Matthew 11
11
1Neħ noˑnă̱h' neħˑhuh' shaħˑa'wă̱h, noˑnă̱h' shaˑa'dwă̱ˑnoħk'dă̱ħ ne Jeˑsus heˑniˑa'go̱ħˑniˑgóoħˑdă̱sˑdo̱h ne dekˑni' sga'eħ niˑă̱'na̱nˑdi naˑgo̱'iˑnyaˑni'ak, oˑnă̱h' he oh'dă̱nˑdyo̱o̱h, neħˑhuh' heˑa'weˑno̱o̱h ga'no̱nˑda'yă̱nˑdo̱ħ gaˑno̱n'doˑwaˑnă̱s, nă̱'a̱ˑgo̱ˑi'o̱ˑnyă̱ħ, dă̱ˑa̱n'diˑoˑgwat, kuh, he'o̱ˑweh haˑdi'na̱ˑgeħ.
2Oˑnă̱h' hoˑi'waˑo̱ˑgă̱h ne John, he'o̱ˑweh niˑah'hoˑdo̱ħ, he'niˑo'iˑoħ'dʋsˑyuħ'dă̱h ne' Christ, heˑa'go̱hˑha̱ħ'o̱h deˑi'yʋsˑheh na'go̱'iˑo̱ˑnyaˑni'ak.
3Neħ no̱'wă̱'a̱hˑseeh, Iis, gă̱h, ne gă̱ħ ne' daˑeħ'; o̱ˑgii', ah'so̱h' ă̱ˑjo̱'gwʋsˑhaˑek' noˑyaħ'?
4Jeˑsus desˑhaˑgo'wă̱'na̱ħˑsăˑgwă̱h, haˑgo̱'yă̱ˑa̱h'seeh, Saˑjah'dă̱nˑdih, o'yă̱nˑdet' she'sno̱'nyă̱h ne John heˑniˑyu'iˑwaˑge eˑji'wa̱'o̱k, kuh ne ji'gă̱h;
5Ne deˑye'gahˑgweˑgo̱h, je'gă̱h'; go'si'na̱nˑji'yuħˑah, iˑjă̱ħs', goˑyaħ'datˑgă̱ă̱h, jaˑgo'yaħˑda'go̱ˑeˑwă̱h; deˑyo̱ħ'sweˑgo̱h, kuh, jaˑgut'ho̱nˑdeħ; gaˑwe'eˑyo̱o̱h, gwaħˑhuh, jo̱nˑda'dyaħˑda'gesˑgwă̱h; neħ, kuh, neh waˑo'niˑdă̱ă̱sˑthet', gai'wiˑyus'dʋk ho̱ˑwa̱n'ditˑhăăh'gwaˑnii.
6Neħ no'dă̱'o̱h ne so̱n'diħˑgwa'naħˑòt ă̱ˑgă̱'a̱k deˑo'deˑyă̱ħ'hihˑdaˑnih he'gyaħˑdaˑdeħ.
7Neħ noˑnă̱h' shaˑă̱'no̱hˑdă̱nˑdiħ, Jeˑsus hoh'saaħ' ha'go̱'yă̱ˑa̱h'seeh ne gă̱nˑdyuh'goˑwaˑnă̱s, ne' otˑyuˑoˑwiih' ne John, A'naħˑot' swehˑhe'aħk ă̱ˑya'gwaˑgă̱ă̱ħ', deħˑdye'na̱ˑgeˑnyo̱ħ heˑswak'do̱o̱ħ'? O̱ˑgii', neħ ne găăˑhaħ' a'o̱nˑdaħˑdo̱h noˑaaħ'gă̱nˑdaħ?
8A' di'naħˑot' swatˑgat'hwahˑso̱'no̱ħ, he' neħˑhuh' heˑsweħs'gwaħ'? Oˑgii', neħ no̱'gweh o'oħ'dă̱o̱h hoˑsyu'nyaħˑdo̱h? Swatˑgaat'huh, neħ, naeh, yo̱nˑdye'ăħˑdah'gwaħ no'oħ'dă̱o̱h nasˑsyu'nyʋsˑhăħ, ne' neħˑhuh', iˑgă̱', yeħˑdyo̱ħ' goˑwăh'goˑwaaˑsho̱ħ' hoˑdi'no̱hˑsoˑdo̱ħ.
9A', dih', naħˑot' swatˑgat'hwahˑso̱'no̱ħ'? No'do'gă̱sˑda̱ˑnih? Neħ', waeh, oħˑgwă'a̱s, shaˑgo'ăhˑdaˑniih neħ'huh, naeh ne goˑdo'gă̱sˑdaˑnih.
10Neħ, să̱ħ'ă̱h, nă̱ˑgă̱' ho'do̱h', he'niˑgaˑye'ă̱h he ga'yaˑdo̱ħ, ne wa'do̱h, jat'gaat'huh, wa'eˑhaħt naˑgeh'haħsˑhăħ o'ă̱nˑdo̱h' heˑse'go̱hˑsaˑdeħ, neħ ă̱ˑa̱'as''yo̱ˑniħ he'seˑgat, hă̱ˑă̱hˑse'no̱ˑa̱nˑdyĭĕħ.
11Doˑgă̱s' gai'waˑgwĕnˑni'yuħ oħˑgwă̱'a̱s, Neħ' haˑdi'yaħˑdaˑdeħ ne' neħˑhuh', iˑgă̱, goˑna̱'găˑdo̱h heˑyeˑyaħ'daˑdeħ ne ye'o̱h, tă̱ħ'ă̱h daħˑa'goˑdyaħt'gwai'ihˑso̱o̱h so̱ˑgaaħ ne da̱''o̱ˑwa̱ˑgă̱'niħ he'niˑaˑgoˑwaˑnă̱h, ne John, ne Bapˑtist; neħ, gwa', naeh, naˑgwʋs' heˑòs'tho̱h, iˑgă̱, he'o̱ˑweh niˑga'yă̱ħ ne gă̱'o̱ˑyaħˑgĕh oˑi'waħˑgĕh ne dwă̱ˑno̱h'do̱ˑo̱ħ'shăˑgwĕnˑni'yuħ, neħ, naeh, de'o'gă̱ˑnyo̱o̱h he'niˑa'goˑwaˑnă̱h.
12Sho̱nˑda'wahˑsaˑwă̱h ne chiˑthaˑwă̱'nĭs'hăˑdeˑnyo̱ħ' ne John, ne Bapˑtist, he'niˑyo'oˑweħ nă̱ˑgă̱ ne'waħ, ne gă̱'o̱ˑyaħˑgĕh oˑi'waħˑgĕh ne dwă̱ˑno̱h'do̱ˑo̱ħ'shăˑgwĕnˑniˑyuħ gaħˑhas'desˑhăħ oˑdye'ăħˑdah'gwaˑnih ne goˑdes'haħˑdo̱h ne dyaˑguħ'niˑgo̱'ă̱sˑahˑdo̱h; neħ, kuh, ne dyaˑguħ'niˑgo̱'ă̱sˑah'do̱h goˑdes'haħˑdo̱h doˑgă̱s' yo̱nˑdye'na̱ˑwa̱ntˑhaħ, gaħˑhas'desˑhăħ waˑdye'ăħˑdah'gwaħ.
13Neħ, să̱ħ'ă̱h, ne gaˑgweˑgo̱h noˑdi'doˑgă̱s'daˑni'ak, haˑdis'nyĭĕhˑdah'gwak, kuh ne gaˑya'nesˑhăħ, gʋsˑnyĭĕh'dahˑgwak neħˑhuh' niˑyo'o̱ˑweħ he'yoˑdoħk noˑnă̱h' shaħ'thaˑdaħt ne John.
14Da neħ, dih, dyă̱ˑgwah ă̱'swai'waˑgwĕnˑniˑyus, neħ' ne gă̱ħ nă̱ˑgă̱' ne Eˑliˑas, ne'swʋsˑha'eħ, gă̱s, dă̱ntˑheħ.
15So̱n'diħˑgwa'naħˑot' haˑo̱h'doˑdo̱ħ, iˑgă̱, oˑgwe'nyo̱o̱h' nă̱ˑa'o̱k, hotˑho̱nˑdek' neh'huh.
16Neħ, dih, a', no̱o̱, naħˑot' do̱'saˑgyă̱'o̱nˑdaˑak' nă̱ˑgă̱' haˑdi'waˑji'yăˑdeħ'? Neeħ desˑsga''yă̱ˑo̱nˑdaaħ naˑdĭk'saħˑsho̱ħ'o̱h, hă̱ˑniħ'dyo̱ħ he'o̱ˑweh yo̱ntˑge'o̱nˑdah'gwaħ goˑyaħ'daˑye'isˑdah'gwaˑno̱h, heˑsha'go̱ˑni''no̱s neh shaħˑgaat' hă̱ˑno̱nt'gaˑnyeh.
17Neħ nă̱'na̱nˑdo̱h, Gwaˑaħ'gă̱nˑda'wahˑseeh, tă̱ħ'ă̱h daħˑde'swatˑgwă̱ă̱ħ; neħ, kuh, ne gwaˑdă̱'na̱ħˑseeh, tă̱ħ'ă̱h niis daħ'de''swahˑsă̱ntˑhwă̱h, na'yetˑchi'haˑdă̱ħ.
18Neħ, să̱ħ'ă̱h, ne John, noˑnă̱h' sha'aˑyo̱ħ, tă̱ħ'ă̱h neeħ' deˑaas', a'aˑne'geˑhaak', giħˑshă̱h', [naeh ne' naħˑot' haˑdiis', haˑdi'neˑgeˑhaħ, kuh, noˑyaħ'sho̱ħ;] neħ, kuh, hă̱ˑna̱n'do̱h, Neħ ne'oˑaaħ naˑnĭs'heˑoˑno̱ħ.
19Neħ, No̱ˑwa̱'wa̱k' No̱ˑgweh, neh sha'aˑyo̱ħ' neeħ' haˑdek'ho̱ˑnih, haˑne'geˑhaħ', gwaħ'huh', [nă̱'no̱n'dekˑho̱ˑnih, haˑdi'neˑgeˑhaħ', kuh, noˑyaħ'sho̱ħ;] neħ nă̱'na̱nˑdo̱h, Sheˑswat'gatˑhuh' no̱'gweh, noˑnyaħ'doˑwĭs, neħ, kuh, haˑne'geˑhaħ noˑnyo̱'gwiħˑsăħ oˑya'giħ; ho'no̱nˑdă̱'oħ naˑdi'wĭsˑde'oˑes, kuh noˑdi'wa'neħˑaˑgo̱h; neħ, gwa', ne gaħˑni'go̱hˑdʋs'hăħ okˑsaħ'daħˑsho̱ħ hoˑnă̱n'no̱hˑdo̱ħ heh tă̱ħ'ă̱h deħˑo'yă̱ħˑhis he'niˑga'yeˑhaħ.
20Da oˑnă̱h' hohˑsaaħ haˑgo̱'iˑwa'yă̱hˑdo̱h he'o̱ˑweh ga'no̱n'daˑyă̱nˑdo̱ħ ne gaˑno̱n'doˑwaˑnă̱s, he'o̱ˑweh toˑhah' gaˑgwe'go̱h noˑi'oħˑdʋs'yoˑwaˑnă̱s niˑo'dyeˑăs'o̱h, neħ gai'o̱ˑnih heh tă̱ħ'ă̱h daħˑdes'hoˑdiˑdeˑnyo̱o̱ħ naˑdiħ'niˑgo̱'ă̱ħˑgĕh.
21Gaˑno'o̱ħ niis, Choˑraˑzin; Gaˑno'o̱ħ niis, Bethˑsaˑiˑda; neħ, să̱ħˑă̱h, ne gai'oħˑdʋs'yoˑwaˑnă̱s niˑya'wă̱ħˑsyo̱ħ he'swaˑyaħ'daˑdeħ, neħˑhuh' no̱n'daˑya'wă̱ħˑsyo̱k ne Tyre, kuh ne Siˑdon, o'nă̱hˑjih'goˑwaah do̱'saˑoˑdiˑde'nyo̱o̱h naˑdiħ'niˑgo̱'ă̱ħˑgĕh, ne gaˑă̱h'dăăˑdă̱s ne gaˑă̱h'dăăħ gaˑsyu'nyaħˑdo̱h a'o̱ˑno̱nˑdyeˑăħ'do̱ˑa̱k, oħˑgă̱ă̱ħ'gĕh a'ă̱ˑniħ'dyo̱nˑdʋk.
22Neħ, gwa', noħˑgwă̱'a̱s, Neħ saħ'gwah ti'gă̱ˑa̱h he'nă̱ˑyaˑwă̱h ne Tyre, kuh ne Siˑdon ne dwă̱ˑnĭs'hăˑdeħ noˑnă̱h dă̱ˑswa̱'dyaħˑdoˑwet, naeh niis' he'nă̱ˑswa'yaħˑdaˑwă̱h.
23Neħ niis, Caˑperˑnaˑum, saˑyaħ'daˑnă'ăˑgwat'heħˑo̱h, neħˑhuh' he'yoˑdoħk ne gă̱'o̱ˑyaħˑgĕh, haħ'deˑgaˑgo̱nt' ehˑdaħ'gĕh ă̱hˑsa'do̱ħ', naˑnĭs'heˑo'na̱ħˑgĕh; neħ, să̱ħ'ă̱h ne gaˑi'oħˑdʋs'yoˑwaˑnă̱s, neħˑhuh' niˑya'wă̱ħˑsyo̱ħ he'o̱ˑweh' syaħ'daˑdeħ, neħˑhuh' no̱n'daˑya'wă̱ħˑo̱'na̱ħ ne Sodˑom, doˑgă̱', sho̱, ne'waħ na̱'yuħˑdă̱'na̱ħ nă̱'gă̱ wă̱ˑnĭs'hăˑdeħ.
24Neħ, dih, niiħ noħˑgwă̱'a̱s, Neħ naaħ'deˑgaˑgo̱nt saħ'gwah ti'gă̱ˑa̱h he'nă̱ˑyu'yaħˑda'wă̱h he'dyo̱ˑă̱n'jaˑdeħ' ne Sodˑom, noˑnă̱h' dwă̱ˑnĭs'hăˑdeħ ne' dă̱ˑswa̱'dyaħˑdoˑwet, naeh niis' heˑnă̱ˑsa'yaħˑdaˑwă̱h.
25Neħ neħˑhuh' niˑyò'oˑweħ' heˑga'aˑwiħs, Jeˑsus desˑho'wă̱ˑna̱ħ'săˑgwă̱h, wa'ă̱ħ, Otˑgo̱'no̱ˑo̱ˑnyo̱o̱ħ', O Haħ'nih, Syaħ'daˑgwĕnˑni'yuħ ne gă̱'o̱ˑyaħˑgĕh, kuh ne yo̱ˑă̱n'jă̱ħˑgĕh, neħ gai'o̱ˑnih heh sheˑyah'sehˑdaˑniih nă̱ˑgă̱' na̱ħˑo'iˑoħ'dă̱ħ ne' guħ'niˑgo̱nt', kuh ne goˑdyă̱'no̱ˑniih, o'yă̱nˑdet' neħ' she'yo̱ˑnyaˑniih' no'no̱nˑdo̱ˑniħ'aah.
26Doˑgă̱s' neħˑhuh' niˑyuħ'dă̱ă̱h, Haħ'nih; neħˑhuh', să̱ħ'ă̱h niˑyuħ'dă̱ă̱h ne wiˑyu he'deˑse'gaˑneeħ.
27Gaˑgwe'go̱h' he'niˑyu'iˑwaˑge haˑgi'waˑge'o̱ˑniih Na'aħˑnih. Tă̱ħ'ă̱h deħ'so̱ˑgaaħ' no̱'gweh do'oˑyă̱nˑde'ih No'aˑwak, haˑo̱h'hwa̱ħˑgeˑah' sho̱ No'oħˑnih. Tă̱ħˑă̱h, kuh, deħ'so̱ˑgaaħ' no̱'gweh deˑo̱'wa̱ˑyă̱nˑde'ih No'oħˑnih, neħ', sho, No'aˑwak, kuh, ne so̱n'diħˑgwa'naħˑot No'aˑwak o'yă̱ndet', ă̱s'haˑga̱'o̱ˑnyă̱ħ.
28Gaˑoħ' da'swet' he'gyaħˑdaˑdeħ, gaˑgwe'go̱h niis neh swachˑhă̱h'do̱ˑo̱nˑdyĭĕħ neh swai'oħˑdeħ, kuh neh swaˑe'no̱sˑda'neħs. Iiħ ă̱ˑgyo̱ħ nă̱ˑswa'do̱ˑĭs'hă̱nˑdʋk.
29Deˑswak' naˑga'wă̱h ne dyaˑgo'no̱hˑdo̱'nĭsˑthaħ, swaˑdye'ăħˑdʋk', gwaħˑhuh; neħ, kuh, niiħ gwai'o̱ˑnyă̱h swaħˑni'go̱ˑă̱ˑyă̱nˑdaħt' he'gyaħˑdaˑdeħ; neħ, să̱ħ'ă̱h, niiħ nakˑni'go̱ˑă̱ˑniˑdă̱ă̱s, hehˑdaħ'gĕh, kuh, oˑda'do̱ˑniih naˑgĕn'nyahˑsaħ; ă̱ˑswaˑgă̱ħ neħ'huh nă̱'wa̱nˑdo̱ˑĭs'hă̱ă̱ħ ne swatˑwais'hăħ'sho̱ħ;
30Neħ, să̱ħ'ă̱h, naˑgi'waħˑgĕh ne dyaˑgo̱'no̱hˑdo̱'nĭsˑthaħ tă̱ħˑă̱h deħ'gaˑno'o̱ħ; neħ, kuh, nakˑhe'na̱ħ tă̱ħ'ă̱h deħ'òs'deħ.
Currently Selected:
Matthew 11: SEE
Highlight
Share
Copy
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.
