LUKA 18

1Yesu druga takindra ko kulia na guguma adi ma ko magu mu luŋa, ka’bi ko ku kakanya, 2adi, “Kazu i kezi ne’de kata yu kaŋerani lo kulia le’de lu yu de laga aku kuga Ŋun, aku yiki le’de ŋutu itro. 3Ti derengi awuzi ne’de nu i nu kezi de kata yu, nu woro ku lepe yu mu luŋa adi, ‘Ŋere kulia kaya kine seku miriku liolo.’ 4I luŋa ku’de kilo kaŋerani lo kulialo a’biye, i bo ŋanina lepe druga rambu adi, ’Dibani kodro ku na laga ani kuga Ŋun, ku na laga ani yiki kulia ti le’de ŋutu itro de kpe, 5’bo igbonaga ina awuzi de ina sasandru nana, ti na ŋeraki lepe kulia kanye kine, ka’bi na ku kanya koru ku pondra na lepe naga ’duuna.’ ” 6Matalo druga kulia adi, “Yiŋeta kulia na ta kaŋerani lorolo kine. 7Ŋun aka ŋedya kulia ti ŋutulu kanye laga anyumo lo gbiye kanye yu tukaze ku tupara kilo sosoni ya? Lepe ipipiri pipiri mugu ku ko ku baŋe a nazo ya? 8Na takindra ta, lepe iŋeŋeri kulia kasiko kine wuleŋa, ’Bo kpe, ku Ŋiro lo ŋutulo lo pondra, irurumbi rugo i kani ya?” 9Yesu druga takindra ko kulia na guguma ti ŋutulu ku’de laga lo rambu adi se laga a lo’bu, ti ko ’da’dari ku’de kilo ŋutulu, adi, 10“Ku’de ŋutulu mure kazu autu i kadi na Ŋun ina yu i magu na Ŋun, le’delo a Farisayota, le’delo a kawuroni lo mosorolo. 11Farisayotalo druga lira ki, druga poki i ma'yu na mugu deŋa adi, ‘Ŋun na tikindra do iyete‚ igbonaga na ani gbo’da beti ku’de kilo ŋutulu, laga a kariaka, laga a loro, a ti towute, kuwagi beti ilo kawuroni lo mosoro delo. 12Na kuka luŋa mure i sabiti gele katani, na tikindra dridriŋi gele i mere gele katani ti kapazi kuwe lo rio na kilo giri.’ 13’Bo kawuroni lo mosorolo alira pazo yu de, lepe nanye aku ’bi’yu konye kanye kilo i boŋadru ki i ’diko yu, lepe nanye druga zoga gedyo nanyena kuliani adi, ‘Ŋun, gbo’di ku ediyo ku na laga a katoronyani ilo!’ 14Na takindra ta, ilo ŋutu de autu kanye ’ba yu ti akena mŋgba ku Ŋun i konyeni alangu ŋutu laga lu de. ’Bo ŋutulu giri gele gele lo ŋizu ’beri kilo, kilo itetemize ka, ’bo ŋutulu giri lo temizundro ’beri ka kilo‚ kilo iŋiŋiyuzi ki.” 15Druga ko zondra ’u’uŋweta ku’de ku Yesuni adi ma lepe ku ’bo’yu ko‚ ’bo kugbo lotodiniki ti lepe kilo laga abonga ko‚ ko druga poki i ringa na karaŋa. 16Yesu druga lungu ko kanyeni‚ druga kulia adi‚ “Koluta ŋazi lo’di’diki kilo ti pondri kuweni, ’bo ku gogota ko, igbonaga tumata na Ŋun ina a na ŋutu laga be kilo de kilona. 17Na takindra ta a ’diri‚ ŋutu laga aku rugo tumata na Ŋun ina beti ŋiroŋalo‚ aka lubo kata yuni.” 18Druma le’de druga piza Yesu adi, “Katogoloni lo’bulo, ma na kondra inyo naga ma na rumbi ru naga ani lengana ya?” 19Yesu druga piza lepe adi, “Do lungu na a ŋutu lo’bu gbandra ya? Ŋutu lo’bu ’bayi, ŋolo a Ŋun ka’delo. 20Do adeni kukuzuki kine, adi: ‘Ku kokonu towute, Ku reremi ŋutu, Ku koko’ya koko’ya‚ Ku leleŋi ’bure‚ Sope so ku munyi seku ŋuti.’ ” 21Drumalo druga kulia adi‚ “Kine kulia de giri na akonu ko ŋiyu kuwe toŋiro yu.” 22Ku Yesu laga ayinga de, lepe druga teyitokindro lepe adi, “Do inga aku kondra le’de ŋo gele. Togbore kapazi kolu kilo giri, koraki lemerika kilo, ’bo do irurumbi tokorine i ’diko yu, ’bo pondri kuru, ku keporo bo niona.” 23Ku lepe laga ayinga kine kulia de, lepe druga gbo ku drelia, igbonaga lepe a korine koruna. 24Yesu druga ku medri lepe druga kulia adi, “Ku korineko kilonina lubo naga i tumata na Ŋun ina kata yuna a nago a ’diri! 25’Bo lubo na kamelo naga i drili na sindani katani ina pa’de’de alangu lubo na korine naga i tumata na Ŋun ina kata yuna.” 26Ŋutulu lo yinga lepe kilo druga piza adi‚ “Kuwade ŋa lo romoki i rite ya?” 27Yesu druga teyitokindro ko adi‚ “Ŋo laga ku ŋutu kiloni ku teriŋi ilo ku Ŋun ini ’ba teriŋi.” 28Petero druga kulia adi‚ “Mete, yi akolokindro ’beŋi kaya kilo, yi kilo kepodru do.” 29Yesu druga takindra ko adi, “Na takindra ta a ’diri‚ le’de ŋutu ’bayi laga akolokindro kadi nanye, kuwa noka, kuwa luŋaseri, kuwa kayuŋo, kuwa ŋazi, ku kulia ti tumata na Ŋun kine. 30laga aka riondru rope lonye i ina baŋe de luŋa rodri‚ ’bo i baŋe naga na popondra nu ru naga ani lenganani.” 31Yesu druga zonga ŋutulu laga mere gele konye mure kilo i merete‚ druga takindra ko adi‚ “Meteta‚ yi kilo tu Yerusalema yu, ’bo kulia giri na wuru kakeyo kilo ku kulia ti Ŋiro lo ŋutulo kine itotorumoki. 32’Bo lepe ititiki ku Monyazi kiloni, lepe i’da’data, irumbi yukuwe, iyakani kamula kini. 33Ko ikpikpinyi lepe, ireremi lepe, ’bo i luŋa lo musala lu lepe iŋiŋiye.” 34’Bo ko aku yo kine kulia de gele tro, ’bo kine kulia de a’dandru ’beri ku ko, ko aku rami uye. 35Kuwade ku Yesu laga ayeŋundra gbo’di Yerikoni nyoga‚ derengi ŋutu laga ku konye a mudumudulo ti lu agbi’diki i kiko kutu yu i magu na kapazi. 36Ku lepe laga ayinga mongoyo na ŋutu kilona ituni, lepe druga piza adi kine kulia de a inyo. 37Druga trukoki lepe adi, “Ŋolo a Yesu lo Nazaretalo nyelo rosodru.” 38Lepe druga laiza ku teriŋi adi, “Yesu, Ŋiro lo Dawidilo, gbo’di ku ediyo ku na!” 39Ko laga ku lepe i koŋo yu kilo druga ringa lepe, adi ti lepe yiŋani tali, ’bo lepe druga laiza ku teriŋi ’do, adi “Ŋiro lo Dawidilo, gbo’di ku ediyo ku na po!” 40Yesu druga lilira, druga takindra ko kukuzu adi ti ŋutu ŋanilo zuweni kanyeni. Ku lepe laga apondra nyogani, Yesu druga piza lepe adi, 41“Do nyadru ku na konaki do inyo ya?” Ŋutulo druga teyitokindro lepe adi‚ “Mata‚ ti na mete kana po!” 42Yesu druga takindra lepe adi‚ “Medri kuru‚ Rugo nonuna atoruzo do.” 43Wuleŋa gele lepe druga medra kana‚ druga kepodru bo na Yesuna ku pudya na Ŋun. Ŋutulu kilo giri kuwa amedra de‚ ko druga teminizo Ŋun.

Currently Selected:

LUKA 18: KNT77

Highlight

Copy