लुका 8

चालाइ बिकाको निङपिका

(मति 13:1-23; मर्कु 4:1-20)

1आले दिना न्हुसो, येसु परमेस्वरको सासनको बारेता प्राचार पाकाताङ, देरागेलाइ कालाउ सहरगेलाइ घुराइकाताङ हानिहि। तेन्हे चात्यागेलाइ बुङ वाको दोफाङ हिघाहि। 2हेथेते बेबालाइ बुङ वाको दोफा हिघाहि, जाइ भुत-आत्मा हिका कालाउ मासाधेका बेथागेलाइसो एल्का हिघाहि। इम्बालाइ मध्ये मग्दल देरासो मरियम लोका हिघाहि, जाइसो येसु न्हि लोङ भुत-आत्मा ओल्ले पापिका हिघाहि, 3कालाउ राजा हेरोदहेङ साघाइका खुजासकि को बे योआन्ना दोफाङ सुसन्ना कालाउ आरु हेन्जाङ बेबालाइ हिघाहि। जाइ दोङ येसु कालाउ वाको चात्यागेलाइहेङ ताइको ताका पितेङ साघाइघाखे।

4जेलाउ बार्का जेर वाको कोर्पाहाङ जोम्लि लोहि कालाउ सहर-सहरसो द्‍याङगेलाइ वाकोता लोहि, येसु इम्बालाइहेङ एनोङ निङपिकासो हेन्जाङ काथागेलाइ दोअ्हि। 5एमि किसान चालाइ बिलि ताइको मिलिङता हानिहि। कालाउ चालाइ बिलाउ आतुसाइसा दामा भारि बिन्हाहि, कालाउ द्‍याङगेलाइ याङहि, आधे चालाइ आकासको जिहाँ-जुइलेङ लोतेङ चुम्पुतेङ हानिहि। 6आधे चालाइगेलाइ आसा उन्ठुइभारि बिन्हाहि, इङको चालाइगेलाइ योलि तेङहि कालाउ मिलिङ आसा चेचेपा झाका मान्थुनाङ सेङहि। 7आधे चालाइ चुइगेलाइको भारि थालन्हाहि, चुइगेलाइ बारानाङ इङको आतुइका चालाइगेलाइहेङ बारालि मापिहि, कालाउ इङको चालाइ एरिन्हाहि, कालाउ मुहि। 8कालाउ आधे चालाइगेलाइ रेम्का भोनोइता बिन्हाहि, इङको चालाइगेलाइ लादाइलादाइपा योलि तेङहि, कालाउ आधे चालाइ साइ गुना, आधे चालाइ तुते गुना, आधे चालाइ सुम्ते गुना सेहि वा निङपिलि दोअ्तेङ वा बार्का गालाहोइ दोअ्हि, “जाइ काङको या काथा हिङदोङखे, वा इङको काथाहेङ ध्यान पितेङ हिनाको।”

9चात्यागेलाइ वासेहेङ हिअ्हि, या निङपिका को माने हाइको? 10येसु इम्बालाइहेङ दोअ्हि, परमेस्वरको सासनको रहस्य इम्बालाइहेङ पिका हि, जाइ परमेस्वरको सासनको बाहार हिकालाइहेङ निङपिका पाहासो गोताङ काथा दोअ्खा,

कालाउकि इम्बालाइ खाङनुते खानाको कालाउ मातिनाको,

कालाउ हिङनुते हिनाको कालाउ बुङ माबुझियाको।

11एला निङपिका या, चालाइ चाहि परमेस्वरको बचन। 12दामाको भेरपा झारिका चालाइ चाहि इम्बालाइ, जाइ हिङखे, कालाउ बचन हिङतेङ खाङधुरि मापाको कालाउ मुक्ति माजेनाको दोअ्तेङ साइतान लोतेङ इम्बालाइको ह्रदयसो बचन चुम्पुतेङ हानिखे। 13आधे उन्ठुइ भाइका मिलिङ हि, जेता चालाइ बिन्हाका हि, या इसिका द्‍याङगेलाइ दोङ जाइ दोङ लेङचातेङ परमेस्वरको बचन हिङखे कालाउ तुरुन्तै ग्रहन पाखे। कालाउ मिलिङ चाहि इम्बालाइ, जाइ बचन हिङतेङ लेङचाखे कालाउ वा ग्रहन पाखे, कालाउ बुङ वाको चाहि जारि मान्थुनाङ कालाउ आतुइसा पहरको भाअ्सिङ इम्बालाइ खाङधुरि पाखे, कालाउ जाचिका पहरता इम्बालाइ नासातावा। 14चुइको झुन्झिता बिन्हाका चालाइ भाइका हि, इम्बालाइ परमेस्वरको बचन हिङखे, कालाउ सुमिङको सुरताहोइ धनको मायारुहोइ कालाउ रेम-रेम्का आमेनेको लोभ वाको जिबनता लोखे ओदोङ भाअ्सिङ परमेस्वरको बचनता आगा बारालि मादोखे कालाउ इम्बालाइ हिदोइ बुङ फल सेपालि मादोखे। 15कालाउ आधिमि द्‍याङगेलाइ रेम्का मिलिङ भाइका हि, जाइ परमेस्वरको बचन रेम्फा कालाउ मन लागाइतेङ हिङखे। कालाउ इम्बालाइ परमेस्वरको बचन पालाना पाखे। कालाउ ह्रुम्तेङ सोमोइताङ रेम्का फल सेपाखे।

गेसाको बारेता निङपिका

16हिदोइ बुङ द्‍याङ गेसा जोलाइतेङ तापिहोइ माथुमखे, याते चाउकि लिता माताखे, भरु उङको द्‍याङ गेसा जोलाइतेङ चेरा दानिता दोङ ताखे इन्तासो लोका द्‍याङगेलाइ थाअ्-थाइकाहोइ फाइसालामका तिनावा। 17एसापा हाइ दोङ म्होतेङ ताअ्का तिनाङ, जेदोङ म्होनाका काथा हि देखाल जेनावा। जेदोङ म्मोन्हाका काथा हि इङको प्रकासता माल्वाङ। 18एसापा नेलाइ चङख हिसु हेसा हिङसुखेना, जाइ दोफा जेथे हि वा निनावा, जाइ दोफा ग्यान हि वासेहेङ हेन्जा प्याङ, जाइ दोफा ग्यान मान्थु वाको आतुइसा हिका बुङ चुम्पावा।

येसुको आमाइ कालाउ ओनेगेलाइ

(मति 12:46-50; मर्कु 3:31-35)

19येसुको आमाइ कालाउ ओनेगेलाइ वासेहेङ भेतिलि लोहि, द्‍याङगेलाइको बार्का जेर हिघाहि कालाउ गुल्सु-गुल्सुपाङ हिलाउ ओबालाइ येसुहेङ भेतिलि मादोहि। 20एमि द्‍याङ येसुहेङ दोअ्हि, “गुरु ज्यु नाङको आमाइ कालाउ नाङको ओनेगेलाइ नासेहेङ खाङलि बाहार ह्रुम्तेङ हि।”

21येसु इम्बालाइ झाराङहेङ जोबाफ पिहि, “काङको आमाइ कालाउ काङको ओनेगेलाइ ओबालाइ दोङ जाइ परमेस्वरको बचन हिङखे कालाउ इङकोहेङ किखे।”

येसु दुरभेर्माहेङ गाङपाहि

(मति 8:23-27; मर्कु 4:35-41)

22एनि येसु वाको चात्यागेलाइहेङ दोअ्हि, “लोसु का दोफा गालिल समुन्द्रको ओदोइ पार हानाइने। कालाउ इम्बालाइ नाउता धोल्तेङ हानिलि तेङहि। 23जेलाउ इम्बालाइ नाउता हानिकाताङ पालाउ येसु जिम्हि, समुन्द्रता बार्का दुर भेर्मा लोहि कालाउ इम्बालाइको नाउ चिहोइ पोङघालि तेङहि, कालाउ इम्बालाइ दुबिलि तोम्हि।”

24चात्यागेलाइ येसुकोता हानिहि कालाउ वासेहेङ ल्होपाहि इम्बालाइ दोअ्हि, “प्रभु, प्रभु, केलाइ दुबिलि तोम्न्हाहोइ।” कालाउ येसु ल्होहि वा दुरभेरमाहेङ कालाउ उल्लाउ-उल्लाका चिहेङ चेरहि, दुर भेरमा गाङहि, कालाउ समुन्द्र माचालाम मुचुलुमहि। 25वा चात्यागेलाइहेङ दोअ्हि, नेलाइको खाङधुरि खोइ हिसो हि? चात्यागेलाइ थिहि, कालाउ भारभुसाइहि, इम्बालाइता-ताइमिता, काथा पालि तेङहि, “या हासु वाला? वाते भेरमा कालाउ चिको उल्लाउ-उल्लाउकाहेङ बुङ आग्या पिखे कालाउ ओबालाइ बुङ वाको आग्या साअ्खे।”

भुत-आत्मा धेल्का द्याङ एल्हि

(मति 8:28-34; मर्कु 5:1-20)

26येसु कालाउ वाको चात्यागेलाइ समुन्द्रको ओदोइ पार गेरासनगेलाइको मुलुकता थुकाहि। 27जेलाउ येसु नाउसो लेता खुहि, ओदोङ घुरि एमि द्‍याङ जाइ दोफा भुत-आत्मा हिघाहि। वा तोम भारिसो ओल्लेतेङ वासेहेङ भेतिहि। उङको द्‍याङ हेन्जा बेलासोङ लोखोन मालागाइघाखे, कालाउ उङको द्‍याङ साअ्ता माहिसिङ तोमगेलाइभारि खिनिङ हिघाहि। 28जेलाउ उङको द्‍याङ येसुहेङ दुरेसोङ तिङहि कालाउ धाअ्तेङसाङ येसुको आगाता खोकोइता तुघुरतेङ आराधाना पाकाताङ दोअ्हि, “हे येसु सर्बोच्च परमेस्वरको चान, नाङको कालाउ केलाइ दोफा हाइ सरोकार हि रो?” सेउपाखा कासेहेङ मासाताइ। 29हाइपालिपानु येसु भुत-आत्माहेङ इदोइ द्‍याङसो ओल्लेतेङ हानेका आग्या पिका हिघाहि। वासेहेङ हेन्जा पोल्ति भुत-आत्मा रिम्का हिघाहि, वासेहेङ झिन्झिरिहोइ खुर खोकोइ धेउपिका हिघाहि कालाउ बुङ वा इङको झिन्झिरि धोअ्पाघाखे, कालाउ भुत-आत्मा वासेहेङ चाका-मान्दा थामे भारि चुम्पुघाखे।

30येसु वासेहेङ हिअ्हि, नाङको मिङ हाइ? वा जोबाफ पिहि, केलाइको मिङ फाउज हि, केलाइते हेन्जाङ हिनाहि। हाइपालिपानु वाको लिता हेन्जा भुत-आत्मागेलाइ दुल्का हिघाहि। 31इङको भुत-आत्मागेलाइ इम्बालाइहेङ हेलाउ बुङ वाङखाराका खाराता माथुकापाको दोअ्तेङ बिन्ति पाहि।

32इङको तिकारता एनोङ बार्का हुल पायागेलाइ दुगिल्तेङ हिघाहि, इङको भुत-आत्मागेलाइ पायागेलाइता दिङगिल्पि दोअ्तेङ येसु दोफा सेउपाहि कालाउ येसु भुत-आत्मागेलाइहेङ एन्साङ पापिहि। 33कालाउ भुत-आत्मागेलाइ उङको द्‍याङसो ओल्लेतेङ पायागेलाइकोता दुल्हि, कालाउ पायागेलाइ तिकार कालाउ समुन्द्रको काम्भे भारिसो धाअ्सितेङ समुन्द्रता वाङतेङ सिहि।

34एला जेदोङ जेङका हिघाहि इङको तिङतेङ पाया घोअ्कालाइ खाअ्हि, कालाउ इम्बालाइ इन्ता हाइ जेङका हिघाहि गोताङ इन्ताको देरागेलाइ कालाउ सहरको झाराङ द्‍याङगेलाइहेङ दोअ्पिहि। 35हेन्जाङ द्‍याङगेलाइ हाइ जेङहि दोअ्तेङ खाङलि बाहार ओल्लेतेङ लोहि, जाइ एनोङ सोमोइता भुत-आत्माहोइ पोङघाका हिघाहि। इम्बालाइ येसुकोता लोहि एला वा लोखन होङतेङ एल्का जेङतेङ येसुको खोकोइ भेरपा योम्तेङ हिका तिङनाङ इम्बालाइ आवाइतुहि। 36तिङकालाइ भुत-आत्मा धेल्का द्‍याङ हेसा एल्हि दोअ्तेङ ओबालाइहेङ दोअ्पिहि। 37गेरासनगेलाइ येसुहेङ इङको मुलुकसो लाअ्तेङ हानिलि दोअ्तेङ सेउपाहि, ओबालाइ मारफाङ थिका हिघाहि कालाउ येसु एनोङ नाउता धोल्तेङ गालिलभारि हानिहि।

38भुत-आत्मा धेल्तेङ एल्का वाजान वा बुङ येसु दोफा हानिलि सेउपाहि कालाउ येसु चाहि एसा दोअ्तेङ उङको द्‍याङहेङ इन्तासो बिदा पिहि। 39साअ् भारि हाने परमेस्वर नाङको भाअ्सिङ हाइ पापिहि इङको को बारेता द्‍याङगेलाइहेङ हिङपा। कालाउ न्हुसो उङको द्‍याङको भाअ्सिङ येसु वाको हाइ-हाइ पापिहि सारा सहरको द्‍याङगेलाइहेङ दोअ्काताङ हानिहि।

याइरसको चामिन्दि कालाउ हिति होका बेबाल एल्हि

(मति 9:18-26; मर्कु 5:21-43)

40जेलाउ येसु गालिल समुन्द्र भारि घुरिहि, द्‍याङगेलाइको हुदा वासेहेङ स्‍वागत पाहि, हाइपालिपानु झाराङ वासेहेङ ह्रुम्तेङ हिघाहि। 41एमि याइरस मिङ हिका द्‍याङ येसुकोता लोहि याइरस यहुदिगेलाइको चाउघारा साअ्को झाराङ खान्तेङ बार्का हिघाहि वा येसुको खोकोइता तुघुरतेङ वासेहेङ ताइको साअ्ता लोलि दोतेङ बिन्ति पाहि। 42याइरसको एमि खिनिङ चामिन्दि हिघाहि, तेन्हे बासार थुकाका हिघाहि, कालाउ वा सिलि तोम्का हिघाहि, जेलाउ येसु याइरसको बिन्ति हिङतेङ वाको दोफा साअ्ता हानिलि तोम्हि, येसु हानिलि तोम्लाउ द्‍याङगेलाइको हुदाहोइ वासेहेङ कोरपाहाङ गुल्सु-मुल्सुपा थेलिगिल्तेङ हिघाहि। 43तेन्हे बासारसोङ इङको जेरता हिति होतेङ हिका बेथाहोइ दुख निङतेङ हिका एमि बेबाल बुङ इन्ता हिघाहि, ताइको हेन्जाङ जय जेथा बैधेकोता ओसेरे पैति पाकाताङ खार्चा पाहि कालाउ बुङ वासेहेङ हासु बुङ एल्पालि मादोहि। 44उङको बेबाल येसुको न्हु पाहा लोतेङ वाको धाबा साइहि, ओदोङ पहरसो वाको हिति होलि तुहि।

45कालाउ येसु दोअ्हि, कासेहेङ हासु साइहि? झाराङ दोअ्हि कि इम्बालाइ हासु बुङ नासेहेङ साइका मान्थु, पतरुस दोअ्हि, गुरु ज्यु, द्‍याङगेलाइ कोरपाङ हि, कालाउ इम्बालाइ नासेहेङ धाकालाइतेङ हि।

46कालाउ बुङ येसु दोअ्हि, हासु बुङ कासेहेङ साइहि, काङकोसो सरबुङ ओल्लेतेङ हानिका थाहा गिघा।

47जेलाउ ताइमि म्होतेङ हिलि मादोका जेङहि गोताङ काथा थाहा निङतेङ उङको बेबाल फिरकाताङ लोहि, कालाउ वाको खोकोइता तुघुरतेङ सेउपाहि। कालाउ हाइ पालि वा वासेहेङ साइहि, कालाउ हेसा ओदोङ घुरि एल्हि, इङको गोताङ द्‍याङगेलाइको आगाता दोअ्पिहि। 48येसु उङको बेबालहेङ दोअ्हि, “ओइ चामिन्दि, नाङको खाङधुरिहोइ नाअ् एल्होइना, सान्तिसो हाने।”

49येसु दोङ बेबाल दोफा काथा पाअ्काताङ पालाउ यहुदिगेलाइको चाउघारा साअ्को एमि माझिवाराङको द्‍याङ लोतेङ याइरसहेङ दोअ्हि, नाङको चामिन्दिते सिहोइ आरोङ हाइ पालि गुरुज्युहेङ दुख प्याना

50येसु इङको काथा हिङतेङ कालाउ वा याइरसहेङ दोअ्हि, “माअ्थि खिनिङ खाङधुरि पाअ्‌ कालाउ नाङको चामिन्दि एलावा।”

51येसु इङको साअ्ता हानिहि, वा ताइको दोफा पतरुस, युहान्‍ना, याकुब कालाउ बेजानको आबा कालाउ आमाइहेङ लिता चुम्पुहि वा आरुगेलाइहेङ लिता दुल्लि मापिहि। 52झाराङ द्‍याङगेलाइ उङको बेजान सिकाता झाराङ खारतेङ हिघाहि कालाउ येसु दोअ्हि, माखारसु, उङको सिका मान्थु, वाते जिम्तेङ हि।

53द्‍याङगेलाइ येसुको काथा हिङतेङ लेङपिलि तेङहि हाइपालिपानु उङको बेजान सिहोइ दोका इम्बालाइहेङ थाहा हिघाहि। 54जेलाउ येसु उङको बेजानहेङ खुर चाअ्तेङ दोअ्हि, “तालिता कुमि!” इदोइ दोअ्का चाहि ओइ म्हुइका चामिन्दि, ल्हो! 55वाको जिउ आरोङ घुरितेङ लोहि, कालाउ उङको जाराक जुरुप्पा ल्होहि, कालाउ येसु दोअ्हि, यासिहेङ हाइ दोङ चालि पिसु। 56उङको बेजानको आमाइ-आबा भारभुसाइहि, वा उङको घाटानाको बारेता ओबालाइहेङ हासुहेङ बुङ मादोअ्सु दोअ्तेङ आदेस पिहि।

Currently Selected:

लुका 8: DHINT

Highlight

Copy