Genesis 18
18
Omakwizikiro wongwatero ya Isak
1 Muhona we rimunikisa ku Abraham pomimbonde vya Mamre. Abraham wa haamene pomuvero wondanda ye moruveze rwomapeta. 2#Heb 13:2Neye tja yera omeho we wa muna ovarumendu vetatu, mba kurama momurungu we nu kokure kaṱiṱi. Neye wa tupuka ku wo okuveyakura, tje ya pu wo, wa wa kozongoro nomurungu we amau tara mehi 3na tja: “Vatengwa, arikaneye amu kapita nokuhina ku kurama poyandje; ami mbi ri mba okumukarera. 4Ndji esa mbi raye omeva, mu rikohe na wo ozombaze zeṋu, nu mu suve kehi yomuti mbwi. 5Nu ami me kaeta ovikurya, mbi mavi mu pe omasa okuryama mouyenda weṋu; orondu eṋe mwe ya koyandje, ami otji me mu sekirisa.”
Nowo va zira ave tja: “Osemba, tjita pu wa hee.”
6Nu Abraham wa hakahana okuhita mondanda na tja ku Sara: “Hakahana, toora oruhere rwoye oruwa ovisanekero vitatu nu ru runga u tereke po omavanda!” 7Abraham wa tupuka kozongombe ze na katoorora mo ondana ndja ṋuna, ne i yandja komukarere, neye wa hakahana okuiṱuna okumana. 8Nu Abraham wa toora omaere nomaihi na indji onyama, ne vi twara ku wo. Nowo va rya eye omuini ngunda a kurama puna wo momuti.
9Nowo ve mu pura ave tja: “Omukazendu woye Sara u ri pi?”
Neye wa zira nai: “U ri mondanda.”
10 #
Rom 9:9
Umwe wa imba ovarumendu wa ri Ndjambi, na tja ku Abraham: “Tjiri, moruveze mangara tjingero ndwi mombura ndji mai yende me kotoka, nu Sara omukazendu woye, tjandje u nomuatje omuzandu.”
Sara aa puratenene pomuvero wondanda mbwa ri mongotwe yomuyenda. 11OoAbraham na Sara va kurupire tjinene; nu Sara wa isa okumuna omayuva woukazendu we 12#1Pt 3:6Nu Sara otje riyorera mu ye omuini na tja: “Nambano ami ngu mba kurupa tjinene me kara nonyuṋe movyonyama are? Nu ngunda peri nao, omurumendu wandje wina wa kurupa nai.”
13Nu Muhona wa pura ku Abraham a tja: “Okutjavi Sara tja yoro ama tja: ‘Ami ngu mba kurupa nai me sora okumuna omuatje are?’ 14#Lk 1:37Indu pe notjiṋa tji tji ha sorwa i Muhona are? Moruveze tjingero, kombunda yombura imwe ami me kotoka kove, nu Sara ma panduka omuzandu.”
15Nu Sara tjinga aa tira wa pataṋa na tja: “Ami hi yorere.”
Neye wa zira nai: “Ii, ove wa yoro!”
Abraham merihekenenepo Sodom
16Novarumendu va sekama nave i, nave kakurama poṋa puyave sora okutara kOsodom. Nu Abraham wa ya puna wo okuveṱika. 17Nu Muhona we rihungirira mu ye omuini a tja: “Ami me sora vi okuhorekera Abraham imbi mbi me vanga okutjita, 18Abraham, tjiri, ngunda ama rire omuhoko omunene nomunamasa, noviwaṋa avihe kombanda yehi amavi serwa ondaya mena re? 19Ami mbe mu toorora kutja a rakize kovanatje ve na kozondekurona ze, ve kare nonḓuviro ku ami, nokutjita ve tjite ousemba nokupangura nouatjiri. Tji va tjiti nao ami me yenenisa avihe mbi mba kwizikira Abraham.”
20Tjazumba Muhona wa tja ku Abraham: “Ami mba zuu omuano omunauvi wovandu va Sodom na Gomora, tjiri, ourunde wawo ounene tjinene. 21Ami me vanga okurauka mbi kamune omuano omunauvi mbwi mbu mba zuva kutja ouatjiri.”
22Novarumendu va ya nave hungama kOsodom. Nungwari Abraham wa sewa a kurama puna Muhona. 23Nu Abraham weya popezu na Muhona na pura nai: “Mo kayandeka ingwi omuhinandjo puna omunandjo are? 24Ngahino mu novasemba omirongo vitano moukoto wotjihuro; indu ove mo ve yandeke? Ove ko nokuyama otjihuro mena raimba ovasemba omirongo vitano are? 25Tjiri, ove komoo yandeke omuhinandjo pamwe nomunandjo. Kape nokuyenena! Ove komoo tjiti nao. Komuano mbwi omusemba ma verwa otja omurunde; kape nokuyenena. Omupangure wehi arihe u sokutjita ousemba.”
26Nu Muhona wa zira a tja: “Tji me munu ovasemba omirongo vitano mOsodom, ami me yama ihi otjihuro atjihe mena raimba omirongo vitano.”
27Abraham wa hungira rukwao a tja: “Arikana, ndji isira okuryama komurungu nehungi kuna ove, Muhona. Ami owami omundu uriri ngu mbi hi nousemba wokuhungira kuna ove. 28Ngahino mamu kara omirongo vine na vetano ovehinandjo moruveze rwomirongo vitano. Ove mo yandeke otjihuro atjihe mena rokutja pa kaere vetano are?”
Nu Muhona wa zira nai: “Ami himee yandeke ihi otjihuro tji mba vaza mo ovasemba omirongo vine na vetano.”
29Nu Abraham wa hungira rukwao a tja: “Ngahino mamu kara omirongo vine uriri.”
Muhona wa zira nai: “Ami himee tji yandeke tji mu na omirongo vine.”
30Norukwao Abraham wa tja nai: “Muhona, o ṱomazenge ami tji me hungire rukwao. Nu tji mamu kara omirongo vitatu?”
Muhona wa zira a tja: “Ami hi nokutjiyandeka ko tji mba vaza mo omirongo vitatu.”
31Nu Abraham wa tja: “Arikana, ndji isira tji me hungire puna ove, Muhona. Nu tji mu na omirongo vivari uriri?”
Muhona wa zira nai: “Ami himee yandeke ihi otjihuro tji mu na omirongo vivari.”
32Nu Abraham wa tja: “Arikana, o ṱomazenge, Muhona, tji me hungire otjikando tjimwe rukwao. Nu tji mu na omurongo uriri?”
Nu Muhona wa zira a tja: “Ami himee tji yandeke tji mu na omurongo.” 33Nu Muhona tja mana okuhungira kuna Abraham, arire tja i. Nu Abraham wa yaruka konganda ye.
Currently Selected:
Genesis 18: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
