Kejadian Uram 23
23
Sara dibmou ba, tukwe dekoka dongobmou deyok
23:1-20
1Sara kam kuramwe talak kwalina ara yubwa 127 baryi kam kubmou cok, dibmou. 2Ba, Sara er dibmou mutuk ara Kanaan mutuk asi Kiryat-Arba#23:2 Kiryat-Arba atei yuk si ara Hebron atei kuamwe. dam atei dibmou. Ba, Abraham yandoka boukwe aryi engena weikto engebmou. 3Sirya engebmou ura, Abraham er ner dibmoua tukwi ara a takloboka Het yala nang dam asi binmou. 4Ura, bindoka ato ebmou, “Nira sun mutuk dam a tingyandoka kunun ati, sun mutuk dam asi tukwe ton ebnindarur. Ba, ni ner dibmara tukwi asi boboka tukwe dongobkwan,” eboka molobmou. 5Ura, Het yala nang aryi Abraham bisi ato ebmai, 6“Nai, nunci kansi uram ton ebkwankib asi kekerum. Nai, kanda mikib ilintonyi kurum, ati kan ner dibmara tukwi ara telebto nun wibdiboubwe tukwe dam asi dongobkwamarim. Nun yala nang aryi a tukwe asi kan ner dongobkwamarim dinyi ati, uram ton talena kum kubkwamaking,” ebmai. 7Ba, Abraham biryi Het yala nang a tukwe dam nang asi bindoka kisok luknubdongoboka kibdobmou. 8Ura, sunsi ato ebmou, “Ni kwit yabwe teleb. Sunci mundu lobmanurum ati, ni ner tukwi borbinmanyi ani, tukwe dongobkwaman. Ati, sunci Zohar mi Efron bisi molobdarur. Anyi er mutuk Makhpela keil siling um asi ni ner tukwe dongobkwan. 9Ba, anyi biryi er mutuk dam Makhpela keil siling um a mutuk kubkub dam otam kuboka asi niti ebnici ba, sun dinmamunya dam aryi ersi bona weikto tabakdongoboka dekwan. Ba, a keil siling um ab, a mutuk ab ara ni dinyi kibkwande,” ebmou. 10Ura, a talak ara Het yala nang ara akatei lika bisik bublan dam asi uram sisingmai. Ba, Efron bibabyi a uram sisingmai a dam bukmou aryi Het yala nang kekenmai bok, Efron biryi Abraham bisi ato ebmou. 11“Nai, ni yala nang nirya a wekmangci kekenmang dam aryi kansi ebkwinkin. Ara, a mutuk ab, a keil siling um ab asi kanti ebkin. Ati, kan ner a keil siling umbura ur dongobdum!” ebmou. 12Ba, Abraham biryi kutam sunsunuboka buryibinmouci, tukwetam kisok ikdongoboka sunsi kibdobmou. 13Ura, Abraham biryi Het yala nang a wekmaici, kekenmai bok, Efron bisi ato ebmou, “Nisi kekenurum! Niryi kansi a mutuk dekinyi ura, ni ner dibmar ba, o deibmar ara a mutuk dam boyandoka tukwe dongobkwan,” ebmou. 14Ura, Efron biryi Abraham bisi ato ebmou, 15“Nai, kekerum, a mutuk dekwamanirim ara dengna weik keil perak yubwa 400 baryi deknurum. Bok, a dekmanimnyi dinyi ara teleb dinyi do? Ati, kan ner dibmara tukwi ara ur a mutuk dam dongobdum!” ebmou. 16Ura, Abraham biryi Efron er molobmou to ikin kiklibdeboka keil perak yubwa 400 baryi dekmou. 17Ato kuboka Abraham biryi ninyi si Efron er mutuk si Makhpela dam asi dekmou. A mutuk Makhpela dam nirya dekmou ara keil siling ab, co otong ab, mutuk wiliba dina-dina ab nirya dekmou. Ara, dikum ara Mamre mutuk yaletam kuboka asi dekmou. 18Ura, a dekmou mutuk ara Het yala nang akatei lika bublan dam yandoka uram sisingmai nang nirya asing eibmaici, a mutuk ara Abraham mutuk kibmou asi bikmai. 19Ura, Abraham biryi er ner Sara dibmoua tukwi ara Kanaan mutuk akwe mutuk Mamre dam bok, Hebron atei dam Makhpela keil siling um asi deibmou. 20Ato kuboka Het nang mutuk asi, Abraham biryi dekdobmouci, er tukwe dongon mutuk kibmou.
Currently Selected:
Kejadian Uram 23: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
