लुका 3
3
बप्तिस्ता पिका युहान्ना
(मति 3:1-2; मर्कु 1:1-8; युहा 1:19-28)
1रोमि साम्रात तिबेरियासको सासन पाका तेनाऔङ बासारता जेलाउ पन्तियास पिलातस यहुदिया जिल्लाता बडा-हाकिम हिघाहि। जेलाउ राजा हेरोद गालिल जिल्लाको सासक हिघाहि। वाको ओने फिलिप इतुरिया कालाउ टेबेरियासको इलाकाता सासन पाघाखे, कालाउ लुसानियास दोअ्का द्याङ आबिलेनेको इलाकाता सासन पाघाहि। 2जेलाउ हन्नास कालाउ कैयाफा झाराङ खान्तेङ बार्का पुजारिगेलाइ जेङका हिघाखे। ओदोङ घुरि चाका-मान्दा थामेता परमेस्वर जकरियाको चान युहान्नाहेङ प्रचार पालि आदेस पिहि। 3बप्तिस्ता पिका युहान्ना यर्दन झोराको द्यापाहाङको गोताङ सहर, कालाउ देरागेलाइता हानिहि, कालाउ वा दोअ्हि, “पाप पालि लाअ्सु बप्तिस्ता ह्रुसु कालाउकि परमेस्वर नाङको पाप स्यामा पाप्याको।” 4इदोइ गोताङ काथागेलाइ यासाइया परमेस्वरको बक्ता लेखेका कितापको बचन आन्सार जेङहि,
चाका-मान्दा थामेता एमि ह्रिकाइकाको गाला दोअ्खे,
प्रभु लोलिको भाअ्सिङ दामा तियार पासु,
वाको दामागेलाइ सोझाका बानाइसु।
5गोताङ धोबेलेङगेलाइ पुराइन्हावा,
कालाउ गोताङ तिकार-दोला देहेलन्हापावा,
केङकुलुङका दामागेलाइ सारिपाङ,
कालाउ आपथ्यारो दामागेलाइहेङ सुकाका बानाइयावा।
6गोताङ द्याङगेलाइ परमेस्वरको मुक्ति निनावा।
7ओदोङ भाअ्सिङ बप्तिस्ता पिका युहान्ना दोफा बप्तिस्ता ह्रुलि द्याङगेलाइ लोहि, बप्तिस्ता पिका युहान्ना ओबालाइहेङ दोअ्हि, ओइ बिस हिका पुय्याँको चान भाइका, परमेस्वरको पालि खाङका न्यायसो खाअ्लि हासु नेलाइहेङ धिर्पाहि? 8ओदोङ भाअ्सिङ पाप पालि लाअ्सु कालाउ सोबाइका काम पासु। कालाउ नेलाइ ताइमिङ केलाइको आबा आब्राहाम दोङ मादोअ्सु, हाइपालिपानु का नेलाइहेङ दोअ्खा, परमेस्वर इङको उन्ठुइगेलाइसो आब्राहामको भाअ्सिङ बङस, बानाइपिलि द्वावा। 9कालाउ परमेस्वर झाराङको न्याय पालि तियार हि, जाइ दोङ पाप पालि मालाखे, ठिक एन्साङ पाअ्तेङ दुफे हिका द्याङ इङको सिङको जारिहेङ पाल्लि तियार हि, जेदोङ रेम्का फल मापिखे।
10द्याङगेलाइ युहान्नाहेङ हिअ्हि, परमेस्वरको साजाइसो बान्चिलि केलाइ हाइ पालि गोइका हि?
11युहान्ना इम्बालाइहेङ जोबाफ पिहि, जेसापा नेलाइ दोफा न्हेनोङ लोखन हिनु भेनेङ माहिकाहेङ एनोङ पिसु, चाका-आम्का हिनु बुङ मान्थुकालाइहेङ बाखाराइपिसु।
12पोत ल्होपाकालाइ बुङ युहान्नाकोता बप्तिस्ता ह्रुलि लोहि कालाउ वासेहेङ हिअ्हि, “गुरु ज्यु, केलाइ हाइ पालि गोयाङ?”
13युहान्ना इम्बालाइहेङ दोअ्हि, नेलाइहेङ जेथे पोत ल्होपालि सारकारको आदेस हि, इङको खान्तेङ हेन्जा पोत माल्होपा।
14आधिमि सिपालाइ युहान्नाहेङ हिअ्हि, केलाइ चाहि हाइ पालि? युहान्ना इम्बालाइहेङ दोअ्हि, धाक तिङपातेङ द्याङगेलाइसो ताका माह्रुसु हासुको बुङ बारेता माधाताइसु ताइमिङ कामाइका जेदोङ जेथे डोरमा हि ओदोङता सन्तोक हिसु।
15गोताङ द्याङगेलाइ ख्रिस्ट धेमाङ ल्वाङ दोअ्तेङ आसता हिघाहि कालाउ युहान्नाको बारेता भारबुसाइतेङ हिघाहि। इम्बालाइ सोचिहि, हाइ वा दोङ ख्रिस्ट कुनु? 16युहान्ना झाराङहेङ जोबाफ पिहि, का नेलाइहेङ चिको बप्तिस्ता पिखा, का न्हुसो जाइ एमि ल्वाङ वा दोङ का खान्तेङ हेन्जा माहान हि कालाउ का वाको जुत्ताको तुना बुङ खाइलि थेकापा सोबाइका मान्थुघा, वा दोङ नेलाइहेङ पबित्तरो आत्मा कालाउ मेको बप्तिस्ता प्यावा। 17सिसा फाचिका राअ् वाकोङ खुरता हि, कालाउ से उम फाचेतेङ भाकारता जोम्पावा, कालाउ पिताना चाहि हेलाउ बुङ मासिका मेता दुकावा। 18एसापा वा द्याङगेलाइहेङ हेन्जाङ आरु काथागेलाइको आर्तिगेलाइसो सिक्स्या पिहि, कालाउ द्याङगेलाइहेङ सुसमाचारगेलाइ प्राचार पाहि।
19राजा हेरोद ताइको ओनेको बे हेरोदियासहेङ ताइको बे बानाइतेङ ताअ्हि। वाको इन्सिका मारेम्का दुस्ट काम कालाउ सम्बन्ध ताअ्नाङ युहान्ना सासक राजा हेरोदहेङ मारफाङ चेरहि। 20ओदोङ भाअ्सिङ राजा हेरोद युहान्नाहेङ झ्यालखानाता ह्वातेङ वा इङको गोताङ दुस्ट कामगेलाइ ह्रुता झन आरोङ एनोङ दुस्ट काम थोपिहि।
येसुको बप्तिस्ता
(मति 3:13-17; मर्कु 1:9-11)
21जेलाउ झाराङ द्याङगेलाइ बप्तिस्ता ह्रुहि, येसु बुङ बप्तिस्ता ह्रुहि। येसु प्रार्थाना पातेङ हिलाउ आकास फाङगिल्का तिङहि। 22कालाउ ताइ ह्रुता पबित्तरो आत्माहेङ कुर्जा भाइपा खुअ्काताङ पाका तिङहि। कालाउ स्वर्गसो परमेस्वरको इसिका एनोङ गाला ओल्लेहि, नाअ् काङको आनाउ सोना तुमलिताको चान, नाअ् दोफा का लेङचाका हिघा।
येसुको हारागुटिया
(मति 1:1-17)
23जेलाउ येसु ताइको काम पालि तेङहि ओदोङ बेला वाको बासार झान्डाइ ए कुरि ते पुगिका हिघाहि। द्याङगेलाइ सोचिका हिघाहि कि, योसेफ चाहि एलिको चान हिघाहि। 24एलि मत्तातको चान हिघाहि, मत्तात लेबिको चान हिघाहि, लेबि मल्किको चान हिघाहि, मल्कि याम्नाको चान हिघाहि, कालाउ याम्ना युसुफको चान हिघाहि। 25युसुफ मत्ताथियासको चान हिघाहि, मत्ताथियास आमोसको चान हिघाहि, आमोस नहुमको चान हिघाहि, नहुम इसलिको चान हिघाहि, इसलि नग्यैको चान हिघाहि। 26नग्यै माथको चान हिघाहि, माथ मत्ताथियासको चान हिघाहि, मत्ताथियास सिमोनको चान हिघाहि, सिमोन योसेखको चान हिघाहि, योसेफ योदाको चान हिघाहि। 27योदा योआननको चान हिघाहि, योअनन रेसाको चान हिघाहि, रेसा यारुबाबेलको चान हिघाहि, यारुबाबेल साल्तिएलको चान हिघाहि, साल्तिएल नेरिको चान हिघाहि। 28नेरि मल्किका चान हिघाहि, मल्कि आद्दिको चान हिघाहि, आद्दि कोसामको चान हिघाहि। कोसाम एलमादमको चान हिघाहि, एलमादम एरको चान हिघाहि। 29एर यहोसुको चान हिघाहि, यहोसु एलिएजरको चान हिघाहि, एलिएजर योरिमको चान हिघाहि, योरिम मत्तातको चान हिघाहि, मत्तात लेबिको चान हिघाहि। 30कालाउ लेबि सिमियोनको चान हिघाहि, सिमियोन यहुदाको चान हिघाहि, यहुदा युसुफको चान हिघाहि, युसुफ योनानको चान हिघाहि, योनान एल्याकिमको चान हिघाहि। 31एल्याकिम मलेआको चान हिघाहि, मलेआ मिन्नाको चान हिघाहि, मिन्ना मत्ताथाको चान हिघाहि, मत्ताथाको नातानको चान हिघाहि, कालाउ नातान राजा दाउदको चान हिघाहि। 32दाउद यिसैको चान हिघाहि, यिसै ओबेदको चान हिघाहि, ओबेद बोअजको चान हिघाहि, बोअज सोलोमोनको चान हिघाहि, कालाउ सोलोमोन नहसोनका चान हिघाहि। 33नहसोन आम्मिनादाबको चान हिघाहि, आम्मिनादाब आरामको चान हिघाहि, आराम हेस्रोनको चान हिघाहि, हेस्रोन फारेसको चान हिघाहि, कालाउ फारेस यहुदाको चान हिघाहि। 34यहुदा याकुबको चान हिघाहि, याकुब इसाहाकको चान हिघाहि, इसाहाक आब्राहामको चान हिघाहि, आब्राहाम तेरहको चान हिघाहि, कालाउ तेरह नाहोरको चान हिघाहि। 35नाहोर सरुगको चान हिघाहि, सरुग रउको चान हिघाहि, रउ पेलेगको चान हिघाहि, पेलेग एबेरको चान हिघाहि, कालाउ एबेर सेलहको चान हिघाहि। 36सेलह केनानको चान हिघाहि, केनान आर्पस्यदको चान हिघाहि, आर्पस्यद सेमको चान हिघाहि, सेम नुहाको चान हिघाहि, कालाउ नुह लेमेखको चान हिघाहि। 37लेमेख मतुसेलहको चान हिघाहि, मतुसेलह हनोकको चान हिघाहि, हनोक येरेदको चान हिघाहि, येरेद म्हलालको चान हिघाहि, कालाउ महलालेल केनानको चान हिघाहि। 38केनान एनोसको चान हिघाहि, एनोस सेतको चान हिघाहि, सेत आदमको चान हिघाहि, कालाउ आदम परमेस्वरको चान हिघाहि।
Currently Selected:
लुका 3: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
