Lukas 14
14
Jesus ma verukisa omuvere
1Nu mesabata Jesus wa karere pehi potjiriro mondjuwo yomunane umwe Omufarisei, tjandje nao ovandu mave mu tjungire. 2Nomundu umwe worive ngwa surire omutwi we ere ku Jesus, 3nu Jesus wa purire ozonongo zomambo nOvafarisei na tja: “Okuverukisa mesabata kwa yandjerwa?”
4Nungwari owo va mwinine uriri. Jesus arire tja kambura ingwi omundu, e mu verukisa, tjazumba e mu esa kutja a yende. 5#Mt 12:11Eye wa tjere ku wo: “Owaṋi mokati keṋu ngu nomuatje omuzandu poo ongombe, nu tji ya wire mondjombo ngu hi nakukeinana tjimanga nangarire kutja omesabata?”
6Nungwari owo kave sorere okumuzira otjiṋa hi.
Omerisusuparisiro nomasekirisiro
7Jesus wa muna kutja ovaṋangwa tjiva mave ritoororere ovihavero imbi vyovatengwandu, notje ve serekarerera omasanekero nga: 8#Omia 25:6, 7“Tji wa ṋangwa komukandi worukupo, o kahaama kovihavero imbi vyovatengwandu. Ngahino umwe omunanḓengu pove wina wa ṋangwa, 9nu ingwi ngwe mu ṋanga amuyevari eya, nu a tja kove: ‘Yandja oruveze ndwi komukweṋu ngwi.’ Nu otji mo yaruka koruveze rwokombundambunda awa ṱohoṋi. 10Nungwari tji wa ṋangwa kahaame poruveze rwokombundambunda kokutja omukuṋange tje ya kove a tja: ‘Mukwetu, indjo mba kovihavero imbi vyovatengwandu.’ Ihi matji tjiti kutja ove u pewe ondengero i avehe mbu mwa haama pamwe. 11#Mt 23:12; Lk 18:14Orondu auhe ngu me ritongamisa ma susuparisiwa, nu ngu me risusuparisa ma tongamisiwa.”
12Jesus wa tjere ku ingwi ngwe mu ṋanga: “Tji wa ṱunu eriro romutenya poo rongurova, oṋanga omapanga woye poo ovangu nomarumbi novaṱena voye poo ovararanganda ovatumbe, mena rokutja owo tjiva kara nomariro ngahino mave ku ṋanga. Nu momuano mbo ove otji mo munu ondjambi mena raimbi mbi wa tjiti ku wo. 13Nungwari tji wa kara nomukandi, isana ovasyona noviṱeṱu novaremane novapoṱu, 14nu ove mo serwa ondaya, orondu owo kave nokusora okukupa ondjambi mena raimbi mbi wa tjiti ku wo. Ndjambi omuini ongu me ku pe ondjambi meyuva ndi ovasemba ndi mave penduka movakoke.”
Omasanekero womukandi omunene
(Mt 22:1-10)
15Umwe wa imba mba haamene potjiriro tja zuva otjiṋa hi, wa tjere ku Jesus: “Ovaṋingandu imba mbu mave kakara pehi potjiriro mouhona wa Ndjambi!”
16Jesus wa tjere ku ye: “Pa ri omundu ngwa tjitire omukandi omunene, nu a isana ovandu ovengi. 17Oruveze rwomukandi tji rwa yenena, arire tja hindi omukarere we kovaṋangwa ve na tja: ‘Indjeye, oviṋa avihe vya ṱunwa nu vya manuka!’ 18Nungwari owo avehe va uta okurihepura no nokuriyarikaṋa. Omutenga wa tja komukarere: ‘Ami mba randa ehi romakunino, mbi sokukeritara; me riyarikaṋa kove, zuvira omaningira wandje.’ 19Outjavari wa tja: ‘Ami mba randa omapanda yetano wozongombe, nu me kezerora; me riyarikaṋa kove, zuvira omaningira wandje.’ 20Outjatatu wa tja nai: ‘Ami mba kupu nambano nai, punao hi nokuyenena okukara po.’
21“Omukarere wa yaruka na kaserekarera omuhona we oviṋa mbi avihe. Omuhona wa pindika, narire tja tja komukarere we: ‘Hakahana, twende komivanda na kozondjira zotjirongo u kaete ovasyona noviṱeṱu novapoṱu novaremane!’ 22Kombunda yokaruveze okaṱiṱi omukarere wa tja: ‘Muhona, pa tjitwa otja tjinga awa hee, nungwari ingee pe noruveze ndwa hupu.’ 23Omuhona arire tja tja komukarere: ‘Twende kozondjira na kotuhito u kakondjise avehe ve ye okuhita mwi, kokutja ondjuwo yandje i ure. 24Tjiri, me mu raere, kape na umwe wa imba mba isanewa ngu ma roro omariro wandje wongurova!’ ”
Okurira omuhongewa maku hee tjike?
(Mt 10:37-38)
25Ovimbumba ovingi vyovandu ngunda amavi ka wondja puna Jesus, eye wa tanaukira ku vyo na tja: 26#Mt 10:37“Auhe ngu meya ku ami kamaa sora okurira omuhongewa wandje posi yaindu tja suvere ami tjinene pu ihe na ina, nomukazendu we, novanatje ve, novangu nomarumbi novaṱena kwe, nangarire pokurisuvera eye omuini. 27#Mt 10:38; 16:24; Mk 8:34; Lk 9:23Ingwi ngu hi nokutoora otjikoroise tje ne ndji kongorere, kamaa sora okurira omuhongewa wandje.
28“Owaṋi mokati keṋu tja vanga okutunga otjiretundu, rutenga ngu hi nokukara pehi okusasaneka kutja omatungiro maye ningire tjike, a mune kutja ovimariva vingapi mbi ma hepa okuyenenisa omatungiro ngo? 29Nu tje ha tjitire nao, eye kamaa yenene okumana ihi otjiretundu tja zu nokuzika inga omazikameno, nu imba avehe mbu mave mu munu mave yaruka okumuyora, 30nu ave tja: ‘Tareye, omundu ngwi wa uta okutunga, nu eye wa urwa i okumana!’
31“Nu ombara iṋe tji mai karwisa ombara ongwao, rutenga ndji hi nakuripura kutja novarumendu omayovi omurongo mbu i na yo, mai sora okukapirukira indji ongwao, ndji novarumendu omayovi omirongo vivari? 32Tji i hi nokusora, indji ombara ongwao ngunda ai ri kokure, oyo mai ṱo kuningira ovahindwa kutja ve kazuvasane pe kare ohange. 33Punao, auhe ngamwa ngu hi na okuyenena okuisa oviṋa vye avihe mbye na vyo, eye kamaa sora okurira omuhongewa wandje.
Omongwa omureze
(Mt 5:13; Mk 9:50)
34“Omongwa owo otjiṋa otjiwa. Nungwari owo tji wa mana omutjato mau tjatisiwa na tjike? 35Owo kau tji nombatero, kutja wa tuwa mehi poo kutja wa tuwa mombumbi; owokuimbirahiwa uriri. Ngu nomatwi okuzuva nga zuve!”
Currently Selected:
Lukas 14: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
