Echos 18
18
O Pablo ando Korinto
1O Pablo llelotar katar e Atenas ta llelo ando Korinto. 2Kote maladilo iekhe judioia kai ikhardola Akila kai saia katar o Ponto. Ni cherela but kai o Akila ta leki rromi e Prisila avilea katar e Italia, soke o charo o Klaudio phenda te llantar sa e judiura katar o foro Roma. O Pablo llelo lende 3ta sar vou cherela chare sargo von achilo lenchar te radin zanio. 4Ta suako sabado o Pablo llala ande khanlliri e judionengi, ta dela orba lenge ta i e llenenge kai ni sea judiura te cherel len te pachan ando Jesus.
5Kana o Silas ta o Timoteo avile katar e Masedonia, o Pablo sikavela e judionen e lachi viasta kai o Jesus saia o Mesias. 6A e judiura cherdile leke dusmanura ta thode te kusen le. Ondaka o Pablo chinosarda pe patave te sai dikhen kai leke ni saia drago so cherde, ta phenda lenge:
Isto pe tumende ka avel e dos kai ka jasaon; me ni sem dosalo. Katar angle me ka llau kai e llene kai inai judiura te dav lenge orba.
7Likisto katar e khanlliri e judionengi ta llelo kai o cher iekhe lleneko kai ikhardola Tisio Chacho, kai blagosila e Devle ta kai zivila pasa e khanlliri e judionengi. 8Ta o Krispo, o gazda katar e khanlliri e judionengi, pachaia sa pe familiaia ando Gazda. Ta but llene katar o Korinto, kana asunde e Pablo, kristisaile. 9Iek riat, o Gazda sikadilo e Pabloke sargo ande iek suno ta phenda leke:
Na dara, phen e orba ta na achi. 10Soke me sem tuia ta niko ni ka thovel po va pe tute te cherel chuke niso bilacho, soke ande gava foro si man but llene kai pachan. 11Ta o Pablo achilo ando Korinto burs ta dopas, ta sikavela maskar lende e orba e Devleki.
12A ande llivesa kana o Galion gazdarila ande Akaia, e judiura chidinaile te maren e Pablo, ta inllarde le kote kai chinen krisa 13ta phende e lleneke kai gazdarila po foro:
Gava lleno cherel e llenen te blagosin e Devle na sar phenel o zakono.
14Ta kana o Pablo mangela te del orba, o Galion phenda gia e judionenge:
Te avilaia iek bilachipe but baro, kote me asundema tumen e judionen; 15a sar gava si samo katar e orbe ta katar e anava ta katar tumaro zakono, lacharen tumari buchi isto tumen, soke me ande gala ezgode ni kamam te avav tumaro krisari.
16Ta tradia len katar o cher kote kai chinen e krisa. 17Ondaka sa istarde e Sostenese, o gazda katar e khanlliri e judionengi ta marde le isto kote, angla o cher kote kai chinen e krisa. A e Galioneke ni chitilape niso so cherena.
O Pablo irilpe ande Antiokia
18O Pablo achilo but llivesa ios ando Korinto. Mapalal dia orba e phlalenchar katar e khanlliri soke saia te llaltar ta llelotar ande iek llimia karing e Siria, a e Prisila ta o Akila llele lea. Ando Senkrea, kana llana te liken ande llimia, o Pablo jaliarda po soro, soke jalaia sovel e Devleke te cherel le.#Nm 6.18. 19Kana avile ando Efeso, o Pablo mukla e Prisila ta e Akilase ta llelotar ande khanlliri e judionengi, ta dia orba e judionenchar kai chidiniaona kote. 20Von mangle letar te achel ios mai but vreme lenchar, a vou ni kamla, 21Ta dia lenchar orba mai anglal te llaltar, ta phenda:
Te kamela o Del, ka avav pale tumende.
Mapalal o Pablo likisto ande llimia ta llelotar katar o Efeso. 22Kana avilo ande Sesarea, llelo ando Jerusalem te del orba e llenenchar katar e khanlliri, ta mapalal llelo karing e Antiokia.
O Pablo phirel e Galasia ta e Frijia te inllarel e lachi viasta
23O Pablo achilo nesave llivesa ande Antiokia, ta mapalal phirda iek po iek e thana kai si ande Galasia ta ande Frijia ta dela zor sa e llenen kai pachana ando Jesus.
O Apolo del orba ande Efeso
24Ande gola llivesa avilo ando Efeso iek lleno kai ikhardola Apolo, kai saia katar e Alejandria. Vou llanela te del orba but sukar e llenenchar ta pinllarela but katar o Pisipe. 25Vou sikiloia katar o drom e Gazdako, ta saia but vreno te sikavel ta sikavela bristomaia katar o Jesus, makar pinllarela samo o kristope e Juaneko. 26O Apolo dia orba bi darako ande khanlliri e judionengi, a kana asunde le e Prisila ta o Akila, ikharde le po chorial ta sikade le mai sukar katar o drom e Devleko. 27Kana o Apolo mangla te llal ande Akaia, e phlal die le zor, ta pisisarde iek lil e llenenge kai zivina ande goia phuv ta kai pachana ando Jesus, te aven lea pachivale. Kana avilo ande Akaia, pomozisarda but e llenen kai pala e zalba e Devleki, pachaiea, 28ta angla sa e llene phenela e judionenge kai sea ando kojaipe alavenchar kai von nasti phenena kai inai chache, ta prema o Pisipe sikavela lenge kai o Jesus saia o Mesias.
Currently Selected:
Echos 18: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
