MARAKO 1
1
1Kuu na’bu na Yesu Kristo‚ Ŋiro lo Ŋun ilo na suluki 2be naga ma kakeyoni Isaya wudri ina‚ adi‚ “Mete‚ na sonyodru lo’di liolo konu koŋo yu‚ lo ikukundra kiko lolulo. 3Roro lo ŋutu lo laiza i diŋo yu‚ adi, Kukuneta kiko lo Matalo, ’bo rineta kikoli ti lepe kilo gbogbo.” 4Kuwade Yoane lo tikindra baputizi ilo ayeŋundra i diŋo yu i trugo na kulia ti baputizi laga lo kpeza lopuko na teiliko ma torozi kine ’di’diyalo. 5Ŋutulu ti ka na Yudaya kilo giri druga lupodru ku lepe yu, ku ŋutulu ti Yerusalema kilo. Ku ko laga atrugo torozi kase kine, lepe druga tikindra ko baputizilo i kare laga Yorodani ilo kata yu. 6Ti Yoane asozu bongo na kukuna ku kupi ti kamelo, ’bo kapa na muko na lepena a ’beriko, ’bo lepe nyosu maya ku wele na siwa ti droru. 7’Bo lepe atrugo kulia adi, “Ŋutu laga ku teriŋi alangu na ilo, ilo ipondra kuwe boni, laga na ani romoki dula i lagu na pata ti kamuka ti lepe kine. 8Laga na tikindra ta baputizilo ku pio, ’bo laga lepe itikindra ta baputizilo ku Yuka Nakiyena.” 9I kulu luŋa de Yesu alupundro Nazareta Galili yu, ’bo Yoane druga tikindra lepe baputizilo Yorodani kata yu. 10Ku lepe laga alupundro i pio kata yu, lepe druga medra wuleŋa gele ’dikona aŋazu mugu gboŋa, Yuka Nakiyena druga kiyundra ka beti a’buguti i gbi’diki ku lepe kini. 11Roro le’de druga kuu i ’diko yu, akulia adi, “Do a Ŋiro lio laga ma na nyadrilo, na anyola koru ku do.” 12Wuleŋa gele Yuka Nakiyena arikodru Yesu i diŋo kata yu. 13Lepe druga saka i diŋo yu luŋa meria iŋmani, ’bo Satani aluluga lepe. ’Bo lepe asaka ku kapa ti droru kilo kugele, ’bo malaika kilo akonakindra lepe kita. 14Ku Yoane laga amoka, Yesu druga lubo Galili yu i trugo na kuu na’bu na Ŋun ina‚ 15druga kulia adi‚ “Luŋalo atorumokindro mugu azo‚ tumata na Ŋun ina gbo’di nyogoŋa. Lopuketa teiliko‚ ruketa kuu na’buna.” 16Nyenaga ma Yesu rosodrini i suburi lo Galililo i kutu yuna‚ lepe amedra Simona seku luŋase lo lepe laga Anderia i biriŋodru na bira na somo suburi kata yu, igbonaga ko a kareka ti somo ina. 17Yesu druga takindra ko adi, “Keporota na, ma na ku toyeŋundra ta a katuna ti ŋutulu.” 18Wuleŋa gele ko druga kolokindro birazi kase kine, druga kepodru lepe. 19Ku lepe laga amizoro ŋero yu ’baziŋa, lepe druga medra Yakobo, ŋiro lo Zebedayolo ku Yoane, luŋase lo lepelo, ti ko kulu saka kase ki’bo kata yu i trutrugu na birazi kase kine. 20Wuleŋa gele lepe druga lungu ko. Ko druga kolokindro monye lase Zebedayo i ki’bo kata yu ku ŋutulu laga lo kondra kita ku rope kilo‚ druga kepodru lepe. 21Nyenaga ko alubo Kaperinauma yu. I luŋa lo sabatolo Yesu alubo i kadi naga a momorena kata yu i togo’yu na ŋutulu. 22’Bo ko arambu ’beri koru ku togo’yu na lepena‚ igbonaga lepe atogo’yu ko be ŋutu laga ku teriŋi agbo’da be katogolo ti kukuzuna kilo ma togo’i inani. 23Ti le’de ŋutu lu i kadi naga a momorena kata yu ku yuka naro. 24Lepe druga resa adi‚ “Yesu lo Nazaretalo‚ kulia kaya seku do kine a ti nyo ya? Do pondra i tukarakindra na yi ya? Na adeni do‚ do a Ŋutu laga a Lokiye lokiye lo Ŋun ilo.” 25Yesu druga ringa lepe adi‚ “Yiŋani tali, lupundri kaŋo ku lepe i muguni.” 26Ku yuka narona naga abiriŋokindro ŋutulo kani‚ lepe druga resa ku roro laga gboŋa‚ druga lupodru ku lepe kata yu kaŋo. 27Ko giri druga yo’yu ’beri, druga piza ’beri adi‚ “Ilo de inyo? Ina togo’yu de a naludu po! ’Dibani kodro ku yukala naro kpe‚ lepe takindra ko kukuzu ku teriŋi‚ ’bo ko kilo sobu kulia ti lepe kine.” 28Kari ti lepe kine druga kuworo i pirito giri naga i ka na Galili nyoga yu kine. 29Wuleŋa gele Yesu druga kolokindro kadi naga a momorena kaŋo‚ druga lubo i kadi nasi Simona seku Anderia ina kata yu ku Yakobo seku Yoane. 30Ti moke na Simonana nu ka yu ku yeyenga na mugu na kamaka‚ ’bo wuleŋa gele ko druga trukokindro Yesu kulia ti lepe kine. 31Yesu druga pondra ku lepeni, druga ’deba keni lo lepelo, i toŋizu na lepe ki, druga mugu na lepe na kamakana koko’yu kaŋo, ’bo lepe druga konakindra ko kita. 32I nu tokotria de kugbo kolona naga a’doro, ko druga zondra ku Yesuni ŋutulu giri laga ku tatuwa kilo ku laga ku dreria loro kilo. 33’Bo ŋutulu giri laga kezini kilo atunundra ’beri kugele i kaakutuni. 34Lepe druga totoruzo ŋutulu rodri laga ku tatuwa ka’de ka’de kilo, ’bo lepe druga rikodru dreria loro rodri. Lepe druga gokindra dreria ŋani kilo tazu na kulia, igbonaga ko adeni lepena. 35I trari na kani, ti wara na kana inga pazo, Yesu druga ŋi druga lupodru i diŋo yu ka’delo‚ ’bo lepe amagu Ŋun yu de. 36’Bo Simona druga kepodru bo na lepena ku ŋutulu lo gbo’da kasi lepe kilo. 37Ku ko laga arumbi lepe‚ ko druga takindra lepe adi‚ “Ŋutulu kilo giri kilo ga’yu do.” 38Lepe druga teyitokindro ko adi‚ “Kita woro i kezino naga ŋero kunu, ma na ku trugo yu de itro, igbonaga na lupundro ku kulia naga kine dena.” 39’Bo lepe aworo Galili yu giri‚ i trugo na kulia kine i kadizi naga a momoreta kine kata yu‚ i rikodru na dreria loro itro. 40Nyenaga ŋutu laga ku rima apondra ku Yesuni i magu na lepe‚ druga ruguŋo ka‚ druga takindra lepe adi‚ “Ku do anyari‚ do roromoki toke’ya na.” 41Yesu druga gbo ku ediyo‚ druga riodru keni lonyelo‚ druga ’bo’yu lepe‚ akulia adi‚ “Na anyari, gbo’di a lokiye.” 42Wuleŋa gele rima kine druga ko’yu lepe‚ lepe druga yeŋundra a lokiye. 43Yesu druga takindra lepe kukuzu ku teriŋi, druga sonyodru lepe agbole, 44ti atakindra lepe adi, “Gbo’di go, ku trutrukoki le’de ŋutu kine kulia de tro. Utini ku kpene mugu ku ka’i’ilanilo i koŋo yu, ’bo tiki kapatio lo tokelani dolo, beti naga ma Mose tazi kukuzuna ina, a kpiye ku ŋutulu kilo yu.” 45’Bo lepe druga lupodru kaŋo yu, druga poki i trugo na kulia koru, i tokuzo na kulia ŋani kine. Kuwade Yesu aku romoki lupodru gboŋa i kezi yu tro, ’bo asaka kaŋo i diŋo yu. Ŋutulu kilo druga pondra ku lepeni ŋiyu i pirito giri.
Currently Selected:
MARAKO 1: KNT77
Highlight
Share
Copy
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
