Keriekitho 11
11
Babel Tsiepfheu
1Siro kijü pete rei die puo mu pfhe puo zo. 2Ukoe niathutsa rühou tuo di Shinar nu kijüthezha puo nu vor lhouta. 3Sitse ukoe huoniehuo ki, “Úko ita chülie mu rie pevi selie khe,” ilie. Sidi ukoe ita pie ketsie sou chülie mu süko nyhü kemaketuo la nyoba selie. 4Süsie ukoe “Úko nadi puo chülie mu sünunu tsiepfhe pfhe kho teiko thulie di u za chü kemeyielie mu úko rei kijü zieu gei kezakezi tuota moketuo chülie khe,” ilie. 5Süsie Jihovae themiako chüse keba nadi mu tsiepfheu mehotuoü ker. 6Sitse Jihovae sie “Hako themia kro puo zo mu uko die rei puo zo, hauha uko mhatho therieu zo. Cha mo di ukoe chü kenyü pete chülie vi partatuo. 7Kerlie, úko ke di uko die bie kebvüwa di uko bu huoniehuo die silie mota khe.” 8Sidi Jihovae uko pfüphropie kijü lukihaki shüwata di uko bu nadiu chülie mota. 9Süla nadiu za pie Babel chüte, kekreilamonyü Jihovae themiako die bie kebvüwa mu sünunu Jihovae uko bie kezapie kijüu gei lukihaki shüwaketa la.
Shem Nuosenuoyieko
(1 Seyie 1:24-27)
10Hako Shem nuosenuoyieko. Dzüdiu sie cie kenie cie, Shem-e puo kelhouzha cie krie puo ki puo nuo thepfumia puo, Arpakshad ngulie. 11Süsie puoe cie krie pengou lhou sa di puo nuo kekrei thepfu mu thenu ngu salie.
12Arpakshad-e cie serepengou ki puo nuou Shela ngulie. 13Siro Arpakshad-e Shela penuokelie sie cie kriedia di se lhou sa di puo nuo kekrei thepfu mu thenu ngu salie.
14Shelae cie ser ki puo nuou Eber ngulie, 15mu Shelae Eber penuokelie sie cie krie dia di se lhou sa di puo nuo kekrei thepfu mu thenu ngu salie.
16Eber-e cie seredia ki, puo nuou Peleg ngulie 17mu Eber-e Peleg penuokelie sie cie krie dia di ser lhou sa di puo nuo thepfu mu thenu ngu salie.
18Peleg-e cie ser ki Reu ngulie; 19mu Reu penuokelie sie Peleg-e cie krie kenie di thepfü lhou sa di puo nuo thepfu mu thenu ngu salie.
20Reue cie serekenie ki puo nuou Serug ngulie, 21mu Nahor-e Tera penuokelie sie cie krie kenie di thenie lhou sa di puo nuo kekrei thepfu mu thenu ngu salie.
22Serug-e cie ser ki puo nuou Nahor ngulie, 23mu Serug-e Nahor penuokelie sie cie krie kenie lhou sa di puo nuo kekrei thepfu mu thenu ngu salie.
24Nahor-e cie mepfüethepfü ki puo nuo Tera ngulie, 25süsie puoe cie krie puo di kerethepfü lhou sa di puo nuo thepfu mu thenu ngu salie.
26Terae cie hiethenie ki puo nuo Abram, Nahor mu Haran hako ngulie.
Tera Nuosenuoyieko
27Hako Tera nuosenuoyieko: Puoe Abram, Nahor mu Haran-nuoko puou mu Haran-e Lot puo. 28Haran-e puo thuo puo rüna, Chaldia nu keba Ur rüna, puo kepenuo chüu nunu puo puo mhodzü siata. 29Abram mu Nahor unie thenu lielie. Abram kimia za Sarai mu Nahor kimia za Milka. Hapfü nuo puo liro Haran, Milka mu Iska-nuo puou. 30Derei Sarai nuojüpfü puo; puo puo nuo jü. 31Siro Terae puo nuou Abram mu puo tsuu Haran nuou Lot siro puo miepfü Abram kimia Sarai, zelie di Chaldia nu keba Ur rünau khawa di Kanan kijü nu voketuo la tuota; derei uko Haran nu vor di sünu lhou bata. 32Siro Terae puo kelhouzha cie krie kenie di pengou ki Haran nunu siata.
Currently Selected:
Keriekitho 11: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
