Evangelijs pēc Lukasa 3

III.

Jōņs Kristeitōjs.

1Pīcpadsmytajā keizara Tiberija vaļdeišonas godā, kad Pontijs Pilats pōrvaļdeja jūdu zemi, kad Erods beja Galilejas tetrarchs, un jō brōļs Filipps — Iturejas un Trachonitis apgobola, un Lizanijas Abilenes tetrarchs, 2kad par vērsgoreidznīkim beja Annass un Kaifass, Dīva bolss atsasauce uz Zacharija dālu Jōni tuksnesī. 3Jys apstaigōja vysu Jordana apgobolu, sludynōdams grāku atlaisšonai grāku vaidēšonas kristeibu, kai ir raksteits pravīša Izaja pravītōjumu grōmotā:

4Tuksnesī saucūšs bolss:

sagatavojit Kungam ceļu,

padorit taisnas Jō stygas.

5Ikvīnai īlejai jōbyun pīpiļdeitai,

ikvīnam kolnam un kaļneņam pazamynōtam,

leikumim — izklainōtim

un naleidzonumim padareitim par leidzonu ceļu.

6Tūlaik ikvīns cylvāks īraudzeis Dīva pesteišonu.

7Ļaužu pulkim, kas gōja uz jū kristeibas pījimtu, jys saceja: Čyusku dzymums! Kas jums apgolvōja, ka jyus izbēgsit nu tyvojūšōs dusmes? 8Dūdit tad grāku vaidēšonai atteiceigus augļus un nasokit: Mums Abraams ir tāvs. Es tadei jums soku: Dīvs spēj nu šitim akminim Abraamam dālus izsaukt. #3:8 Napīteik tō, ka asat Abraama bārni, bet vajag Dīvam ticēt un Jō klauseit tai, kai Abraams. 9Cērvs jau ir klōtu pi kūka saknes; ikvīns kūks, kas nadūd lobu augļu, tiks izcērsts un gunī īmasts. #3:9 Cērvs jau klōtu — strōpes laiks jau ir klōtu.

10Un ļaužu pulki vaicōja nu jō saceidami: Kas mums jōdora? #3:10 Kas doroms, lai pōrlyugtu Dīva taisneibu. 11Jys atbiļdēja: Kam ir diveji svōrki, tys lai īdūd tam, kam nava; ari tys, kam ir ēdīņs, lai tai pat dora. #3:11 Jōņs Kristeitōjs grāku pīdūšonas sajimšonai īteic žāļsirdeibas dorbus.

12Ari muitinīki gōja kristeibas pījimtu. Jī vaicōja: Mōceitōj, kas mums doroms? 13Jys tim atbiļdēja: Napīprosit vairōk, kai jums ir pazeimōts.

14Tai pat ari karaveiri nu Jō vaicōja: Kas tad mums doroms? Jys tim atbiļdēja: Nadorit nivīnam pōresteibas, namōnejit, bet gon esit mīrā ar sovu olgu.

15Ļaudis beja uzbūdynōti. Jī sevī pōrdūmōja: Vai Jōņs tik nav Kristus. 16Jōņs atbyldādams saceja visim: Es jyusus krystu ar yudini, bet pēc manis nōks par mani spēceigōks. Es naasmu cīneigs atraiseit Jō kūrpem saišku. Jys jyusus kristeis ar Svātū Goru un guni. 17Jys ar laišku rūku teireis sovu kulu: kvīšus savōks sovā orodā, bet palovas sadadzynōs nadzīstūšajā gunī. 18Ari daudz cytu pōrsorgōjumu Jys deve ļaudim, sludynōdams tautai Prīceigū Ziņu.

19Tetrarchs Erods brōļa sīvas Erodiades un cytu ļaunu dorbu dēļ, kurus Erods beja padarejis, sabōrts, 20klōt pi tō vysa, padareja vēļ tū, ka Jōni īslūdzeja cītumā.

K. Jezus pījam kristeibu.

21Un nūtyka, ka visi ļaudis pījēme kristeibu, un kad Jezus pēc kristeibas lyudzēs, atsadareja dabasi un 22Svātais Gors radzamā veidā nūsalaide uz Jō kai bolūds, un nu dabasim atskanēja bolss: Tu esi muns nūmīļōtais dāls; tu maņ īpatiki.

K. Jezus ciļtsgrōmota.

23Sovas darbeibas īsōkumā Jezus beja ap trejsdesmit godu vacs. Jys tyka dūmōts asam Jezupa dāls, kura (prīkšteči) beja: Heli, 24Matats, Levi, Melchi, Jannajs, Jezups, 25Matatias, Amos, Nahums, Heslis, Naggajs, 26Maats, Matatias, Semejs, Josechs, Joda, 27Jōņs, Reza, Zorobabeļs, Salatieļs, Nerejs, 28Melchis, Addejs, Kozams, Elmadams, Hers, 29Jezus, Eliezers, Jorims, Matats, Levis, 30Simeons, Jūds, Jezups, Jonašs, Eliakims, 31Melejs, Menna, Mattats, Natans, Davids, 32Jesse, Obeds, Boozs, Sala, Naassons, 33Aminadabs, Admins, Arnejs, Ezroms, Farezs, Juds, 34Jākubs, Izaaks, Abraams, Tara, Nachors, 35Saruchs, Regaus, Faleks, Ebers, Sala, 36Kainams, Arfaksads, Sems, Noes, Lamechs, 37Matusals, Enochs, Jareds, Malaleels, Kainans, 38Enos, Sets, Odums, kurs beja Diva (radeits).

Currently Selected:

Evangelijs pēc Lukasa 3: LGT

Highlight

Copy