साल्न्हाका चात्या 18
18
पावल कोरिन्थि सहरता
1कालाउ न्हुसो पावल एथेन्स सहरसो बिदा जेङतेङ कोरिन्थि सहरता हानिहि। 2वा इन्ता आकिलास मिङ हिका एमि यहुदिहेङ दुसुहि, आकिलास पोनट्स दोअ्का प्रदेसता जोलोम जेङका हिघाहि, वा ताइको बे प्रिस्किला दोफा इटालि सारभिसो लोका हिघाहि। हाइपालिपानु साम्रात क्लौदियस गोताङ यहुदिगेलाइहेङ रोमसो ओल्लेतेङ हानिलि आदेस पाका हिघाहि। ओदोङ भाअ्सिङ पावल इम्बालाइहेङ भेतिलि कोरिन्थि सहरता हानिहि। 3हाइपालिपानु पावल बुङ इम्बालाइ जेसाङ पाल बानाइका काम पाघाखे, वा इम्बालाइ दोफाङ काम पाअ्तेङ योमहि। 4कालाउ गोताङ परमेस्वरको पबित्तरो दिनाता पावल यहुदिगेलाइको चाउघारा साअ्ता हानितेङ यहुदि कालाउ ग्रिकगेलाइ दोफा येसुको बारेता काथा पोसुघाखे कालाउ इम्बालाइहेङ येसु ख्रिस्टता खाङधुरि पापालि कोसिस पाघाखे।
5जेलाउ सिलास कालाउ तिमोथि म्यासिडोनिया प्रदेससो थुकालि लोहि, कालाउ पावल पाल बानाइलि काम लाअ्तेङ ताइको पुरा सोमोइ बचनको प्राचारता। कालाउ यहुदिगेलाइ येसु दोङ ख्रिस्ट हि दोअ्तेङ वा सिक्स्या पिदोङघाहि। 6कालाउ जेलाउ यहुदिगेलाइ पावलको बिरोध पातेङ वाको निन्दा पालि तेङहि, कालाउ पावल ताइको लोखोन धाबागेलाइसो धुला ह्रितेङ इम्बालाइहेङ दोअ्हि, “नेलाइ ताइमिङ परमेस्वरको बचन सुइकार मापाकाता परमेस्वरसो लोका दन्डको जिम्मेबार जेङस्वाना, का निरदुसि हिघा। एलासो का गैर-यहुदिगेलाइकोता हानाङका कालाउ परमेस्वरको बचन प्राचार पाङका।”
7कालाउ पावल यहुदिगेलाइको चाउघारा साअ्सो तितस युस्तस मिङ हिका परमेस्वरको भक्ति पाका गैर-यहुदि द्याङको साअ्ता गैर-यहुदिगेलाइहेङ सिक्स्या पिलि हानिहि। वाको साअ् चाउघारा साअ्को भेरपा हिघाहि। 8क्रिस्पस यहुदिगेलाइको चाउघारा साअ्को सासक हिघाहि, कालाउ क्रिस्पस कालाउ वा झाराङ जाहान प्रभुता खाङधुरि पाहि, कालाउ कोरिन्थि सहरको हेन्जा द्याङगेलाइ बुङ पावलको प्राचार हिङतेङ खाङधुरि पाहि कालाउ बप्तिस्ता ह्रुहि।
9एनि न्हिसिन्ता दर्सनता प्रभु पावलहेङ दोअ्हि, “माअ्थि, भरु धुइकाताङ हाने सिकापा माहि। 10हाइपालिपानु का नाअ् दोफा हिघा, कालाउ हासु बुङ नासेहेङ आक्रामन पातेङ हान्ति पालि माद्वाङ, हाइपालिपानु इदोइ सहरता हेन्जा द्याङगेलाइ हि जाइ कासेहेङ खाङधुरि पाङ।” 11कालाउ पावल परमेस्वरको बचन धिर्पाकाताङ ए बासार तु माइना थेकापा कोरिन्थि सहरता हि।
12जेलाउ गलियोन आखैया प्रदेसको हाकिम हिघाहि, कालाउ आधिमि यहुदिगेलाइ मिलितेङ पावल ह्रुता जाइ लागिहि, कालाउ ओबालाइ पावलहेङ आदालातता चुम्पुतेङ दोअ्हि, 13“इदोइ द्याङ व्यवस्थाको बिरुद्द परमेस्वरको आराधाना पालि द्याङगेलाइहेङ धिर्पादोङखे।”
14जेलाउ पावल दोअ्लि तोम्का हिघाहि, कालाउ गलियोन उङको यहुदिगेलाइहेङ दोअ्हि, “ओइ यहुदिगेलाइ, एन्सानु या हिदोइ बुङ मारेम्का काम माकुनु बार्का आपाराधको काथा जेङका हिनु का नेलाइको काथा हिङलि उचित जेङधाङ। 15कालाउ या काथा पोसुका ते नेलाइकोङ सब्दगेलाइ, मिङगेलाइ कालाउ व्यवस्थाको बारेता खिनिङ हि। ओदोङ भाअ्सिङ इदोइ काथागेलाइ नेलाइ ताइमि मिलिपासु। का इसिका काथागेलाइको न्याय पालि माचाहिखा।” 16कालाउ ओबालाइहेङ गलियोन आदालातसो खाअ्लि आदेस पिहि। 17कालाउ ओबालाइ झाराङ यहुदिगेलाइको चाउघारा साअ्को सासक सोस्थेनिसहेङ रिम्तेङ, आदालातको आगाता वासेहेङ दानाइहि। कालाउ गलियोन इङको काथाको हाइ दोङ वास्ता मापिहि।
प्रिस्किला, आकिलास कालाउ आपोल्लोस
18पावल खान्धुराइ ओनेगेलाइ दोफा बिदा जेङतेङ वा हेन्जा दिना थेकापा कोरिन्थि सहरता दोङ हि। कालाउ न्हुसो वा बिदा जेङतेङ समुन्द्रको दामा पाहासो सिरिया प्रदेसता हानिहि। प्रिस्किला कालाउ आकिलास बुङ वाकोङ दोफा हिघाहि। खान्धुराइ ओनेगेलाइ दोफा बिदा जेङतेङ वा सिरिया प्रदेस हानिलि खान्तेङ लाम्फा किङक्रिया मौजाता पावल ताइको पुसुङ मुन्डाइहि, हाइपालिपानु वा एनोङ भाकल पाका हिघाहि। 19इम्बालाइ एफिसस सहरता लोहि, कालाउ पावल प्रिस्किला कालाउ आकिलासहेङ इन्ताङ ताअ्धिहि कालाउ ताइमि चाहि एनोङ चाउघारा साअ्ता दुल्तेङ यहुदिगेलाइ दोफा काथा पोसुलि तेङहि। 20जेलाउ द्याङलाइ पावलहेङ आझाइ आले दिना थेकापा हिलि बिन्ति पाहि, कालाउ बुङ पावल माकिहि। 21पावल एसा दोअ्तेङ इम्बालाइ दोफा बिदा जेङहि, “जेसापा परमेस्वरको इच्छा जेङनु का नेलाइकोता आरोङ ल्वाङका।” कालाउ वा एफिसस सहरसो समुन्द्रको दामा पाहासो हानिहि।
पावलको सुम्खे प्राचार पालि पाक-पाका
22जेलाउ पावल कैसरिया सहरता थुकाहि, कालाउ यरुसेलेम सहरको मन्डलिहेङ भेतितेङ सेउपाहि। कालाउ न्हुसो पावल एन्तिओक सहरता लोहि।
23पावल एन्टिओक सहरता आले सोमोइ थेकापा हि, कालाउ न्हुसो इन्तासो वा गलातिया इलाका कालाउ फ्रिगिया प्रदेस जेङतेङ गोताङ चात्यागेलाइहेङ हाउसाइ पातेङ भेनेङ-भेनेङ थामेगेलाइता हानिहि।
24आपुल्लोस मिङ हिका एमि यहुदि एफिसस सहरता लोहि, वाको आलेकजेन्द्रिया सहरता जोलोम जेङका हिघाहि। वा हेन्जा रेम्कासो नुइ धुइलि गिखा द्याङ हिघाहि, कालाउ वासेहेङ धर्मसास्तरको बिसोइता रेम्का ग्यान हिघाहि। 25वा प्रभुको दामाको बिसोइता सिक्स्या निङका हिघाहि कालाउ आत्माता हाउसाइतेङ येसुको बिसोइता गोताङ काथा रेम्फासो धिर्पाघाहि। कालाउ बुङ वा युहान्नाको पिका बप्तिस्ताको बारेता खिनिङ गिघाखे। 26वा यहुदिगेलाइको चाउघारा साअ्ता निर्धक्क नुइ धुइलि तेङहि। कालाउ प्रिस्किला कालाउ आकिलासको दोअ्का काथा हिङतेङ। कालाउ इम्बालाइ वासेहेङ ताइको साअ्ता चुम्पुहि कालाउ परमेस्वरको दामाको बिसोइता वासेहेङ झन प्रस्ट पातेङ बुझाइपाहि।
27जेलाउ आपोल्लोस आखैया प्रदेसता हानिलि खाङघाखे, खान्धुराइ ओनेगेलाइ वासेहेङ इन्ता हानिलि हाउसाइ पाहि। कालाउ इन्ताको चात्यागेलाइ वासेहेङ सुइकार पाको दोअ्तेङ हाउसाइ पाअ्तेङ पात्तारा लेखेहि। कालाउ आपोल्लोस आखैया प्रदेसता थुकातेङ प्रभुको आनुग्रहहोइ खाङधुरि पाकालाइहेङ हेन्जा साघाइहि। 28हाइपालिपानु आपोल्लोस ताइको सरबुङ कालाउ सिप पाहासो यहुदिगेलाइहेङ झाराङको आगाता काथा पोसुलि मादोअ्का बानाइहि कालाउ धर्मसास्तरको बचन पाहासो येसु दोङ ख्रिस्ट हि दोअ्का काथा प्रमान पाहि।
Currently Selected:
साल्न्हाका चात्या 18: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
