Nugana 3
3
‘UPWA 3.
1Ta moata nuanuasinasinapuna bomitawa iauna Ieoba Eaubada ‘i bubudi ‘edia. Ta waine ‘ena ‘i ona, ‘Ai‘aila, Eaubada ni‘atu ‘i gwae, Kaiwe iauna baguraia gea‘abo ‘enega wa da ‘e‘a ga? 2Ta waine moata ‘ena ‘i ona, Bagura ‘ana kaiweiao uadiega ‘a da ‘e‘ai: 3ta kaiwe bagura gamwanaia uana, Eaubada ni‘atu ‘i gwae, Gea‘abo ‘enega wa da ‘e‘ai, ta gea‘abo wa gitoo, nai wa mwawamwawasa. 4Ta moata waine ‘ena ‘i ona, Gea‘abo wa da mwawamwawasa: 5Eaubada ‘i mwaratoni ta ‘enega ‘aene asiata ‘enega wa ‘e‘ani, ga matami ‘i da ‘esasa, ta wa da Eaubada ‘atua, bobo‘ana be to‘umalina wa da sinapudi. 6Ta ni‘atu waine i ‘itena ‘aene kaiwe nina ‘e‘ai bobo‘ana, ta ‘ana ‘ita ‘ebeguausoara, ta ‘aene kaiwe nina ‘ana ‘ita ‘ebesinapu, ga uana i ‘ewena, ta i ‘enina; ta mwanena wate ma‘ieana i ‘ebwaena, ta i ‘enina. 7Ta siterua matadi i ‘esasena, ta ‘idi mabubugewana si sinapuna; ta bwainono iawana si sailina, ta ‘adi gadiwana si bubuna. 8Ta Ieoba Eaubada ‘enana si nonona baguraia ‘i lopilidadana asuinuanuaia; ta tai mamwanena si ‘ekwaiedi Ieoba Eaubada matanega bagura kaiwenao ‘edia. 9Ta Ieoba Eaubada tai ‘ena ‘i bwau, ta ‘i eonena, Mane ‘oio? 10Ta ‘i gwae, ‘Enaio ia nonona baguraia, ga ia matauta, mabubugewagu ta ‘enega; ga ‘enega ia mia kwaia. 11Ta ‘i ona, Iaita ‘i simanemu ‘aene ‘u bubugewa? Kaiwe nina ‘enega u ‘e‘enina, tauna manuna ia eonemu ‘aene gea‘abo u ‘e‘ani? 12Ta tai ‘i gwae, Waine nina u ‘ebwaegu be ma‘ieagu ‘a da miami, tauna kaiwe ‘enega i ‘ebwaegu, ga ia ‘enina. 13Ta Ieoba Eaubada waine ‘ena ‘i ona, To‘ase gete ‘u guinua ni‘atu? Ta waine ‘i gwae, Moata ‘i kaboegu, ta ia ‘enina. 14Ta Ieoba Eaubada moata ‘ena ‘i ona, Iage gete ‘u guiguinuena, ga ‘enega ‘oio ‘u to‘umali wawasae iobai iauiauna ‘edia, bomitawa iauna ‘edia ta; gamwamuiega ‘u da tauia, ta nedila ‘u da ‘e‘ani ga ‘amu tuta iauiauna: 15ta ‘oio ta waine wa da etarauwara, wate ‘imu susu ta ‘ina susu: tauna debaio ‘i da bwaruna, ta ‘oio ‘aeedueduna ‘u da bwaruna. 16Waine ‘ena ‘i ona, ‘Imu dedoi ta ‘imu ‘euwana ia da giesinabwa wawasae; dedoi ‘enega natumuao ‘u da enatunedi; ‘imu nuanuana mwaneio ‘ena ‘i da miami, ta ‘emuia ‘i da loina. 17Ta Adama ‘ena ‘i gwae, Mwaneio ‘enana ‘u nonona ta ‘enega, ta kaiwe ‘enega u ‘enina, tauna manuna ia eonemu, ia gwae, Gea‘abo ‘enega ‘u da ‘e‘a: bwa‘a ‘i to‘umali manuio; ma‘imu dedoi ‘u da ‘e‘a iawasio ‘ana tuta maibo‘anega; 18kwakwakwara wate ta pwatura taritaridi ‘emuia ‘i da gietabwa; ta mitawa ‘ana pwatura ‘enega ‘u da ‘e‘ai; 19maninio ‘ina amweai ‘enega masura ‘u da ‘e‘ai, ga bwa‘a ‘ena ‘u da ‘ila; ‘enega ‘u apwesama ta ‘enega: ‘oio nedila ta ‘enega, ta nedila ‘ena ‘u da ‘ila. 20Ta tai mwanena ‘i eesena Ebe; tauna iauiaudi maiawasidi sinadi ta ‘enega. 21Ta Ieoba Eaubada Adama mamwanena manudi ‘oama bwara ‘i bubudi, ta ‘i e‘otedi.
22Ta Ieoba ‘i gwae, Wa ‘ita, tai nina ni‘atu ‘abo‘ada ‘atua, bobo‘ana ta to‘umalina ‘i sinapudi; ta gete tuga, nai nimana ‘i da iasitoto, ta iawasina ‘ana kaiwe wate ‘i da ‘ewa, ta ‘i da ‘e‘ai, ta ‘i da bobo‘ana ‘ataia: 23‘enega Ieoba Eaubada bagura Edena ‘enega ‘i etunena, be bwa‘a ‘enega ‘i apwesama ‘i da gesoi. 24Ga tai ‘i pa‘ina; ta bagura Edena matana bomatu ‘ena Tierubima ‘i sa‘udi, ta sisi‐saia ‘i sabesabelulu esena iauiauna ‘edia, be iawasina ‘ana kaiwe ‘ana ‘eda ‘i da ‘ita‘ita‘i‘isi.
Currently Selected:
Nugana 3: DOBOT
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1919
