Genesis 30
30
1Nu Rahel tja muna kutja ke nakupandukira Jakob ovanatje, arire tja ṱesupa nerumbi re na tja ku Jakob: “Ndji pa ovanatje poo me ṱokukoka!”
2Jakob arire tja pindikire Rahel na pura a tja: “Ami owami Ndjambi are, ngwe ku pata okumuna ovanatje?”
3Nu Rahel arire tja tja ku Jakob: “Omukarere wandje omusuko Bilha eye ngo; karare pu ye kutja eye e ndji pandukire omuatje ngu ma rire owandje; komuano mbwi otji me rire ina yomuatje mena re.” 4Neye opa yandjera omukarere we omusuko Bilha komurumendu we a karare pu ye. 5Nu Bilha wa rira otjingundi, na pandukire Jakob omuzandu. 6Rahel opa tjera: “Ndjambi we ndji pe ousemba, nu wina we ndji zuvire ongumbiro yandje ne ndji pe omuzandu.” Neye ope mu rukira Dan. 7Nomukarere wa Rahel ingwi Bilha wa rira otjingundi rukwao na pandukire Jakob omuzandu outjavari. 8Rahel arire tja tja: “Ami mba rwa otjirwa otjizeu tjinene nerumbi randje, nungwari ami mba toṋa.” Neye ope mu rukira Naftali.
9Nu Lea tja muna kutja kena ku muna ovanatje rukwao, wa yandja omukarere we omusuko wena Silpa ku Jakob a rire omukazendu we. 10Silpa arire tja pandukire Jakob omuzandu. 11Lea wa tja: “Owami omuṋingandu”, ne mu ruku Gad. 12Nomukarere wa Lea, Silpa, wa pandukira Jakob omuzandu outjavari. 13Nu Lea wa tja: “Owami omuṋingandu! Nu nambano ovakazendu mave ndji ruku Omuṋingandu.” Neye ope mu rukire Aser.
14Nu moruveze rwomakondero wovikokotwa Ruben wa ya mokuti na kamuna ko ovihape vyorusuvero, mbya eterera ku ina Lea. Nu Rahel wa tja ku Lea: “Arikana, ndji pao ko kovihape vyorusuvero vyomuzandu woye.”
15Lea arire tja ziri a tja: “Kapuwo tji we ndji yeka omurumendu wandje, nu ngunda mo kondjisa okundjiyeka otjihape tjorusuvero tjomuzandu wandje wina are?”
Rahel arire tja tja: “Tji we ndji pe otjihape tjorusuvero tjomuzandu woye, nu mo rara puna Jakob ouṱuku mbuno.”
16Nu Jakob tja kotoka ongurova okuza mokuti, Lea arire tje mu tjakanene nomambo nga: “Ove rara puna ami ouṱuku mbwi, orondu ami mbe ku randa notjihape tjorusuvero tjomuzandu wandje.” Nu Jakob otja karara pu Lea ouṱuku mbo.
17Nu Ndjambi wa zuvira ongumbiro ya Lea; neye a rire otjingundi, na pandukire Jakob omuzandu outjatano. 18Lea arire tja tja: “Ndjambi we ndji pe ondjambi yandje, orondu tji mba yandja omukarere wandje omusuko komurumendu wandje.” Neye we mu ruka Isakar. 19Nu Lea wa rira otjingundi rukwao na pandukire Jakob omuzandu outjahamboumwe. 20Lea wa tja: “Ndjambi we ndji pe otjiyandjewa otjiwa; nambano omurumendu wandje eha ma twa pu ami, orondu ami mbe mu pandukira ovazandu hamboumwe.” Eye otje mu ruka Sebulon. 21Nu kombunda eye we mu pandukira omukazona, ne mu ruku Dina.
22Ndjambi we rizemburuka na Rahel ne mu zuvire ozongumbiro ze, ne mu pe omuatje. 23Neye wa rira otjingundi na panduka omuzandu. Neye wa tja: “Ndjambi wa isa po ohoṋi pu ami yokuhinakumuna ovanatje.” 24Nope mu rukira Josef na tja: “Muhona nge ndji pe omuzandu warwe rukwao.”
Outumbe wa Jakob
25Kombunda yongwatero ya Josef, Jakob wa tja ku Laban: “Ndji esa mbi tjinde, mbi yaruke kehi retu. 26Ndji pa ovakazendu mbu mba ungurira pove, novanatje vandje kutja mbi yende. Ove omuini hapo mo tjiwa kutja okuungura kwandje kwa ṱekire pi.”
27Laban arire tja tja ku ye: “Ndji yandjera okuhungira otjiṋa hi: Ami mba muna kutja Muhona we ndji sera ondaya mena roye.” 28Tjazumba a hungire komurungu a tja: “Twa ko ondjambi yoye, nami me ku sutu.”
29Nu Jakob we mu zira a tja: “Ove omuini mo tjiwa kutja mbe ku ungurira vi, nokutja ozonyanda zoye za tumbara tjinene kehi yondjeverero yandje. 30Orondu ozo za ri ouṱiṱi ngunda ambi hiye ya; nambano za takavara tjinene. Muhona we ku sera ondaya mu avihe, mbi mba tjita. Nu nambano imba ovondjuwo yandje hi keveungurire ruṋe?”
31Nu Laban wa pura ku Jakob a tja: “Hi ku sute tjike?”
Nu Jakob wa zira nai: “Ami hi nokuvanga ondjambi; ove tji mo tjiti ihi ami tji me hungire, nu ami me ku ṱakamisire ozonyanda zoye komurungu. 32Ndinondi ami me tuurunga mokati kozonyanda zoye azehe. Me tuku mo ozonyanda azehe ozombinḓe nozombonde; ozondjona azehe ozonḓorozu, nozongombo ozombonde nozombinḓe; inḓa onḓu maze rire ondjambi yandje. 33Nu ku imbyo kombunda opu mo munine ouṱakame wandje; ove tji weya okutara ondjambi yandje, nami tji mbi nongombo, ndji he ri ombinḓe poo ombonde poo onḓu, ndji he ri onḓorozu, otji mo tjiwa kutja oyo ya vakwa.”
34Nu Laban wa zira a tja: “Osemba, eṱe matu tjiti nao otja tji wa hungire!” 35Nungwari eyuva tjingero ndo Laban wa tuka ozongombo ozondume zotuvao nozombonde, nozongombo ozonḓenḓu azehe, nḓa ri ozombinḓe nozombonde, nu nḓa ri nouvara ouvapa; wina wa tuka ozonḓu ozonḓorozu azehe, na twako ovazandu ve okuzetjevera. 36Laban wa zapo pu Jakob na kayenda oure wondjira yomayuva yetatu nozonyanda ze. Nu Jakob wa ṱakamisa inḓa ozonyanda za Laban, nḓa sewa po.
37Jakob wa pora otutavi twomaso oruhapo komutjenya nomuvapu nomutete, na tatura mo otuvao otuvapa kutja otutavi tu kare notuvao otuvapa mu two. 38Eye wa twa itwi otutavi momurungu wozonyanda momatemba omahiriro. Eye we tu twa mbo, tjinga aaze hambwa tji maze ya okunwa. 39Nozonyanda tjinga aaze hambwa mokati kouti mbo za kwata oungombona wotuvao nouvinḓe noumbonde.
40Nu Jakob wa tuka inḓa ozonḓu ne ze tarisa ouhunga na inḓa ozombinḓe na inḓa ozonḓorozu mokati kozonyada za Laban; neye we ritjitira otupanda twe peke, ne he ze twa mozonyanda za Laban.
41Naruhe ozonyanda inḓa omaremba tjiyaze paha okuhambwa, Jakob otjaa twa outi mbo momurungu wozonyanda momatemba omahiriro kutja ze hamberwe pouti mbo. 42Nungwari eye kaa twa po outi momurungu wozonyanda inḓa nḓa rambuka kutja inḓa ozondambi ze rire oza Laban, nu inḓa ozonḓune ze rire oze. 43Mokamanga eye wa karira omurumendu omutumbe tjinene. Eye wa ri notupanda otuingi twozonyanda novakarere nozongamero nousino.
Currently Selected:
Genesis 30: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
