MATAYO 14

1I lu luŋa de mata laga Herode ayinga kulia ti Yesu na kuworo kine. 2Lepe druga takindra lopuno kanye kilo adi‚ “Ilo de a Yoane lo tikindra baputizilo‚ lepe aŋiyu i dridriŋi na ŋutulu laga atatuwa kilo‚ kuwade kine teriŋito de se na kondra ’beri ku lepeni.” 3’Bo ti kazu Herode amoga Yoane, atodya lepe, druga todya lepe i kadi naga a drodrore nu kata yu, ku kulia ti Herodia, noka na luŋase lonye laga Filipo ina. 4Ti kazu Yoane atakindra lepe adi, “Kukuzuna aku rugo ’deba nonu na lepe a noka nonu.” 5’Dia kodro ku lepe anyadru rembu na lepe kpe‚ lepe akuze mongoyo na ŋutuluna‚ igbonaga kasiko i konyeni Yoane a kakeyonina. 6’Bo kugbo luŋa lo soponi yuŋe na Herode laga ayeŋundra, ŋiro na Herodia agboza ku ŋutulu i koŋo yu‚ druga tikindra Herode nyola. 7Kuwade lepe anyokindro lepe milio i tikindra na lepe kapatio laga ma lepe magilo kugbo anyo kpe. 8Igbonaga ŋote na lepena azuzuza lepe ’berona, lepe druga kulia adi, “Tiki na kuwe lo Yoane lo tikindra baputizilo i senia ki.” 9Matalo druga gbo ku drelia koru, ’bo ku kulia ti milio nanyena, ku ti komo kanye kilo, lepe atakindra kukuzu adi ti tikini. 10Lepe druga sonyodru ŋutulu kilo i ’duŋundro na kuwe lo Yoanelo i kadi naga a drodrorena kata yu. 11Ko druga zondra kuwe lo lepelo i senia ki druga tikindra ’diyena, lepe druga zondra ku ŋoteni. 12Lotodiniki ti Yoane kilo druga utu i ’dokodru na opulo, druga nuga lepe, druga tu ku trukokindro Yesu. 13Kugbo Yesu laga ayinga kulia ti Yoane kine, lepe druga ŋiyoro yu de ku ki’bona, druga utu i diŋo yu, lepe ka’delo. ’Bo kugbo mongoyo ti ŋutulu kilo laga ayinga kulia ŋani kine‚ ko druga kekepodru lepe ku mukuzi‚ ŋiyu i kezino ka’de ka’de. 14Ku lepe ilupodru i ki’bo katani‚ lepe druga medra mongoyo na ŋutulu rodri. Lepe druga gbo ku ediyo ku ko‚ druga toruzo ŋutulu kasiko laga ku yeyengaki kilo. 15Ku gbo’dini kotriana‚ lotodiniki ti lepe kilo apondra ku lepeni‚ akulia adi‚ “Na piri de a diŋo. Kolona gbo’di a’doro‚ sonyoro mongoyo kilo ma ko ku itu i beŋito i gborokindro na ’beri nyosuto.” 16Yesu druga teyitokindro ko adi‚ “Ani nyadru ti ko utini. Tikita ko nyosuna ta lepe.” 17Ko druga teyitokindro lepe adi‚ “Yi gbo ku ’diloto mukana ku somo mure ’du.” 18Lepe druga kulia adi‚ “Zowuta karaŋa kuweni.” 19Lepe druga takindra mongoyo kilo kukuzu adi ti ko gbi’dikini ka i droru kini. Lepe druga ’deba ’diloto naga mukana kine ku somo laga mure kilo‚ druga boŋadru ki i ’diko yu‚ druga ’boriza ko‚ druga ŋoŋowuzu ko‚ druga tikindra ’diloto kine ku lotodiniki kilo i kenisini, lotodiniki kilo druga tikindra mongoyo kilo. 20Ko giri druga nyosu‚ druga yiyimotu yiyimotu. Ko druga pependra limbitio ti ’diloto na ŋoŋoyi kine nyakaleta mere gele konye mure zore zore. 21Ko laga lo nyosu kilo gbo beti lalia alifu mukana‚ ’bo wate ku ŋazi aku kena. 22Yesu druga sonyodru lotodiniki kilo i lubo i ki’bo kata yu‚ i laŋadru lozo yu kanye koŋo yu inga ti lepe ilo teririza mongoyo kilo boni. 23Kugbo lepe laga ateririza ko boni‚ lepe druga kiyadru ka’delo i mere ki yu i magu na Ŋun. Ku gbo’dini kotriana lepe druga gbo ka’delo yu de‚ 24rumbi derengi ki’bona ma nu suburi kide yu‚ ti pio kine kine igbongu na ’beri ku lepe i muguni‚ igbonaga kobuŋena nu kasiko i koŋo yu ina. 25Ku gbo’dini i wara na kani lepe ayeŋundra kasikoni, i woro suburi kini. 26’Bo kugbo lotodiniki kilo laga abonga lepe ilo i woro suburi kini‚ ko druga zazangu, akulia adi‚ “Lo ŋo de a mulete!” Ko druga resa ku kuze. 27’Bo wuleŋa gele lepe atakindra ko adi‚ “Gbo’dita ku teiliko logo, ŋolo a na. Ku kukuzeta.” 28Petero druga teyitokindro lepe adi‚ “Mata‚ kugbo ŋolo a do, taki na ti na uti konu yu i pio kini.” 29Lepe druga kulia adi, “Pondri.” Nyena kiyundri Petero i ki’bo kata yu, woroni i pio kini, tuni ku Yesu yu. 30’Bo kugbo lepe laga abonga kobuŋena, lepe druga kuze, druga poki i ’diroro ka, aresa adi, “Mata, ’bo na.” 31Wuleŋa gele Yesu druga sodru keni lonyelo, druga ’depundra lepe, akulia ku lepe adi, “Do laga ku rugo a natrilo, do lolopugo mugu de gbandra ya?” 32Kugbo ko laga alubo i ki’bo kata yu, kobuŋena druga gbigbi’diki. 33Ŋutulu laga i ki’bo kata yu kilo druga teminizo lepe adi‚ “A ’diri, do a Ŋiro lo Ŋun.” 34Ku ko laga alangu i lu lozo‚ ko druga yeŋadru i ka na Genesareta ina kata yu. 35Kugbo ŋutulu laga i nu ka de kilo laga atritrimi lepe‚ ko druga sonyodru ŋutulu i ka naga nyoga yuna‚ i zondra ku lepeni ŋutulu giri laga ku tuwanezi kilo. 36Ko druga ma’yu ’beri ku lepe adi ti ko ’bole kutu na bongo na lepena ka’delo. Ŋutulu giri laga lo ’bo’yu kilo‚ ’beri kasiko kine ako’yu.

Currently Selected:

MATAYO 14: KNT77

Highlight

Copy