लुका 18
18
के सिका बेबाल कालाउ न्यायाधिस
1येसु ताइको चात्यागेलाइहेङ निरास माजेनाको दोअ्तेङ दिनाङ प्रार्थाना पालि धिर्पालि इदोइ निङपिका दोअ्का हिघाहि। 2एनोङ सहरता एमि न्यायधिस हिघाहि, वा परमेस्वरको बारेता माअ्थिघाखे कालाउ द्याङगेलाइको वास्ता मापाघाखे। 3इङकोङ सहरता एमि के सिका बेबाल हिघाखे, घुरि-घुरि वा न्यायधिसकोता हानितेङ दोअ्हि, इता एमि द्याङ हि, काङको सतुरु कालाउ काङको माझाता न्याय पापि।
4हेन्जा दिनासोङ न्यायधिस उङको के सिका बेबालको काथा माहिङपिहि, कालाउ न्हुसो वा ताइको मनता दोअ्हि, का परमेस्वर दोफा माअ्थिखा द्याङको बुङ वास्ता मापाखा। 5कालाउ बुङ इदोइ के सिका बेबाल कासेहेङ मेनाङ दिनाङ हाइरान पानाङ का याको न्याय पापियाङका, माकुनुते वा घुरि-घुरि लोतेङ कासेहेङ हाइरान पावा।
6प्रभु येसु दोअ्हि, हिङसु, उङको आन्यायि न्यायधिस हाइ दोअ्खे। 7कालाउ परमेस्वर ताइको साल्का द्याङगेलाइहेङ जाइ झेम्पाङ-लिपाङ वाको आगाता न्याय निनाङकाबे दोअ्तेङ खार्खे, परमेस्वर वासेहेङ साघाइलि माबेलोम्खे। 8का नेलाइहेङ दोअ्खा, परमेस्वर ताइको द्याङगेलाइहेङ झटै इम्बालाइको न्याय पाप्यावा। कालाउ का द्याङको चान आरोङ प्रिथिबिता लोलाउ हेथे द्याङगेलाइहेङ का ह्रुता खाङधुरि निनाङका रो?
फारिसि कालाउ पोत ल्होपाका निङपिका
9जेदोङ द्याङगेलाइ ताइको बारेता सोचिखे कालाउ जाइ ताइमिहेङ धर्मि सम्झिखे, येसु इदोइ निङपिकासो इम्बालाइहेङ दोअ्हि। 10न्हेमि द्याङ प्रार्थाना पालि मुन्दिरता हानिहि, एमि फारिसि कालाउ भेनेङ चाहि पोत ल्होपाका द्याङ। 11फारिसि जाअ्तेङ मन मनता कालाउ एसापा प्रार्थाना पाहि, हे परमेस्वर, का नासेहेङ धन्यबाद प्याङका, का आरु द्याङगेलाइ भाइका धाताइका, आन्यायि, कासिबिरि, माकुनु इदोइ पोत ल्होपाका भाइका मान्थुघा। 12का ए आथारता न्हेखे बारिखा का निङका गोताङ आमेनेको दसाङसा पिखा।
13कालाउ पोत ल्होपाका चाहि आसा दुरे दोङ जाअ्तेङ स्वर्ग भारि खाङलि आट मापासिङ दुख जेङतेङ ताइको तुम्ता थेअ्तेङ दोअ्हि, हे परमेस्वर का एमि पापि हिघा का ह्रुता दाया पापि कालाउ कासेहेङ स्यामा पि।
14का नेलाइहेङ दोअ्खा, उङको फारिसि माको भरु पोत ल्होपाका द्याङ चाहि परमेस्वरको आगाता सहि थोहोराइतेङ ताइको साअ् घुरिहि। हाइपालिपानु हासु बुङ ताइमिहेङ बार्का बानाइखे, वासेहेङ लेता हु्ल्पावा, कालाउ ताइमिहेङ लेता हुल्पाका चाहि बार्का बानाइयावा।
येसु कालाउ म्हुइका जामालाइ
(मति 19:13-15; मर्कु 10:13-16)
15येसु ताइको खुर ताअ्तेङ आसिस प्याको दोअ्तेङ द्याङगेलाइ ताइको जामाललाइहेङ वाकोता चुमाहि। इसिका तिङतेङ चात्यागेलाइ उङको द्याङगेलाइहेङ चेरहि। 16कालाउ येसु चात्यागेलाइहेङ काइतेङ दोअ्हि, उङको जामाललाइहेङ काङको दोफा लोलि पिसु, इम्बालाइहेङ मागोराइसु हाइपालिपानु परमेस्वरको सासन इसकालाइको दोङ हि। 17जातिङ भारि का नेलाइहेङ दोअ्खा, परमेस्वर ताइको सासनता खिनिङ इम्बालाइहेङ सुइकार पावा जाइ दोङ परमेस्वरको सासनहेङ जामाल भाइपा सुइकार पावा।
धनि सासक
(मति 19:16-29; मर्कु 10:17-30)
18एमि सासक येसुहेङ एसा दोअ्तेङ हिअ्हि, हे एल्का प्रभु, परमेस्वरसो का आनान्त जिबन निङलिको भाअ्सिङ हाइ पालि गोयाङ?
19येसु वासेहेङ उत्तारा पिहि, नाअ् हाइ पालि कासेहेङ एल्का हिना दोअ्खेना? एमि परमेस्वर खिनिङ एल्का हि, वा बाहेक हासु बुङ एल्का मान्थु। 20परमेस्वरको आग्यागेलाइते नेलाइहेङ थाहा दोङ हि, जेसापा मारा मापालि, कासिबिरि मापालि, माखुलि, आखेका काथा मादोअ्गिल्लि, माधाताइलि कालाउ ताइको आबा-आमाइको आदार पालि।
21वा दोअ्हि, गुरु, इदोइ गोताङ आग्यागेलाइ का ते धाअ्नासोङ पातेङ लोका हिघा।
22इङको काथा येसु हिङलि दोअ्तेङ वासेहेङ दोअ्हि आरोङ एनोङ काम पालि गोइका हि। नाअ् दोफा जेथे हि इङको गोताङ पितेङ गरिबगेलाइहेङ बाखाराइपि, कालाउ स्वर्गता धन निनाना कालाउ का दोफा लोसु कालाउ काङको चात्या जेङसु। 23जेलाउ वा इङको काथागेलाइ हिङहि, कालाउ वासेहेङ ओसारापाङ बार्का पिर परिहि हाइपालिपानु वा मेनाङ धनि हिघाखे।
24जेलाउ येसु उङको द्याङहेङ दुखि जेङका तिङहि, वा दोअ्हि, जातिङको धनि द्याङगेलाइ परमेस्वरको सासनता दुल्लि एकदम मुसकिल हि। 25हाइपालिपानु एनोङ उटहेङ बिन्दुको कानासो दुल्लि मुसकिल माजेङखे भरु, “एमि धनि द्याङहेङ परमेस्वरको सासनता दुल्लि हेन्जा मुसकिल हि!”
26जेलाउ इन्ता हिका द्याङगेलाइ इदोइ हिङहि, कालाउ इम्बालाइ दोअ्हि, एन्सा पानु हासु चाहि मुक्ति निङखे?
27येसु दोअ्हि, जेदोङ द्याङको भाअ्सिङ आसम्भब काम हि, कालाउ परमेस्वरको भाअ्सिङ सम्भब हि।
28कालाउ पतरुस दोअ्हि, खाङसु ताइको साअ् द्वार लाअ्तेङ केलाइ नाङको दोफा लोका हिनाहि?
29येसु दोअ्हि, जातिङ भारि का नेलाइहेङ दोअ्खा, जाइ ताइको साअ्, बे, दादा-ओने, आबा-आमाइ, कालाउ जामाललाइ परमेस्वरको सासनको भाअ्सिङ लाअ्का हि। 30उङको इदोङ सोमोइता झाराङ खान्तेङ हेन्जा गुना निनावा। कालाउ लोका सुमिङता आनान्त जिबन थेकापा योम्लि निनावा।
ताइको सिकाको येसुको आगमबानि
(मति 20:17-19; मर्कु 10:32-34)
31कालाउ न्हुसो येसु तेन्हे चात्यागेलाइहेङ भेनेङ थामे भारि चुम्पुतेङ दोअ्हि, हिङसु, केलाइ यरुसेलेम सहर हानिन्हाखे। का द्याङको चानको बिसोइता परमेस्वरको बक्तागेलाइ जेदोङ लेखेका हि इङको गोताङ थुकातावा। 32हाइपालिपानु कासेहेङ गैर-यहुदिगेलाइको खुरता सुम्पि प्यावा, कालाउ इम्बालाइ कासेहेङ खुजालाइयावा, थोअ्तावा कालाउ 33इम्बालाइ कासेहेङ द्वालिहोइ म्हेतावा, कालाउ सेअ्तावा, कालाउ सुम्निको दिना का आरोङ सिकासो सिन्हुतेङ ल्होकाङका।
34चात्यागेलाइ इदोइ काथागेलाइको माने माबुझिहि, ओबालाइको भाअ्सिङ इङको काथाको आर्था म्होन्हातेङ हि, कालाउ वा हाइ दोअ्खे दोअ्तेङ इम्बालाइ थाहा मानिङहि।
कान्हा द्याङ तिङलि दोहि
(मति 20:29-34; मर्कु 10:46-52)
35वा यरुसेलेम सहर हानिकाताङ पालाउ यरिहो सहर भेरपा थुकाहि, इन्ता एमि कान्हाँ दामाको आलिता योमतेङ द्याङगेलाइ दोफा भिख ह्रेतेङ हिघाहि। 36जेलाउ ओदोङ दामा पाहासो जेर लोका हिङतेङ वा हिअ्हि, इन्ता हाइ जेङतेङ हि। 37उङको द्याङगेलाइ वासेहेङ दोअ्हि, नासरत देराको येसु इदोइ दामा पातेङ लोदोङखे।
38उङको कान्हाँ द्याङ मेनाङ हाउसाइहि, कालाउ दोअ्हि हे येसु राजा दाउदको चान, कासेहेङ दाया पाअ्। 39लाङ-लाङ हानिकालाइ वासेहेङ चेरहि कालाउ वासेहेङ दोअ्हि सिकापा हि। कालाउ वा झन ह्रिकाइतेङ-ह्रिकाइतेङ दोअ्लि तेङहि, “हे येसु राजा दाउदको चान, नाअ् का ह्रुता दाया पाअ्।”
40येसु इन्ता जाअ्हि कालाउ दोअ्हि, उङको कान्हाँ द्याङहेङ का दोफा चुमासु। जेलाउ उङको कान्हाँ द्याङ येसु हिकाता थुकाहि, येसु वासेहेङ हिअ्हि, 41नाअ् हाइ भोअ्खेना, का हाइ पापिलि नाङको भाअ्सिङ? उङको कान्हाँ द्याङ दोअ्हि, हे प्रभु, का तिङलि भोअ्खा।
42येसु वासेहेङ दोअ्हि, नाअ् तिङलि द्वाना, नाङको खाङधुरिसो नासेहेङ एल्पाका हि। 43कालाउ वा ओदोङ घुरि तिङलि दोहि, कालाउ परमेस्वरको बाखिन पाकाताङ उङको वा दोफा हानिहि। इङको तिङतेङ झाराङ द्याङगेलाइ परमेस्वरको बाखिन पाहि।
Currently Selected:
लुका 18: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
