Johanes 2

Orukupo mOkana

1Nu meyuva oritjatatu mwa ri orukupo motjihuro Kana mOgalilea, nu ina ya Jesus opari mbo. 2Jesus novahongewa ve wina va ṋangerwe korukupo ndwi. 3Nomavinu tji ya manuka, ina ya Jesus wa tjere ku ye: “Owo kave tji nomavinu.”

4Jesus wa zirire a tja: “Ove ondjiraere imbi mbi me sokutjita, orondu oruveze rwandje ingee karuya yenena.”

5Ina ya Jesus arire tja raere kovakarere a tja: “Tjiteye ngamwa atjihe eye tji me mu raere.”

6Ovajuda va ri nomazikamisiro otja komerikohororero wawo, nu komuhingo mbwi otji pa ri ovikuve vyomawe hamboumwe, atjihe tji tja ri nomurya wozorita mangara esere rimwe. 7Jesus wa tjere kovakarere: “Uriseye ovikuve mbi nomeva.” Nowo ave vi urisa nga potjinyo. 8Tjazumba arire tja tja ku wo: “Nambano woteye ko omeva nu mu ye tware komutye womariro.” Nowo va tjita otja pu va raerwa. 9Omutye womariro tja rora omeva nambano nga rire omavinu, eye kaa tjiwa kutja omavinu nga ya zire pi, nungwari mbaa ve tjiwa owo mba ovakarere, mba wotere omeva. Eye opa isanena omuvareke, 10na tja ku ye: “Omundu rutenga u eta omavinu inga omawa, novaṋangwa tji va nu tji va kowa, arire tja eta inga omapupu. Nungwari ove wa horeke omavinu inga omawamawa nga nai!”

11Jesus wa tjitire otjiraisiro otjitenga hi motjihuro Kana mOgalilea. Eye wa raisa ounene we, novahongewa ve ave kambura mu ye.

12 # Mt 4:13 Kombunda yoviṋa mbi, Jesus na ina novahongewa ve novangu ve va ya kOkapernaum nave kakara ngo oure womayuva tjiva.

Jesus ma i kondjuwo ya Muhona

(Mt 21:12-13; Mk 11:15-17; Lk 19:45-46)

13 # Eks 12:1-27 Nomayuva omanene wOpaska tji yari pokuyenena, Jesus wa ire kOjerusalem. 14Mondjuwo ya Muhona eye wa kavaza mo ovandu mbaa ve randisa ozongombe nozonḓu nozonguti, na wina ovapimbasane vovimariva mba haamene poviriro vyawo. 15Eye opa ungurira ongora pozongoze na ramba avehe mondjuwo ya Muhona nga kozonḓu nozongombe. Eye wa imbirahi ovimariva ovisilveri vyovapimbasane na tjengura oviriro vyawo. 16Okuzambo wa rakiza kovandu mbaa ve randisa ozonguti na tja: “Pitiseye oviṋa mbi mu tware! Amu ririsa ondjuwo ya Tate oruveze romarandero!” 17#Psa 69:9Ovahongewa ve arire tji ve rizemburuka nomatjangwa ngu ma ye tja: “Oupyuke kondjuwo yoye, Ndjambi, u ndji nyosa otja omuriro.”

18Ovanane vOvajuda va tjere nai: “Otjingee himise tji mo yenene okutjita okuturaisira kutja u nousemba okutjita oviṋa mbi?”

19 # Mt 26:61; 27:40; Mk 14:58; 15:29 Jesus a ziri a tja: “Haṋeye ondjuwo ya Muhona ndji, nu moure womayuva yetatu ami me i tungurura rukwao.”

20Owo ve mu pura ave tja: “ondjuwo ya Muhona ndji ya tungwa moure wozombura omirongo vine na hamboumwe, nove mo i tungurura moure womayuva yetatu are?”

21Nungwari mokuhungira ondjuwo ya Muhona, Jesus aa hee orutu rwe. 22Nu kombunda eye tja pendurwa movakoke, ovahongewa ve va zemburuka kutja eye wa hungirire oviṋa mbi, nowo ave kambura momatjangwa na mu imbi Jesus mbya hungirire.

Jesus u tjiwa omundu

23Jesus ngunda e ri mOjerusalem momayuva omanene wOpaska, ovandu ovengi va kambura mu ye, tji va munine ovihimise eye mbya tjiti. 24Nungwari Jesus ka ri nonḓakameno mu wo, tjinga ee ve tjiwa avehe. 25Ka ri ohepero kutja eye ma raerwe otjiṋa i omundu, eye omuini tjinga aa tjiwa imbi mbi ri momitima vyovandu.

Currently Selected:

Johanes 2: HRR-UNI

Highlight

Copy