Genesis 20
20
Abraham na Abimelek
1Abraham wa tjinda okuza kOmamre nga kehi ra Negeb na katura pokati kooKades na Sur. Nu moure woruveze ndo wa tura mOgerar otja owozonganda. 2#Gen 12:13; 26:7Nu Abraham wa tja omukazendu we Sara omuṱena. Abimelek, ombara ya Gerar, otja raya kutja Sara a etwe ku ye. 3Nungwari Ndjambi we riraisa ku Abimelek ouṱuku moruroto na tja ku ye: “Tara, ove mo ṱu mena romukazendu ngu wa kaisanisa; orondu eye omukazendu ngwa kupwa.”
4Nungwari Abimelek ka ṱunine ku ye; neye arire tja tja: “Muhona, mo zepa otjiwaṋa tji tji hi nandjo are? 5Indu nai Abraham ke ndji raerere omuini kutja Sara omuṱena are? Nu Sara omuini wina otja hee kutja eye omuṱena. Ami opu mba zu okutjita nao nomeritjiviro omakohoke, nu hi tataizire.”
6Nu Ndjambi we mu zira moruroto a tja: “Ii, ami wina me tjiwa kutja ove wa tjiti ihi nomeritjiviro omakohoke. Ami omuini opu mbe ku tjaerere kutja o ha tjiti ourunde komurungu wandje. Nopu mbe ku tjaerere kutja o ha ṱunu ku ye. 7Nambano yarura omukazendu komurumendu we, orondu eye omuprofete; neye me ku kumbire kutja o ha ṱu. Nungwari ove tji u hi nakumuyarura, tjiwa kutja mo ṱu, ove neṱunḓu roye arihe.”
8Abimelek arire tja penduka omuhuka omunene na isana ovakarere ve avehe, ne ve serakarerere oviṋa mbi avihe. Novarumendu mba arire tji va tira tjinene. 9Nu Abimelek wa isana Abraham na tja ku ye: “Ove wa tjiti tjike ku eṱe? Nu mba tjiti ourunde watjike komurungu woye tji wa eta ourunde mbu ṱa mba, kombanda yandje na kouhona wandje? Ove wa tjiti otjiṋa ku ami tji tji ha pu pokutjitwa.” 10Abimelek wa pura Abraham a tja: “Ove hapo we ripura vi tji wa tjiti nao?”
11Abraham wa zira nai: “Ami mbe ripura kutja kape na umwe mba ngu ma tira Ndjambi, nokutja mave ndji zepa kutja ve kambure ingwi omukazendu wandje. 12Eye, tjiri, omuṱena kwandje, omuatje ngwa za mu tate, nungwari ka wamama; nopu mbe mu kupira. 13Nu Ndjambi tje ndji isa mo mondjuwo ya tate okuyenda kehi rozonganda, ami otji mba tja nai ku Sara: ‘Ove ndji yarisira ouṱakame: Poṋa apehe pu matu ya, itja: Ingwi omuṱena kwandje.’ ”
14Abimelek wa yarura Sara ku Abraham; nu moruveze tjingero eye we mu pa orupanda rozonyanda nozongombe, novakarere ovarumendu novakazendu. 15Nu Abimelek wa tja ku Abraham: “Ehi randje arihe oro ndo; tura apehe pu movanga.” 16Nu eye wa tja nai ku Sara: “Ami me yandja ovimariva ovisilveri eyovi rimwe komuṱena kwoye otja otjiyarisiro ku eṋe amuhe mbu mu ri pamwe, tjokutja oove omuhinandjo.”
17Abraham arire tja kumbu ku Ndjambi, nu Ndjambi wa verukisa Abimelek; wina wa verukisa omukazendu we novakarere ve ovasuko kutja ve panduke; 18orondu Muhona tja patere orukwato aruhe mondjuwo ya Abimelek mena raimbi mbya tjitwa ku Sara, omukazendu wa Abraham.
Currently Selected:
Genesis 20: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
