KONESI 2
2
1Kugbo luŋa lo Pentekositolo laga ayeŋundra, ti ko giri amore i piri nagele. 2Wuleŋa gele le’de ŋo akuu i ’diko yu beti woŋo na lobiyu druga zore i kadi naga ma ko gbi’dikini kata yuna. 3Ŋedepa lo kodya ’beri beti kima kilo druga kpeza ’beri kasikoni i gbi’diki kasiko kini. 4’Bo ko giri druga zore ku Yuka Nakiyena druga poki i kulia ku kutuzi ku’de naga ka’de ka’de be naga ma Yukana tikindri ko kine. 5Ti Yahudi laga lo ’delakindra ’beri i teminizo na Ŋun, lo ŋiyu i zuro ka’de ka’de giri i kani kilo kulu saka Yerusalama yu. 6Ku ilo roro de‚ mongoyo na ŋutulu kilo druga pondra i piri nagele‚ ’bo ko apoki i bayi koru igbonaga ko giri gele gele ayinga karuko kilo i kulia ku kutuzi kaSe kinena. 7Kulia ŋani kine druga zu’yo ko a li’do‚ ko arambu ’beri adi‚ “Kilo ŋutulu lo kulia kilo de ani gbo’da giri a Galili kilo ya? 8’Bo yi gele gele yinga kulia na tayi ku kutu nika lepe adidinyo ya? 9Ŋutulu i Paritia‚ ku ti Media‚ ti Elama, ku lo saka Mesapotamia‚ Yudaya‚ Kapadokia, Ponto‚ ku Asia‚ 10Ferugia, Pamfulia, Ezipeto‚ ku goto ti Lubia laga ti Kurene kilo‚ ku komo lo pondra Roma kilo‚ 11laga a Yahudi, ku laga lo lopugo ’beri kilo‚ Kirete kilo ku Arabi kilo, yi yinga ko i kebu na kulia ti konesi drumala ti Ŋun ku kutu nika ina.” 12Kulia kine druga zu’yo ko a li’do, ’bo ko druga poki i bayi, i pipiza na ’beri adi‚ “Kine kulia de bo ŋanina adinyo ya?” 13’Bo ku’de kilo a’dari ko‚ druga kulia adi ŋo kilo amemeri ku yawa naga a pupu. 14’Bo Petero druga ŋi ki ku lososonyo laga mere gele koyita gele kilo druga trukokindro ko ku roro laga gboŋa adi‚ “Ŋutu ti Yudaya kilo ku ŋutulu lo saka Yerusalemani kilo‚ deneta de kine kulia de‚ ’bo geŋuta suwo i yinga na kulia kuwe kine. 15Kilo ŋutulu de aku memeri, be naga ma ta rambinina, ŋolo inga a sawa musala lo a’igo, 16’bo kine kulia de a kulia na ta kakeyoni Yoeli kazu kine: adi, 17‘I luŋa ti bo kulu igbo’da de, Ŋun lo kulia‚ na iburakindra Yuka niona ku ŋutulu giri kini‚ ŋazi kasu kilo ku ŋazi kasu kine ikezu kulia, ’bula kasu kilo imemedra kulia na kpikpiya, modoŋa kasu kilo irurude rudesi. 18’Bo i kulu luŋa de na iburakindra Yuka niona ku upi kuwe lalia kilo, ku nawate kine kini, ’bo ko ikekezu kuliata. 19Na ikpekpeza wonyesi i ’diko ki yu ku kpiyesi i kuzo kani rima, kima ku kopure druma, 20kolona itoWuSa a mude, ’bo yapalo a rima ti inga luŋa lo Matalo aku yeŋundra‚ lu luŋa druma lo ikpeza mugulo. 21’Bo ŋutulu giri gele gele lo ilungu kari ti Mata kine kilo iririte.’ 22Ŋutu ti Isiraeli kilo‚ yiŋeta kine kulia de. Yesu lo Nazareta, laga ma Ŋun kpekindri ta soso ku konesi naga ku teriŋi‚ ku wonyesi, ku kpiyesi naga ma Ŋun kondri ku lepe kasu dridriŋini be naga ma ta lepe dendrinina, 23Yesu ŋanilo, laga atiki ku mero ti lepe kilo be naga ma Ŋun dendri soso a kayo i lopete lonyelo katani ina, ta a’begu lepe druga tatuza lepe kaŋo ku ŋutulu loro i kenisini. 24’Bo Ŋun atoŋizu lepe druga lakundra lepe i miye na tuwana kata yu, igbonaga lepe aku romoki ’depa ku tuwana. 25’Bo Dawidi atazu kulia ti lepe kine adi, ‘Na abonga Matalo ’duu kuwe koŋoni, igbonaga lepe ilo kuwe keni laga lo lutatelo ka’bi na ku bayi. 26Kuwade nyena nyolani na‚ druga na kulia ku nyola‚ ’bo na lepe isaka mada ku yendru itro. 27’Bo do aka kolokindro yuka niona i piri na ŋutulu laga atatuwa kilona kata yuni, do aka kolokindro Ŋutu Lokiye lokiye lolulo i ’bureni. 28Do atrukokindro na kikoli ti ru kilo; do itozodru na ku nyola konu koŋo yu.’ 29Luŋaseri, na takindra ta gboŋa kulia ti merenye lika laga Dawidi kine, adi lepe atuwa, anuka, ’bo gulo na lepena ina kayani yeŋundra tozo tinade. 30Lepe laga a kakeyoni, lo dendra adi Ŋun akpekindra nye ku milio na nyei adi le’de ŋutu laga a nyumuti lonye igbo’da a mata kanye pirini. 31Lepe amedra a kayo, druga tazu kulia ti ŋiye na Kristo kine, adi lepe aku koloki i piri na ŋutulu laga atatuwa kilona kata yu, ’bo mugu na lepena aku ’bute itro. 32’Bo Ŋun atoŋizu ilo Yesu de, laga yi giri a ka’doto ti bo na kulia ti lepe kinelo. 33Ti lepe atoŋiyuzi i keni lo lutate lo Ŋun ilo yu‚ ti lepe ariondru sare lo Yuka Nakiyena ku Monyelo yu‚ lepe druga tikindra yi ilo ’doke laga ma ta medri‚ ma ta yingi tinade ilo de. 34Dawidi aku kiyadru i ’diko yu‚ ’bo lepe ku mugu akulia adi‚ ‘Matalo akulia ku Mata liolo adi‚ Gbi’dikini i keni lio lo lutate ilo, 35yeŋadru tozo i ’delakindra na na mero kolu kilo a si’de na ’de’i do mukuzi kolu kilo.’ 36Ketimi na Isiraelina giri deneta adi Ŋun a’delakindra ilo Yesu de laga ma ta ’begi i kedini mugu ilo a Mata‚ a Kristo itro.” 37Ku ko laga ayinga de‚ kulia kine druga ’dungo teiliko kasiko kilo‚ druga ko piza Petero ku lososonyo ku’de kilo adi, “Luŋaseri, ma yi kondra inyo ya?” 38Petero druga teyitokindro ko adi‚ “Lopuketa teiliko‚ ’depeta baputizilo ta giri gele gele ku kari ti Yesu Kristo kine‚ i ’diyani na torozi kasu kine‚ ma ta giri ku rumbi ’doke laga a Yuka Nakiyena. 39’Bo sare ilo a lasuŋa‚ ku ŋazi kasu kilo ku ŋutulu giri gele gele lo luŋu Mata Ŋun lika kanyeni kilo.” 40Lepe druga ’dodru bo na kulia ku’de rodri druga ma’yu mugu ku ko adi, “Rituta ’beri i yuŋe na tinade naga a bidrori ina de katani.” 41Ŋutulu lo rugo kulia na ta lepe kine kilo atiki baputizilo‚ ’bo i lu luŋa de‚ ku’de ŋutulu a’dulukindra ’beri i kulu de kata yu beti alifu musala. 42Ko a’delakindra ’beri ku teili giri i yinga na togo’yu na lososonyo kilona‚ ku tomodya na ’beri‚ i gbegbenyeza na mugatina ku magu na Ŋun. 43Nyenaga ŋutulu giri akuze koru‚ ’bo lososonyo kilo akondra wonyesi ku kpiyesi rodri. 44Karuko kilo giri druga saka kugele‚ kapa kasiko kilo giri a’dela a ŋo logele. 45Ko druga togbodyu kapa kase kilo ku toro’bo kase kilo‚ ko druga kodya gbore ŋanilo kasiko giri i dridriŋini, be naga ma telemera nasikona gbo’dinina. 46Ko woro kugele i kadi na Ŋun ina kata yu mu luŋa‚ ko gbegbenyeza mugati kine kugele kase ’beŋito yu‚ ko nyosu nyosuto kine ku teiliko lo’bu ku nyola. 47Ko pudya Ŋun ti ko saka a lo’bu ku ŋutulu kilo giri. ’Bo Matalo druga 'yalakindra ko mu luŋa ŋutulu laga lo ririte kilo.
Currently Selected:
KONESI 2: KNT77
Highlight
Share
Copy
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
