लुका 24
24
येसु सिकासो सिन्हुका
(मति 28:1-10; मर्कु 16:1-11; युहा 20:1-10)
1आइताबारको दिना एह्रिमाङ येसुको सिका जिउ ताअ्का तोमता बेबालाइ लोहि। ओबालाइ तियार पाका मालामालाका चुइति कालाउ आत्तर चुमाहि। 2तोमको घारा ठुम्लि एनोङ बार्का उन्ठुइ ताअ्का हिघाहि। कालाउ ओबालाइ इङको उन्ठुइ तोमसो भेनेङ थामे भारि सारिका तिङहि। 3ओबालाइ लिता दुल्हि कालाउ प्रभु येसुको सिका जिउ मातिङहि। 4जेलाउ इम्बालाइ इङको बिसोइता आवाइतुतेङ हिघाहि, कालाउ जाहाँका धाबा होङतेङ हिका न्हेमि वाजानगेलाइ इम्बालाइको भेरपाङ जाअ्हि। 5उङको बेबालाइ मेनाङ थिहि कालाउ तुघुरहि। कालाउ उङको न्हेमि वाजान बेबालाइहेङ दोअ्हि, सिन्हुका द्याङहेङ नेलाइ हाइ पालि सिकालाइको माझाता भोसुखेन्हा? 6येसु इन्ता मान्थु, वा सिकासो सिन्हुतेङ ल्होका हि। वा नेलाइहेङ गालिल जिल्लाता दोअ्का काथा फोम पासु, 7कि का द्याङको चान आबस्य दोङ पापि द्याङगेलाइको खुरता सुम्पि प्यावा कालाउ क्रुस्टा तोइयावा कालाउ सिकाको सुम्निता सिन्हुतेङ ल्होकाङ। 8कालाउ उङको बेबालाइ येसु हाइ दोअ्का हिघाहि, इङको फोम पाहि।
9उङको बेबालाइ तोम लाअ्तेङ तेए चात्यागेलाइ हिका थामे भारि हानिहि, कालाउ गोताङ इङको घाटानागेलाइको बारेता ओबालाइहेङ दोअ्पिहि। 10उङको बेबालाइ मग्दल देराको मरियम, योआन्ना कालाउ याकुबको आमाइ मरियम हिघाहि। इम्बालाइ उङको येसुको काम पालि साल्न्हाका चात्यागेलाइहेङ जेङका गोताङ घाटानागेलाइ हिङपाहि। 11कालाउ बुङ ओबालाइहेङ दोअ्पिका काथा इङको हाइ दोङ माको दोअ्तेङ मासाअ्हि। 12पतरुस जारा-जुरुक्पा ल्होहि कालाउ तोमभारि घाअ्तेङसाङ हानेहि कालाउ तुघुरतेङ खाङहि। इन्ता ते सुतिको धाबा जेदोङ येसुको जिउहेङ लुन्धाइका हिघाहि, इङको खिनिङ वा इन्ता तिङहि। जेदोङ जेङका हिघाहि इङको बिसोइता आवाइतुतेङ पतरुस साअ् भारि घुरिहि।
येसु इम्माउसको दामाता
(मर्कु 16:12-13)
13कोकोङ दिना येसुको न्हेमि चात्यागेलाइ इम्माउस मिङ दोअ्का देरा भारि हानिदोङघाखे। इङको थामे यरुसेलेम सहरसो लगभग तेए किलो मिटर हिघाहि। 14इम्बालाइ आले सोमोइ लाम्फा घातिका इङको गोताङ घाटानागेलाइको बारेता काथा पाकाताङ हिघाहि। 15जेलाउ इम्बालाइ इदोइ काथागेलाइ पाकाताङ हिघाहि, येसु ताइमिङ इम्बालाइको भेरपा लोहि कालाउ ओबालाइ दोफाङ तेतेङ हानिघाहि। 16कालाउ उङको न्हेमिहेङ परमेस्वर येसुहेङ नाल्लिसो रोकिका हिघाहि।
17कालाउ न्हुसो येसु दोअ्हि, नेलाइ तेअ्काताङ पालाउ हाइको बिसोइता बात मारेका हिसुन्हा? उधिन्हेमि टक्क जाअ्हि। इम्बालाइको ह्राइ हेन्जाङ डाहि। 18ओबालाइसो एमि क्लेओपास मिङ हिका द्याङ वासेहेङ हिअ्हि, बाहारसो लोका परदेसिगेलाइता हानिका आले दिनागेलाइता यरुसेलेम सहरता घातेका घाटानागेलाइको बारेता मागिका सायद नाअ् खिनिङ एमि द्याङ वाला।
19येसु इम्बालाइहेङ हिअ्हि, हिसिका काथा? इदोइ नासरत देराको येसुको बारेता जेङका काथा हि, वा परमेस्वर कालाउ द्याङगेलाइको आगाता सरबुङसाइका काम पाका कालाउ सिक्स्या पिका एमि परमेस्वरको सरबुङसाइका बक्ता हिघाहि। 20कालाउ केलाइको मुलि पुजारिगेलाइ रिम्हि, कालाउ वासेहेङ सिका दन्ड पिहि कालाउ क्रुस्टा तोइलि चुम्पुहि। 21वा दोङ इस्राएल सारभिको द्याङगेलाइहेङ रोमिगेलाइको बन्धनसो लाअ्पावाबे दोअ्तेङ केलाइ आस पाका हिघान्हाहि। कालाउ वासेहेङ क्रुस्टा तोइका नानि सुम दिना जेङहोइ। 22कालाउ एला केलाइको समुहको आधिमि बेबालाइ केलाइहेङ आचाम्माको काथागेलाइ दोअ्हि। जाइगेलाइ नानि एह्रिमाङ येसुको तोमता हानिहि जेता वाको जिउ ताअ्का हिघाहि। 23कालाउ इम्बालाइ येसुको जिउ इन्ता मानिङहि, इम्बालाइ इन्तासो घुरिहि कालाउ दोअ्हि, केलाइ स्वर्गदुतगेलाइको दर्सन निङन्हाहि कालाउ इम्बालाइ दोअ्हि, येसु सिन्हुका हि। 24कालाउ न्हुसो केलाइको समुहको आधिमि सानाइतिगेलाइ बुङ तोमता खाङलि हानिहि। उङको बेबालाइ दोअ्का भाइपाङ तोम खालि हिघाहि, इम्बालाइ हासु बुङ येसुहेङ मातिङहि।
25येसु उङको न्हेमि चात्यागेलाइहेङ दोअ्हि, ओइ आनाइगेलाइ जेदोङ परमेस्वरको बक्तागेलाइ धर्मसास्तरता लेखेका हिघाहि। नेलाइहेङ इङको काथा ह्रदयता खाङधुरि पालि हेन्जा मुसकिल जेङतेङ हि। 26कालाउ ख्रिस्ट दुख भोगिलि कालाउ वाको महिमाता दुल्लि आवस्यक हिघाहि।
27कालाउ येसु मोसाको व्यवस्थासो चुम्तेङ गोताङ परमेस्वरको बक्तागेलाइसो धर्मसास्तरता ताइको बारेता दोअ्का काथागेलाइ इम्बालाइहेङ बुझाइपिहि।
28जेलाउ इम्बालाइ इम्माउस देरा भेरपा थुकाहि, कालाउ येसु बाहाना पाहि, कि वा इन्तासो आसा दुरे हानिलि मन पापिहि। 29कालाउ इम्बालाइ वासेहेङ एसा दोअ्काताङ हेन्जा बिन्ति पाहि, नानि केलाइ दोफाङ हि, हाइपालिपानु हेन्जा कितिकितिलि तोम्होइ। कालाउ येसु ओबालाइ दोफा बासा हिलि सिता हानिहि।
30येसु जेलाउ चाअ्लि ओबालाइ दोफा योमहि, कालाउ तोलेको भाअ्सिङ परमेस्वरहेङ धन्यबाद पिहि। कालाउ वा इङको तोले पोङहि कालाउ ओबालाइहेङ पिलि तेङहि। 31कालाउ इम्बालाइको मिसियाँ हेअ्नाहि, कालाउ इम्बालाइ काथा गिहि कि वा येसु हि, दोअ्तेङ, कालाउ वा इम्बालाइसो माअ्न्हातेङ हानिहि। 32इम्बालाइ ता-ताइता दोअ्हि, वा केलाइ दोफा दामाता तेअ्काताङ पालाउ धर्मसास्तरको आर्था दोअ्पिलाउ केलाइको ह्रदय आनन्दोहोइ गद्गद् जेङका मान्थु घानाहि रो?
33कालाउ इम्बालाइ ओदोङघुरिदोङ ल्होतेङ यरुसेलेम सहर भारि घुरिहि। तेए चात्यागेलाइ कालाउ ओबालाइ दोफा जोम्तेङ हिका आरु द्याङगेलाइ दोफा दुसुहि। 34उङको तेए चात्या दोअ्हि, जातिङको प्रभु सिकासो सिन्हुतेङ ल्होका हि, कालाउ वा सिमोन पतरुसकोता तिङचालाहि। 35कालाउ न्हुसो उङको न्हेमि दामाता जेदोङ जेङका हिघाहि इङको आरु चात्यागेलाइहेङ हिङपाहि। इम्बालाइ दोअ्हि, वा तोले पोङलाउ येसुहेङ नाल्हि।
येसु चात्यागेलाइको आगाता तिङचालाहि
(मति 28:16-20; मर्कु 16:14-18; युहा 20:19-23; प्रे 1:4-8)
36जेलाउ उङको न्हेमि द्याङ इङको काथागेलाइ पाकाताङ पालाउ, येसु ताइमिङ चात्यागेलाइको माझाता तिङचालाहि कालाउ वा इम्बालाइहेङ दोअ्हि, नेलाइहेङ सान्ति ज्याको!
37कालाउ चात्यागेलाइ भाङ-भाङहि कालाउ इम्बालाइते भुत-आत्मा तिङन्हाहि दोअ्तेङ थिहि। 38कालाउ येसु इम्बालाइहेङ दोअ्हि, हाइ पालि नेलाइ थिसुखेना? हाइ पालि मनता इसिका साङखा पासुखेन्हा? 39काङको खुर कालाउ खोकोइगेलाइ खाङसु, का हिघा। कासेहेङ साइतेङ खाङसु, या काङको हारा कालाउ बिहाको जिउ हि। भुत-आत्माकोते हारा कालाउ बिहाको जिउ मान्थुखे।
40एसा दोअ्लि दोअ्तेङ येसु ताइको खुर कालाउ खोकोइ तिङपाहि। 41इम्बालाइ मेनाङ लेङचातेङ कालाउ भारभुसाइश जेङहि कि इम्बालाइ खाङधुरि पालि मादोहि येसु हेसापा सिन्हुहि। कालाउ येसु इम्बालाइहेङ दोअ्हि, हाइ इता नेलाइ दोफा चाका-आम्का हि? 42इम्बालाइ ए टुक्रा फुङका हाया वासेहेङ पिहि। 43इङको हाया ह्रुहि, जेलाउ इम्बालाइ खाङतेङ हिघाहि कालाउ वा इम्बालाइको आगाता चापिहि।
44कालाउ येसु ओबालाइहेङ दोअ्हि, जेलाउ का नेलाइ दोफा हिघाखा का हाइ दोअ्घा इङको फोम पासु। का दोअ्घा, मोसाको व्यवस्थाता, परमेस्वरको बक्तागेलाइको पुस्तकता कालाउ भजन सङग्रहता काङको बिसोइता लेखेका गोताङ काथा पुरा जेनाको।
45कालाउ न्हुसो वा धर्मसास्तरता लेखेका गोताङ काथागेलाइ बुझिलि साघाइहि। 46येसु ओबालाइहेङ दोअ्हि, धर्मसास्तरता एसापा लेखेका हि, ख्रिस्ट दुख भोगितेङ सुम दिनाता सिकासो आरोङ सिन्हुतेङ ल्होकावा। 47कालाउ यरुसेलेम सहरसो सुरु पातेङ द्यापाहाङ गोताङ जातिगेलाइ वासेहेङ खाङधुरि पातेङ पाप पालि लाअ्नु पाप स्यामा जेनावा दोअ्तेङ सुसमाचार पालि गोइस्वाना। 48नेलाइ दोङ इदोइ गोताङ काथाको साक्सि जेङसु। 49कालाउ खाङसु, का ताइमिङ नेलाइकोता पबित्तरो आत्मा दिङगिल्लाङका जाइको प्रतिग्या काङको आबा पाका हिघाहि। कालाउ नेलाइ जेलाउ थेकापा स्वर्गसो सरबुङ मानिङस्वाना एन्सालाउ थेकापा नेलाइ इदोङ सहरता ह्रुम्तेङ हिसु।
येसुको स्वर्गरोन
(मर्कु 16:19-20; प्रे 1:9-11)
50कालाउ न्हुसो येसु ताइको चात्यागेलाइहेङ सहरसो बाहार भेरपाङको बेथानिया देराता चुम्पुहि, इन्ता थुकातेङ वा ताइको खुर तोल्हेतेङ ओबालाइहेङ आसिरबाद पिहि। 51जेलाउ येसु ओबालाइहेङ आसिरबाद पिकाताङ पालाउ ओबालाइहेङ लाअ्हि कालाउ आकासता चुम्पुहि। 52कालाउ चात्यागेलाइ वाको आराधाना पाहि कालाउ न्हुसो इम्बालाइ हेन्जाङ दोङ लेङचातेङ यरुसेलेम सहर घुरिहि। 53दिना-दिनाङ इम्बालाइ मुन्दिरता हेन्जा सोमोइ परमेस्वरको बाखिन पाघाखे।
Currently Selected:
लुका 24: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
