YOANE 10
10
1“Na takindra ta a ’diri‚ ŋutu laga ani lubo i kaakutu na mari na kebilizi kinena‚ ’bo laga lo kiyadru ku kiko lo kaŋolo‚ lepe a kolani‚ a kariakani itro. 2’Bo ŋutu lo lubo i kaakutuni ilo lepe a kayukuni lo kebilizilo. 3Katiyunilo bita ŋaŋakindra lepe kaakutuna. Kebilizi kine ko bita yiyinga roro lo lepelo. Lepe bita lungu kebilizi kanye kine ku kari‚ ’bo lepe bita ’doladru kuweto kasiko kine kaŋo yu. 4Kugbo lepe laga atolupundro kebilizi kanye kine giri‚ lepe druga tu kasiko ŋero yu‚ kebilizi kine druga kekepodru bo na lepena‚ igbonaga ko adeni roro lo lepelona. 5Ko ani kepodru bo na monyatiolo tro‚ ’bo ko iwowoke ku lepe igbonaga ko aku deni roroto ti monyazi kilona.” 6Kugbo Yesu laga atakindra ko kine kulia na guguma de‚ ko aku yo kulia naga ma lepe takindri se kine tro. 7Yesu druga takindra ko ’do adi‚ “Na takindra ta a ’diri‚ na laga a kaakutu na kebilizina. 8Ŋutulu giri lo tu kuwe koŋo yu kulu ko a kola‚ a kariaka itro‚ ’bo kebilizi kine aku yinga koŋa. 9Na laga a kaakutuna. Kugbo le’de ŋutu lo lubo kuweni‚ lepe iririte, lepe ilulubo‚ ilulupodru, irurumbi droruta. 10Kolanilo pondra i koko’ya ku i rembu‚ ku i tukarakindra ka’delo. Na pondra adi ma ko gbo’da ku ru‚ ru naga mŋgbana. 11Na laga a kayukuni lo kebilizi laga a lo’bulo. Kayukuni lo’bulo kolokindro ru nanyena ku kebilizi kine. 12Ŋutu lo yugu ku ropelo ani gbo’da a kayukuni tro‚ ani gbo’da a monye lo kebilizi ŋani kine tro. Kugbo lepe laga amedra rarawutalo ipondrani, lepe druga kolokindro kebilizi kine druga wowoke. Rarawutalo druga momoga kebilizi ŋani kine‚ druga teteriri ko. 13Lepe wo igbonaga lepe a ŋutu laga lo yugu ku rope ka’delona, ’bo puso na kebilizi ŋani kine ’bani ku lepeni ina. 14Na a kayukuni laga a lo’bulo. Na adeni kebilizi kuwe kine‚ ’bo ko adeni na itro. 15Be naga ma Monyelo dendri nana‚ na ’do adeni Monyelo, ’bo na kolokindro ru niona ku kebilizi kine. 16Na gbo ku kebilizi ku’de itro‚ naga ani gbo’da i ina moniza na kebilizi de katani kine. Ti na mewu ko itro‚ ko iyiyinga roro liolo‚ ko igbogbo’da a moniza na kebilizi gele‚ ma gbo’da ku kayukuni gele. 17Kuwade Monyelo anyari na igbonaga na lo kolokindro ru nio‚ na i’dumu na ’dona. 18Le’de ŋutu ’bayi lo ninadru lepe kuweni‚ ’bo na lepe lo kolokindro lepe‚ ’bo na gbo ku teriŋi i ’dumundra na lepe ’do. Ina kukuzu de na riozu ku Monye liolo yu.” 19Rerenya druga lupundro ku Yahudi kilo i dridriŋini ’do ku kulia ti kine kuliata de. 20Ŋutulu rodri laga kasiko i dridriŋini kilo adi‚ “Lepe gbo ku dreri loro‚ lepe lo mamali. Ta yinga lepe gbandra ya?” 21Ku’de kilo druga kulia adi‚ “Kine kuliata de ani gbo’da a kuliata ti ŋutu laga ku dreri loro tro. Dreri lorolo roromoki ŋazu konye ti ŋutu laga a mudumudu ya?” 22I lu luŋa de kolo druma na tikini Ŋun kadi ina nu Yerusalema yu. 23Ti nu baŋe de a baŋe na katiro‚ ’bo ti Yesu lu woro i kadi na Ŋun ina kata yu i bu na luŋu a bu na Solomona ina kata yu. 24Kuwade Yahudi kilo druga tunundra ’beri ku lepeni‚ druga piza lepe adi‚ “Do itikindra teiliko kaya kilo ma bayizi su da ya? Ku do laga a Kristolo, trukoki yi gboŋa.” 25Yesu druga teyitokindro ko adi‚ “Na atrukokindro ta azo‚ ’bo ta aku rugo. Konesi naga ma na kondri ku kari ti Monye liolo kine se na ’dodru bo nio na kuliana. 26’Bo ta aku rugo igbonaga ta ani gbo’da a kebilizi kuwe ina‚ beti naga ma na takindri tana. 27Kebilizi kuwe kine ko bita yiyinga roro liolo‚ na adeni ko‚ ’bo ko bita kekepodru na. 28Na tikindra ko ru naga ani lengana. Ko aka karakini, le’de ŋutu aka ninadru ko kuwe keninini. 29Monye lio laga lo tikindra ko kuwenilo arodru giri‚ le’de ŋutu ’bayi lo romoki ninadru ko ku Monyelo i kenini. 30Yi seku Monyelo a ŋo logele.” 31Yahudi kilo druga ’dumundra ŋoropo ’do i bibiringo na Yesu. 32’Bo lepe druga teyitokindro ko adi‚ “Na akpeza konesi na’bu rodri naga na ŋiyu ku Monye liolo kine. I kine konesi de i dridriŋini ta bibiringo na ku naga ya ya?” 33Yahudi kilo druga teyitokindro lepe adi, “Yi ani bibiringo do ku kulia ti kone lo’bulo kine, ’bo ku kulia ti momorozu kine‚ ku naga do laga a ŋutu‚ lo ’delakindra mugu a Ŋun ilona.” 34Yesu druga teyitokindro ko adi‚ “Aku wuro i kukuzu nasuna katani adi‚ ‘Na akulia adi ta a muloko’ ya? 35Kine kulia na wuwuro kine de ani romoki wusa. Kuwade kugbo lepe laga alungu ko a muloko‚ ko laga ma kulia ti Ŋun kine pondri kasikoni kilo‚ 36ta lo takindra ŋutu laga ma Monyelo gelundri a lokiye ma sunyundri kanilo adi‚ ‘Do lo momorozu momorozu,’ igbonaga na kulia adi na a Ŋiro lo Ŋun ilona ya? 37Kugbo na laga ani kondra konesi ti Monye liolo kine, ku ruruta na. 38’Bo kugbo na laga kondra ko, ’dia kodro ku ta ani rugo na lepe de kpe, rugita konesi kine, ma ta dendri ku yo’yu adi Monyelo gbo kuwe katani, ’bo na gbo ku Monyelo katani ’do.” 39Kuwade ko druga ga’yu moga na Yesu ’do, ’bo lepe a’dotodru mugu kasiko i kenisini. 40Yesu druga utu ’do Yorodani yu i lu lozo, i piri naga ma Yoane tikindri baputizi a kayo nu, lepe druga saka yu de. 41Ŋutulu rodri druga pondra ku lepeni. ’Bo ko akulia adi, “Yoane aku kondra kpiye, ’bo kulia giri naga ma Yoane tazini ku kulia ti ilo ŋutu de kine a ’diri.” 42Ŋutulu rodri druga rugo lepe yu de.
Currently Selected:
YOANE 10: KNT77
Highlight
Share
Copy
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
