Kejadian Uram 25
25
Abraham ner Ketura biryi yaldakmou ninyi deyok
25:1-6
1Abraham bira ner ton dobmou. A ner si ara Ketura dobmou. 2A ner Ketura biryi deibmou nang si ara Zimran ab, Yoksan ab, Medan ab, Midian ab, Isybak ab, Suah ab deibmou. 3Ba, Yoksan biryi Syeba ab, Dedan ab deibmou. Ba, Dedan biryi yaldakmou nang ara Asyur nang ab, Letush nang ab, Leum nang ab kunung. 4Ba, Midian biryi yaldakmou nang ara Efa ab, Efer ab, Henokh ab, Abida ab, Eldaa ab deibmou. Sun a nang nirya ara Ketura biryok yaldakmou. 5Abraham er bona talena nirya ara er mi Ishak bitikwe kareamwe. 6Bok, Abraham er kam tuba kuramwe talak ara er nerabwe aminda tanuramwe nerabwe aryi deiriramnyi mabwe ababyi bona kareramwe. Ani, er aminda dortanuramwe nerabwe aryi deiriramnyi mabwe nirya asi, “Kanaan mutuk yaletam kuboka bindobdarur. Ba, Ishak er yuk a kubkwande,” ebmou ba, bindobmaici, kuroramnyi.
Abraham dibmou ba, tukwe dongobmai deyok
25:7-11
7-8Abraham kam kuramwe ani, er otong ara kul otong akwe abmouci, kwalina yubwa 175 baryi kwalibmou cok, dibmou. 9-10Ura, er mabwe Ishak ab, Ismael ab aryi mutuk si Mamre dinatam kuboka Makhpela keil imira deibmarei. A mutuk Makhpela ara minob talak Abraham kam tuba kunmou uca, Het yalanyi si Zohar mi Efron bisi dekamwe. A mutuk dekamwe ara er ner Sara dibmou ba, a keil imira deibkwamouci, Het mutuknyi bisi dekamwe. Abraham erbabyi dibmou ura, neik mutuk akwe, neik keil imira dam deibmarei. 11Abraham sirya dibmou ura, Er Iya Erebdobnyi biryi Ishak bisi kisal dakmou. Ba, Ishak kuramwe mutuk si ara Lahai-Roi me anamna dam kuramwe.
Abraham mi Ismael deibdoba deyok
25:12-18
12Ismael bira Abraham mi kuramwe. Ismael er kwin si Hagar bira Mesir mutuk ner asi Sara er miliboka ai me ilingna ner kiamwe uca, Abraham dobmouci, a mi Ismael deiamwe. 13Ismael er mabwe deibmoua sun si yuma aryi kuboka deyok lilibde bana ara ato: Yuma kobdob ara Nebayot deibmou. Anyi deibmoua dam ara Kedar deibmou. A dam ara Adbeel deibmou, a dam ara Mibsam deibmou. 14A dam ara Misyma deibmou, a dam ara Duma deibmou, a dam ara Masa deibmou. 15A dam ara Hadad deibmou, a dam ara Tema deibmou, a dam ara Yetur deibmou, a dam ara Nafish deibmou, sirya ara Kedma deibmou. 16Ismael mabwe ara ukuboka yaldakamwe ba, sun atei doramnyi to ab sun ai yuk-yuk keis ol ai dobde kuramnyi to kuboka sun yala yuk-yuk kibdamiryi, sien nang amolbaryi bukoka, taleamiryi kuramnyi. 17-18Ba, sun nai Ismael kam kuramwe talak kwalina ara 137 baryi kwalibmou cok, dibmou. Ura, Ismael yaldangna ara yuk buluboka wibdobmaici, mutuk si Hawila dam aryi kuboka Syur dam kibdobmai. A mutuk ara Mesir mutuk dam asi yaletam kuboka, mutuk si Asyur tam kuboka era yuk mutuk asi kuramnyi. Ba, sun kwit yabwe Abraham mabwe ton ner aryi deibdoba Ishak mabwe ara dinatam mutuk tuba kuroramnyi.
Ishak mabwe Esau ab Yakub ab deyok
25:19-34
19Abraham mi Ishak biryi yaldakmou mabwe deyok ara ato. Abraham biryi Ishak deibmou. 20Ura, Ishak kuramwe ani, kwalina yubwa 40 baryi kwalibmou bok asi, er ner Ribka dobmou. A ner Ribka bira mutuk si Padan-Aram nerabwe asi doyandoka kabdeiamnyi. A ner er nai si ara Betuel ba, er malnyi bira Aram mutuknyi si Laban kuramwe. 21A ner Ribka bira mi deirina kum kuramuryi, mi you ner kiamwe. Ati, Ishak biryi Er Iya Erebdobnyi bisi molobmou. Ba, Er Iya Erebdobnyi biryi Ishak er molona kekebmouci, er molobmou to kunubdeibmou. Ba, er ner mundu bobmou. 22Uca, a ner mundu boamwe ara kwabitinyi mabwe boamwe. A mabwe alok bitinyi ara sun kwin mundu umbura maandei dam aryi limkusungdarandei aryi sun kwin mundu louknyangnamwe. Ba, Ribka er kanya ara, “Nai e, una kubkwanir ati, ato kunurur do?” teneramwe. Ura, Er Iya Erebdobnyi bisi, “Ato kunurur dinyi ara una kubkwanir ati kunur do? Nisi eterebnurum!” eboka molobmou. 23Ba, Er Iya Erebdobnyi biryi ato eboka eterebmou.
“Ninyi yala bitinyi kan mundu umbura bobumwe.
Kan mundu umbura aryi ninyi yala bitinyi anabkwanding.
Tonyi bira mikib ilintonyi anabkwande.
Tonyi bira mitangnyi anabkwande.
Weitnyi bira er du asi erebdobci ba,
er du bira amwetam kibkwande,” ebmou.
24Ura, Ribka mundu boamwe ani, mi deirin tum sirya berekmou ura, kwabitinyi mabwe deibmou. 25Yuma deibmou mi si ara, “Esau” eboka si dobmou. A mi ara er bol nirya bi bol akwe kiamwe. Tonda, er nong nirya ara otong bi ongon aling atoanun mundu umbura aryi ongoamwe mi deibmou ati si dobmou.#25:25 Esau eboka si dobmai ara nun uram ara, “Otong abdobnyi,” eboka si doraming. Ton si ara Edom, “Bi mutuknyi,” eamnyi 26Ani, aminda er weit deibmou. A mi aryi er du yan kweim taruk talebmou tok deibmou. Ato kubmou deyok aryi aminda deibmou mi si ara, “Yakub,” eboka si dobmou.#25:26 Yakub ena ara nun uram, “Yan kweim talebmounyi,” eboka si dobmai. A si ara, “Tolanyi,” ena ati a si dobmai. A mabwe bitinyi deibmou talak ara sun nai Ishak kwalina yubwa 60 baryi kubmou bok, a mabwe deibmou. 27Ura, a mabwe bitinyi sirya nebmarei. Ura, Esau bira bai asi kurona er teleb kuramwe. Akiryi bai akwe kuboka bai bisam akwe dobde kuramwe. Uca, Yakub bira dakeiyam asa aryi atei akwe kuronanyi kiamwe. 28Ba, Ishak bira er mi Esau bisi kanyi deiriramwe. Ara, er mi Esau biryi bai bisam oboka boyangaramwe ba, Ishak yiramwe deyok aryi er mi Esau bisi teleb kuramwe. Uca, Ribka bira Yakub bisi kanyi deiriramwe.
29Uki tentok tum ara Yakub bira bi bol dang asi kwalinmou. Bok, Esau bai bisam dobde kunmou uca, kwaning utan aryi mitang kubmou ba, Yakub bisi binmou. 30Ura, Esau biryi Yakub bisi ato ebmou, “Ni kwaning utanmanirci, iya mitang kubmanir ati, bi dang mitikanun ton lukeibokniminyi ba, yibokwan,” ebmou. Ato ebmou deyok aryi er si ara, “Edom,” enung. 31Uca, Yakub biryi ato ebmou, “Ninyi wis aryi yuma mabwe ati, sun boramingnyi bona nirya kareraming. A kareraming dinyi ara nun nai Ishak biryi kanti karebkwankir dinyi ara nisi karebkwanurum. A karebniminyi ura, a yubmana bi dang du karebkwamakin,” ebmou. 32Uca, Esau biryi ato ebmou, “Anda bona atikwe, ni kwaning utan aryi dibmanto ati, ur kan da doronmaruma e!” ebmou. 33Ura, Yakub biryi ato ebmou, iya dib en uram ebminci, “Ninyi wisi aryi yuma mabwe ati, kareraming dinyi asi niti ebnurum!” ebmou. Ba, Esau biryi, “Dib en uram aryi ebkun ara wisi nang aryi du deiamingnyi mabwe ati, er nai boranci bona kareraming dinyi ara kan dobdobkwandim,” eboka mundu lobmou.#Ibr. 12:16 34Ura, Yakub biryi roti ab, bi dang me ab lukeibmou ba, yibdobmouci, tikoka bindobmou. “A dinyi ara sanglakana dinyi aca,” tenen aryi bikdob dinyi bok, asi er weit ati karebokmou.
Currently Selected:
Kejadian Uram 25: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
