Mark 4
4
Lieciemia Puo Tsia Keva
(Mat 13:1-9; Luk 8:4-8)
1Süsie puo dzükezha khieki nu mia petha la sie. Themia krodi vor puo houpfülieketa la puoe rou puo nu le bata, mu themiako dzükezha khie kijü keso nu ba. 2Sitse puo dievi nunu mhaneiü se uko petha, mu puo uko pethakecü nu hakemhie pushü. 3“Rünyüliecie! Tsiakevau tsia vatuoü tsu. 4Siro puo tsia prukeshü ki, huo te cha nu tsuta, sitse perako vor di süko pa cülieta. 5Siro tsia huo te ketsietsoru rünyo shü kemonu tsuta, mu rünyo shü kemo la tsiako tsü mha sierlie. 6Süsie niaki thusier tse süko puomie kre pesou kemo la phie pesiawa di kitota. 7Tsia huo te zohu donu tsuta, mu tsü sier tse zohuko bu süko gecüwaketa la puo si rüchülie mota. 8Mu kekreiko te kijü kevi nu tsukelieko lhou sier zhalie di puo si rüchülie, sidi huo ser, huo hiesorou mu huo krie puo vülie.” 9Sidi puo sie, “Themia kehoupuorei unyie kenyimia, sümia bu rünyüliecie!” sishü.
Dievi Kese Ca
(Mat 13:10-17; Luk 8:9-10)
10Siro puo keba nu kerekenieko ze puo houpfü keba kro puoe puo dievi cako ketsota. 11Sitse puo sie uko ki, “Keviepieketuo die kesou Ukepenuopfü kedi dze pie nieko we tsüwate, derei chazou kekreiko ki we mha pete rei dievi nunu puya, 12Süko geinu,
‘Uko meho we mehotuo, derei ngulie lho,
uko rünyü we rünyütuo, derei puoca silie lho;
uko rürei la vor di uko kejo valie lho ücü la.’ ”
Jisu Tsia Keva Dieviu Ca Pukeshü
(Mat 13:18-23; Luk 8:11-15)
13Sidi puo uko ki, “Nieko dievi hau silie mo me? Siliro nieko kikemhie di dievi peteko ca silietuo ga? 14Tsiakevau dieu prushü. 15Mu dieu prupie cha khie shükewako hako zo: uko silie tse, Satan kenourhei vor dieu te uko nou keleko seseketako zo. 16Mu prupie ketsietsoru gei shükewako hakoha: uko dieu sikeshü ki uko nei siei di lielie. 17Derei uko mie sou kemo la, zopuoki rübei balie, sidi dieu la kepechü morei kemezhiekecü sier tse, uko süu kha#4:17 Moro tetsuta.mhawa. 18Kekreiko liro prupie zohu donu shükewako: hakoha dieu rünyülie, 19derei kijüu rüliko, kishükinyiko kemehou mu kemehou kekrei neiüko bu dieu ge pejüwa di puo si rüchülie motayakezhako zo. 20Siro prupie kijü kevi nu shükelieko hakoha: Uko dieu rünyülie mu lielie, di u si rüchülie, sidi huo ser, huo hiesorou mu huo krie puo vülie.”
Mituu pie Merha Khro Keba
(Luk 8:16-18)
21Siro puo uko ki, “Mia mi petupie mituba gei mo di merha khro morei thezhü khro baya me? 22Kekreilamonyü pie mia pesipengushütuo ükecüu sie mhapuorei keviepie keba jü; mu mia bu ngulietuo ükecüu sie mhapuorei kepekhre jü zokecü la. 23Süla kehoupuorei unyie nyi di rünyüketuomia sümia bu rünyüliecie.” 24Siro puo la sie uko ki, “Nie rünyükeshüko le menuoliecie; nie mejükeshü tuoi mejüpie nie tsütuo; mu sü kezie rei kha sapie nieko tsü zotuo. 25Kekreilamonyü kehoupuorei kenyimia khapie u tsütuo mu themia kehoupuorei kejümia puo kinu ketuokoyo rei chüsetatuo,” ita.
Tsia Rüchükecü Dievi
26Siro puo sie, “Ukepenuopfü kedi-e huomia tsia se tsu prushü, 27di theva vo zeta mu teisolie ro la siertata iba, sirei tsiau kimhie di tsü par di zha miemielieya shikecü si kemo mhie zo. 28Kijüue puo thuo puosi rüchülie, therieu puo bo-u, süsie puolha pralie, süsie puokre mu puokre geinu puosi rüchü tshulie. 29Derei telha me lotsolie tse lieyie tei tsoketa la puo zhiepfhinuo se süko relieya.”
Gakrie Tsia Dievi
(Mat 13:31-32,34; Luk 13:18-19)
30Siro puo sie, “We Ukepenuopfü kedi pie kedipuo ze kemejü ta? Morei we süu la dievi kikecüpuo se ta? 31Süue gakrie tsia yopuo kemhie zo, süyo se tsu kijü nu prukeshü ki mha tsia pete ki cü, 32derei se tsu leishü di tsü parlie ro ga pete ki zhataya, sidi puo co kezhazhacü the parlieya, di teirako bu puo khrükhro nu rüselie kevi chülieya”, sita.
33Jisu dievi hamhiecü kekra se mia petha; puo uko silie kevi de dievi nunu uko ki pu. 34Puo dievi se mo di uko ki mhapuorei pu mo, derei puo puoe pethakelieko rübeiketa ki puoca pete vatshashüya.
Jisu Khriedi Kekhakewa
(Mat 8:23-27; Luk 8:22-25)
35Siro sünhie thevatieta tse puo uko ki, “Úko tuo lutsakhie pfüta khe,” sishü. 36Mu uko themia kro-u khawa di puo siedziko rei Jisu le baketa rouu nu lelie di puo ze tuota. Süki rou kekrei huo rei tuo. 37Siro khriedi puo sierta, mu dzü rüpfhüu vo rouu vata, sidi dzü bu rouu tshuta. 38Derei puo we rou sietsa nu tsükhe puo se di zezhü; sitse uko puo kesoulie di sie puo ki, “Kepethau, úko siatatuo ükezhü n noumeca mo me?” 39Sitse puo sierlie di teikhrieu kerhieshü di dzükezhau ki “Kemekrie zeitalie!” sishü. Sitse teikhrieu kemerie chü sa mo di la zeita. 40Sitse puo uko ki, “Nieko kiüdi michieya ga? Nieko tsie rei nie kepele nyilie mo zo me?” 41Sitse uko kedethorwaketa la uko huoniehuo ki, “Themia hauha kikecüpuota mu? Teikhrie mu dzükezha thuo rei puo die zeyakecü ha!”
Currently Selected:
Mark 4: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
