Lukas 18
18
Omasanekero womukazendu omuhepundu nomupangure
1Jesus wa serekarerera ovahongewa ve omasanekero wokuvehonga kutja mave sokukumba aruhe nokuhaurwa. 2Eye wa tjere nai: “Mwa ri omupangure motjirongo tjorive ngu ha ri nondira ku Ndjambi, nu ngu ha ri nondengero nomundu. 3Nu motjirongo tjingetjo ho mwa ri omukazendu omuhepundu nguye ya komupangure ngwi aruhe okuyekumuningira nai: ‘Ndji yama komunavita na ami!’ 4Nomupangure wa panḓa oruveze orure, nungwari eye kombunda we rihungirira mu ye omuini a tja: ‘Andarire kutja hi nondira ku Ndjambi, nu hi nondengero nomundu, 5omuhepundu ngwi tjinga ama kara pokundjikurungisa, ami me mu pe ousemba we, tjapo kombunda ngee ndji urisa nokuningira kwe!’ ”
6Nu Muhona wa hungira komurungu a tja: “Purateneye komambo womupangure omuhasemba nga hungire ngo. 7Mamu tjangovasi Ndjambi ke nakutjitira ovatoororwa ve ousemba mbu mave isana ena re omutenya nouṱuku are? Ma wombo okuveyama are? 8Me mu raere, eye meve tjitire ousemba tjimanga. Nungwari Omuna wOmundu tji meya, hapo ma vaza ko ongamburiro kombanda yehi?”
Omasanekero wOmufarisei nomusutise wotjisuta tjouhona
9Jesus wina wa serekarera omasanekero nga ku imba mbaa ve rivara oveni kutja ovasemba nave nyengura ovakwao: 10“Pa ri ovarumendu vevari, mba ire kondjuwo ya Muhona okukakumba. Umwe wa ri Omufarisei, nomukwao wa ri omusutise wotjisuta tjouhona.
11“Omufarisei wa kuramene peke, nu a kumbu nai momutima we: ‘Ndjambi, me tja okunene uri okuhepa kove kutja hi ri otja ovandu varwe, okutja omarunga novahasemba novakatuke wotukupo, nokutja wina hi ri otja omusutise wotjisuta tjouhona ngwi. 12Ami mbi ritjaera kovikurya tuvari motjivike, nu mbi yandja otjitjamurongo kove tjoviṋa avihe mbi mbi muna.’
13“Nu ingwi omusutise wotjisuta tjouhona wa kuramene kokure, nu ka vangere nangarire ingwi okuyera omeho we keyuru, nungwari we ripambara motjari na tja: ‘Arikana, Ndjambi, tjariparera ami omunauvi!’ ”
14 #
Mt 23:12; Lk 14:11 Jesus wa tja: “Me mu raere, omusutise wotjisuta tjouhona ongwa yaruka koye e ri omusemba komurungu wa Ndjambi pOmufarisei, orondu auhe ngu me ritongamisa omuini ma susuparisiwa; nu ngu me risusuparisa omuini ma tongamisiwa.”
Jesus ma sere ounatje ondaya
(Mt 19:13-15; Mk 10:13-16)
15Ovandu tjiva va etere ounatje wawo ku Jesus kokutja eye a ṱune ku wo. Novahongewa tji va muna otjiṋa hi, arire tji ve ve tjevere tjinene nomasa. 16Nungwari Jesus wa isanena imbwi ounatje ku ye, a tja: “U eseye ounatje u ye ku ami, nu amu u tjaere, orondu ouhona wa Ndjambi owo owaimba mbe ri nao. 17Tjiri, me mu raere, auhe ngu hi nokuyakura ouhona wa Ndjambi otja okanatje, kamaa hiti mu wo.”
Omundu omutumbe
(Mt 19:16-30; Mk 10:17-31)
18Omunane umwe Omujuda wa purire Jesus a tja: “Muhonge omuwa, hi tjite vi kutja mbi mune omuinyo waaruhe?”
19Jesus we mu zirire a tja: “Okutjavi tji mo ndji tja owami omuwa? Kape nomundu omuwa posi na Ndjambi erike. 20#Eks 20:14; Deu 5:18 Eks 20:13; Deu 5:17 Eks 20:15; Deu 5:19 Eks 20:16; Deu 5:20 Eks 20:12; Deu 5:16Omatwako nga ove mo ye tjiwa: ‘Ko nakukatuka ko orukupo; ko nakuzepa ko; ko nakuhungirira ko omukweṋu omahongononeno wovizeze; yozika iho na nyoko.’ ”
21Nu ingwi omundu wa zira a tja: “Omatwako aehe nga ami mbe ye ṱakamisa okuza koumutanda wandje.”
22Jesus tja zuva omambo nga, arire tja tja nai ku ye: “Otjiṋa tji wa hepa nambano okutjita itjimwe uriri. Karandise avihe mbi u na vyo, nu imbi ovimariva u kayandje kovasyona, nove otji mo kara notjihuze meyuru; tjazumba kotoka u ye okundjikongorera.” 23Nungwari omundu ngwi tja zuva omambo nga, arire tja ṱoruhoze tjinene, orondu tjinga a ri omutumbe tjinene.
24Jesus we mu munine kutja wa ṱoruhoze, narire tja tja: “Tjiri, ma rire ouzeu tjinene kovatumbe okuhita mouhona wa Ndjambi. 25Oupupu ongamero okupitira mondovi yonane pomutumbe okuhita mouhona wa Ndjambi.”
26Ovandu mba zuva Jesus, ve mu pura ave tja: “Nambano ngu ma sora okuhupisiwa komuinyo, owaṋi?”
27Jesus wa zirire nai: “Otjiṋa hi tji matji uru ovandu, kamaatji uru Ndjambi.”
28Petrus arire tja tja: “Tara, eṱe twa isa ozonganda zetu atu ku kongorere.”
29Jesus wa tja ku wo: “Tjiri, me mu raere, auhe ngu ma isa onganda ye poo omukazendu we poo omarumbi novangu ve poo ovanene ve poo ovanatje ve motjimbe tjouhona wa Ndjambi, 30eye ma mwine po ovingi tjinene nambano mouye mbwi, nu mouye wokombunda eye ma kamuna omuinyo waaruhe.”
Jesus ma hungire onḓiro ye porutjatatu
(Mt 20:17-19; Mk 10:32-34)
31Norukwao Jesus wa isanena imba ovahongewa omurongo na vevari peke, na tja ku wo: “Purateneye! Matu i kOjerusalem ingo oku maku kayenenisirwa oviṋa avihe ovaprofete mbi va tjangera Omuna wOmundu. 32Eye ma yandjewa ku imba mbe he ri Ovajuda, nowo mave mu nyekerere, ave mu yamburura nave mu tjekere omate. 33Mave mu tono nu mave mu zepa, nungwari meyuva oritjatatu eye ma penduka.”
34Novahongewa kave zuvire nawa nangarire tjimwe uriri tjoviṋa mbi; omaheero womambo nga ya undikirwe ku wo, nu kaave tjiwa kutja ma hungire tjike ku wo.
Jesus ma verukisa omupoṱu ngwaa ningire ovyotjari
(Mt 20:29-34; Mk 10:46-52)
35Jesus tje ya popezu na Jeriko, pa kuramene omupoṱu meṋe yondjira ngwaa ningire ovyotjari. 36Omupoṱu ngwi tja zuva otjimbumba tjovandu tji matji kapita, arire tja pura a tja: “Otjikeṋa hi?”
37Owo ve mu raera nai: “OJesus wa Nasaret ongu ma kapita mba!”
38Eye wa ravaera a tja: “Jesus, Muna wa David, arikana ndji tjariparera!”
39Ovandu mba ri komurungu, ve mu kandaiza ave tja nga mwine. Nungwari eye wa ravaerera ko neraka enene a tja: “Muna wa David, arikana ndji tjariparera!”
40Jesus otja kurama na rakiza kutja omupoṱu a etwe ku ye. Tja tje ya popezu, Jesus arire tje mu pura a tja: 41“Mo vanga kutja mbi ku tjitire tjike?”
Eye wa zirire a tja: “Muhona, arikana me vanga kutja mbi mune.”
42Jesus arire tja tja ku ye: “Nu muna! Ongamburiro yoye ye ku verukisa.”
43Tjimanga eye wa uta okumuna, nu a kongorere Jesus ama hivirike Ndjambi. Novandu avehe tji va muna otjiṋa hi, arire tji va tanga Ndjambi.
Currently Selected:
Lukas 18: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
