MATAYO 24
24
1Ku Yesu laga alupodru i kadi na Ŋun ina katani kaŋo‚ ku lepe iutuni‚ lotodiniki ti lepe kilo druga pondra ku lepeni i kpekindra na lepe kadizi ti kadi na Ŋun kine. 2’Bo lepe druga teyitokindro ko adi‚ “Ta ameri kilo kapazi de ya? Na takindra ta a ’diri‚ ŋurupi gele aka koloki i le’de kini tro‚ ko giri itrutruro ka.” 3Ma lepe gbi’dikini i mere laga Oliva ki yuna‚ lotodiniki kilo apondra ku lepeni ka’delo, druga piza adi‚ “Trukoki yi‚ kine kulia de ikondra ’beri nanu ya? Kpiye laga a inyo lo ikpeza adi luŋa lo pondri do ku ’dute na baŋena ayeŋundra ya?” 4Yesu druga teyitokindro ko adi‚ “Gbo’dita go ka’bi le’de ŋutu ku ’do’dolara kuweto kasu kine a bada. 5Ŋutulu rodri ipondra ku kari kuwe kine‚ lo ikulia adi‚ ‘Na a Kristo’ kilo‚ ’bo ko i’do’dolara kuweto ti ŋutulu rodri kine a bada. 6Ta iyiyinga kulia ti moro ku ti nyaŋiliza na ’beri. Gbo’dita go ku konye‚ teiliko kasu kilo ka’bi ku ’do’do ’do’do. Kine kuliata de kine ipupuru‚ ’bo luŋa lo ’dutekini kanalo inga aku yeŋundra. 7Zuro kilo iŋiŋiye ku zuro ku’de kilo‚ tumatana ku tumata ne’de. Magona ku dodonga na kana igbo’da i pirito ka’de ka’de. 8Kine kulia de a suluwe na dreliesina. 9“Ko ititikindra ta i sasanya, ko ireremi ta. Zuro kilo giri iŋmoŋmoza ta ku kulia ti kari kuwe kine. 10Ŋutulu rodri ibabayi, inyonyosu mundrara kase dridriŋini, iŋmoŋmoza ’beri kase dridriŋini. 11Kakeyo rodri laga a ’bureniko kilo iŋiŋiye i ’bo’boliza na ŋutulu rodri. 12Nyadru na ŋutulu rodrina ililikaki igbonaga kulia naro kine izozorena. 13’Bo ŋutu laga ku teili lo rile yeŋadru tozo i ’dute yu ilo‚ nyelo irite. 14Ina kuu na’bu na tumatana de itrutrukozi i kezino giri a kpiye lo kulia ku zuro kilo i koŋo yu. ’Dute na kana bulo ku yeŋundra a bo. 15“Kuwade ku ta laga amedra ŋo laga lo ŋmwa a loro lo tukarakindra kapazi giri laga ma kakeyoni Danieli tazini kulia ti lepe kinelo‚ ku ta medra ŋo ŋanilo ti alira i piri naruruwana kata yu (ti kakenanilo dene kulia), 16ŋutulu laga Yudaya katani kilo ti woki i meria ki yu. 17Ŋutu lo gbo’da i kadi ki ilo ka’bi ku kikiyundra ka i ’dumundra na kapa laga kanye kadini kilo. 18Ŋutu lo gbo’da melesi yulo ka’bi ku yiyite bo i ’dumundra na bongo nanye na kaŋona. 19Dreliana ina ku wate naga ku pelela kine‚ kuwa ku wate naga na tunagu ŋazi kine i kulu luŋa de. 20Mamaleta Ŋun adi woke nasuna ka’bi ku gbo’da i luŋa lo katiro kuwa i sabato. 21Kuwade i lu luŋa de sasanya druma iyeyeŋundra, sasanya ne’de naga be ina dena ’bayi ŋiyu i ’delaki na kana nu yeŋundra tozo tinade ’bo ne’de aka yeŋundra de ’doni. 22Kedri kodro kugbo luŋazi ŋani kulu de aku ŋera ’baziŋa tro‚ le’de ŋutu ’bayi lo ririte. ’Bo ku kulia ti ŋutulu laga anyume kilo‚ luŋazi ŋani kulu de iŋeŋera ’baziŋa. 23I ni luŋa de ku le’de ŋutu kulia ku ta adi‚ ‘Meteta‚ Kristo ma lo!’ kuwa ‘Lepe ma lu!’ ku ruruta. 24’Bo Kristo laga a ’bureniko kilo ku kakeyo ti to’bure kilo iŋiŋiye i kpeza na kpiyesi kine ku wonyesi kilo i ’bo’boliza na ŋutulu laga anyume kilo kuwa roromoki. 25Boŋeta, na atakindra ta a nze. 26Kuwade kugbo ko takindra ta adi‚ ‘Meteta‚ lepe ma lu i diŋo yu!’ ku lulupodruta. Kugbo ko kulia adi‚ ‘Boŋeta‚ lepe lu i kadi naga a na kata nu kata yu‚’ ku ruruta ko. 27’Bo beti mo’yu na piya na ŋiyu i lupundro na kolona nu i molodru yeŋadru tozo i ’doro na kolo ina yuna‚ pondra na Ŋiro lo ŋutulo igbo’da de. 28I piri na ’burala nu‚ logunusi kilo itundra ’beri kugele yu de. 29“Wuleŋa gele i bo na sasanya naga i kulu luŋa dena‚ kolona isosomuko, yapalo aka kpekpezani, kasiri kilo i’do’do ’do’do i ’diko yu ka‚ teriŋito ti ’diko kine idodoŋa dodoŋa. 30I bo ŋanina kpiye lo Ŋiro lo ŋutulo ikpekpeza mugu i ’diko yu‚ zuro kilo giri ti ka kilo igbigbiye‚ ko imedra Ŋiro lo ŋutulo i pondra i ’dikolo ti ’diko kine ki yu ku teriŋi‚ ku mo’yu koru. 31Lepe isonyodru malaika kanye kilo ku kuta na gukia naga koruna i goto ti ka kilo giri kata yu‚ ’bo ko itundra ŋutulu laga anyume a ti lepe kilo‚ ŋiyu i ’dute na kana yeŋadru tozo i ’dute na kana yu. 32“Deneta togole lo koligilo. Keniya kine kuwa agara‚ koropo kine kuwa awila, ta roromoki dendra adi za’belo gbo’di nyoga. 33Kuwade kugbo ta laga amedra kine kulia de i kondra na ’berini, ta roromoki dendra adi lepe gbo’di ilo nyogoŋa, i ketimi kutuni. 34Na takindra ta a ’diri, yuŋe na tinadena aka lengani ti inga kine kuliata de giri aku kondra ’beri. 35’Dikona ku kana ilelenga, ’bo kulia kuwe kine aka lengani. 36“ ’Bo luŋa ŋani lu ku baŋe ŋani nu‚ le’de ŋutu gele aku deni, ŋona malaika ti ’diko kilo‚ ŋona Ŋirolo‚ gele’du Monyelo laga adeni. 37Be naga ma gbo’dini i baŋe na Noa kazu nu‚ pondra na Ŋiro lo ŋutulona igbo’da de. 38Be naga i nu baŋe de ti inga lorozi kilo aku zore‚ ko kazu nyonyosu‚ ko momozu‚ ko lundra ’beri‚ ko tiyi i ’depa yeŋadru tozo i luŋa lo lubi Noa i ki’bo kata yu lu‚ 39ko aku deni ti inga lorozi kilo aku zore i tukarakindra na ko giri kaŋo ina‚ pondra na Ŋiro lo ŋutulona igbo’da de. 40I lu luŋa de ŋutulu mure igbo’da i melesi yu. Gelelo i’du’dumazi, ’bo le’delo ikokoloki. 41Wate mure igbo’da izizo i mere ki. Gelena i’du’dumazi‚ ’bo ne’dena ikokoloki. 42Kuwade gbo’dita ku konye‚ igbonaga ta aku deni luŋa lo pondrini Mata lasulo ina. 43’Bo deneta kine kulia de‚ kugbo monye kadilo adeni baŋe na mude na yeŋundri kolanilona‚ kedri kodro lepe igbo’da ku konye gboŋa‚ aka tikindra kolanilo i lubo kanye kadi yuni. 44Kuwade tineta ti ’beri itro‚ igbonaga Ŋiro lo ŋutulo ipondra i baŋe naga ta aku yona katani ina. 45“Ŋa laga a upiye laga ku teili lo to’diri, laga ku tobodo, laga mata lo lepelo akolokindro ŋutulu kanye laga i ’bani kilo ku lepeni‚ ma lepe tikindra ko nyosu nasiko i luŋa laga soso? 46Koŋo na’buna ina i upiye laga ma mata lo lepelo ku ’bunyekindri ti ilo kondra delo. 47Na takindra ta a ’diri‚ lepe i’delakindra lepe a katiyuni lo kapazi kanye kilo giri. 48’Bo kugbo lu upiye loro de lo kulia kanye teili yu adi‚ ‘Mata liolo a’dutoro,’ 49druga poki i kidro na upi laga ku lepe i kita kilo‚ druga nyonyosu‚ momozu kugele ku ŋutu lo memera kilo‚ 50mata lo lu upiye de iyeŋundra i luŋa laga ti lepe aku yuluki‚ i baŋe naga ti lepe aku deni nu kata yu‚ 51’bo lepe idedepe dedepe lepe‚ itikindra lepe i saka ku katoŋulupa kilo kugele. Yu de gbiye ku ŋira na rubi nyena igbo’da.
Currently Selected:
MATAYO 24: KNT77
Highlight
Share
Copy
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
