Juan 6
6
O Jesus del te jal panch milie llenen
Mt 14.13-21; Mk 6.30-44; Lk 9.10-17
1Ondaka o Jesus llelotar pe o goia rig katar mora katar e Galilea, katar e phuv e Tiberiaki. 2Ta llana pala lete but llene, soke dikhena e bare ezgode Devlikane kai cherela e nasualenchar. 3Ondaka o Jesus likisto pe iek burdo, ta beslo kote pe disipulonenchar. 4Ta saia pase e Paskua e judionengi. 5Kana o Jesus dikhla kai but llene avilea lete, phenda e Felipeke:
¿Kai ka china marrno te jan pe gachin llene?
6A vou phenela gua te dikhel so ka phenel o Felipe, soke o Jesus llanela so saia te cherel. 7O Felipe phenda leke:
Dui stotine denariura#6.7 Denario si so pochinena iekhe lleneke te radil iek llive. marrno ni resel ni te jan suako lleno po cherricha.
8Ondaka o Andres, kai saia iek katar e disipulura ta i phlal katar Simon Pedro, phenda lenge:
9Kate si iek minono kai si le panch marrne ta dui mache. ¿A so si gava gachine llenenge?
10O Jesus phenda leke:
Phen saurrenge te besen.
Kote saia but char, ta besle preko panch milie murusa. 11O Jesus lia gola marrne, ta kana dia fala e Devle, fulada pe disipulonenchar ta e disipulura fulade len e llenenchar kai besena. Ta isto gia cherde e machenchar ta dia len pe gachin von mangena 12Kana chalile, o Jesus phenda pe disipulonenge:
Chiden e kotororra kai achile, te na jasaol niso.
13Von kana chidie len, pherde lenchar desudui kotariche katar so achilaia katar e panch marrne. 14Gola llene, kana dikhle e bari ezgoda Devlikani kai o Jesus cherdaia, phende:
Chache si, kai gava si o profeta kai saia te avel ando sueto.
15A kana o Jesus llangla kai mangena te len le pe zor te cheren le charo, pale llelotar po burdo, vou korkorre.
O Jesus phirel pe mora
Mt 14.22-27; Mk 6.45-52
16Kana peli e riat, e disipulura e Jesuseke fuliste kai e mora, 17likiste ande iek llimia ta nakhena e mora karing o Kafarnaum. Ia pelia e riat a o Jesus ni aviloia lende. 18Ta e mora divosaili soke phurdela iek balav zurale. 19Kana llele panch o sou kilometrura, dikhle kai o Jesus phirela upral pe mora ta avela kai e llimia, ta von daraile. 20A o Jesus phenda lenge:
¡Me sem, na daran!
21Ondaka veselimaia lie le ande llimia, ta avile oma karing llana.
E llene roden e Jesuse
22Thiarinako, e llene kai sea pe o goia rig e mora dikhle kai e disipulura lleletar ande purvi llimia kai saia kote ta kai o Jesus ni lleloiatar lenchar. 23A aver llimie avilea kote katar o foro kai ikhardol Tiberias pasa o than kai jalea o marrno kana o Jesus diaia fala e Devle. 24Kana dikhle kai o Jesus ni saia kote ni leke disipulura, likiste ande llimie, ta lleletar ando foro kai ikhardol Kafarnaum te roden le.
Jesus, o marrno e zivotoko
25Kana e llene malade e Jesuse pe o goia rig e mora, puchle le:
Kovachi, ¿kana avilan karinga?
26O Jesus phenda lenge:
Chachimaia phenav tumenge kai tumen ni roden man pala e bare ezgode Devlikane kai cherdem, tumen roden man pala o marrno kai jalen ta chalilen. 27Na radisaren pala o jape kai jasaol, radisaren pala o jape kai inllarel karing o zivoto. Gava si o jape kai ka dav tumen me, o Chavo e Manuseko, soke man esvirisarda o Dad, kai si o Del.
28Puchle le:
¿Sar morabi te chera e Devleki buchi?
29O Jesus phenda lenge:
Gaia si e Devleki buchi, te pachan ande gua kai vou bichalda.
30Ondaka puchle le:
¿Savi ezgoda Devlikani ka chere, te dikha ta te pacha tut? ¿Savi buchi chere? 31Amare purane jale o mana po pusto, gia sar phenel o Pisipe: ‘Dia len te jan marrno katar o miloso’.#Sal 78.24; Ek 16.4,15.
32O Jesus phenda lenge:
Chachimaia phenav tumenge kai o Moises ni dia tumen o marrno e milosoko, mo Dad del tumen o chacho marrno e milosoko. 33Soke e Devleko marrno si gua kai fulisto katar o miloso ta del o zivoto e sueto.
34Von phende leke:
Gazda de amen suako llive gua marrno.
35O Jesus phenda lenge:
Me sem o marrno e zivotoko. Ko avel mande, nikada ni ka avel bokhalo. Ta ko pachal ande mande, nikada ni ka trusaol. 36A me phendem tumenge, kai tumen dikhen man ta ni pachan. 37Sogo del man o Dad, ka avel mande. Ta kogo avel mande ni ka tradau le avri. 38Soke fulistem katar o miloso, na te cherav so me mangav, avilem te cherav so mangel gua kai bichalda man. 39Ta e volia katar gua kai bichalda man si te na jasarav ni iekhe llene katar gola kai dia man te sai vazdau len katar o meripe kana ka avel o son e suetoko. 40Soke e volia me Dadeki si gaia: Sa gola kai dikhen e Chave, ta pachan ande lete, te avel len zivoto ostade a me ka cherav len te usten katar o meripe kana ka avel o son e suetoko.
41Goleke e judiura jolaile lea, soke phenela: Me sem o marrno kai fulisto katar o miloso. 42Ta phenena:
¿Inai gava o Jesus e Joseeko chavo, kai amen pinllara leke dade ta i leke da? ¿A sar phenel kai vou fulisto katar o miloso?
43Ondaka o Jesus phenda lenge:
Na den bilache orbe mandar maskar tumende. 44Niko nasti avel mande, te na anela le mo Dad kai bichalda man, ta me ka cherav te ustel katar o meripe kana ka avel o son e suetoko. 45Ande lila kai e poraukura pisisarde phenel: ‘O Del ka sikavel saurren’ Goleke suako lleno kai asunda e Dade, ta sikilo letar ka avel mande.#Is 54.13.
46Inai kai vareko dikhla e Dade, samo gua kai avel e Devletar dikhla le. 47Chachimaia phenav tumenge, kogo pachal ande mande, si le zivoto ostade. 48Me sem o marrno e zivotoko. 49Tumare purane jale o mana po pusto, ta mule. 50A me dav orba katar o marrno kai fulisto e milosotar. Kogo jal letar, ni merel. 51Me sem o marrno llundo kai fulisto katar o miloso. Kogo jala katar gava marrno ka zivil ostade. A o marrno kai me ka dav si mo mas, kai me ka dav pala o zivoto e suetoke.
52Ondaka e judiura thode te janpe maskar pete:
¿Sar sai del amen po mas te ja le?
53O Jesus phenda:
Chachimaia phenav tumenge, te na jan o mas katar o Chavo e Manuseko ta te na piena leko rat, ni ka avel tumen zivoto ande tumende. 54Ta kogo jal mo mas ta piel mo rat, si le zivoto ostade. Ta me ka cherav le te ustel katar o meripe kana ka avel o son e suetoko. 55Soke mo mas si o chachuno jape, ta mo rat o chachuno pipe. 56Kogo jala mo mas ta piela mo rat, ande mande si ta i me ande lete. 57Gia sar bichalda man o Dad ta me ziviu letar, isto gia gua kai pravarelpe mandar, i vou ka zivil mandar. 58Gava si o marrno kai fulisto katar o miloso. Inai sargo o mana kai jale tumare purane ta mule. Kogo ka jal katar gava marrno, ka zivil ostade.
59O Jesus phenda gala alava ande khanlliri e judionengi kai saia ando Kafarnaum.
E alava ostade zivotoke
60Kana asunde e Jesuse but katar e disipulura phende:
Pharo alav si gava: ¿Ko sai pachal gala ezgode?
61Kana o Jesus llangla kai dena orbe bilache letar, puchla len:
¿Gala alava peraven tumaro pachape? 62¿A so avelape te dikhlena man o Chavo e Manuseko te likel kote kai saia omanglal? 63O duo si kai del o zivoto, o mas ni blazil nisoke. E alava kai me phendem si duo ta i zivoto. 64A nesave tumendar ni pachan.
Soke o Jesus llanela mai anglal ko sea gola kai ni pachana, ta ko saia leko dusmano. 65Ta i phenda:
Goleke phendem tumenge kai niko nasti avel mande te na mukela le mo Dad.
66Sar kotar but katar leke disipulura mukle le, ta ni llana ios lea. 67Ondaka o Jesus puchla e desuduien:
¿Mangen te llantar i tumen?
68O Simon Pedro phenda:
Gazda ¿Kate ka lla? Che alava si zivoto ostade. 69Amen pachaiam ta llana kai tu san o Santo e Devleko.#Mt 16.16; Mk 8.29; Lk 9.20.
70O Jesus phenda lenge:
¿A ni esvirisardem me tumen e desuduien, ta iek tumendar si iek llavolo?
71Gava phenela katar o Judas Iskariote, chavo e Simonoko, soke gava saia leko dusmano, ta i saia iek katar e desudui.
Currently Selected:
Juan 6: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
