लुका 6
6
येसु परमेस्वरको पबित्तरो दिनाको प्रभु
(मति 12:1-14; मर्कु 2:23-28; 3:1-6)
1एनि, परमेस्वरको पबित्तरो दिनाता, येसु से उम हिका मिलिङ भारिसो हानिघाखे, वाको चात्यागेलाइ सिसा पेतेङ खुरता माझितेङ चाहि। 2आधिमि फारिसिगेलाइ येसुहेङ दोअ्हि, नेलाइ हाइ पालि एसा पासुखेना? परमेस्वरको पबित्तरो दिनाता एसा पालि चाहि व्यवस्थाको बिरोध जेङखे?
3येसु इम्बालाइहेङ जोबाफ पिहि, नेलाइ पढेका मान्थु सुन्हा, राजा दाउद जेलाउ कालाउ वाको सानाइतिगेलाइ म्हितुका बेला वा हाइ पाका हिघाहि? 4राजा दाउद परमेस्वरको मुन्दिर लिता दुल्हि, कालाउ वा परमेस्वरहेङ चढाइका तोले चाहि कालाउ ताइको सानाइतिगेलाइहेङ बुङ पिहि, जेदोङ मोसाको व्यवस्था आन्सार प्राधान पुजारिहेङ खिनिङ तोले चालि खाबारा हिघाहि। 5कालाउ येसु फारिसिगेलाइहेङ दोअ्हि, का द्याङको चान दोङ परमेस्वरको पबित्तरो दिनाको प्रभु।
6आरोङ भेनेङ परमेस्वरको पबित्तरो दिनाता यहुदिगेलाइको चाउघारा साअ् हानितेङ सिक्स्या पिहि, इन्ता एमि द्याङको दाम्पाहाको खुर सेङका हिघाहि। 7वा परमेस्वरको पबित्तरो दिनाता इङको द्याङहेङ एल्पाङबे दोअ्तेङ व्यवस्था धिरपाका द्याङगेलाइ कालाउ फारिसिगेलाइ वासेहेङ दुसिलि दाउगेलाइ भोगिल्घाखे। 8येसु इम्बालाइ हाइ बिचार पाखे दोअ्तेङ बुझिहि कालाउ वा उङको सेङका खुर हिका द्याङहेङ दोअ्हि, ल्हो, कालाउ इदोइ द्याङगेलाइको आगाता जाअ्। ओदोङ भाअ्सिङ उङको द्याङ हाकाधुकु ल्होहि कालाउ इन्ता जाअ्हि।
9जेलाउ येसु दोङ इम्बालाइहेङ दोअ्हि, परमेस्वरको पबित्तरो दिनाता रेम्फा पालि रेम्का ना मारेम्का हि? हासुको बुङ जिउ बान्चिपालि, कि ना सेअ्लि, हिदोइ चाहि रेम्का हि?
10येसु इङको कोरपाहाङ योम्का झाराङहेङ खाङहि कालाउ उङको द्याङहेङ दोअ्हि, खोइ कासेहेङ “नाङको खुर फेनापा।” उङको द्याङ वासेहेङ खुर तिङपाहि वाको खुर ओदोङ घुरि एल्हि। 11फारिसिगेलाइ कालाउ मोसाको व्यवस्था धिरपाका द्याङगेलाइ मारफाङ चेर ताम्पाहि। इम्बालाइ ता-ताइमिता येसुको बिरोधता काथा पालि तेङहि?
तेन्हे साल्का चात्यागेलाइ
(मति 10:1-4; मर्कु 3:13-19)
12इङको दिनाता येसु एनोङ तिकारता हानितेङ झेम्पाङ परमेस्वर दोफा प्रार्थाना पाहि। 13न्हु दिना ह्रिमा, वा ताइको चात्यागेलाइहेङ काइहि। कालाउ इम्बालाइको माझासो तेन्हे झना छाल्का चात्या काम पालि साल्हि। कालाउ वा इम्बालाइहेङ प्रेरित दोअ्तेङ उपमिङ पिहि इम्बालाइ हिघाखे: 14येसु सिमोनहेङ पतरुस मिङ ताअ्पिका हिघाखे कालाउ आन्द्रियास पतरुसको ओने, याकुब कालाउ युहान्ना, फिलिप कालाउ बारथोलोमइ, 15मति, थोमा, आल्फायासको चान याकुब कालाउ सिमोन जाइहेङ जेलोट बुङ दोअ्खे, 16यहुदा याकुबको चान कालाउ यहुदा इस्कोरियत, इदोइ यहुदा दोङ उङको एमि हि जाइ येसुहेङ सतुरुगेलाइको खुरता रिम्पावा।
आसिस कालाउ स्राप
(मति 5:3-12)
17येसु कालाउ चात्यागेलाइ तिकारसो लेता खुतेङ एनोङ चाउरता लोहि, वाको चात्यागेलाइ दोफा एनोङ बार्का जेर इन्ता हिघाहि। कालाउ टुरोस कालाउ सिदोन सहर कालाउ समुन्द्रको काम्भेगेलाइसो कालाउ यहुदिया जिल्लाको गोताङ देरागेलाइसो, यरुसेलेम सहरगेलाइसो वाको बचन हिङलि कालाउ ता-ताइको मिसासो एल्लि इन्ता लोका हिघाखे। 18भुत-आत्मागेलाइसो साताइन्हाकागेलाइ बुङ एल्हि। 19झाराङ येसुहेङ साइलि खाङघाखे, हाइपालिपानु वाकोसो सरबुङ ओल्लेतेङ हिघाहि, कालाउ इम्बालाइ झाराङहेङ एल्पाघाखे।
20वा ताइको चात्यागेलाइहेङ खाङहि कालाउ दोअ्हि,
धन्य ताइमिहेङ आत्मिकि रुपता गरिब सम्झिकालाइ
हाइपालिपानु परमेस्वरको सासन नेलाइको दोङ हि।
21धन्य नेलाइ एला म्हितुकालाइ,
हाइपालिपानु नेलाइ जिबन निङस्वाना,
धन्य नेलाइ एला खार्तेङ हिकालाइ,
हाइपालिपानु नेलाइ लेङचास्वाना।
22धन्य नेलाइ का द्याङको चानको भाअ्सिङ
नेलाइहेङ द्याङगेलाइ मन्दा-माताकावा,
कालाउ ताइको जेरसो ओल्लेपावा,
कालाउ इम्बालाइ नेलाइहेङ साताइयावा
कालाउ नेलाइको बिरोधता मारेम्का काथागेलाइ दोअ्तावा,
कालाउ नेलाइहेङ आपमान पावा।
23इङको बेला लेङचासु कालाउ आनान्द जेङसु,
हाइपालिपानु नेलाइको भाअ्सिङ स्वर्गता बार्का इनाम ताअ्का हि।
हेन्जाङ सोमोइ लाम्फा हाइपालिपानु नेलाइको पुर्खागेलाइ
परमेस्वरको बक्तागेलाइहेङ द्याङगेलाइ एन्साङ पाघाहि।
24ओइ धनि द्याङगेलाइ! हेथे बार्का दुख नेलाइहेङ ह्रुम्तेङ हि,
हाइपालिपानु नेलाइ सुखको जिबन बितिपालि दोसुहोइना।
25ओइ एला नेलाइ घाइपा चाकालाइहेङ,
बार्का दुख नेलाइहेङ ह्रुम्तेङ हि,
हाइपालिपानु नेलाइ म्हितुस्वाना,
एला नेलाइ लेङतेङ हिकालाइहेङ बार्का दुख नेलाइहेङ ह्रुम्तेङ हि,
हाइपालिपानु नेलाइ सोक पास्वाना कालाउ खार्हि गोइस्वाना।
26बार्का दुख नेलाइहेङ ह्रुम्तेङ हि,
जेलाउ द्याङगेलाइ नेलाइको बाखिन पाखे,
हाइपालिपानु इसिका बाखिनते नेलाइको पुर्खागेलाइ
धातुवा आगमबक्तागेलाइ बुङ पिका हिघाहि।
सतुरुहेङ प्रेम पालि
(मति 5:38-42)
27का नेलाइहेङ दोअ्खा, ताइको सतुरुगेलाइहेङ प्रेम पासु, जाइ नेलाइहेङ मन्दा माताखे इम्बालाइहेङ बुङ भलाइ पासु, 28नेलाइहेङ साराप पिकालाइहेङ बुङ आसिरबाद पिसु, नेलाइ दोफा दुर्यव्भार पाकालाइको भाअ्सिङ प्रार्थाना पापिसु। 29जेसापा हासु बुङ नेलाइको एनोङ गाल्भुङता चाउरिनु आरोङ भेनेङ गाल्भु बुङ धोअ्पि जेसापा हासु बुङ नाङको लोखन चुम्पुनु वासेहेङ कोट बुङ पि। 30नाङको दोफा ह्रेकालाइहेङ झाराङहेङ पि कालाउ नाङको आमेने चुम्पुका दोफा आरोङ मार्हे। 31जेसाङ नेलाइ दोफा द्याङगेलाइ हिसिका पाका मन्दा तासुखेना, कालाउ नेलाइ बुङ द्याङगेलाइ दोफा इन्सिकाङ पासु।
32जाइ नेलाइहेङ प्रेम पाखे कालाउ इम्बालाइहेङ खिनिङ प्रेम पासुखेना पानु, नेलाइ हिदोइ बुङ बाखिनको योग्य माजेङस्वाना हाइपालिपानु पापिगेलाइ बुङ ताइमिहेङ प्रेम पाकालाइ दोफा प्रेम दोङ पाखे। 33नेलाइको भालाइ पाकालाइहेङ खिनिङ भालाइ पासुखेना पानु नेलाइ हिदोइ बुङ बारका काम पाका मान्थुसुना, हाइपालिपानु पापिगेलाइ बुङ एन्साङ पाखे। 34कालाउ जेसापा तिरिलि दोकालाइहेङ खिनिङ रिन पिस्वाना पानु नेलाइहेङ हासु हाइ पालि बाखिन पावा रो? पापिगेलाइ बुङते तिरिलि दोका पापिहेङ रिन पिखे। 35कालाउ ताइको सतुरुगेलाइहेङ प्रेम पासु। इम्बालाइहेङ रेम्फा पासु, कालाउ रिन ह्रेकालाइहेङ धुरिपाङका दोअ्तेङ आस मापासिङ रिन पि। एन्सा पाहे पानु नेलाइ बार्का इनाम निङस्वाना कालाउ सर्बोच्च परमेस्वरको सान्तानगेलाइ जेङस्वाना, हाइपालिपानु परमेस्वर बैगुनि कालाउ दुस्ट द्याङगेलाइहेङ दाया पाखे। 36जेसाङ आबा परमेस्वर दायाका हि, कालाउ नेलाइ बुङ एन्साङ दायाका जेङसु।
आरुगेलाइहेङ मादुसिलि
(मति 7:1-5)
37आरुको न्याय मापासु, कालाउ नेलाइको परमेस्वर बुङ न्याय मापाङ। आरुगेलाइहेङ मादुसिसु, कालाउ नेलाइ बुङ दुसिका माजेङस्वाना। स्यामा पासु, कालाउ नेलाइहेङ बुङ स्यामा पापियावा। 38आरुगेलाइहेङ पिसु कालाउ नेलाइहेङ बुङ परमेस्वर रेम्फा दोङतेङ प्यावा थिचाइकाताङ कालाउ ताम्पाकाताङ हेङगालाइकाताङ होपाङ निङस्वाना, जेथे हेन्जा मन पितेङ हिनाना, ओदोङ झोको हेन्जा नाअ् ग्यान बुझियाना।
39येसु इम्बालाइहेङ इदोइ निङपिकासो दोअ्हि: हाइ एमि कान्हाँ भेनेङ कान्हाँहेङ थोङलि द्वावा? जेसापा थोङनु न्हेमि दोङ खाराता वालातावा। 40एमि चात्या ताइको गुरु खान्तेङ माबाराखे गोताङ द्याङ जाइ पुर्न रुपता धिरलि दोखे कालाउ खिनिङ वा गुरु भाइपाङ जेङलि द्वावा।
41नाअ् दोङ ताइको सानाइतिको एनोङ आतुइका दुसिका चुम्तेङ हाइ पालि वाको न्याय पाखेना जाइ वाको मिसियाँको धुला भाइका हि, कालाउ ताइको बा-बार्का दुसिका माखाङखे, जेदोङ वाको मिसियाँता हिका धेङग्रा भाइका हि। 42नाअ् लिता बार्का दुसिका हि पानु, ताइको खान्तेङ म्हुइका दुसिका हिका द्याङहेङ साघाइलि कोसिस माभोअ्। ओइ कपटिगेलाइ! लाम्फा ताइको बार्का दुसिका सुधार पाअ्, कालाउ न्हुसो नाअ् पुर्न रुपहोइ गोताङ सोमोइ कालाउ नाअ् इन्ता ताइमिङ खाङतेङ ताइको सानाइतिको मिसियाँको धुला ओल्लेपालि द्वाना। कालाउ आरुगेलाइको आतुइका दुसिका सुधारतेङ साघाइलि द्वाना
सिङ कालाउ इङको को सेका
(मति 7:16-20; 12:33-35)
43एनोङ रेम्का सिङ मारेम्का सेका हेलाउ बुङ मासेपाखे, एन्साङ दोङ एनोङ मारेम्का सिङ रेम्का सेका सेपालि मादावा। 44गोताङ सिङ वाको सेका पिकासो नाल्लि दोअ्खे द्याङगेलाइ चुइको झुन्जिसो आन्जिर पेलि माद्वावा कालाउ इम्बालाइ चुइ झुन्जिसो आङगुर पेलि माद्वावा। 45एनोङ आसल द्याङ, ताइको मनता हिका आसल काथा भाकारसो आसल काथा दोङ ओल्लेपाखे। खाराब द्याङ खाराब दोङ काथा भाकारसो ओल्लेपाखे। हाइपालिपानु जेदोङ मनता हि ओदोङ काथा द्याङगेलाइ धुइखे।
न्हेनोङ साअ्को निङपिका
(मति 7:24-27)
46जेलाउ “काङको दोअ्का माकिसुखेना पानु हाइ पालि कासेहेङ ‘प्रभु, प्रभु’ दोअ्स्वाना? 47जाइ द्याङ काङको दोङ दोअ्का काथागेलाइ हिङखे, इङको आन्सार पाखे वा हिसिका हि। दोअ्तेङ का नेलाइहेङ दोअ्प्याङका। 48वा एमि साअ् धाम्का द्याङ भाइकाङ हि वा वाङखारापा घारा तोतेङ बल्लियाका उन्ठुइ ह्रुता खाम्बा गिङहि। जेदोङ बेला झोराता बाने लोहि कालाउ चिहोइ साअ्ता थुन्हाहि कालाउ बुङ इङको बानेहोइ साअ्हेङ हेङगालाइलि मादोहि, हाइपालिपानु इङको साअ् रेम्फा कालाउ बलियापा धाम्का हिघाहि। 49जेदोङ द्याङ काङको काथा हिङखे कालाउ बुङ मासाखे, उङको एमि इसिका द्याङ हि, जाइ बल्लियाका खाम्बा मागिङसिङ साअ् धामहि। जेलाउ इङको साअ् ह्रुता बाने लोहि इङको साअ्ता थुन्हाहि कालाउ इङको साअ् एधेमासिङ भापाहि कालाउ गोताङ हान्ति जेङहि।
Currently Selected:
लुका 6: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
