युहान्ना 5
5
न्हेकुरिता न्हे बासार घाति एमि मासाधेका द्याङ एल्हि
1आले सोमोइ न्हुसो यहुदियागेलाइको पार्बा हिघाहि, कालाउ येसु यरुसेलेम सहरता हानिहि। 2यरुसेलेम सहरता भेडा-फिनुको भेरपाङ एनोङ चि कुन्ड हि, जाइको नालोङ खाम्बाहोइ आरेस पिका एनोङ चाल्हा हि, जाइहेङ हिब्रु भासाता बेथेस्दा दोअ्खे। 3इन्ता हेन्जा मासाधिकालाइ आधिमि कान्हाँ, लेङग्रा, कालाउ गाइल्हि खोकालाइ उन्धितेङ हिघाखे। इम्बालाइ चि हिदोइ सोमोइता साल्काताङ दोअ्तेङ ह्रुमतेङ हिघाहि। 4हाइपालिपानु परमप्रभुको एमि स्वर्गदुत सोमोइ-सोमोइता चि कुन्डता खुअ्तेङ चि हेङगालाइ पिघाखे, कालाउ चि साल्काइका बेला जाइ लाम्फा चि लिता दुल्घाहि जिसिका मासाधिका हिलाउ बुङ उङको एल्घाहि।
5इन्ता न्हेकुरिता न्हे बासार घाति एमि मासाधेका द्याङ हिघाहि। 6उङको द्याङहेङ इन्ता उन्धितेङ हिका येसु तिङहि। वा निकोङ दिना लाम्फासो उङको मासाधेका हिघाहि दोअ्तेङ येसु थाहा गिहि कालाउ वासेहेङ हिअ्हि, “नाअ् हाइ एल्लि भोखेना कोनु?”
7उङको मासाधेका येसुहेङ दोअ्हि, “नेउ, जेदोङ बेला चि साल्काखे कासेहेङ चि कुन्डता दुल्पाका काङको हासु बुङ मान्थु, का हानिलि कोसिस पालाउ लाम्फा दोङ भेनेङ द्याङ चिता हानिलि दोका हिखे।”
8कालाउ येसु उङकोहेङ दोअ्हि, “नाअ् ल्हो, कालाउ नाङको धोक्रा तोअ्तेङ तेअ्।” 9ओदोङ घुरि उङको द्याङ एल्हि, कालाउ ताइको धोक्रा चुम्तेङ वा तेअ्लि तेङहि। इदोइ गोताङ कामगेलाइ जेङतेङ हिका दिना परमेस्वरको पबित्तरो दिना हिघाहि। 10ओदोङ भाअ्सिङ एल्का द्याङहेङ यहुदि आगुवागेलाइ दोअ्हि, “इदोइ ते परमेस्वरको पबित्तरो दिना, कालाउ मोसाको व्यवस्था आन्सार नाअ् धोक्रा चुम्पुलि माएल।”
11इम्बालाइहेङ वा जोबाफ पिहि, “जाइ कासेहेङ एल्पाहि वा दोअ्हि, ताइको धोक्रा चुम्पुतेङ तेअ्।”
12कालाउ यहुदि आगुवागेलाइ वासेहेङ हिअ्हि, “धोक्रा चुम्तेङ हानिलि दोअ्तेङ नासेहेङ हिदोइ द्याङ दोअ्हि?” 13कालाउ वासेहेङ एल्पाका द्याङ हासु वाला दोअ्तेङ इङको एल्का द्याङहेङ थाहा मान्थुघाहि। हाइपालिपानु उङको थामेता जेर हिनाङ येसु इन्तासो हानिलि दोका हिघाहि।
14कालाउ न्हुसो वासेहेङ येसु मुन्दिरको सालेङता दुसुतेङ दोअ्हि, “खाङ, नाअ् एल्होइना। आरोङ पाप मापा, कालाउकि, नाङको ह्रुता आरोङ बुङ मारेम्का माल्वाको।” 15कासेहेङ एल्पाका ते येसु हिघाहि दोअ्तेङ, यहुदि आगुवागेलाइहेङ हानितेङ दोअ्पिहि। 16ओदोङ भाअ्सिङ यहुदि आगुवागेलाइ येसुहेङ साताइलि तेङहि, हाइपालिपानु वा दोङ इदोइ गोताङ काम परमेस्वरको पबित्तरो दिनाता पाकाताङ हिघाहि। 17कालाउ येसु इम्बालाइहेङ दोअ्हि, “काङको आबा परमेस्वर जेलाउ बुङ काम पाखे, कालाउ का बुङ काम पातेङ हिलि गोइखे।” 18येसु एन्सा दोअ्नाङ यहुदि आगुवागेलाइ येसुहेङ सेअ्लि दाउ भोतेङ हिघाहि, हाइपालिपानु वा परमेस्वरको पबित्तरो दिना भङग पाका खिनिङ माको, कालाउ ताइमिहेङ परमेस्वरको झोको बाराबरको काथा दोअ्घाहि कालाउ परमेस्वरहेङ ताइकोङ आबा दोअ्घाहि।
परमेस्वरको चानको खाबारा
19येसु इम्बालाइहेङ जोबाफ पिकाताङ दोअ्हि, जातिङ भारि का नेलाइहेङ दोअ्खा का चान ताइमिङ हाइ दोङ पालि मादोखा, कालाउ जेदोङ आबा परमेस्वर पाका तिङखा इङको खिनिङ पाखा, कालाउ आबा जेदोङ-जेदोङ पाखे, ओदोङ का चान बुङ एन्साङ पाखा। 20हाइपालिपानु आबा परमेस्वर का चानहेङ प्रेम पाखे, कालाउ वा ताइमिङ पाका गोताङ काम का चानहेङ तिङपिखे। नेलाइ आचाम्मा जेङस्वाना दोअ्तेङ इदोइ खाङतेङ माहान काम वा दोङ का चानहेङ तिङपा प्याङ। 21हाइपालिपानु जेसाङ आबा परमेस्वर सिका द्याङगेलाइहेङ आरोङ सिन्हु पाङ, एन्साङ का चान बुङ जाइहेङ इच्छा पाखा वासेहेङ जिबन प्याङका। 22हाइपालिपानु आबा परमेस्वर हासुको बुङ न्याय मापाखे, भरु गोताङ न्याय पाका खाबारा आबा परमेस्वर का चानहेङ पिका हि, 23हाइपालिपानु जेसाङ गोताङ द्याङगेलाइ आदार पाखे, एन्साङ दोङ इम्बालाइ का चानको आदार पाको। जेसापा हासु बुङ कासेहेङ आदार मापाखे पानु वा कासेहेङ दिङगिल्का आबा परमेस्वरहेङ बुङ आदार मापाखे।
24जातिङ भारि का नेलाइहेङ दोअ्खा, जाइ काङको बचन हिङखे कालाउ कासेहेङ दिङगिल्काहेङ खाङधुरि पाखे, उङको दोफा आनान्त जिबन हि। ओबालाइहेङ दन्ड माप्याङ कालाउ इम्बालाइ आनान्त कालको सिकासो बान्चियाङ कालाउ लाम्फासोङ नावा जिबनता दुल्लि दोका हि। 25जातिङ भारि का नेलाइहेङ दोअ्खा, इङको सोमोइ लोलि दोका हि, कालाउ इङको एलाङ दोङ लोहोइ, जेलाउ झाराङ सिकालाइ का परमेस्वरको चानको गाला हिनावा, कालाउ हिङकालाइ जेलाउ बुङ बान्च्यावा। 26हाइपालिपानु जेसाङ आबा परमेस्वर ताइमिङ जिबनको मुहान हि, एन्साङ पातेङ वा दोङ ताइको चानहेङ बुङ जिबनको मुहान बानाइका हि। 27कालाउ हाइपालिपानु का द्याङको चान हिघा। आबा परमेस्वर कासेहेङ गोताङ द्याङगेलाइको न्याय पाका खाबारा पिका हि।
28नेलाइ काङको काथा हिङतेङ माभाङ-भाङसु, हाइपालिपानु इङको सोमोइ लोदोङखे, सिकालाइ झाराङ काङको गाला हिनावा कालाउ सिन्हुतेङ ल्होकाङ। 29हासुलाउ बुङ आसल जिबन जियाइका इम्बालाइ आनान्त जिबन निङलिको भाअ्सिङ सिङचाङ। कालाउ जाइ मारेम्का काम पातेङ जिबन जियाइका हि, ओबालाइ दन्ड निङलिको भाअ्सिङ सिङचाङ।
30का ताइमिङ हाइ दोङ पालि माद्वाङका। जाइ आबा परमेस्वर दोअ्खे ओदोङको आधारता का न्याय पाखा, कालाउ काङको न्याय सत्ये हिखे, हाइपालिपानु का ताइको इच्छाहोइ माको कालाउ कासेहेङ दिङगिल्काको इच्छा आन्सार काम पाखा।
31का ताइमिङ ताइको बिसोइता साक्सि पिघा पानु काङको साक्सि सत्ये माजेङखे। 32कालाउ काङको बिसोइता साक्सि पिका एमि भेनेङ हि, कालाउ वा काङको आबा परमेस्वर हि। कालाउ का गिखा वा दोङ काङको बिसोइता जेदोङ साक्सि पिखे, इङकोङ साक्सि सत्ये हि।
33इदोइ बाहेक बप्तिस्ता पिका युहान्नाकोता इम्बालाइ काथा बुझिलि बानाल चुम्पुका द्याङहेङ दिङगिल्हि, कालाउ वा दोङ काङको बारेता सत्येको साक्सि पिका हि। 34काङको भाअ्सिङ द्याङगेलाइको साक्सि हिलि गोयाङ दोअ्तेङ माको, कालाउ नेलाइको मुक्ति ज्याको दोअ्तेङ का युहान्ना दोङ पिका साक्सिको बारेता दोअ्का हिघा। 35युहान्ना जोल्तेङ हिका कालाउ चिल्कातेङ हिका गेसा भाइका हिघाहि, कालाउ नेलाइ वाको थास्साइकाता आतुइसा सोमोइ लाउ बुङ इङको आनान्द मानिलि रेम्का लागिहि।
36कालाउ का दोफा युहान्नाको साक्सि खान्तेङ माहान साक्सि हि। इङको कामगेलाइ पुरा पालि काङको आबा परमेस्वर कासेहेङ पिका हि, वा दोङ काङको बारेता साक्सि पिखे। जेदोङ काम का पातेङ हिघा इङकोहोइ आबा परमेस्वर कासेहेङ दिङगिल्का हि दोअ्तेङ साक्सि पिखे। 37कासेहेङ दिङगिल्का आबा परमेस्वर ताइमि दोङ काङको बिसोइता साक्सि पिका हि। वाको गाला नेलाइ हेलाउ बुङ हिङका मान्थु सुन्हा ना ते वासेहेङ तिङका हिसुना। 38वाको बचन नेलाइको मनता माताअ्स्वाना हाइपालिपानु नेलाइ का ह्रुता खाङधुरि मापा सुखेना, जाइहेङ परमेस्वर दिङगिल्का हि। 39नेलाइ धर्मसास्तरता ध्यान पातेङ आध्यान पासुखेना, हाइपालिपानु इन्ता आनान्त जिबन निनाङबे दोअ्तेङ, नेलाइ मानिसुखेना। काङको बिसोइता धर्मसास्तर दोङ साक्सि पिखे। 40कालाउ बुङ नेलाइ आनान्त जिबन निङलि काङकोता लोलि माखाङसुखेना।
41का द्याङगेलाइको बाखिन माह्रुकाङका। 42कालाउ का परमेस्वरको भाअ्सिङ प्रेम नेलाइता मान्थु दोअ्तेङ का गिखा। 43का ताइको आबा परमेस्वरको खाबारा दोफा लोका हिघा, कालाउ बुङ नेलाइ कासेहेङ सुइकार मापास्वाना। कालाउ ताइकोङ खाबारा चुम्तेङ लोकालाइहेङ चाहि नेलाइ सुइकार पास्वाना। 44नेलाइ कासेहेङ खाङधुरि मापा सुखेना, हाइपालिपानु नेलाइ ता-ताइमिता बाखिन ह्रुसुखेना, कालाउ नेलाइ एमि खिनिङ परमेस्वरको बाखिन निङलि कोसिस मापा सुखेना।
45इदोइ मासम्झेसु, हाइ का आबा परमेस्वरको आगाता नेलाइहेङ दुसियाङका। नेलाइहेङ मोसाको व्यवस्था दोङ दुसियावा, जेदोङता नेलाइ ताइको आस पातेङ हिसुना। 46जेसापा नेलाइ मोसाहेङ खाङधुरि पाकानु कासेहेङ बुङ खाङधुरि पासुध्वाना। हाइपालिपानु वा काङको बिसोइता लेखेका हिघाहि। 47कालाउ नेलाइ वाकोङ, लेखेका काथागेलाइ खाङधुरि मापा सुखेना पानु, काङको दोअ्का काथाता निसित दोङ नेलाइ खाङधुरि मापास्वाना।
Currently Selected:
युहान्ना 5: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
