Johanes 6

Jesus ma parura ovandu omayovi yetano

(Mt 14:13-21; Mk 6:30-44; Lk 9:10-17)

1Kombunda yoviṋa mbi Jesus wa kondere Omuronga wa Galilea, wina mbu ku za Omuronga wa Tiberias. 2Notjimbumba otjinene tjovandu tje mu kongorera, tjinga ava munine ovihimise vye vyokuverukisa ovavere. 3Jesus arire tja karonda kondundu na kakara pehi puna ovahongewa ve. 4Nu omayuva omanene wOpaska ya ri popezu. 5Jesus tja yevayeva na munu otjimbumba otjinene tjovandu tji matji ya ku ye, arire tja pura ku Filipus a tja: “Ozomboroto ndu maze yenene okuparura ovandu avehe mba matu randa pi?” 6Omambo nga we ye hungirira okurora Filipus, eye omuini tjinga aa tjiwa kutja ma tjiti vi.

7Filipus wa zirire a tja: “Nangarire ozomboroto zovimariva ovisilveri omasere yevari katu nokuyenena okuranda, kokutja auhe wawo a mune okahumburwa kemwe.”

8Nomuhongewa we umwe wena Andreas, omuangu wa Simon Petrus, arire tja tja: 9“Pe nomuzandona mba ngu nozomboroto ndano ozombomba zovirya nozohi mbari. Nozo ze nonḓengu yatjike kovandu avehe mbe ṱa mba?”

10Jesus wa tjere ku wo: “Raereye ovandu ve kare pehi.” Nu poṋa mbo pa ri nehozu enyingi. Novandu avehe arire tji va kara pehi. Novarumendu porwe va ri notjivaro mangara tjomayovi yetano. 11Jesus arire tja toora inḓa ozomboroto, a tja okuhepa ku Ndjambi ne ze haṋa movandu, mba karere pehi mbo. Eye wa tjita tjingetjo nozohi wina, nu avehe va muna otja auhe punga a vangere. 12Navehe tji ve kuta, Jesus a tja kovahongewa ve: “Wongeye outekero mbwa hupu, ape ha pandjara okaṋa.” 13Notji va wonga auhe nave urisa ovimbamba omurongo na vivari noutekero mbwa serwe po wozomboroto nḓa ndano ozombomba zovirya ovandu nḓu va rire.

14Novandu tji va za nokumuna otjihimise Jesus tja tjita, arire tji va tja: “Tjiri, ingwi eye Omuprofete ngu kwa za meya mouye!” 15Jesus tja tjiza kutja owo ve ri pokuyekumukambura ve mu zike komasa okurira ombara, arire tja rondo kondundu, eye erike.

Jesus ma ka wondja kombanda yomeva

(Mt 14:22-23; Mk 6:45-52)

16Nu tja rira ongurova, ovahongewa va Jesus va ire komuronga, 17ave karonda mokayaha nave i kOkapernaum, munda mbwina yomuronga. Kwa zorerere, nu Jesus tjandje ingee keye ya ku wo. 18Nu kwa hinga otjivepo otjinamasa natji zunganisa omeva. 19Ovahongewa tji va hinga okayaha oure wozokirometa mangara ndano poo hamboumwe, arire tji va munu Jesus ama ka wondja kombanda yomeva, nameya kokayaha, nowo ave uruma tjinene. 20Jesus we ve raera a tja: “Owami, amu tira!” 21Nowo va vangere okumurondisa mokayaha, nu tjimanga okayaha ake kavaza kehi kuyave i.

Ovandu mave paha Jesus

22Nu mependukirwa otjimbumba tjovandu mba ri munda mbwina yomuronga va munine kutja pe nokayaha kemwe uriri. Owo aave tjiwa kutja Jesus ka ire puna ovahongewa ve mokayaha. 23Ouyaha oukwao mbwa zire kOtiberias we ere okukurama mba otjimbumba tjovandu pu tja rira omboroto, indu Muhona tja zire nokutja okuhepa. 24Notjimbumba tji tja muna kutja Jesus ke po, novahongewa ve wina kave po, arire tji tja rondo mouyaha mbo natji i kOkapernaum okukemupaha.

Jesus eye omboroto yomuinyo

25Ovandu tji va kavazere Jesus munda mbwina yomuronga, va tjere ku ye: “Muhonge, ove we ere ruṋe muno?”

26Jesus a zire a tja: “Tjiri, tjiri, ami me mu raere, eṋe kamu nakundjipahera imbi ovihimise mbi mwa munu, nungwari mamu ndji pahere omboroto ndji ndji mwa ri namu kuta. 27Amu ungurire ovikurya mbi yanda, nungwari ungurireye ovikurya mbi yandja omuinyo waaruhe. Ovyo ovikurya mbi mamu pewa i Omuna wOmundu, Ndjambi Ihe tjinga e mu pa ouvara wokuviyandja.”

28Owo arire tji ve mu pura ave tja: “Ngatu tjite vi kokutja tu ungure imbi oviungura Ndjambi mbye vanga?” 29Jesus wa zirire a tja: “Ihi Ndjambi tji ma vanga kutja mu tjite okongwi okutja eṋe mu kambura mu ingwi eye ngwa hinda.”

30Owo va zirire ave tja: “Mo tjiti otjingee otjihimise kokutja eṱe tu tji mune nu tu kambure move? Mo tjiti tjike? 31#Eks 16:4, 15; Psa 78:24Ootate mukururume va rire ovimana mokuti onguza otja tjinga apa tjangwa momatjangwa: ‘Eye we ve pa omboroto okurya ndja zire keyuru.’ ”

32Jesus arire tja tja: “Tjiri, tjiri, ami me mu raere ouatjiri, Moses kenaa we mu pere omboroto ndja zira keyuru, nungwari Tate ongu me mu pe omboroto yatjiri ndji mai zire keyuru. 33Orondu omboroto Ndjambi ndji ma yandja oyo eye ngwi ngu ma zire keyuru, nu ngu ma yandja omuinyo kouye.”

34Owo ave mu pura ave tja: “Muhona, tu pao omboroto ndji aruhe.”

35Jesus e ve raere a tja: “Owami ngu mbi ri omboroto yomuinyo. Ingwi ngu meya ku ami kamaa ṱondjara, nu ngu ma kambura mu ami kamaa ṱonyota. 36Nungwari ami hapo mbe mu raere kutja eṋe mu ndji muna nu kamu kambura mu ami. 37Omundu auhe Tate ngu me ndji pe meya ku ami. Nu ngu meya ku ami, ami himee mu humbu ko, 38tjinga ambi he ere okuza keyuru okuyekutjita ombango yandje, nungwari tjinga ambe era okuyekutjita ombango yaingwi ngwe ndji hinda. 39Nombango yaingwi ngwe ndji hinda okongwi okutja e ha pandjarisa ko umwe wa imba avehe eye mbe ndji pa, nungwari mbi ve pendure avehe movakoke meyuva esenina. 40Nombango ya Tate oyo ndji: Auhe ngwa munu Omuna nu a kambura mu ye ma kara nomuinyo waaruhe; nami me mu pendura movakoke meyuva esenina.”

41NOvajuda va uta okumuunaunina, eye tjinga a tja: “Owami omboroto ndja rauka keyuru.” 42Nopu va tjera: “Omundu ngwi ka Jesus omuna wa Josef, are? Ihe na ina tu ve i nawa, nu. Nu nambano eye ma heere tjike kutja wa rauka keyuru?”

43Jesus arire tja ziri a tja: “Amu unauna nao mokati keṋu. 44Kape nomundu ngu ma sora okuya ku ami tje ha nanenwe i Tate ngwe ndji hinda; nami me mu pendura movakoke meyuva esenina. 45#Jes 54:13Ovaprofete va tjangere nai: ‘Navehe mave hongwa i Ndjambi.’ Auhe ngu ma zuu ku Tate na hongwa i ye, meya ku ami. 46Nu kakutja nao pena ngwa muna Tate; ingwi ngwa zira ku Ndjambi eye porwe ongwa muna Tate. 47Ami, me mu raere ouatjiri, ingwi ngu ma kambura mu ami u nomuinyo waaruhe. 48Owami ngu mbi ri omboroto yomuinyo. 49Ooiho mukururume va rire otjimana mokuti onguza nu va koka. 50Nungwari omboroto ndji ndji mai zu keyuru oyo omboroto yokutja auhe ngu ma ri ku yo a ha ṱu. 51Owami omboroto yomuinyo ndja zira keyuru. Auhe ngu ma ri komboroto ndji ma kara nomuinyo waaruhe. Omboroto ndji ami ndji me yandja oyo onyama yandje ndji me yandjere omuinyo wouye.”

52Ovajuda va yarukire okupatasana mokati kawo oveni nave pura ave tja: “Omundu ngwi ma sora vi okutupa onyama ye okurya?”

53Jesus arire tja tja ku wo: “Ami, me mu raere ouatjiri, tji mu hi nokurya onyama yOmuna wOmundu nokunwa ombinḓu ye, kamu nokukara nomuinyo mu eṋe. 54Ingwi ngu ma ri onyama yandje na nu ombinḓu yandje u nomuinyo waaruhe, nami me mu pendura movakoke meyuva esenina. 55Orondu onyama yandje otjikurya tjiri, nombinḓu yandje omanuwa tjiri. 56Ingwi ngu ma ri onyama yandje na nu ombinḓu yandje ma kara mu ami, nami e kara mu ye. 57Tate omunamuinyo we ndji hinda, nami mbi nomuinyo mu ye. Nu momuhingo tjingewo ingwi ngu ma ri ami ma kara nomuinyo mu ami wina. 58Indji oyo omboroto ndja zira keyuru; oyo kamboroto ndji ooiho mukururume ndji va rire nave ṱu. Ingwi ngu ma ri omboroto ndji ma kara nomuinyo nga aruhe.”

59Jesus wa hungirire omambo nga, indu tjaa hongo ovandu mosinagoge mOkapernaum.

Omambo womuinyo waaruhe

60Ovakongorere ovengi va Jesus va zuvire omambo nga nave tja: “Omahongero nga omazeu tjinene. Ngu ma sora okuyezuva nawa owaṋi?”

61Nu ngunda e hiya raerwa otjiṋa, Jesus aa tjiwa kutja owo mave unaunine omambo we, narire tja tja: “Otjiṋa hi matji mu pe ooma wokurihahiza are? 62Nu mape kara vi tji mwa munu Omuna wOmundu ama rondo okuyaruka ka ri rutenga? 63Ombepo ya Ndjambi ondji yandja omuinyo momundu; omundu omuini ke na tje tjita oparukaze. Omambo ngu mba hungire ku eṋe ye eta Ombepo ya Ndjambi ndji yandja omuinyo. 64Nungwari eṋe tjiva kamu nokukambura.”

Jesus aa tjiwa rukuru okuza kombutiro kutja oowaṋi mbe hi nokukambura, nokutja owaṋi ngu me mu horora movineya.

65Nu eye wa hungirire komurungu a tja: “Opu mba zu okumuraera kutja kape nomundu ngu ma sora okuya ku ami, Tate tje he mu yandjerere okutjita nao.”

66Motjimbe tjomambo nga ovakongorere ovengi va Jesus va yarukira mbo nave ha uhara amave mu kongorere rukwao. 67Nu Jesus arire tja pura imba ovahongewa omurongo na vevari a tja: “Neṋe, indu kamu nokuvanga okuyaruka wina are?”

68 # Mt 16:16; Mk 8:29; Lk 9:20 Simon Petrus we mu zirire a tja: “Muhona, matu yaruka ku aṋi? Ove u nomambo womuinyo waaruhe. 69Nu nambano eṱe twa kambura nu matu tjiwa kutja oove ngu u ri Omuyapuke ngu wa hindwa i Ndjambi.”

70Jesus a ziri a tja: “Ami hi mu toororere omurongo na vevari are? Nungwari umwe mokati keṋu eye oSatan!” 71Eye aa hee Judas, omuzandu wa Simon Iskariot. Orondu Judas, nangarire kutja eye wa ri umwe wa imba ovahongewa omurongo na vevari, ongwa kahorora Jesus movineya.

Currently Selected:

Johanes 6: HRR-UNI

Highlight

Copy