Matthew 24
24
1Oˑnă̱h' hoˑya'gă̱ħˑo̱h ne Jeˑsus, hotˑhă'daˑdo̱h, kuh, he'niˑga'no̱hˑsòt noˑno̱h'saˑdoˑgă̱h'diħ; da neħ', dih, naˑgo̱'iˑo̱ˑnyaˑni'ak neħˑhuh' niˑtho'neˑno̱o̱h, ho̱ˑwa̱'yaħˑdo'wă̱ħˑo̱h neħ naˑo̱ˑwa̱nt'gatˑhwah'dă̱ħ heˑniˑyò'iˑwaˑnă'ăˑgwahˑdo̱ħs niˑyòˑdye'ă̱h he'gʋs'yo̱ˑniih noˑno̱h'saˑdo'gă̱hˑdiħ.
2Haˑgo̱'yă̱ˑa̱h'seeh, dih, ne Jeˑsus, Tă̱ħ'ă̱h, gă̱h, deħˑswa'gă̱ħ' gaˑgwe'go̱h' nă̱ˑgă̱'? Doˑgă̱s' oħˑgwă̱'a̱s, Taħˑă̱h deħˑjòħ'sgwăăt'ah tă̱ħ'do̱'saˑgyaˑdyaħ'săħk, nă̱ˑgă̱'a̱k deħˑdwaħ'să̱hˑdo̱h.
3Neħ neħˑhuh' heˑo'dyă̱nˑdʋs'o̱h oˑno̱n'daˑgă̱'yat ne Olˑives; oˑnă̱h' neħˑhuh' ho̱ˑwa̱'yaħˑdo'wă̱ħˑo̱h naˑgo̱'iˑo̱ˑnyaˑni'ak, haˑdi'yaħˑdi, hoˑnă̱', Nă̱', daˑgwa'oˑwih, wă̱nˑdo̱h ne gă̱ħ' neħˑhuh' nă̱ˑya'wă̱hˑsyo̱o̱ħ? neħ kuh, ne'naħˑot' ă̱ˑyò'yă̱nˑdeh'dahˑgo̱'o̱k noˑnă̱h' dă̱chˑheħ'; kuh noˑnă̱h ă̱ˑwa̱n'doħkˑdă̱ħ heˑyo̱ˑă̱n'jaˑdeħ?
4Dechˑha'go̱ˑwă̱'na̱ħ'săˑgwă̱h ne Jeˑsus, haˑgo̱'yă̱ˑa̱h'seeh, Jaˑdah'niˑgo̱'ă̱ˑă̱k'; să̱ˑno̱h so̱ˑgaaħ' no̱'gweħ ă̱ˑshe'swaħˑniˑgo̱'ă̱ˑgahˑhaatˑhòh.
5Neħˑsă̱ħ'ă̱h ne gòtˑgaħ'deħ aˑgeh'să̱ˑna̱ˑgo̱' ă̱ˑdyă̱ă̱h'dʋk, ă̱'no̱nˑdo̱'neħ, Iiħ ne gă̱ħ' ne' Christ; da, gă̱nˑdyòh'goˑwaˑnă̱h ă̱ˑsha'goˑdiħ'niˑgo̱'ă̱ˑgah'hatˑhòħ'.
6Neħ, kuh, nă̱ˑswa'iˑwa'o̱kˑhaak, neħˑhuh', gyeeh, dya'goˑdiˑyò; neħ, kuh, nă̱ˑgai'waˑna̱ˑgek' ă̱'yo̱nˑdi'yòħ'; jaˑdah'niˑgo'ă̱ˑă̱k, dih, să̱ˑno̱h' ăˑswah'dyo̱ħk; neħ să̱ħ'ă̱h, naaħ'deˑyo'i'waˑge haħ'deˑgaˑgo̱nt' ă̱ˑgai'waˑye'ih; neħ, dih, naˑgwʋs' oˑdoħk'dahˑgo̱h, tă̱ħˑă̱h, naeh, ahˑso̱h, ne' neħ.
7Neħ, să̱ħ'ă̱h ne dă̱ntˑha'diˑdaħt noˑthoˑno̱'ă̱nˑjoħˑdă̱ħ'sho̱ħ dă̱ˑa̱n'diˑnyòˑdă̱ħ; kuh ne go'wăh'goˑwaah hoˑni'dyòhˑgwaħ'sho̱ħ, dă̱ˑa̱n'diˑnyòˑdă̱ħ; ă̱ˑya'goˑdo̱s'sweħˑda'no̱o̱s, kuh; oˑno̱hˑsoˑdăă'tgiħ, kuh, ă̱ˑga'no̱hˑsoˑda'iħ; ă̱ˑya'ă̱nˑjo̱n'daħˑda'no̱o̱h, kuh, ne' thiˑgaˑwă̱ˑni'yòħ.
8Gaˑgwe'go̱h' neħ nă̱ˑgă̱' dyòhˑsa'wahˑgo̱h, sho̱, noħ'niˑgo̱'ă̱ˑetˑgă̱nt.
9Neħˑhuh' niˑyo'oˑweħ', oˑnă̱h' ă̱ˑyech'hiˑyaˑtgaħ' dă̱ˑyech'hiˑya'do̱ˑă̱'o̱hˑdă̱ħ, ă̱ˑyech'hiˑnyòħ, kuh; neħ, kuh, nă̱ˑyech'hiˑswa'ă̱h naħˑdeˑyaˑga'ă̱nˑja'gee; neħˑă̱ˑdyòˑiˑwaħ'gă̱ˑa̱k naˑgeh'să̱ˑna̱ħ.
10Neħˑhuh' niˑyo'oˑweħ, gòtˑgaħ'deħ dă̱ˑya'goˑdoˑdăăhˑdă̱ħ, dă̱'no̱nˑda'datˑgaħˑho̱o̱ħ, kuh; dă̱'ă̱ˑno̱nˑda'desˑswa'ă̱hˑsyo̱'nyo̱ˑo̱k', kuh.
11Oˑnă̱h gòtˑgaħˑdeħ ne ya'gă̱ħˑo̱h hoˑdiˑdoˑgă̱s'daˑnih dă̱nˑthaˑdiˑdaħt; gòtˑgaħ'deħ', kuh, ă̱ˑshaˑgoˑdiħˑniˑgo̱'ă̱ˑgah'haatˑhòħ.
12Neħˑhuh', dih, nă̱ˑya'wă̱h, neħ, ă̱ntˑgaiˑo̱ˑniħ hă̱ˑgaˑdeek' ne deˑyeˑyaˑnes'hăˑit'haħ, ne goˑno'o̱hˑgwaħ'shaħ ne gòtˑgaħ'deħ ă̱ˑga'no̱ħˑnos.
13Da neħ', dih, haˑyaħ'daˑdeħ nă̱ˑo'gweˑnyo̱'o̱k ă̱'oˑdah'gasˑdo̱o̱k' he'niˑyoˑwe'yoˑdoħk, neħ ne' neħ ăˑsho̱ˑwa̱ˑyaħ'daˑgòħ.
14Neħ, dih', nă̱ˑgă̱' no̱ħˑgaiˑwi'yòsˑdo̱s'yòħˑdă̱ħ neħ oˑi'waħˑgĕh, ne dwă̱ˑno̱h'do̱ˑo̱ħ'shăˑgwĕnˑniˑyòħ, ă̱ˑo̱'wa̱nˑdit'hăăhˑgwă̱ħ ne yo̱ˑă̱n'jaˑgweˑgo̱h, gai'waˑgwai'ihˑso̱s ă̱ˑo'no̱ˑnyă̱ħ naaħ'deˑoˑno̱'ă̱nˑjaˑge; neħˑhuh' niˑyo'oˑweħ, oˑnă̱h' ă̱ˑgaˑyo̱ħ' noˑdoħk'dahˑgo̱h.
15Neħ'huh, dih, niˑyo'oˑweħ, noˑnă̱h' ă̱hˑswat'gatˑhuħ' notˑgiħ'shăˑswa'aħt ne goˑi'wahˑdo̱ħtˑhaħ, kuh ne deˑya'goˑdeħ'gwaˑo̱h'gwaħ, hosˑnyĭĕh'dahˑgo̱h ne Danˑiˑel hoˑdo'gă̱sˑda'niˑak, neħˑhuh' ă̱ˑga'daħk' oˑno̱k'daˑdo'gă̱hˑdiħˑgĕh, (so̱n'diħˑgwa'naħˑot ă̱'a̱ˑwă̱ˑno̱h'saˑhaak hatˑgaˑă̱ˑo̱o̱h ne' neħ,)
16Neħ'huh, dih, niˑyo'oˑweħ' ne'neħ, neħˑhuh' yo̱nˑdeħ'gwat he gaˑe'no̱nˑdeˑnyo̱ħ, ne'neħˑhuh' ă̱ˑye'na̱ˑgek' ne Juˑdeˑa;
17Neħ, kuh, neh gaˑno̱h'saˑgă̱'yaat ă̱ntˑhăă'daħk, să̱ˑno̱h' neħ ă̱ntˑha'dyaħˑdă̱h'dʋk naaħˑgwĭs'dă̱ħ ho̱o̱'saˑaˑguħ' no̱ˑgyĕh;
18Neħ, kuh, ne gaħˑă̱'go̱ ă̱ntˑheħ'sek, să̱ˑno̱h' ă̱sˑhah'get na'ehˑhe'aak, hă̱sˑge'guħ, no'syo̱'nyʋsˑhăħ.
19Neħ, dih, noh'să̱nt heˑnă̱ˑyò'diˑyaħ'daˑwă̱h neh deˑwa'diˑyaħ'daˑnet; neħ kuh, nă̱ˑwă̱'no̱nˑdă̱'na̱ħˑge'ăħˑthaak ne neħ' dwă̱ˑnĭs'hăˑdeˑnyo̱ħ.
20Jaˑdo̱'ehˑsyo̱h'go̱ˑo̱k', dih, na'gă̱ˑa̱k' gòsˑhe'neh deħˑswa'deħˑgwă̱ă̱ħ; neħ, kuh, naˑgă̱'a̱k' haeħ'gwah na'wă̱nˑdaˑdo'gă̱hˑdo̱ħ'gĕh;
21Neħˑhuh' ni'yoˑweħ' doˑgă̱s' gaˑno'o̱ħ he'nă̱ˑya'wă̱h'syo̱o̱ħ; neħˑhuh' nă̱ˑyaˑwă̱h ne tă̱ħ'ă̱h deˑwă̱nˑdo̱h deħˑdya'wă̱ħˑo̱h heh na̱ħˑo̱'nisˑheħt chiˑyo̱'ă̱nˑjaˑdeħ, ne'waħ he'niˑyo'oˑweħ' heˑga'wiħs; doˑgă̱s' tă̱ħ'ă̱h de'wă̱nˑdo̱h', kuh, neħˑhuh' tho̱'saˑya'wă̱h.
22Neħ, dih, nă̱ˑgă̱'a̱k, giħˑshă̱h', deħˑwă̱'nĭsˑhă'gwahˑda'no̱ħ ne'neħˑhuh' niˑyo'oˑweħ', deħˑo'gweˑnyo̱o̱h neh so̱ˑgaaħ' a'yaˑgo̱ˑhek'. Neħ, gwa, sho̱, gai'o̱ˑnih heˑyo̱ˑgweħ'dă'gwaˑo̱ħ ă̱ˑwă̱'nĭsˑhăˑgwahˑda'no̱k noˑnă̱h' hă̱ˑga'eħ.
23Da neħ no'nă̱h hă̱ˑga'eħ, so̱ˑgaaħ', giħˑshă̱h', ă̱ˑshes'swă̱ˑa̱s, Nă̱', ne gă̱ħ', naeh, ne' Christ; si dah', giħˑshă̱h; să̱ˑno̱h' ă̱ˑswai'waˑgwĕnˑni'yòs;
24Neħ, să̱ħ'ă̱h, neh dă̱ˑo̱n'diˑdaħ'syo̱o̱ħ ne ya'gă̱ħˑo̱h neħ' ne Christ; neħ, kuh, ne ya'gă̱ħˑo̱h hoˑdi'doˑgă̱s'da'no̱ˑnih, neħ nă̱ˑsha'goˑno'dahˑsaħ'syo̱o̱s noˑi'waˑnă'ăˑgwah'do̱ħs nă̱ˑya'wă̱hˑsyo̱'nyo̱o̱ħ, neħ'huh haħ'deˑgaˑye'iħ, neh teħˑo'gweˑnyo̱o̱h ne' tgaˑgo̱nt' a̱'o̱ˑwa̱n'diħˑniˑgo̱'ă̱ˑgahˑhaat'huħ' naˑgwʋs' ho̱ˑwa̱n'diˑyaħˑdă'gwa̱ˑo̱ħ.
25Jat'ga'ă̱ˑo̱h', dih; oˑnă̱h', naeh, dyoˑăh'do̱h tgwa'oˑwiih.
26Neħ, dih, giħˑshă̱h' na'yechˑhi'yă̱ˑa̱s, Nă̱', neħˑhuh' neh'huh thă̱ħˑdyo̱ħ heˑdeħˑdyo̱'gweħˑda'na̱ˑgeħ', să̱ˑno̱h' neħˑhuh' ă̱ˑswat'go̱nˑdʋk; Jatˑgaaˑthòh, neħˑhuh' neh'huh thă̱ħ'dyo̱ħ, neˑeħ'tgă̱h aˑdah'sehˑdo̱ħ'gĕh dyoˑno̱k'daˑyă̱nˑdo̱ħ; să̱ˑno̱h' ă̱ˑswai'waˑgwĕnˑni'yòs.
27Neħ, să̱ħ'ă̱h, heˑniˑyòħ'dă̱ neh tgăăh'gwitˑgă̱ħs do̱nˑda'wă̱nˑni'huħ' heˑgăăhˑgwă̱ħs hoħˑga'aħ nooħˑdyòh'hatˑheħ'; neħ'huh, dih, haeħ'gwah, ne gă̱ħ' niˑya'wă̱hˑseħ, noˑnă̱h' dă̱ntˑheħ No̱ˑwa̱'wa̱k no̱'gweh.
28Neħ, să̱ħ'ă̱h, ne ga'ă̱nˑdiħˑgwa'o̱ˑweh tgaˑyʋs'swaˑyă̱ħ, neħˑhuh' hă̱ˑyò'no̱nˑdyò'o̱ˑo̱k ne do'nyo̱nˑdah.
29Ă̱ˑyò'go̱nˑdaˑdyĭĕħ' noˑnă̱h' ă̱ˑga'at ne dwă̱ˑnĭs'hăˑdeˑnyo̱ħ ne gaˑno'o̱ħ nă̱ˑya'wă̱hˑsyo̱'nyo̱o̱ħ', dă̱ˑwa̱n'dahˑso̱nˑdaik' heˑgăăh'gwaaħ; neħ, kuħ, ne so̱'eˑkhaaħ găăh'gwaaħ taħ'do̱'saˑyòh'hatˑheh; neħ, kuh, nă̱ˑdwaħ'să̱ħˑsyo̱o̱ħ heˑgaˑjih'so̱ħˑdă̱ˑo̱ˑnyo̱ħ' neˑgă̱'o̱ˑyaħˑgĕh; neħ, kuh, heˑniˑgaħ'hasˑdes'yòħˑdă̱s heˑgă'o̱ˑyaˑde'nyo̱ħ' ă̱ˑya'o̱nˑdaħ'daˑno̱o̱ħ.
30Neħˑhuh' niˑyo'oˑweħ' ă̱ˑwa̱n'doˑdah'siħ noˑyă̱n'dehˑdah'go̱h haˑyaħ'daˑdeħ No̱ˑwa̱'wa̱k' no̱'gweh ne gă̱'o̱ˑyaħˑgĕh; neħˑhuh', kuh, niˑyo'oˑweħ', gaˑgweˑgo̱h ne ga'waˑji'yăˑde'nyo̱ħ ne yo̱ˑă̱n'jaħˑgĕh dă̱ˑo'nă̱nˑnyah'sahˑgwa'no̱o̱ħ, ă̱ˑo̱ˑwa̱ˑgă̱ħ', kuh, No̱ˑwa̱'wa̱k' no̱'gweh, dă̱ntˑheħ' ohˑjiħ'găˑgo̱ˑsho̱ħ' ne gă̱'o̱ˑyaħˑgĕh, gaħˑhasˑdesˑhăħ, kuh, neh si'gwa heˑno̱ħˑdeˑga'ă̱hˑsă̱ˑo̱ħ ă̱ˑtho'dyeˑăħ'dahˑgo̱'o̱nˑdyĭĕħ.
31Neħ nă̱ntˑha'go̱hˑha̱ħt no'o̱'yaħˑge'oˑno̱ħ'shăħˑsho̱ħ, ă̱ntˑga'wă̱ˑnă̱'ă̱nˑdyĭĕħ neh si'gwa he'niˑga'wă̱ˑna̱ħ' ne yă̱ˑo̱ħ'dasˑthaħ; neħ, kuh, nă̱chˑha'goˑdi'yaħˑde'oˑek naˑgo̱'yaħˑdăăˑgwa'o̱ħ, neħˑhuh' dă̱chˑha'goˑdi'aˑwih'dʋk, heˑniˑtgăˑă'go̱n'dahˑgwaħ neħ ne ge'ih niˑyo̱; kuh heˑgwʋs' haħ'deˑyòˑdyo̱'yoħkˑdo̱ħ.
32O'nă̱h, dih, jiħˑni'go̱ˑă̱ˑyă̱nˑdaħt he'niˑyòħ'dă̱ desˑsga'yă̱ˑo̱nˑdaaħ neħ noˑnyo̱'gwiħˑsăħ'goˑwaah na̱ħ'gă̱'o̱nˑdoħ'dă̱ħ, neħ noˑnă̱h' oˑnăh'do̱nˑdaˑdyĭĕħ noˑdo̱'niħˑaah'' deˑdyu'deħ'hah'doˑdyă̱h, swa'yă̱nˑde'ih heh oˑnă̱h' deˑyu'gă̱hˑho̱n'dyo̱ˑo̱nˑdyĭĕħ.
33Neħ'huh, dih, ne gă̱ħ nă̱ˑyaˑwă̱h nă̱ˑgă̱, noˑnă̱h' oˑi'waˑgweˑgo̱h ă̱ˑswat'gatˑhuħ, ă̱ˑswă̱n'no̱hˑdo̱o̱k', oˑnă̱' neħ' ne dòsˑgă̱'o̱h niˑga'deħ, aˑgwʋs', gwa', neħˑhuh' o'nă̱h' gaˑdeħ' he'gahˑho'gaˑă̱nˑdo̱ħ.
34Doˑgă̱s' oħˑgwă̱'a̱s, Neħ ne tă̱ħ'ă̱h ta'gaat nă̱ˑgă̱' ga'waˑji'yăˑdeħ', he'niˑyo'oˑweħ' ahˑso̱h' ă̱ˑgă̱'a̱k deħ'oˑi'waˑyeiħ'o̱h nă̱ˑgă̱' neˑyò'iˑwaˑgwe'go̱h.
35Neħ heˑgă̱'o̱ˑyaˑdeħ, kuh he'yo̱'ă̱ˑjaˑdeħ ă̱ˑga'at, naeh; neħ, gwa', he'niˑwa'gwă̱nˑna̱'wă̱ħˑsyo̱ħ tă̱ħˑă̱h', naeh tha'gaˑat.
36Neħ, dih, ne dwă̱'nĭsˑhăˑdeħ, kuh heˑnă̱nˑdyò'ĭsˑdaħ'eˑak, deħˑso̱ˑgaaħ' no̱'gweh de'oˑno̱hˑdo̱ħ; tă̱ħ'ă̱h; tă̱ħ'ă̱h, kuh, haeħ'gwah de'oˑnă̱nˑno̱h'do̱ħ naˑdi'o̱ˑyaħ'geˑoˑno̱ħ; neħ', sho̱, Naaħ'nih ha'o̱ˑhwa̱ħˑge'ah'.
37Neħ, dih, heˑniˑdwă̱'nĭsˑsyòħ'dă̱sˑsgwaħ ne chi'o̱ˑheħ' ne Noˑah; neħˑhuh', haeħ'gwah, nă̱ˑyaˑwă̱h' noˑnă̱h' ă̱ˑa̱n'dyaħˑdo'dahˑsiħ No̱'waˑwa̱k no̱'gweh.
38Neħˑhuh' niˑdwă̱'nĭsˑsyòħ'dă̱sˑgwaħ nah'so̱h deħˑa'o̱ˑă̱n'joħˑo̱'no̱ħ, neħ noˑno̱n'dekˑho̱ˑnii, haˑdi'neˑgeˑhaħ', kuh; hoˑdi'nyakˑho̱ˑnyo̱h', hoˑwa̱nˑdiˑnyak'daˑno̱ˑnih', kuh; he'niˑyo'oˑweħ' hoħˑwă̱'nĭsˑhă'eħ, oˑnă̱h', naeh, ga'o̱ˑwa̱ˑgo̱o̱ heˑo'yo̱sˑo̱h ne Noˑah,
39Tă̱ħ'ă̱h deˑa'diħˑni'go̱ˑă̱ħ, hoˑno̱n'dyă̱ˑgwaħ'o̱h', sho̱, oˑnă̱h' oˑno'do̱nˑdyĭĕħ, wa'oˑdiˑyaħ'dahˑgwiħ', kuh; neħˑhuh' ne gă̱ħ' niˑya'wă̱h'seħ noˑnă̱h' ă̱ˑa̱n'dyaħˑdo'dahˑsiħ No̱ˑwa̱'wa̱k' no̱'gweh'.
40Neħ noˑnă̱h' hă̱'ga'eh deˑi'yʋsˑheeh' ne gaħˑă̱'go̱o̱h ă̱ˑneħ'seek, shaˑyaħ'daat hă̱'o̱ˑwa̱ˑa̱ħ; ă̱ˑo'daˑdă̱ă̱ħ', naeh, ne shaˑyaħ'daat.
41Deˑgi'yʋsˑheeh, kuh, ne dekˑni'o̱h ă̱ˑgit'heħˑsyo̱'niˑak he yeˑtheħ'syo̱ˑnyaħ'thaħ; jeˑyaħ'daat hă̱ˑyo̱n'datˑhaaħ, ă̱ˑya'goˑdaˑdă̱ă̱ħ', naeh, ne jeˑyaħ'daat.
42Neħ, dih, gai'o̱ˑni'aak, swaˑdah'niˑgo̱'ă̱ˑă̱ħk; neħ, să̱ħ'ă̱h, ne tă̱ħ'ă̱h deħˑswă̱'no̱hˑdo̱ħ heˑnă̱ˑdyò'ĭsˑdaħ'eˑaak oˑnă̱h' ă̱'a̱ˑyo̱ħ' ne Sheˑswa'yaħ'da'gwĕnˑni'yòħ.
43Neħ, dih, swă̱ˑno̱h'do̱k nă̱ˑgă̱', Neħ, giħˑshă̱h', ne te'o'no̱hˑdo̱ħ no̱'gweh, na'no̱h'saˑgwĕnˑniˑyòħ, he'niˑdyo̱nt'ga'ă̱ˑo̱hˑgwaħ oˑnă̱h' ă̱'a̱ˑyo̱ħ' naˑno̱s'gwaˑo̱ħ, neħ', waeh, na'otˑga'ă̱ˑo̱sˑo̱h; neħ o̱n'daˑyò'iˑwaħ'heħˑo̱h a'gă̱ˑno̱ħ deˑa'weħˑo̱h, Aˑweħ'o̱ˑo̱nˑdyĭĕh', sho̱, hakˑno̱h'săˑjo̱.
44Neħ, dih, gai'o̱ˑnih, swaˑdeh'saħˑo̱h'jiˑwă̱'o̱k; neħ, să̱ħ'ă̱h, ne ga'ă̱ˑgwah' niˑyo'oˑweħ' nă̱nˑdyò'ĭsˑdaħ'eˑaak, ă̱ˑgă̱'a̱k neħ deħˑji'swă̱ˑno̱h'doˑnyo̱h, waˑa'dyaħˑdo'dahˑsiħ No̱ˑwa̱'wa̱k' no̱'gweh.
45So̱' naħˑoh'dă̱ħˑă̱h, dih', doˑgă̱s' hoˑi'waˑye'ĭsˑdo̱h, hoˑhaħ'shăħˑniˑgo̱nt', kuh, neħ no'yaħ'daˑgwĕnˑni'yòħ thoˑno̱h'do̱sˑo̱h, haˑweħ'o̱h', neħ ă̱ˑtho'no̱hˑdo̱o̱nˑdyĭĕħ he'niˑkno̱h'saˑgwĕnˑni'yòħ, neħ ă̱ˑo̱'go̱ħˑkwa'no̱nˑdă̱'a̱k' noˑnă̱h' hă̱ˑsga'ehˑseek?
46Hoˑdă̱'o̱h ne neħ na'haħ'shăħ noˑnă̱h' dă̱ntˑheħ no'yaħ'daˑgwĕnˑni'yòħ, ă̱'oˑdyă̱ˑgwah' neħˑhuh', gwah', niˑoˑye'a̱nˑdyĭĕħ.
47Doˑgă̱s' oħˑgwă̱'a̱s, Neħ ne' tgaˑgo̱nt' neħˑhuh' nă̱'oˑyeeħ, ne gaˑgwe'go̱h neħ ă̱ˑtho'no̱hˑdo̱'o̱nˑdyĭĕħ he'nă̱ˑyaˑwă̱ħ'o̱ˑo̱nˑdyĭĕħ no'shă̱ˑno̱ˑnyʋs'hăˑgweˑgo̱h.
48Neħ, dih', giħˑshă̱h, no̱ˑgweħ'daˑetˑgă̱ħ, na'haħ'shăħ, a'gaˑgweˑniħ naˑwă̱n'nyahˑsaˑgo̱' ă̱ntˑhă̱ħ', Oˑnă̱'ă̱ħ oˑăh'do̱ˑo̱nˑdyĭĕħ heˑna̱'oˑyo̱o̱h naˑgyaħ'daˑgwĕnˑniˑyòħ;
49Oˑnă̱h', kuh, ă̱'a̱h'saˑwă̱h ă̱ˑo̱'go̱ˑno̱h'go̱nˑdă̱ħ', ă̱ˑo̱'go̱ˑyă̱s'daˑno̱o̱h' kuh, ne shaħ'gaat haˑdih'haħˑshăħ, ă̱ˑa̱n'dekˑho̱ˑniħ, ă̱ˑa̱'neˑgeˑăħ, kuh, neħ' shaħˑgaat' ă̱ˑoˑdiˑno̱ˑă̱h'do̱ħˑo̱'o̱k noˑyaħ'sho̱ħ,
50Neħ no'yaħ'daˑgwĕnˑni'yòħ na'haħ'shăħ ă̱ntˑheħ' neħ wă̱ˑnĭs'hăˑdeħ noˑnă̱h' ă̱ˑgă̱'a̱k de'aħ'niˑgo̱'ă̱ħ; neħ, kuh, heˑnă̱ˑdyò'ĭsˑdaħ'eˑaak ă̱ˑgă̱'a̱k deˑo'no̱hˑdo̱ħ.
51Neħ neħ haħ'dă̱ˑoˑyaħ'dyaħkˑdʋk, neħˑhuh' ă̱ˑo̱'wa̱ˑyaħ'do̱nˑdyeet' haˑdi'yaħˑdaˑdeħ' ne da'aˑdiˑgo̱h'saˑneet; neħˑhuh', naeh, ă̱ˑdyo̱sˑdă̱ˑo̱'nyo̱ˑo̱k, dă̱ˑdyo̱n'dyòħ'gă'nye'aak', kuh.
Currently Selected:
Matthew 24: SEE
Highlight
Share
Copy
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.
