Kejadian Uram 18
18
Er Iya Erebdobnyi biryi Abraham bisi, “Sal mi karebkwamakin,” ebmou deyok
18:1-15
1Abraham bira mutuk si Mamre dam kuramwe. Uki tentok tum ara kiting deibmou ba, kiting tin kubmou ura, co si tarbantin deyok dam asi bukmou. A dikum ara er ai keis ol ai doboka kuramwe ai bisik bublan dam asi bukmou. Asi Er Iya Erebdobnyi Abraham dam yandoka lak kibdanmou. 2Ura, Abraham a bukoka dirweleramwe uca, er urasin dam asi ninyi winiryi a yandoka tikmai asi asing eibmou. Ura, a keis ol ai dam aryi cungbindoka a yandoka tikmai nang sun boukwe dam binmou ura, kisok luknubdongoboka sunsi kibdobmou. 3Ura, ato ebmou, “Nai yabwe, sun almalakoka bana mem. Sun kanya aryi teleb kubsici ura, ‘Anyi bukmar ai dam a dikdik seabibyi ani, binkwayeb,’ tenebmunyi ura, ni ab tonkwa a buramibyi ani, bindarur,” ebmou. 4Ani, Abraham biryok tubto ton ato ebmou, “Me kweyandoka sun nang yan me ilikeibsinyi ura, a co tarbantin deyok dikdik sebdobmunyi ura, bindarur. 5Nai yabwe, nisi boukwe kiboka ni ai dam yanmarum ati, ukura ni ai wengbindoka roti ton borbinkwansin. Boyasinyi ba, yibdobmunci, mikib kubsici ba, bindobdarur,” ebmou. Ba, a nang aryi ato ebmai, “Yo teleb, ur kan ebmarim to ukubsurum,” ebmai. 6Ura, Abraham ola cungbindoka er ner Sara bisi keis ol ai binmou ura, ato ebmou, “Roti kiknina tepung teleb dinyi akwe kitin winiryi doboka ola kiknirongdum! Taruk aryi iniboka kiknirongminyi ani, kisok roti akwe kiknibdum!” ebmou. 7Ura, Abraham bira cukaboka er bisam sapi winiramwe ai dam binmou. Ura, bindoka sapi mi ukuryok nenmoua asi doboka er milinanyi bisi tomobkarebmou. Ba, anyi biryi ola oboka sekmouci, kwalibmou. 8Sirya ura, Abraham biryi a roti kisok ab, a bisam tub ab, moum yung me ab boboka a winiryi nang ati yandoka karebmou ba, yibmai. Ba, Abraham bira a nang yinmaia dam a tikmou ba, yinmai. 9Ura, a winiryi nang aryi ato asibmai, “Kan ner Sara bira dantam kunmar da?” eboka asibmai. Uca, Abraham biryi ato ebmou, “Ni ner Sara bira keis ol ai o bukmar,” ebmou. 10Ura, Er Iya Erebdobnyi biryi ato ebmou, “Niryi iya dib uram aryi ebkwinkin ara o kwalina asi a kunmab talak kunmaci ura, kan ab ebdankwanim. A ebdanimnyi tum aryi kan ner Sara er mi sal deiboka iriboka bukmaci bok, ebdankwanim,” ebmou. Ba, a erdeirinmou uram ara Sara bira akai bisik bublan dongtam tikoka kekerongmou bok sisingmarei. 11Ucab, Abraham ab Sara ab ara iya wis danandei. Ani, er ner Sara bira mi kin aling sirya tumakamwe bok asi ato ebmou. 12Ato ebmou deyok aryi Sara er kanyatam aryi ato tenebmou, “Nibabyi ni akenyi babyi sirya wis danoumwe. Ni sirya wis dase aryi ni mabur sirya tumakanute bok asi, da yuk kilkil dongobkwamasute do?” tenebmouci, akwi tubmou. 13Uca, Er Iya Erebdobnyi biryi Abraham bisi ato ebmou, “Sara biryi, ‘Ni wis sirya dase bok, mi deibkwan ara dib deibkwan do?’ tenen akwi tubmar ara unati do? 14Ni Iya Erebdobnyi bira ukubman kumto dinyi asi kunubdeibkwanunyi kunun. Ati, o kwalina, ‘Kan dam yankwan,’ ebman tum yanyi tum ara kan ner Sara biryi sal mi deibkwande,” ebmou. 15Ba, Sara a ebmou uram ara er ilil kubmou ura, inina dokmouci, ato ebmou, “Ni akwi ton kum tubman,” eboka inina dokmou. Uca, Er Iya Erebdobnyi biryi ato ebmou, “Kan sirya akwe tuabumwe ni bikmakin,” ebmou.
Abraham biryi Sodom atei ninyi ati, Er Iya Erebdobnyi bisi molobliknibmou deyok
18:16-33
16A winiryi nang isin sirya seboka yina sirya yibdobmai ura, anabdobmai. Ura, Abraham bira sun bongbinkwamou ati sunsi milibmou ba, tonkwa binmai. Ura, barabyi ani, mutuk yim deici asi tingbinmai ura, Sodom atei doramnya dibkwetebmai. 17Ura, a banmai talak aryi Er Iya Erebdobnyi kanyitam aryi ato tenebmou, “Sodom ab, Gomora ab asi ukubkwaman to ara Abraham bisi lak minob ebkwan do? Lak kum ebkwan do?” tenen Er kanya kankana kubmou. 18Uca, ton tenebmou ara, “Abraham er yaldangna mabwe aryi odei-odei binkwaming. Ani, er yaldangna aryi sien nang kiboka talebde binkwaming. Ani, Ni kisal dangna dinyi asi er deici aryi im dangna tukwe dangna nang nirya kisal dangna dinyi karebde binkwan. 19Ani, Niryi ersi wibsinyi biryi er deibdoba asi Ni Iya Erebdobnyi biryi, ‘Ato kubkwandarur,’ eanyi uram akwe kunuboka, sunci telebto dinyi ab, kikiman dinyi ab akwe kunubde binkwaming. Ani, Abraham er deibdoba aryi ersi ebdeianse to kunubde baramingnyi ura, Niryi sunsi kisal dakde binkwan. Ati, ni tenebman uram ersi ur lak ebkun,” tenebmou. 20Ura, Er Iya Erebdobnyi biryi Abraham bisi ato ebmou, “Sodom atei ab, Gomora atei ab aryi iya malyito dinyi kunubde banung ba, yuk mutuk ninyi aryi, ‘Sodom Gomora ninyi ara iya malyito dinyi kununung se!’ tenenung. 21Ato tenenungci, a deyok asi Ni dam erbanung to dib kunung do? Tonda, sangkuna tola ati, Ni dam erbaranununga, tenen dirbanman,” ebmou.
22Ura, a banmai nang ara ninyi bitinyi ara Sodom binmarei ura, Er Iya Erebdobnyi bira Abraham ab a tikmarei.
23Ura, Abraham bira Er Iya Erebdobnyi dam tingyanmou ura, ato ebmou, “Sodom ninyi nirya malyi dinyi kununung nang akwe kum dandeibkwamarim do? Malyi dinyi kununa kum kunung nang ababyi nirya laboka kum dandeibkwamarim do? 24Ba, sangkuna a weik atei dam asi ninyi yubwa 50 baryi nang teleb dinyi akwe kunun nang kuramingnyi ura, una kubkwamarim do? 25Telebto akwe kuramingnyi nang ab, malyito kuramingnyi nang ab neika laboka ona ara mem. Telebto kunuramingnyi nang asi malyi dinyi kunuraming nang kuraming to kubkwamarim. Ato kuboka ona ara taklobdum. Tukwetam nang nirya malyi kun dinyi liliboka wenenanyi kurum cok, ato dinyi kubkwamarim ara malyito kubkwamarim,” ebmou. 26Uca, Er Iya Erebdobnyi biryi ato ebmou, “Sodom atei asi ninyi 50 baryi, telebto dinyi kunuramingnyi nang ton asing eibnyi ura, sun deyok aryi akatei asi kum danardeirina kum kubkwaman,” ebmou.
27Ba, Abraham biryi tubto ato ebmou, “Nira ninyi sirik aca, nira sici ab tukwe borbosa ab aryi kiknibmanoumwe kunun. Bok, Nai Iya Erebdobnyi, niryi Kansi luknubdongoboka molobmakin. 28Akatei dam asi malyi dinyi kununa kum uca, telebto akwe kuramingnyi nang ara 45 baryi kuramingiryi, amubaryi nang ara malyi dinyi kunuramingnyi nang kuramingnyi ura, a amubaryi nang deyok atikwe akatei kum dandeibkwamarum do?” ebmou. Uca, Er Iya Erebdobnyi biryi ato ebmou, “Ninyi 45 baryi asi teleb dinyi akwe kunun nang asing eibnyi ura, akatei ara kum danardeirina kum kubkwaman,” ebmou.
29Ani, tubto Abraham biryi ato ebmou, “Ba, ninyi 40 baryi nang teleb dinyi kunun nang demang a kuramingnyi ura, una kubkwamarim do?” ebmou. Uca, Er Iya Erebdobnyi biryi ato ebmou, “A 40 baryi nang demang kuramingnyi ura, ‘Ukubkwan,’ tenebmanyi dinyi taklobkwaman,” ebmou.
30Ba, Abraham biryi ato ebmou, “Nai, tubto ebkun ara ninyi 30 baryi nang demang asi teleb dinyi kunun nang kuramingnyi ura, sunsi obminyei,” ebmou. Ba, Er Iya Erebdobnyi biryi ato ebmou, “Ninyi 30 baryok nang asi telebto dinyi kunun nang kuramingnyi ura, ‘Obkwan,’ tenebmanyi dinyi taklobkwaman,” ebmou.
31Uca, Abraham biryi tubto ato ebmou, “Nai, Iya Erebdobnyi, ni dabub asa aryi kansi ebkun ara ninyi 20 baryok nang demang telebto dinyi kunun nang kuramingnyi ura, a nang asi ona mem,” ebmou. Ba, Er Iya Erebdobnyi biryi ato ebmou, “Ninyi 20 baryok nang demang kuramingnyi ura, kum obkwaman,” ebmou.
32Uca, Abraham biryi tubto ato ebmou, “Nai, nisi yu bobniminyei, tubto ton asibdenkwankin. Ba, ninyi 10 baryok demang telebto kun nang kuramingnyi ura, una kubkwamarim do?” eboka asibmou. Uca, Er Iya Erebdobnyi biryi tubto ato ebmou, “Ninyi 10 baryi nang demang atikwe ara a nang asi ona kum kubkwaman,” ebmou.
33Ura, ukuboka sisingmarei ani, Er Iya Erebdobnyi bindobmou. Ba, Abraham bibabyi tamuboka er atei yandobmou.
Currently Selected:
Kejadian Uram 18: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
