Johan 15

Jisu Khubebo Ketho-u

1“A khubebo ketho-u, mu a Puoe liecieu zo. 2A geinu kepar puoco kehoupuorei puosi vülieya kemo-u puo süu sawaya, mu puoco kehoupuorei puosi vülieyakezhau puo süu bu puosi vü kralieketuo la meza#15:2 Grik nu puoco rhuokecü mu mesakecü dielou nie puo zo. kemesashüya. 3A nieko ki pukeshü dieu la nie mesa bate. 4A nou balie, a rei nieko nou bakezha tuoi. Puocoe puobo-u gei ba kemosie puosi vülieya kemo tuoi, nieko rei a nou ba kemosie nie si vülie kenjü. 5A khubebo-u zo, nieko we puocoko zo. Kehoupuorei a nou ba mu a puo nou bakezhamia u si vü philieya; kekreilamonyü a sa mo di nieko mhapuorei chülie kenjü zo. 6Kehoupuorei a nou ba kemo-u puoco tuoi kelhouwaya, sidi kitaya; siro mia süko rhe kengulie di kelhoupie mi nu thewaya. 7Nieko a nou ba mu a dieko nie nou ba ro mha nie neiko chaliecie, siro süko chüpie nie tsütuo. 8Nieko si vü phikelie geinu a Puou zayie chülietuo mu sügeinu nieko ae pethakeliemia chülietuo. 9A Puoe a khrieyakezha tuoi a nieko khrieya, nieko a kekhrie nu baliecie. 10A a Puoe diekhakeshüko chülie di Puo kekhrie nu bakelie tuoi a diekhakeshüko nieko chüya ro nie rei a kekhrie nu balietuo. 11A mha hako pie nieko ki pukeshü a keneiu bu nieko nou balieketuo la, mu nie keneiu bu tseilieketuo la zo.

12“A nie ki diekhakeshü sü, a nieko khrie kevor tuoi nieko bu huoniehuo khrienucüu zo. 13Mia puoe puo khriethoko la puo phou khakeshü hahaki kekhrie kezha jü. 14A nie bu chünukeshüu chüya ro nieko a khriethoko zo. 15A nieko üse kituomia#15:15 Gk Diemia. üdi kie sa mote, kituomia puo niepuu kedipuo chüya shicü siya kemo la; sirei a nieko ü khriethoko üte, kekreilamonyü a a Puou kinu sikelie khe pie nie pesipengushüwate. 16Nieko a kedalie mo, derei a thuo nie kedalie. Nieko bu vo nie si vülie mu nie si süu bu ba seilieketuo la a nieko pethoshü, mu nieko mhakehoupuorei a za nunu Puou ki cha ro puo süu chüshü nie tsütuo. 17Nieko bu huoniehuo khrielieketuo la a die hako khashü ho.

Kijüu Jisu Ngumecütaketuo

18“Kijüu nieko ngumecüya liro süu nieko ngumecüketa mhodzü a ngumvüketa siliecie. 19Nieko kijüu vie üro,#15:19 Gk Kijüu nu mia. kijüu nie üse puo vie üdi nie khrietuo. Sirei nie kijü hau vie mo zo, derei a kijü hau nunu nieko kedaliete, süla kijüu nieko ngumecüya. 20A nie ki, ‘Kituomia u niepumia ki zha mo,’ idi pukeshüu rükraliecie. Uko a pese ro, uko nieko sa pesetuo; uko a die zeya ro uko nieko die rei ze zotuo. 21Derei a za la uko nie gei mha hako pete chütuo, ukoe a ketsekeshüu siya kemo la. 22A vor di mha hako uko ki pushü kemosie we uko phouma lhomu ru, derei tsie we uko u kephouma keprülieketuo ba jüte. 23Kehoupuorei a ngumecüyakezhau a Puou rei sa ngumecüya. 24A uko donunu miapuorei chüshü kemo mhathoko chüshü mo üro uko phouma lhomu ru. Derei tsie we uko mha süko ngushüte, süla a mu a Puo rei ngumecüya. 25Süu thiedzü uko zho-u nu, ‘Uko puoca kejü nu a ngumecüte,’ idi thupie kezhü dieu bu tseilieketuo la zo.

26“A u Puou kinu ketsepie nieko ki shüketuo Thukepeluou#15:26 Moro Kekhruohiu., Puou kinu kepar ketho Ruopfüu, nieko ki vorlie ro puo thuo a zhapu chülietuo. 27Nieko rei a zhapumiata zo, kekreilamonyü nieko sietsenu a ze tuoketa la.

Currently Selected:

Johan 15: ANBRBSI

Highlight

Copy