Echos 11
11
O Pedro ando Jerusalem phenel so cherda e llenenge katar e khanlliri
1E apostolura ta e phlal kai sea ande Judea asunde kai i e llene kai inai judiura pachaie ande leke alava. 2A kana o Pedro irisailo ando Jerusalem, nesave llene kai pachana ta sea katar e judiura dena leke orbe. 3Ta puchle le:
¿Soke llelan kai e llene kai inai judiura, ta jalan lenchar?
4O Pedro phenda lenge sa so avilape. Ta phenda:
5Me sema ando foro katar o Jope, ta kana molivaman sikadila mange sargo iek suno:
Dikhlem sargo iek baro chiti kai saia phanglo pe star riga kai fuliela katar o miloso llik kote kai sema me. 6Ondaka dikhlem mai sukar te sai llanav so saia andre, ta dikhlem zivirinie stare porrnenge, ta sapa ta chiriklia. 7Ta asundem iek avazi kai phenda mange:
Uste Pedro; mundar ta ja. 8Me phendem:
Na Gazda, soke nikada ni jalem niso melalo. 9Ondaka o avazi kai avela katar o miloso dia manchar orba pale ta phenda mange:
So o Del chistosarda, na phen tu kai si melalo. 10Gava avilape trin droma, ta mapalal sa so dikhlem llelotar upre ando miloso. 11Ondaka, trin llene bichalde katar e Sesarea avile te roden man kai o cher kai me ziviva. 12O Duo phenda mange te na darav niso ta te llau lenchar. Ta llele manchar i gala sou phlal. Sa diam ando cher katar iek lleno, 13kai phenda amenge sar dikhlaia iekhe suecho ande po cher, kai achilo pe porrne ta phenda leke:
Bichal vareka ando foro katar o Jope te anen e Simono, kai phenen leke Pedro; 14vou ka phenel chuke sar sai ave braduime, tu ta i sa chi familia. 15Kana thode man te dav lenge orba, o Santo Duo avilo pe lende isto sar omanglal aviloia pe amende. 16Ondaka mislisailem so phendaia o Gazda:#Ech 1.5.
Chachimaia o Juan kristisarda e paiea, a tumen ka aven kristime e Santone Duoia. 17Ta dia len o Del isto so dia amen kai pacha ando Gazda o Jesukristo, ¿a ko sem me te phenav e Devleke kai gua nasti avelpe?
18Kana e phlal katar o Jerusalem asunde gaia orba, ni die ios orbe jolinaia ta blagosisarde e Devle, ta phenena:
¡O Del ikharel te irinpe lete i golen kai inai judiura ta te len o zivoto ostade!
E khanlliri katar e Antiokia
19Kana mulo o Esteban, mapalal thode te roden e llenen kai pachana ando Jesus te maren len, ta nesave saia te nasen ta lleletar ande Fenisia, ando Chipre ta ande Antiokia. Kote phende e judionenge e lachi viasta.#Ech 8.1-4. 20A nesave llene kai pachana kai sea katar o Chipre ta katar o Sirene avile ande Antiokia ta die orba i e llenenge kai inai sea judiura, ta phenena lenge e lachi viasta e Jesukristoki, o Gazda. 21E zor e Gazdaki saia lenchar, ta gia but llene mukle po pachape o purano ta pachaie ando Gazda.
22E llene e khanllirake katar o Jerusalem, kana asunde gaia viasta, bichalde e Bernabee ande Antiokia. 23Kana avilo o Bernabe dikhla sar o Del blagosisardaia len, ta veselisailo but ta phenda saurrenge te llan chachimaia pala o Gazda sa pe liea. 24Soke o Bernabe saia iek lleno lacho, pherdo katar o Santo Duo ta pherdo pachape ta gia but llene diepe kai o Gazda. 25Mapalal kana nakhle gala ezgode, o Bernabe llelo ando Tarso te rodel e Saulo, 26ta kana malada le, inllarda le ande Antiokia ta kote achile e llenenchar katar e khanlliri burs llive, ta sikavena bute llenen. Kote ande Antiokia saia e purvo drom kai ikharde len kristianura.
27Ande gola llivesa nesave poraukura llele katar o Jerusalem ande Antiokia. 28Ta iek lendar kai ikhardola Agabo, thodape pe porrne ta o Duo cherda le te del orba, ta phenda kai ka avel but bari bok ande sa o sueto, ta gua avilape ande llivesa katar o charo o Klaudio.#Ech 21.10. 29Ondaka ande Antiokia e llene kai pachana ando Jesus mangle te pomozin e phlalen kai zivina ande Judea, ta bichalde lenge prema so sai dela suako lleno, 30Ta gia cherde le, chidie love ta die len kai o Bernabe ta kai o Saulo te inllaren len kai e phure katar e Judea.
Currently Selected:
Echos 11: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
