Mak 4
4
Yesus wai pelengon ano ke gute ka lila ser wit londo
(Matyu 13.1-9 e Luk 8.4-8)
1Oklou silang Yesus dong ke elim Galili ina dingen batne e osep pula pula time tipolou ke iye. E iye la sep ke bot gesa ka dong olwo boto ke aki ina dingen batne deka dong ine. E osep pula pula tonari tivri ke aki ina dingen batne. 2Deka Yesus parere isak ke pelengon ano pula e wai ke isak langane. 3“Osep umoklingen lou pelengon ane. Gute gesa la ma iye ser wit londo ke ila yage. 4Iye lila ser wit londo pula e londo leklou tiduru timunu ke ekreng. Deka monuk leklou time tingene. 5E wit londo leklou tiduru timunu ke taklak ka isuk boto vala ka napal munu ke opmu tona. Deka londo tinobolbol suong kesua tidong ke taklak ka botom kovok. 6Mase alo ka oklou polou engil wit tonari suong tipolou kakrak kesua gigitno tiduru ke taklak ka botom kovok. 7E wit londo leklou tiduru timunu ke taklak ka galou marak tidong ine. Deka galou marak tirim tipolou omba e tidim londo tonari deka tikaranga tiusu kovok. 8E wit londo leklou tiduru timunu ke taklak ka itau. Deka tinobolbol itau e mase tiusu pula. Wit leklou tiusu otna iseklu e leklou tiusu otna iselme songotno e leklou tiusu otna buno kene.” 9Yesus wai pelengon ano yagos deka iye wai langane. “Talapmu klingen lou pelengon ane.”
10Mase alo ka osep kla kodong deka Yesus gosok ila disaipel songotno orwo e osep leklou ka tididi iye tidong vala. Deka osep tonari tipmi iye ke pelengon ano lana ine. 11Deka iye wai ke isak langane. “Osep pula tile pelengon ano lana ine kovok. E ma ngakere pelengon tonari ka kukwop ka la ke alo ka Ida Tapolngon plau osep lana ine ke umu. Ma umeile omur ine itau.”
12“Elio ka ngawai ke osep ke pelengon ano didi pelengon ka oglou gute napaprangan ina gesa sogo ine langane. ‘Ma osep tivati wan itau e ma tile lana ine kovok. Ma tiklingen pelengon itau e ma tile lana ine kovok. Tidong tidue elio ka langane lama tile omur ine deka tibauluk aitno lisak ke urok elio epmes ina e Ida Tapolngon sak urok elio epmes ina la.’”
Yesus kere pelengon ano tonari
(Matyu 13.18-23 e Luk 8.11-15)
13Yesus ile osep tonari tile ke ila pelengon ano tonari lana ine kovok. Deka iye pmi isak langane. “Umeile omur ke pelengon ano lana ine koke aurou? Langka umeile pelengon ano ane lana ine kovok ma umousine ke pelengon ano ka mase ngawai ke umu ine? 14Ma ngakere pelengon ano ke gute ka lila ser wit londo lana ine ma umeile omur ine. Gute ka lila ser wit londo iye eriar langka gute ka napapra Ida Tapolngon ila pelengon ke osep. 15Osep leklou tidong langka wit londo ka tiduru timunu ke ekreng. Osep ka langane tiklingen pelengon tonari e lokono Satan paiavu aitno lisak deka tile lana ine kovok. 16Osep leklou tidong langka wit londo ka tiduru timunu ke taklak ka isuk boto vala ka napal munu ke opmu tona. Osep ka langane tiklingen Ida Tapolngon ila pelengon deka aitno lisak neser ine e aitno lisak kis dagar ine. 17Aitno lisak neser ine e aitno lisak la dagar lokono ine kovok. Aitno lisak la dagar ine isuk boto vala langka wit ka gigitno isuk boto vala. E alo ka osep tidue agegeng ke isak koke tisokluk ine batne ke pelengon tonari deka lokono tisongone. Tidue elio langane kesua batne aitno lisak la dagar isuk boto vala. 18Osep leklou tidong langka wit londo ka tiduru timunu ke taklak ka galou marak tidong ine. Osep ka langane tiklingen Ida Tapolngon ila pelengon vala. 19E mase aitno lisak kro ke elio bitna bitna ka taklak ina e aitno lisak mter ke mani. E tiwaiki tidue wan isuk isuk ma urok wan pula pula. Deka pelengon tonari karanga lua isak ke urok elio isuk isuk kovok. 20E osep leklou tidong langka taklak itau ka wit londo leklou tiduru timunu ine. Kesua tiklingen Ida Tapolngon ila pelengon deka aitno lisak kis dagar ine e aitno lisak la dagar ine. E eriar langka wit londo ka tidong ke taklak itau tiusu pula ma osep tonari tidue elio isuk isuk itau e pula ka tididi pelengon tonari. Bitna langka wit londo leklou tiusu otna iseklu e leklou tiusu otna iselme songotno e leklou tiusu otna buno kene osep tonari urok elio isuk isuk ka itau polou pula langane blang.”
Yesus wai pelengon ano ke lam
(Luk 8.16-18)
21Deka Yesus wai pelengon ano silang blang langane. “Langka gute gesa bik lam ke ila ninu ma iye kadinge ke kerka gesa koke due dong ke ila kova bisna? Aurou. Ma iye due elio langane kovok. Ma iye due lam mana egim ke ila ninu vala. 22Elio keniye ka osep tikukwope e elio keniye ka osep tibisi ine mase ma Ida Tapolngon due isak tipolou malak ke osep amtarsak. 23Talapmu klingen lou pelengon ane itau.”
24Deka iye wai ke isak blang langane. “Aitno lumu mter pula ke lou pelengon ka umoklingen ine ma umeile omur ke lana ine. Langka umawai ke osep ke Ida Tapolngon ila pelengon ka umoklingen ine ma iye lua umu ke ila pelengon leklou blang. E langka umawai ke osep ine kovok ma Ida Tapolngon lua umu ke ila pelengon leklou blang kovok. 25Langka gute gesa aitno kis dagar ke Ida Tapolngon ila pelengon ka iye ile lana ine ma Ida Tapolngon lua iye blang ma iye ile ke ila pelengon leklou blang. E langka gute gesa ile ke Ida Tapolngon ila pelengon lana ine e aitno kis dagar ine kovok ma Ida Tapolngon lua iye ke ila pelengon leklou blang kovok.”
Pelengon ano ke wan ka osep tiusake
26Deka Yesus wai pelengon ano silang blang ke isak langane. “Elio ka Ida Tapolngon vri mgo ke osep iye eriar langka gute gesa ka ser wan londo tiduru timunu ke taklak. 27Iye ser londo tonari deka iye dong para ke alo ka tinobolbol. Langka epmes gute tonari munu kudung deka langka oklou blang iye tipa e lila. Iye due elio langane e londo tonari isak kensak kensak tinobolbol. Tinobolbol mgo deka mase tirim tipolou alang. E gute tonari ile omur ke elio ka londo tonari tinobolbol e tirim tipolou alang kovok. Iye vati vala. 28Elio ka dong ke taklak vala due londo tonari tipolou alang. Mgongon londo urok nobolbolngon tipolou. Mase elilo tipolou. Mase otna tipolou deka mase sisiou. 29Alo ka wan tonari otna sisiou kodong deka lokono gute tonari kalke elil deka iye la ma bloue. Iye due langane kesua wan tonari sisiou kodong.”
Pelengon ano ke akai mastet londo
(Matyu 13.31-32 e Luk 13.18-19)
30Deka Yesus wai ke osep langane. “Ma ngawai ke umu ke pelengon ano ka lana ine la ke elio ka Ida Tapolngon vri mgo ke osep. 31Elio ka Ida Tapolngon vri mgo ke osep iye eriar langka akai mastet londo ka daudeng lokono. Wan bitna bitna londo daudeng langka akai mastet londo kovok. 32Langka gute gesa usak akai mastet londo gesa ka aren aren ma iye nobolbol e rim la lama polou omba lokono e mole wan ka pula keniye ka osep tiusake ke urok yage. E tetna omba e monuk pula tiuri urok onuk ke tetna ma oklou bublo ke isak kovok.”
33Yesus wai ke osep tonari ke pelengon ano pula ka lana ine la ke Ida Tapolngon ila pelengon. Iye wai ke isak ke pelengon langane ka tikaranga tile lana ine vala. 34Alo ari iye wai pelengon ano vala ke osep e wai ke isak ke pelengon malak kovok. E alo ka iye dong kap ila disaipel vala deka iye kere pelengon ano lana ine ma tile omur ine.
Yesus wai ma engen yagos deka yagos
(Matyu 8.23-27 e Luk 8.22-25)
35Kirui me deka Yesus wai ke ila disaipel langane. “Itala ke aki burla ari.” 36Deka ila disaipel tisongon osep e isak kla tisep ke bot ka iye dong ine ma isak kla. Osep leklou blang tisep ke bot leklou blang deka tigosok kla. 37Isak kla deka engen polou. E boitini omba e klou bot galna ma isuk boto paunim isak. 38E Yesus munu kudung ke bot batne e apna munu ke elio gesa. Deka ila disaipel tipane e tiwai ke iye langane. “Ipem parerengen isuk boto ma itounim e itemete. Aitno lugom kro ine kovok?” 39Yesus tipa deka wai ke engen langane. “Engen yagos.” Iye wai langane deka lokono engen yagos e omur malilo. 40Deka iye wai ke ila disaipel langane. “Anmu nesik batne lange? Aitno lumu dau dagar ke ngong kovok?” 41Ila disaipel tiulou tarna lisak omba ke iye deka tiwai pulu langane. “Gute ane iye sei? Kesua iye wai vala deka engen didi ila pelengon.”
Currently Selected:
Mak 4: ANT
Highlight
Share
Copy
Want to have your highlights saved across all your devices? Sign up or sign in
copyright 2003 New Tribes Mission, Sanford, FL 32771
