MARAKO 4
4
1Nyenaga Yesu apoki ’do i togo’yu na ŋutulu suburi i kutu yu. Mongoyo na ŋutulu rodri koru druga tunadru ’beri ku lepe yu. Kuwade lepe alubo i ki’bo kata yu, druga gbi’diki kata yu i suburi ki yu, ti mongoyo na ŋutulu giri kulu suburi i kuti yu. 2Lepe druga togo’yu ko kuliata rodri ku kulia na guguma. Ma lepe togo’inina, lepe atakindra ko adi, 3“Yiŋeta, kawiani lo nyomo kazu alupodru kaŋo i weza na nyomo. 4Ku lepe i wezani, nyomo ku’de kilo agbadru ’beri i kiko kata‚ druga kpenya kine na ŋiyu i nyosu na ko. 5Ku’de kilo agbadru ’beri i lele kutu‚ i piri naga ko aku rumbi kuzo naga rodri ina. Ko apu agbole igbonaga kuzo kine ani gbo’da a nagululo ina. 6Kugbo kolona naga alupundro‚ druga ko ririŋe‚ ko druga tetio tetio kaŋo igbonaga kukuri kasiko ’bayi ina. 7Nyomo ku’de kilo agbadru ’beri i kakuwa kata‚ kakuwa kine druga ’dudyo‚ tikindra ko gbo a wilio wilio‚ a’duteki, aku trora konye. 8Nyomo ku’de kilo a’do’do i kuzo naga a na’bu kine kata yu‚ ko druga troru konye‚ ku ko i’dudyoni, ko agara, druga troru konye‚ ku’de kilo luŋa meria musala‚ ku’de kilo luŋa meria bukiye‚ ku’de kilo luŋa kama gele.” 9Yesu druga kulia adi‚ “Ŋutu laga ku suwolo, ti lepe yingi.” 10Ku Yesu laga lu ka’delo, ŋutulu laga ku lepe nyogani kilo ku ŋutulu mere gele ku konye mure kilo apiza lepe bo na kulia na guma kine. 11Lepe druga teyitokindro ko adi, “Kasunina kulia na mumuyi mumuyi ti tumata na Ŋun kine atiki ta, ’bo ku ŋutulu laga kaŋo kilonina ko kine tayi giri ku kulia na guguma. 12Kuwade boŋadruna ko ibobonga ’bo aka medrani tro, ku yingana ko iyiyinga, ’bo aka yo’yuni tro, ka’bi ko ku lopuke ’do i ’diya na torozi kase kine.” 13Yesu druga piza ko adi‚ “Ta ani yo’yu kine kulia na guguma kine de ya? Ta iyo’yu kulia na guguma kine giri adidinyo ya? 14Kawiani lo nyomolo weza kulia ti Ŋun kine. 15Kilo de a ko laga i kiko kata kilo‚ piri na wiyani kulia kinena. Kugbo ko laga ayinga‚ Satani druga pondra agbole‚ i ninadru na kulia naga na weki kasikoni kine. 16’Bo kilo de a ko lo wiya i lele kutu kilo‚ ku ko laga ayinga kulia kine‚ ko druga rugo wule ku nyola. 17Ko gbo ’ba kukuri‚ ’bo ko saka luŋa’baziŋa‚ i bo ŋanina kugbo sasanya ku wowonye naga ayeŋundra ku kulia ŋani kine‚ ko druga poki i bayi agbole. 18Ku’de kilo awiya i dridriŋi na kakuwa. Kilo de a ko laga lo yinga kulia kine kilo, 19’bo delaki na teili i kulia ti ka kine kini, ku toŋulupa na tokorine ina‚ ku puso na kulia ku’de ina, ko druga lubo i muluzu na kulia ŋani kine, ’bo ko aka trora konyeni. 20’Bo ko laga awiya i kuzo na’bu kine kata yu, kilo de a ko laga lo yinga kulia kine laga lo rugo kilo, ko druga troru konye, ku’de kilo luŋa meria musala, ku’de kilo luŋa meria bukiye, ku’de kilo luŋa kama gele.” 21Yesu druga piza ko adi, “Ŋutulu roromoki zondra kima i mugo na lepe ku turu’be‚ kugbo i ’delakindra na lepe i gbolo muko ya? Ko ani ’delakindra lepe i lororo ya? 22’Bo le’de ŋo ’bayi laga ilo a’dana ’bo aka puruni‚ kugbo ŋo laga lo kona tali ’bayi laga aka puruni. 23Kugbo le’de ŋutu gbo ku suwo‚ ti lepe yingi.” 24Lepe druga takindra ko adi‚ “Gbo’dita go ku kulia naga ma ta yingi kine. Ko imoroki ta beti naga ma ta modyini, ’yaleta kilo ititiki ta itro. 25’Bo ŋutu laga ku kapalo‚ itiki kapa, ’bo ŋutu laga ’ba kapalo, kapa laga ku lepeni kilo iriariakazi kaŋo.” 26’Bo Yesu adi, “Tumata na Ŋun ina igbo’da de. Kugbo le’de ŋutu laga aweza nyomo i kuzo kata, 27ku lepe laga atoto kuwazena, ku lepe laga apure parani, ku rumbi nyomo kilo apu, a’dudyo‚ ’bo lepe aku deni ’dudyo adidinyo. 28Kuzo kine na tikindra nyosuna ku ’beri, a kayona kopuko, i bo ŋanina kuweto, druga konye kilo troru zore i kuwetoni. 29Kugbo konye kilo laga atrora, druga lepe ’dumundra wale agbole, igbonaga luŋa lo ’ditalo ilo ayeŋundra ina.” 30Yesu druga piza adi, “Ma yi tuzukindro tumata na Ŋun ina ku inyo ki’do? Ma yi kpeza lepe ku kulia na guguma naga inyo ya? 31Lepe gbo beti koyita lo mutadi lo weki i kuzo kata‚ lepe a nyumuti laga ’baziŋadroo koru‚ kuwade nyomo ku’de ti ka kilo giri alangu lepe. 32’Bo ma lepe wekini nu i bo ŋanina lepe a’dudyo‚ ayeŋundra a druma‚ arodru ’detilo na wila i melesi yu kine giri. Lepe ’dagu keniya‚ kuwade kpenya kine roromoki ’dugo kadizi kase kine i tilimo ŋanina.” 33’Bo Yesu bita gumba kulia be kine de rodri‚ druga trukokindro ko kulia kine beti naga ma ko romokini yinga ina. 34Lepe aku takindra ko ku’de kulia ’ba guma na kulia, ’bo lepe atrukokindro lotodiniki kanye kilo bo na kuliata kine giri tali. 35I lu luŋa de ku gbo’dini kotriana, Yesu atakindra ko adi‚ “Kita langu i lu lozo.” 36Ko druga kolokindro mongoyo na ŋutulu kilo, druga zonga lepe i ki’bo naga ma lepe gbi’dikini nu kata yu. ’Bo ki’bolo ku’de aworo kasi lepe itro. 37’Bo kobuŋe naga a drumana druga ŋiŋiye‚ ’bo pio kine druga lalatu i ki’bo kata yu yeŋadru tozo i zore na ko i ki’bo kata yu. 38Ti Yesu atoto i bongo na ’delakini kuwena kini i ki’bo kata yu yeka. Ko druga topurundro lepe, druga resa ku lepe kini adi, “Katogoloni, ku yi laga amanakindra, ani gbo’da a kulia konu ya? 39Lepe druga pure, druga ringa kobuŋena‚ druga takindra suburilo adi‚ “Yiŋani tali! Gbo’di madaa.” Kobuŋena druga gbigbi’diki‚ kana druga yiŋazi lilili. 40Lepe druga piza ko adi‚ “Ta kukuze gbandra ya? Rugo nasu ’bayi ya?” 41’Bo ko apoki i kuze koru, druga pipiza ’beri kase dridriŋini adi, “Ilo ŋutu de a ŋa, laga ma kobuŋena ku suburilo sobini kulia ti lepe delo ya?”
Currently Selected:
MARAKO 4: KNT77
Highlight
Share
Copy
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
