साल्न्हाका चात्या 16
16
पावल कालाउ सिलास दोफा तिमोथि दुसुका
1पावल डर्बि सहर लुस्तारा सहरता बुङ लोहि। इन्ता तिमोथि मिङ हिका एमि चात्या हिघाहि। कालाउ वा एमि यहुदि खान्धुराइको बेबालको चान हिघाहि। कालाउ वाको आबा चाहि ग्रिक सारभिको बासिन्दा हिघाहि। 2लुस्तारा सहर कालाउ आइकोनियम सहरता हिका खान्धुराइ ओनेगेलाइ तिमोथिहेङ रेम्का द्याङ मानिघाखे। 3पावल ताइ दोफा तिमोथिहेङ चुम्पुलि मन पाहि, कालाउ इङको थामेता हिका यहुदिगेलाइको कारनहोइ पावल वासेहेङ चुम्पुतेङ खाताना पाहि। हाइपालिपानु वाको आबा ग्रिक सारभिको बासिन्दा हि, दोअ्का काथा झाराङहेङ थाहा हिघाहि। 4कालाउ न्हुसो पावल कालाउ वाको सानाइतिगेलाइ सहरगेलाइको दामा पातेङ हानिलाउ इम्बालाइ यरुसेलेम सहरको छाल्न्हाका चात्यागेलाइ कालाउ मन्डलिको आगुवागेलाइ पाका निर्नयगेलाइ खान्धुराइगेलाइहेङ केम्लि दोअ्तेङ हिङपाहि। 5एसापा मन्डलिको द्याङगेलाइ खाङधुरिता बल्लियाका जेङकाताङ कालाउ दिनाङ-दिनाङ द्याङगेलाइ सङख्याता बाढेकाताङ हानिहि।
म्यासिदोनियाता हानेका दर्सन
6पावल कालाउ वाको सानाइतिगेलाइ फ्रिगिया कालाउ गलातिया इलाकासो जेङतेङ हानिहि, हाइपालिपानु पबित्तरो आत्मा इम्बालाइहेङ एसिया प्रदेसता प्राचार पालि हानिलि रोकिहि। 7पावल कालाउ तिमोथि माइसिया प्रदेसको सिमानाता लोतेङ न्हुसो, इम्बालाइ बिथिनिया प्रदेसता हानिलि बिचार पाहि। कालाउ येसुको आत्मा इम्बालाइहेङ इन्सो हानिलि मापिहि। 8ओदोङ भाअ्सिङ इम्बालाइ माइसिया प्रदेस पातेङ समुन्द्रको काम्भेता हिका तरोआस सहर हानिहि। 9कोकोङ दिलिमा पावल एनोङ दर्सन निङहि, वाको दर्सनता म्यासिडोनिया प्रदेसता हिका एमि द्याङ जाअ्तेङ वासेहेङ बिन्ति पातेङ हिघाहि, “म्यासिडोनिया समुन्द्रसो इदोइ पार लोतेङ केलाइहेङ साघाइसु।” 10जेलाउ पावल इन्सिका दर्सन तिङहि, केलाइ धेमाङ म्यासिडोनिया प्रदेसता हानिलि तियार जेङन्हाहि। कालाउ केलाइ बुझिन्हाहि, कि परमेस्वर केलाइहेङ उङको द्याङगेलाइहेङ सुसमाचार प्राचार पालि काइका हि।
फिलिप्पिता लिडिया खाङधुरि पाहि
11ओदोङ भाअ्सिङ तरोआस सहरसो जाहाजता ताङतेङ केलाइ समुन्द्रको दामा पातेङ सिधाङ सोमोथ्रेसको टापु भारि हानिन्हाहि। न्हु दिना केलाइ नियापोलिस सहर थुकालि लोन्हाहि। 12कालाउ इन्तासो न्हुसो केलाइ फिलिप्पि सहरता थुकालि लोन्हाहि, जेदोङ म्यासिडोनिया प्रदेसको मुख्य सहर कालाउ रोमिगेलाइको देरागेलाइ बुङ हि। कालाउ केलाइ इङको सहरता आले दिना थेकापा हिनाहि।
13परमेस्वरको पबित्तरो दिनाता केलाइ सहरको फिनुसो बाहार ओल्लेतेङ झोराको काम्भेता हानिन्हाहि, हाइपालिपानु इन्ता यहुदिगेलाइको प्रार्थाना पाका एनोङ थामे हि वाला दोअ्का केलाइ सोचिका हिघान्हाहि, कालाउ इन्ता केलाइ योम्न्हाहि कालाउ जोम्तेङ हिका बेबालाइ दोफा काथा पालि तेङन्हाहि। 14केलाइको काथा हिङकालाइ मध्ये लिडिया मिङ हिका एमि बेबाल हिघाहि, वा थिआटिरा सहरसो लोका हिघाहि, वा नेल्पा धाबाको ब्यापार पाघाहि। कालाउ वा परमेस्वरको आराधाना पाका बेबाल हिघाहि। पावलको दोअ्का काथाता ध्यान पातेङ हिनाको दोअ्तेङ प्रभु वाको मन खोलि पिहि। 15जेलाउ लिडिया कालाउ वाको गोताङ जाहान बप्तिस्ता ह्रुहि। कालाउ न्हुसो लिडिया केलाइहेङ ताइको साअ्ता नेउता पिहि। कालाउ वा दोअ्हि, “जेसापा नेलाइ कासेहेङ प्रभु येसुको जातिङको खाङधुरि पाका मानिस्वाना पानु, काङको साअ्ता लोतेङ हिसु।” कालाउ वा केलाइहेङ वाको साअ्ता हिलि कर पाहि।
पावल कालाउ सिलास झ्यालखानाता
16जेलाउ केलाइ एनि प्रार्थाना पाका थामेता हानिकाताङ पालाउ, एमि बान्धाइति बेजान दोफा केलाइ दुसुन्हाहि, वासेहेङ भुत-आत्मा धेल्का हिघाहि, जाइको साघाइकासो वा द्याङगेलाइको जोखाना खाङतेङ भबिस्य दोअ्पिघाखे। कालाउ इदोइ पाहासो वा ताइको गिह्रिगेलाइको भाअ्सिङ हेन्जा ताका कामाइतेङ पिघाहि। 17उङको बेजान पावल कालाउ केलाइहेङ लेसारा पिताइहि, कालाउ वा ह्रिकाइतेङ दोअ्हि, “इदोइ द्याङगेलाइ सर्बोच्च परमेस्वरको सेवकगेलाइ दोङ। एबालाइ नेलाइहेङ हेसा मुक्ति निङखे दोअ्तेङ प्राचार पातेङ हि।” 18उङको बेजान इन्सिका हेन्जा दिना थेकापा पातेङ हिघाहि, कालाउ पावल दिक्को जेङतेङ फनक्क घुरितेङ इङको भुत-आत्माहेङ दोअ्हि, “येसु ख्रिस्टको मिङता का नासेहेङ उङको बेजानसो ओल्लेतेङ हानिलि आग्या पाखा।” कालाउ इङको भुत-आत्मा ओदोङ घुरि उङको बेजानसो ओल्लेतेङ हानिहि।
19कालाउ उङको बेबालको ग्रिहिर गेलाइ इम्बालाइको कामाइका आस बिफल जेङका तिङतेङ पावल कालाउ सिलासहेङ रिम्तेङ बाजारको चोकता हाकिमगेलाइको आगाता ताअ्निकाताङ चुम्पुहि। 20कालाउ पावल कालाउ सिलासहेङ रिम्तेङ हाकिमगेलाइकोता चुम्पुतेङ दोअ्हि, “इदोइ द्याङगेलाइ यहुदिगेलाइ दोङ, इम्बालाइ केलाइको सहरता गोलमाल मोचिपापिहि। 21एबालाइ इसिका मुन्धुमगेलाइ धिरपाखे, जेदोङ केलाइ रोमता हिकालाइको भाअ्सिङ ग्रहन पालि माकुनु केम्लि ठिक माको।”
22कालाउ इङको जेरगेलाइ मिलितेङ पावल कालाउ सिलास ह्रुता जाइ लागिहि। कालाउ सहरको हाकिमगेलाइ पावल कालाउ सिलासको लोखोनगेलाइ थेअ्तेङ थाइगिल्पिहि, कालाउ इम्बालाइहेङ द्वालिहोइ म्हेलि द्याङगेलाइहेङ आग्या पिहि। 23ओबालाइ पावल कालाउ सिलासहेङ हेन्जा खेप द्वालि म्हेतेङ कालाउ इम्बालाइहेङ झ्यालखानाता थुनिहि। कालाउ झ्यालखानाता हाकिम इदोइ कैदिगेलाइहेङ मेनाङ थाङपा रेसितेङ ताअ्लि हुकुम पिहि। 24इन्सिका हुकुम निङतेङ झ्यालखानाको हाकिम पावल कालाउ सिलासहेङ झ्यालखानाको निकोङ लिताको कोठाता थुनिहि। कालाउ इम्बालाइको खोकोइता धेङग्राको फालाता जिङपिहि।
25कालाउ आधा न्हिसिन्ता पावल कालाउ सिलास प्रार्थाना पाकाताङ परमेस्वरको लेगेलाइ लेतेङ हिघाहि। कालाउ आरु कैदिगेलाइ हिङतेङ हिघाहि। 26कालाउ आचानक इन्ता एनोङ बार्का भुइचाल लोहि, कालाउ झ्यालखानाको जगगेलाइ हेङगालाइन्हाहि, कालाउ एन्सालाउ दोङ झ्यालखानाको गोताङ फिनुगेलाइ हेन्हाहि। कालाउ झाराङ कैदिगेलाइको झिन्झिरिगेलाइ बुङ खाइन्हाहि। 27झ्यालखानाको हाकिम निन्धासो नाङघाहि, कालाउ झ्यालखानाको गोताङ फिनुगेलाइ हेन्हाका तिङहि। गोताङ कैदिगेलाइ खाअ्होइ वाला दोअ्तेङ मनता सोचिहि, ओदोङ भाअ्सिङ तरवार ओल्ला पातेङ झ्यालखानाको हाकिम ताइमिङहेङ सेअ्लि तियार जेङका हिघाहि। 28कालाउ पावल तिराराइका गालाहोइ दोअ्हि, “ताइमिहेङ हाइ दोङ हान्ति मापा, हाइपालिपानु केलाइ झाराङ इताङ हिन्हाहि।”
29इदोइ काथा हिङतेङ झ्यालखानाको हाकिम गेसा ह्रेतेङ धाअ्तेङ लिता लोहि, कालाउ थिकासो फिरकाताङ पावल कालाउ सिलासको आगाता तुघुरहि। 30कालाउ न्हुसो इम्बालाइहेङ बाहार ओल्ला पातेङ वा दोअ्हि, “नेउगेलाइ, मुक्ति निङलि का हाइ पालि गोयाङ?”
31इम्बालाइ वासेहेङ दोअ्हि, “प्रभु येसु ख्रिस्टता खाङधुरि पाअ्, कालाउ नाअ् कालाउ नाङको जाहानगेलाइ मुक्ति निनावा।” 32एसापा पावल कालाउ सिलास प्रभुको बचन झ्यालखानाको हाकिम कालाउ वाको जाहानहेङ दोअ्हि। 33कालाउ न्हिसिनता दोङ वा पावल कालाउ सिलासहेङ चुम्पुतेङ इम्बालाइको पेचारागेलाइ झापिहि। कालाउ इम्बालाइ झ्यालखानाको हाकिम कालाउ वाको गोताङ जाहानगेलाइ बप्तिस्ता ह्रुहि। 34कालाउ न्हुसो इम्बालाइहेङ ताइको साअ्ता चुमातेङ ओबालाइको आगाता उम चाअ्लि ताअ्पिहि, कालाउ परमेस्वरता खाङधुरि पाहि दोअ्का काथाता वाको झाराङ जाहान मेनाङ लेङचाहि।
35न्हु दिनाको ह्रिमा सहरको हाकिमगेलाइ आधिमि सिपालाइहेङ दिङगिल्हि, “उङको द्याङगेलाइहेङ लाअ्पि दोअ्तेङ।” 36कालाउ झ्यालखानाको हाकिम पावलहेङ दोअ्हि, “सहरको हाकिमगेलाइ नेलाइहेङ लाअ्पिलि आदेस पिका हि। ओदोङ भाअ्सिङ एला नेलाइ सान्ति दोफा हानिसु।”
37कालाउ पावल इम्बालाइहेङ दोअ्हि, “केलाइ रोमि नागारिक हिलाउ बुङ इम्बालाइ केलाइको हिदोइ बुङ दुसिका फेला मानिङसिङ केलाइहेङ द्याङगेलाइको आगाता दानाइहि, कालाउ झ्यालखानाता बुङ थुनिहि, एला चाहि सुटुक्पा लाअ्पिलि खाङखे? या जेङलि माद्वाङ। इङको आग्या पिका हाकिमगेलाइ ताइमिङ ल्वाको कालाउ केलाइहेङ ओल्ला पातेङ चुम्पुवाको।”
38सिपालाइ हाकिमगेलाइहेङ इङको काथागेलाइ हिङपाहि। पावल कालाउ सिलासते रोमि नागरिक हि दोअ्का हिङतेङ इम्बालाइ मेनाङ थिहि। 39ओदोङ भाअ्सिङ हाकिमगेलाइ लोतेङ पावल कालाउ सिलास दोफा स्यामा ह्रेहि। कालाउ पावल कालाउ सिलासहेङ झ्यालखानासो बाहार ओल्ला पातेङ केलाइको सहर लाअ्तेङ हानेसु दोअ्तेङ बिन्ति पाहि। 40कालाउ इम्बालाइ झ्यालखानासो ओल्लेतेङ लिडियाको साअ्ता हानिहि। कालाउ इम्बालाइ इन्ता खान्धुराइ ओनेगेलाइ दोफा भेतिहि कालाउ ओबालाइहेङ हाउसाइ पातेङ बिदा जेङहि।
Currently Selected:
साल्न्हाका चात्या 16: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
