मति 13
13
चालाइ बिकाको निङपिका
(मर्कु 4:1-12; लुक 8:4-10)
1कोकोङ दिना येसु साअ्सो ओल्लेतेङ समुन्द्रको काम्भेता योम्हि। 2कालाउ इन्ता द्याङको बार्का जेरगेलाइ वाको भेरमा लोतेङ जोम्हि, ओदोङ भाअ्सिङ येसु इन्ता हिका नाउता धोल्तेङ योम्हि, कालाउ झाराङ द्याङगेलाइ समुन्द्रको काम्भेता जाअ्हि।
3येसु इम्बालाइहेङ निङपिकासो हेन्जाङ काथागेलाइ दोअ्पिहि। वा एसापा धिरपाका ताङ दोअ्हि, एमि किसान चालाइ बिलि ताइको मिलिङता हानिहि। 4कालाउ चालाइ बिलाउ आतुइसा दामा भारि बिन्हाहि, आधे चालाइ जिहाँ-जुइलेङ लोतेङ चुम्पुतेङ हानिहि। 5आधे चालाइ उन्ठुइभारि बिन्हाहि, जेता रेम्का भोनोइ मान्थुघाहि। कालाउ जेता हेन्जा भोनोइ मान्थुनाङ, इङको धेमाङ योहि। 6जेलाउ हेन्जा सान्हेनाङ, आतुइका चालाइको तुपा सेङहि, कालाउ लिता जारि जोअ्लि मादोनाङ इङको चालाइगेलाइ चुअ्हि। 7आधे चालाइ चुइगेलाइ भारि थालन्हाहि, चुइगेलाइ बारानाङ इङको आतुइका चालाइगेलाइहेङ बारालि मापिहि, 8कालाउ आधे चालाइ रेम्का भोनोइता बिन्हाहि, कालाउ आधे चालाइ साइ गुना, आधे चालाइ तुते गुना, कालाउ आधे चालाइ सुम्ते गुना सेहि। 9“जाइ काङको या काथा हिङदोङखे, वा इङको काथाहेङ ध्यान पितेङ हिनाको।”
10कालाउ चात्यागेलाइ लोतेङ येसुहेङ दोअ्हि, “नाअ् इम्बालाइ दोफा हाइ पालि निङपिकासो खिनिङ दोअ्खेना?”
11वा इम्बालाइहेङ जोबाफ पिहि, नेलाइहेङते परमेस्वरको सासनको रहस्य पिका हि। जाइ परमेस्वरको सासनको बाहार हिकालाइहेङ निङपिका पाहासो गोताङ काथा दोअ्पिका मान्थु। 12जाइ दोफा ग्यान हि वासेहेङ हेन्जा प्याङ, जाइ दोफा ग्यान मान्थु वाको आतुइसा हिका बुङ चुम्पावा। 13ओदोङ भाअ्सिङ का इम्बालाइहेङ सिक्स्या पिलाउ निङपिकासो धिरपाका हिघा,
हाइपालिपानु इम्बालाइ खाङनुते खाङखे मातिङखे,
जेदोङ का दोअ्खा हिङनुते हिङखे, कालाउ माबुझिखे।
14यासाइयाको आगमबानि इम्बालाइता पुरा जेङका हि,
हिङनुते नेलाइ हिङसुखेना, कालाउ हेलाउ बुङ मागिसुखेना।
खाङनुते खाङसुखेना, कालाउ हेलाउ बुङ थाहा मातिङसुखेना।
15हाइपालिपानु इदोइ द्याङगेलाइको मन थुरका हि,
कालाउ इम्बालाइ ताइको मिसियाँ थुम्तेङ ताअ्का हि,
माकुनु इम्बालाइ मिसियाँहोइ तिङधावा,
न्हातोङहेङ हिङधावा, मनसो बुझिधावा,
कालाउ घुरिधावा, कालाउ का इम्बालाइहेङ एल्पा पिधाङका।
16नेलाइको मिसियाँ धन्यको हि, हाइपालिपानु वा तिङखे, नेलाइको न्हातोङ धन्यको हि, हाइपालिपानु वा हिङखे। 17जातिङ भारि, का नेलाइहेङ दोअ्खा, नेलाइ तिङका काथा हेन्जाङ परमेस्वरको बक्तागेलाइ, कालाउ धर्मिगेलाइ खाङलि मन पाघाखे, कालाउ बुङ मातिङहि, कालाउ इम्बालाइ हिङका काथा हिङलि खाङघाखे, कालाउ बुङ माहिङहि।
निङपिका को आर्था
(मर्कु 4:13-20; लुक 8:11-15)
18एला चालाइ बिकाको निङपिका काथा हिङसु। 19जेलाउ हासु बुङ परमेस्वरको सासनको सुसमाचार हिनावा, कालाउ बुङ माबुझियावा, कालाउ साइतान लावा, कालाउ वाको मनता जेदोङ बिन्हाकासो घिङतेङ चुम्पावा। दामा भारि बिन्हाका चालाइ चाहि इङको दोङ हि। 20आतुइसा उन्ठुइ भाइका मिलिङ हि, जेता चालाइ बिन्हाका हि, या इसिका द्याङगेलाइ दोङ, जाइ दोङ लेङचातेङ परमेस्वरको बचन हिङखे कालाउ तुरुन्तै ग्रहन पाखे। जेलाउ इम्बालाइको जारि लिता थेकापा माजोनाङ परमेस्वरको बचन ताअ्लि मादोअ्खे ओदोङ भाअ्सिङ इम्बालाइ आले दिना थेकापा खिनिङ खाङधुरि पाखे। 21जेलाउ बचनको भाअ्सिङ इम्बालाइता दुख कालाउ सतावत लोखे, कालाउ इम्बालाइ एन्सालाउ दोङ परमेस्वरको बचन ह्रुता खाङधुरि पालि लाअ्खे। 22आधिमि द्याङगेलाइ चुइको झुन्झिता भाइका हि, जेता चालाइ बिन्हाका हि, जाइ इसिका द्याङ हि वा परमेस्वरको बचन हिङखे कालाउ सुमिङको सुरताहोइ, धनको मायारुहोइ कालाउ रेम-रेम्का आमेने तिङतेङ बचनहेङ लाअ्पिगिल्खे, कालाउ वा हिदोइ बुङ फल सेपालि मादोखे। 23कालाउ आधिमि द्याङगेलाइ रेम्का मिलिङ भाइका हि, जेता चालाइ बिन्हाका हि। वा परमेस्वरको बचन हिङतेङ ग्रहन पाखे। कालाउ आधिमि द्याङगेलाइ साइ गुना, आधिमि द्याङगेलाइ तुते गुना कालाउ आधिमि द्याङगेलाइ सुमते गुना पातेङ सेपाखे।
गहम कालाउ सामाको निङपिका
24येसु आरोङ निङपिकासो दोअ्हि, खाङसु, परमेस्वरको सासन ताइको मिलिङता रेम्का चालाइ बिका एमि किसान भाइका हिखे। 25कालाउ झाराङ द्याङगेलाइ जिम्लाउ, साइतान लोतेङ गहमको चालाइ माझा-माझाता सामा बिपितेङ हानेहि। 26कालाउ बिकाको आले सोमोइ न्हुसो गहम बारातेङ सिसा लागिलाउ सामा बुङ देखाल जेङहि।
27कालाउ चाकारियागेलाइ लोहि किसानहेङ हिअ्हि, नेउ, नाअ् ताइको मिलिङता रेम्का चालाइ थिङका माको रो? कालाउ इङको सामाको सिङ चाहि हिसोसो लोहि?
28उङको द्याङ जोबाफ पिहि, हिदोइ बुङ साइतान एन्सा पापिहि वाला। चाकारियागेलाइ हिअ्हि, एन्सा पाहे पानु केलाइ हानितेङ इङको सामागेलाइ उताङ।
29किसान दोअ्हि, एन्सा मापासु, माकुनुते नेलाइ सामा उलाउ गहम बुङ उन्हावा। 30सिसा मिङका सोमोइ थेकापा इङको न्हेमिहेङ दोफाङ बारालि पिसु। इङको सोमोइता का चेकालाइहेङ दोअ्ताङका लाम्फा सामा उतेङ मेता दुलिको भाअ्सिङ बोझा जिङसु, कालाउ गहमचाहि काङको भाकारता तापिसु।
पासाइको चालाइ कालाउ साउरिको निङपिका
(मर्कु 4:30-34; लुक 13:18-21)
31येसु आरोङ इम्बालाइहेङ निङपिकासो दोअ्हि, परमेस्वरको सासन इदोइ प्रकारसो तुलाना पालि द्वाङ। एनोङ पासाइको चालाइ भाइका हि, एमि द्याङ इङको चुम्पुतेङ ताइको बारिता बिहि। 32गोताङ खान्तेङ म्हुइका चालाइ, जेलाउ वा योतेङ बाराखे गोताङ सारसिङगेलाइ खान्तेङ बारका सिङ जेङखे, कालाउ बा-बार्का डालेङ जोखे, कालाउ आकास ह्रुता उराइका जिहाँ-जुइलेङगेलाइ दालेङता बासा हिखे।
33येसु इम्बालाइहेङ आरोङ भेनेङ निङपिकासो दोअ्हि, “एमि बेबाल आतुइसा साउरि चुम्तेङ सुम पाथि झोको तोलेता मिसालाइखे कालाउ गोताङ तोले साउरि जेङखे। एन्साङ पातेङ” परमेस्वरको सासनको प्रभाब आधे द्याङगेलाइ पाहासो पुराङ सुमिङता चारचाराइखे।
34इदोइ काथा येसु जेरगेलाइहेङ दोअ्हि। वा इम्बालाइहेङ निङपिकासो बाहेक भेनेङ हाइ दोङ सिक्स्या मापिहि। 35कालाउ एसापा परमेस्वरको बक्ता दोङ दोअ्का इदोइ काथा पुरा जेङलि लोका हि का नेलाइहेङ निङपिकासो काथा पाङका कालाउ सुमिङको सिरजाइकासोङ थाहा माजेङका काथागेलाइ दोअ्ताङका।
सामाको निङपिका को आर्था
36कालाउ येसु जेरगेलाइहेङ लाअ्धितेङ साअ् लिता हानिहि, कालाउ वाको चात्यागेलाइ वाकोता लोतेङ कालाउ दोअ्हि, मिलिङको सामाको निङपिका को माने केलाइहेङ बुङ बुझाइ पापि।
37येसु इम्बालाइहेङ जोबाफ पितेङ दोअ्हि, रेम्का चालाइ बिका किसान चाहि का द्याङको चान दोङ। 38मिलिङ चाहि सुमिङको द्याङगेलाइ हि, रेम्का चालाइ चाहि परमेस्वरको सासनको द्याङगेलाइ हि, कालाउ सामा चाहि साइतानको द्याङगेलाइ हि। 39सामाको चालाइ बिका सतुरु चाहि साइतान दोङ हि, कालाउ सिसा मिङका सोमोइ चाहि इदोइ सुमिङको आखिरि दिनादोङ कालाउ सिसा चेका कालाउ जोम्पाका खेतालागेलाइ चाहि स्वर्गदुतगेलाइ दोङ हि।
40जेसाङ सामा मेता दुलि जोम्पाका भाइपाङ इदोइ सुमिङको आखिरि दिना बुङ एन्साङ पावा। 41इङको दिना का द्याङको चान ताइको स्वर्गदुतगेलाइहेङ दिङगिल्लाङका, कालाउ इम्बालाइ वाको सासन भरिको दुस्ट काम पाका कालाउ पाप पालि लागाइका झाराङहेङ लाअ्पावा। 42कालाउ स्वर्गदुतगेलाइ इम्बालाइहेङ मेको भात्तिता थाल्गिल्प्यावा। इन्ता द्याङगेलाइ खारावा कालाउ तासिङ जितावा। 43कालाउ परमेस्वरको आगाता धर्मि थोहराइकालाइ चाहि ताइको आबा परमेस्वरको सासनता तालि भाइपा चिल्कातेङ ह्यावा। “जाइ काङको या काथा हिङदोङखे, वा इङको काथाहेङ ध्यान पितेङ हिनाको।”
गाड्धन
44परमेस्वरको सासन एनोङ मिलिङता लितेङ ताअ्का जाङका गाड्धन भाइका हिखे, हिदोइ बुङ द्याङ इङको निङखे कालाउ आरोङ लितेङ ताअ्खे कालाउ वा मेनाङ लेङचातेङ हानितेङ ताइको भए भरको धन-सम्पति पितेङ इङको मिलिङ चोल्खे।
बहुमुल्य मोतिको निङपिका
45“कालाउ आरोङ परमेस्वरको सासन रेम्का मोतिगेलाइ भोका एमि ब्यापारि भाइका हि।” 46वा एनोङ बहुमुल्य मोति निङहि, कालाउ हानेतेङ ताइको गोताङ धन-सम्पति पितेङ इङको मोति चोल्हि।
हाया माङका जाले
47परमेस्वरको सासन एनोङ हाया माङका जाले भाइका दोङ हि, जाइहेङ समुन्द्रता आखे कालाउ इन्ता गोताङ खाल्को हायागेलाइ देखे। 48कालाउ हायाहोइ पोङघातेङ हाया माङकालाइ इङकोहेङ काम्भेता चुमाखे कालाउ हायागेलाइ साल्खे। रेम-रेम्का हाया चाहि दुङग्रिगेलाइता ह्वाखे, कालाउ काम मालागिका हायागेलाइ चाहि थाइगिल्खे। 49इदोइ सुमिङको आखिरि दिना बुङ एन्साङ जेनावा, स्वर्गदुतगेलाइ लोतेङ परमेस्वरको धर्मि द्याङगेलाइहेङ दुस्ट द्याङगेलाइसो लाअ्पावा। 50कालाउ दुस्ट द्याङगेलाइहेङ मेको भात्तिता थाइगिल प्यावा। इन्ता द्याङगेलाइ खारावा कालाउ तासिङ रेतावा।
51कालाउ येसु चात्यागेलाइहेङ हिअ्हि, हाइ नेलाइ इदोइ काथा गोताङ बुझिसुना? कालाउ इम्बालाइ दोअ्हि बुझिन्हाहि।
52येसु आरोङ इम्बालाइहेङ दोअ्हि, ओदोङ भाअ्सिङ परमेस्वरको व्यवस्था धिरपाका द्याङ कालाउ काङको चात्यागेलाइ बुङ परमेस्वरको सासनता एमि साअ्को गिह्रि भाइका हिखे, जाइ ताइको भाकारसो मुल्यवान आनेमानेगेलाइ नावा कालाउ पुरना बाहार ओल्लेपाखे।
आदार मानिङका परमेस्वरको बक्ता
(मर्कु 6:1-6; लुक 4:16-30)
53इदोइ निङपिका काथागेलाइ दोअ्लि दोतेङ, येसु ताइमि हुरकिका देरा नासरतता हानिहि। 54कालाउ वा ताइमि हुर्किका देराता लोहि। कालाउ वा इन्ता यहुदिगेलाइको चाउघारा साअ्ता इम्बालाइहेङ सिक्स्या पिलि तेङहि। वाको सिक्स्या हिङकालाइ भारबुसाइ जेङहि। इम्बालाइ दोअ्हि वासेहेङ इसिका बुद्दि कालाउ इसिका भारभुसाइका काम पाका सरबुङ हितासो निङहि? 55हाइ या मिस्तिरिको चान माको रो? हाइ वाको आमाइ मरियम माको रो? हाइ या वाको ओनेगेलाइ याकुब, योसेफ, सिमोन कालाउ यहुदा माको रो? 56हाइ वाको बेजान ओनेगेलाइ बुङ झाराङ केलाइकोङ नासरत देराता मान्थु रो? इसिका काथागेलाइ हिसोसो निङहि? कालाउ इम्बालाइ येसु दोफा चेर ताम्पाहि। 57येसु इम्बालाइहेङ दोअ्हि, “परमेस्वरको बक्ताको गोताङ भारि मान हिखे कालाउ ताइकोङ साअ् देरागेलाइ कालाउ ताइकोङ द्याङगेलाइ चाहि वास्ता मापाखे।” 58कालाउ इम्बालाइको खाङधुरि मातिङतेङ येसु इन्ता हेन्जा सरबुङसाइका कामगेलाइ मापाहि।
Currently Selected:
मति 13: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
