Echos 9
9
O Saulo del orba
Ech 22.6-16; 26.12-18
1A o Saulo phenela kai ka mundarel e llenen kai pachan ando Jesus. Goleke llelo kai o mai baro popo, 2ta mangla letar lila te muken le te llal ande khanllira e judionenge katar o Damasko te rodel e llenen kai pachana ando sikadipe e Jesuseko, murusen ta i diskinien, te inllarel len phangle ando Jerusalem. 3A kana avilo pasa o Damasko, iek villelo kai avela katar o miloso klichisarda truial letar. 4Ta o Saulo pelotar pe phuv ta asunda iek avazi kai phenela leke:
Saulo, Saulo ¿Soke lla pala ma te mare man?
5O Saulo puchla:
¿Ko san, Gazda? O avazi phenda leke:
Me sem o Jesus, isto gole kai rode te mare. 6Uste ta de ando foro, kote ka phenen chuke so si te chere.
7E llene kai llana e Sauloia daraile but, soke asunena o avazi a ni dikhena nika. 8Mapalal o Saulo ustilo katar e phuv, a kana putarda pe akha, nasti dikhela. Ondaka istarde le e vastetar ta inllarde le ando Damasko. 9Kote achilo trin llive ta nasti dikhela ta ni jala ni pila niso ande gola llivesa.
10Ando Damasko zivila iek lleno kai pachala ando Jesus, vou ikhardola Ananias, ta o Del sikadilo leke sargo ande iek suno ta phenda leke:
¡Ananias! Vou phenda:
Kate sem, Gazda.
11O Gazda phenda leke:
Uste ta lla po drom kai ikhardol Chacho, ta ando cher katar o Judas puch katar iek lleno kai si katar o Tarso kai ikhardol Saulo. Ta vou molilpe, 12ta dikhla sargo ande iek suno iekhe llene kai ikhardol Ananias gua lleno dela andre ta thovela pe lete pe va te dikhel pale.
13Kana asunda gua, o Ananias phenda:
Gazda, but llene phende mange katar gua lleno ta katar sa o bilachipe kai cherel ando Jerusalem cho santo foro. 14Ta akana avilo kate, e mai bare popura mukle le te inllarel ando phandipe sa e llenen kai blagosin cho anav.
15A o Gazda phenda leke:
Lla, soke esvirisardem gole llene te del orba mandar e llenenge katar aver phuvia, ta lenge charonenge, ta i e llenenge katar o Israel. 16Me ka sikavav leke kai morabi te nakhel but patnia cheres ma.
17O Ananias llelo ando cher kote kai saia o Saulo. Kana dia andre thoda pe va pe lete, ta phenda leke:
Phlala Saulo, o Gazda o Jesus, gua kai sikadilo chuke kana avea e dromea, bichalda man te dikhe pale ta te ave pherdo katar o Santo Duo.
18Ondaka kote, katar e akha e Sauloke peletar sargo kore, ta dikhla. Ondaka ustilo ta kristisailo. 19Mapalal jala ta lia zor, ta achilo nesave llivesa ando Damasko kote kai zivina e llene kai pachan ando Jesus.
O Saulo del orba ando Damasko
20Mapalal o Saulo phenda ande khanllira e judionenge kai o Jesus si e Devleko Chavo. 21Sa e llene kai asunena le chudinape, ta phenena:
¿Inai isto gava o lleno kai ando Jerusalem llala te marel e llenen kai blagosina e Jesuseko anav? ¿Inai gava lleno isto gua kai avilo kate te phandel tumen ta te del tumen kai e gazda e poponenge?
22A o Saulo sa mai but tromala te del orba, ta e judiura kai zivina ando Damasko ni llanena so ka mislin, ta sikavela lenge kai o Jesus saia o Mesias.
O Saulo nasel
23Kana nakhle but llivesa, e judiura achile pe orba te mundaren e Saulo, 24a vou llangla so mangena te cheren. Orachaia ta ollivesea aduricharena le pe udara kai delpe ando foro te mundaren le, 25A leke disipulura oriat thode le ande iek bari kotaricha ta fuliarde le katar o zido kai si truial o foro.#2 Kor 11.32-33.
O Saulo ando Jerusalem
26Kana o Saulo avilo ando Jerusalem, mangla te chidiniaol e llenenchar kai pachana ando Jesus, a sa e llene darana letar soke ni pachana kai i vou pachala. 27A o Bernabe inllarda le ta sikada le e disipulonenge ta phenda lenge kai o Saulo dikhla e Gazda po drom, ta kai o Gazda dia lea orba, ta kai ando Damasko o Saulo dia e Jesuseki orba tromanimaia. 28Ta gia o Saulo achilo ando Jerusalem, ta llala lenchar. Ta dela orba e Jesuseki tromanimaia, 29ta dela orba e judionenchar kai dena orba griego, a von mangena te mundaren le. 30Kana e phlal llangle, inllarde e Saulo ande Sesarea, ta kotar inllarde le ando Tarso.
31Ondaka e khanlliri ande sa e forura kai si ande Judea, ande Galilea ta ande Samaria, saia len pas ta bariona ando Duo. Zivina ande dar e Gazdaki ta o Santo Duo pomozila te aven mai but llene ande khanlliri.
O Pedro sastarel e Enease
32O Pedro, lleloia te del orba e phlalenchar ta llelo te dikhel i e llenen katar o santo foro kai zivina ande Lidia. 33Kote malada iekhe llene kai ikhardola Eneas, gua lleno saia ande postelia ojto burs, ta nasti phirela. 34O Pedro phenda leke:
Eneas, o Jesukristo sastarel tut. Uste ta lachar chi postelia.
O Eneas ustilo oma. 35Ta sa e llene kai zivina ande Lidia ta ando Saron dikhle le sar ustilo ta diepe kai o Gazda.
O Pedro cherel te ustel e Dorkas katar o meripe
36Ando Jope saia iek diskinia Devlikani kai ikhardola Tabita, kai ande chib e griegonengi si Dorkas. Gaia diskinia sa po zivoto cherela o lachipe ta pomozila golen kai trubula len. 37Ande gola llivesa, e Dorkas nasuali ta muli. Jalade laki esnaga ta mapalal thodela ande iek soba upral po cher. 38O Jope saia pasa e Lidia, kote kai saia o Pedro, ta sar e llene kai pachana ando Jesus llangle kai saia kote, bichalde duie llenen te phenen leke:
Aide oma ando Jope.
39Ta o Pedro llelotar lenchar. Kana avilo, inllarde le kai e soba kote kai saia e Tabitaki esnaga, ta sa e phivlia thodepe rovindo truial katar o Pedro ta sikade leke e fistanura kai e Dorkas cherdaia kana saia llundi. 40O Pedro phenda saurrenge te llantar. Mapalal dia changa ta molisailo, dikhla pe diskinia kai mulia ta phenda lake:
¡Tabita, uste!
Voi putarda pe akha, ta kana dikhla e Pedro, besli. 41Vou istarda la e vastetar ta pomozisarda la te ustel, mapalal ikharda e llenen kai pachana ando Jesus ta e phivlien, ta sikada la lenge llundi. 42Gua asundilo ande sa o Jope, ta but llene pachaie ando Gazda. 43O Pedro achilo nesave llivesa ando foro, ando cher katar iek lleno kai radila ande morcha kai ikhardola Simono.
Currently Selected:
Echos 9: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
