Npfong 6
6
Ba tssa ba̱nyet a̱tiyring
1Ka̱tswa na̱won pfong Yesu ka a̱ shyi i ya ka̱son, ka̱ram ka a̱ seyak, a̱dyying a̱ bu nwa ba̱nyet tssup ba a̱ yet ba̱nyet Yahuda na nyyai i ka̱byen Helenawa ni bu ba̱nyet ba a̱ shyi ka̱ryi Yahudiya ka ni. Ba̱nyet ba a̱ nyyai i ka̱byen Helenawa ka ni a̱ yin dyat di ba rak ba̱nyring mba ba a̱ sang ba̱ntyok ni a̱ wwon i ka krum nkyangya ji ba ka kozan ka̱tuk ni. 2Ba̱pfong Yesu ba a̱ yei sa̱rei ba̱nyet tssup ba ka̱rek ka̱yring a̱ hywa da̱ mba, “Ku myim zi kaai wa'azi ba̱ryat Ka̱za nu wwon i nwa ka krum kyangya ba. 3Rot a̱mi, kyang a zi cat da̱ nyin ni ba̱wumbeyang, yi tssa ba̱nyet a̱tiyring, ba̱nyet ba a̱ shyi bu Tswa Ka̱za ni a̱ bo byyi a̱za̱ncyi bu tsatsak diyrek ni zi ba̱ wwon pfong ani, 4njit meyang zi brak ka̱ssi njit ka tyyi i yya a̱duwa bu pfong wa'azi na.”
5Sa̱rei ba̱nyet tssup ba a̱ san ba̱ryat ba̱pfong ba. A̱ tssa Istifanut, a̱ yin wrak ka̱ryong di rya nu na ba̱t a̱ bo shyi bu Tswa Ka̱za ji, bu Filibut, bu Burukorat, bu Nikano, bu Timan, bu Barminat, bu Nikolat, a̱ntyok Antakiya a̱ yin nwa Yahudanci. 6Mba a̱mi ba yin tun a̱ tyyei a̱ta̱ssi ba̱pfong ka. Ba ba̱ yya a̱duwa a̱ ba̱ saai mbvak a̱ccu.
7Ba̱ryat Ka̱za a̱ si bo ya ka̱son ka̱yat Urushalima, kozan ka̱tuk ba̱nyet tssup ba ba tyei ka̱tswa. Ba̱gado Ka̱za ba̱gingang ba bo wrak ka̱ryong ka̱sham ba̱ryat ka.
Ba pyyem Istifanut
8Istifanut a̱ shyi bu ka̱nu-a̱tan Ka̱za ba̱gingang, cet nka na bu shyi a̱za̱ nu. Na̱ yya a̱cecet nkyang ka̱hat ba̱gingang assi ba̱nyet. 9Ma ba̱nyet a̱ yin shyi ban yei Libaratinawa, ba yin nyyai i ka̱byen Kurane bu Iskandariya bu na̱bvwa na̱yaan i ka̱byen Kilikiya, bu Asiya. Ba yrek Istifanut a̱ sook a̱cecet ba̱ nu. 10Ma ba maai a̱ sseng ba̱ nu ba rot Tswa Ka̱za yin shyi ba̱ nu a̱ ku jyet a̱za̱ncyi ba̱ryat a. 11Ba sswat ba̱yanyet ntsang ba nat a̱ si hywa, “Zi hok na̱ pfwei Musa a̱ bo byai Ka̱za!” 12Ba̱ryat iya a̱ tyyi ndya ba̱nyet i byyan, sa̱rei ba̱nekwo ba nta̱mak bu ba̱malam Truwang ba. Ba tom ba bu pyyem Istifanut a̱ ku kwak a̱ nat i ka̱rek Ka̱tung mba ka. 13A̱ yei ba̱yanyet ba ba a̱ bu wrak shaida dira tazwa nu. Mba ba bu hywa, “Kozan ka̱ram a̱yin a̱ni na̱ pfwei bat Ka̱za njit a bu Truwang ji Musa na̱ yin za ryi ni. 14Zi hok na̱ ryat di Yesu a̱ntyok Nazarat u a̱ ni hwwei bat Ka̱za na a̱ shei sa̱rei Truwang ji Musa na̱ yin za ryi zi tssup ni.” 15Sa̱rei ba̱nyet ba a̱n shyi i Ka̱tung ka ni a̱ sak Istifanut a̱ssi a̱ ryi a̱ssi nu na na brak a̱ tai a̱nyyi a̱pfong Ka̱za.
Currently Selected:
Npfong 6: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
