Mark 11
11
Jisu Meyiemeluo Jerusalem nu Kele
(Mat 21:1-11; Luk 19:28-40; Joh 12:12-19)
1Siro uko tuo Jerusalem kepenuoki Betfage mu Bethani rünanie khie Oliv Kijüthou gei vorlie, sitse puoe pethakelie kenie ketseshü, 2di sie unie ki, “Tuose nnie mhodzütsa keba rünau nu vocie, mu nnie sünu volie mumetha, nnie miapuorei puo gei siekemo gada yopuo khepie tha di ngulietuo ho; süyo phreilie di ze vorlie. 3Mia huo nnie ki, ‘Nnie kidi hiya ga?’ idi ketso ro, ‘Niepuu hau se morosuoyalie, mu puo ketse lapie hanu shü mhaiwatuo,’ isiliecie.” 4Süla unie tuo vo tse cha khie kikha kepenuoki puo nu mia gada yopuo khepie ketha ngulie. Süla unie süyo phrei tha tse, 5süki kethako huomia sie, “Nnie kiüdi gadayo phrei tha ga?” ita. 6Süla unie rei Jisu unie ki kepu tuoi pushü; sitse süko unie bu süyo phreilieta. 7Süsie unie gadayo ze Jisu ki vorlie tse, uko pfheko pie süyo gei khrashülie; sidi puo bu süu gei balie. 8Siro themia kekra u pfhe pie cha khrashü, mu kekreiko lie nunu seico zapie chau khrashü. 9Siro themia puo mhodzütsa ketuoko mu puo sietsa ketuoko shiekhoui di sie,
“Hosana!
Niepuu za se vorkezhüu thejakepfütho zo!
10U puou David kedi vorkezhüu thejakepfütho zo!
Tei pesotho gei rei Hosana!” ita.
11Süsie puo Jerusalem nu lelie di rüsuoki nu vorlie; siro puo reipra lutsahatsa mha pete mehoshü, mu menuotazhükecü la, puoe kerekenieko zelie di tuo Bethani nu vota.
Jisu Chiedebo Rüsekewa
(Mat 21:18-19)
12Süsienhie uko Bethani nunu parkezhü ki puo va merüta. 13Sidi puoe kepecie nunu chiedebo puoe puo nyü thekeba ngushü mu sügeinu mha huo ngulietuo nhie idi vo. Derei puo süki vor tse, puonyü sie mhapuorei ngulie mo, kekreilamonyü süki chiedesi kevü tei mocü la. 14Sitse puo süu üse, “Mhakipuorei miapuorei bu n geinu n si cü lalie lho,” sita. Süki puoe pethakelieko die süu si.
Jisu Rüsuoki Chü Kemesakecü
(Mat 21:12-17; Luk 19:45-48; Joh 2:13-22)
15Süsie uko Jerusalem nu vorlie. Sidi puo rüsuoki nu le di sünu mha khrü mu zekebako pete whuota, siro puo priesa keli kebako mizhü mu paruonuo kezeko bako phou pela phrewa; 16sidi puo mia puo bu rei mha pie di tuo rüsuoki nu vo mvüta. 17Siro puoe uko petha di sie,
“ ‘A ki üse seyie neiüko pete la kechaki puo chütuo, ikecü thupie zhü mo üme?’
Derei nieko hau pie kerügumia ki puo chü bate.”
18Sitse zievokezhako mu thezhokepethako süu sishü di, uko puo dukhrikewa cha pfhüvüta; ukoe puo preicü la, kekreilamonyü themia krodiu pete puo kepetha die la u ngo phretacü la. 19Süsie thevatieta tse, Jisu mu puoe pethakelieko nadiu nunu tuota.
Chiedebo-u geinu Kepetha Die
(Mat 21:20-22)
20Siro süsieduü uko tuo vokezhü ki, chiedebo-u sia zotsu puo mie tsokeba ngulie. 21Sitse Pitor puo sielelie di sie puo ki, “Rabi, mehoshücie! No rüsekewa chiedebo-u sü siate.” 22Siru Jisu uko ki, “Ukepenuopfü gei nie kepele nyiliecie.#11:22 Leshü kewe huo nu “N kepele nyi üro.” 23A nieko ki pu toushütuo, nieko kijüthou hau ki, ‘No rülou dzükezha nu letacie,’ idi kenoudo moto di puoe pukeshüu chülieketuo pele tou liro süu chülie zotuo. 24Süla a nieko ki puya, nieko nie mezhiemelo di mhakehoupuorei chashü ro, süu ngulieta ükecü pelelie, sitse süu ngulie zotuo.
25“Siro nie kehoukipuorei chatuo üdi siethakelie ki, huomia gei nie nei kemo ba ro vashü tsüwaliecie, sitse nieko Puou rei nie kejokemouko vashü nie tsütuo.” 26“Derei nie kekreimiako kejo vashü moro teigei nieko Puou rei nie kejoko vashülie lho.”
Jisu Kekuo Dze Ketsokecü
(Mat 21:23-37; Luk 20:1-8)
27Süsie uko Jerusalem nu la vorlie. Siro puo rüsuokiu nu tuo vokezhü ki, zievokezhako, thezhokepethako mu phichüko puo ki vor, 28di puo ki, “No kedipuo kekuo se mha hako chü tuoya ga? Supuo n bu mha hako chülie kevi kekuo kha n tsü ga?” 29Sitse Jisu sie uko ki, “A nieko ki mhapuo ketsotuo, nieko a die kelashücie, siliro a rei kedipuo kekuo se mha hako chütuo shicü pie nieko ki pushütuo. 30Johan mia dzülukepfüu teigei nu vor mo themia ki nu vor ga? A die kelashücie.” 31Sitse uko thuo kemeü di sie, “We, ‘Teigei nuwe,’ ishü ro puoe sie, ‘Di siro nieko kiüdi puo pele mo ga? isitie.’ 32Derei we sie, ‘Themia kinu vorwe,’ ishütuo ürei” uko themia kro-u prei, kekreilamonyü themia pete puo üse siedzekesi kethomia puo üdi peleyacü la. 33Süla uko Jisu ki, “Hie si mo,” ishü. Sitse Jisu uko ki, “Siro a rei kedipuo kekuo se mha hako chüya shicü nieko ki pulie lho,” siwata.
Currently Selected:
Mark 11: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
