MATAYO 7
7
1“Ku ŋeŋerita kulia, ka’bi ta ku ŋeraki kulia. 2Be naga ma ta ŋedyi kulia ti ŋutuluna‚ ta iŋeŋeraki kulia‚ ’do imomoroki ta beti naga ma ta modyinina. 3Do medra korodoti naga ku luŋosu i koyitani ayu‚ ti do ani bonga kedini laga konu koyitani ilo gbandra ya? 4Kuwagi do roromoki takindra luŋosu adidinyo adi‚ ‘Ti na ’dumu korodoti naga konu koyitani ina kaŋo‚’ ti do ani medra kedini laga konu koyitani ilo ya? 5Do a lo toŋulupa, ’dotoro kedini laga konu koyitani ilo a nze‚ mo do buloni medra soso i ’dotodru na korodoti naga ku luŋosu i koyitanina. 6“Ku titikita ’diozi kapatio lokiye. Ku gugupakita kilia kasu kilo i wuriyo koŋo‚ ka’bi ko ku rioga ko ku mukuzi kase kilo‚ ka’bi ko ku lopugo ’beri i kokooza na ta. 7“Maketa‚ ititiki ta‚ galeta. ta iririo‚ trutruŋeta, iŋaŋaki ta. 8Ŋutu gele gele lo magulo irurumbi, ’bo lo ga’yulo irurumbi‚ ’bo lo trutrungolo iŋaŋaki kakana. 9Ŋa laga kasu dridriŋini laga kugbo ŋiro lo lepe lo magu ’dilo‚ lepe druga tikindra lepe ŋurupi ya? 10Kuwagi ku lepe magu sumuti‚ lepe ititikindra lepe munu ya? 11’Bo kuwa ta laga a ŋutulu loro kilo de‚ ku ta adeni tikindra na ŋazi kasu kilo kapa lo’bu de‚ ta rambu adi Monye lasu lo ’dikolo aka tikindra ŋutulu laga lo magu kilo ’doketa lo’bu arodruni ya? 12“Kuwade kuliata giri naga na nyari ta ti ŋutulu kone kasuni kine‚ koneta de kasikoni itro, igbonaga kine kulia de a bo na kukuzu ina ku na kulia ti kakeyo kine itro ina. 13“Lubita i kaakutu natrina, igbonaga kaakutu nawalana ku kiko lowalalo a lo utuniki i karaki ina ’bo ŋutulu lo lubo kata yu kilo ko rodri. 14’Bo kaakutuna a natri‚ ’bo kiko lo utuniki i piri na yeŋona kata yu ilo a logo‚ ’bo ŋutulu lo riondru kilo ’baziŋa. 15“Gbo’dita go ku kakeyo ti to’bure kilo‚ lo pondra kasuni ku ’beri kase be kebilizi‚ ’bo kasiko i muguni ko a rarawuki lo riagu ŋutulu. 16Ta idendra ko ku trora na konye kasiko kilo. Konye ti zabibu kilo iya i kedini laga ku kakuwa i mugu ya? Kugbo konye ti koligi kilo i tulala i mugu ya? 17Kuwade kade giri lo’bu kilo rarada konye lo’bu‚ ’bo kedini lorolo ra konye loro. 18Kedini lo’bu ani romoki rada konye loro‚ ’bo kedini loro ani romoki rada konye lo’bu. 19Kade giri laga ani rada konye lo’bu kilo‚ ko itrotroko ka i gugupazi i kima. 20Kuwade ta roromoki dendra ko ku trora na konye kasiko kilo. 21“Ŋutulu lo takindra na adi‚ ‘Mata‚ Mata‚’ kilo‚ ko aka lubo giri i tumata na ’dikonani, ’bo ŋutu laga lo kondra beti naga ma Monye lio laga i ’diko yulo ma nyadrinina. 22I ni luŋa de ŋutulu rodri itakindra na adi‚ ‘Mata‚ Mata‚ yi aku trugo kulia ku kari konu kine ya? Ku kari konu kine yi aku rikodru dreria loro ya? Ku kari konu kine yi aku kondra konesi rodri naga ku teriŋi ya?’ 23’Bo na itakindra ko adi‚ ‘Na aku deni ta. Utita kuweni kaŋo‚ ta laga a kakona ti kulia naro kilo.’ 24“Kuwade ŋutu gele gele laga lo yinga kulia kuwe kine‚ kugbo lepe akondra‚ lepe gbo be ŋutu laga a miri‚ lo ’dugo kadi nanyena i lele ki ilo. 25’Dla kodro ku kudulo laga aziye‚ lo ’dogu yaŋa‚ ’dibani kodro ku kobuŋena naga abudya kadina ku teriŋi kpe‚ kadina aku ’duki‚ igbonaga a’duko i lele kina. 26Ŋutu gele gele lo yinga kulia kuwe kine‚ kugbo aku konu‚ lepe igbo’da be ŋutu lo mamali lo ’dugo kadi nanyena i sinyaki ki. 27Kugbo kudulo laga aziye‚ lo ’dogu yaŋa, kugbo kobuŋena naga abudya kadina ku teriŋi, druga dukadru lepe ka‚ ’bo ’duki na kadi ŋanina agbo’da a naro.” 28Ku Yesu laga alenga kine kulia de‚ mongoyo ti ŋutulu kilo druga rambu ’beri koru ku togo’yu na lepena, 29igbonaga lepe atogo’yu be ŋutu laga ku teriŋi, ani gbo’da be katogolo kasiko ti kukuzuna kilo ina.
Currently Selected:
MATAYO 7: KNT77
Highlight
Share
Copy
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
