Npfong 5
5
Hananiya bu Safiratu
1To, a̱yanyet a̱ yin shyi, ba ku yei Hananiya a̱ yei a̱mbyring nu nu Safiratu. Hananiya a̱ ma̱ nat a̱ si ryap kyang ka̱yat nkyang ka ba byyi ni, 2ma a̱ tra krum ji a̱ nyat; a̱mbyring nu a̱ shyi bu bvwo. Hananiya a̱ ba bu kpikpit krum a a̱ bu wrak ba̱pfong Yesu ba. 3Bitut a̱ hywa da̱ nu, “A̱nzan a̱n byyi an wwon Ka̱ta̱nyrang a̱ nwa rya nwan na a nin daai Tswa Ka̱za i tun krum ji a shya i ka̱byen ka a ryap ni nyat? 4Nyyai a ka̱n dyap ka̱byen ka ba ka yet ka̱ nwaan, ka̱ni? Ko a bu nka̱ ryap i, krum ji a san ni i yet nwaan, ka̱ni? To, a̱nzan a̱ na̱ nwa pfwa na an yya a̱huhwa kyang a̱mi? A̱yin a raai ba, Ka̱za a̱mi a raai.” 5Hananiya a̱ bu hok a̱mi a̱ shot a̱ kpa bu kom. Sa̱rei ba̱nyet ba a̱ hok nkhang a ni, ka̱wun a̱ ba̱ pyyem. 6A̱kinkreng nzam a̱ ba a̱ bu gat kom a a̱ sook a̱ wruk i a̱ si nyat.
7Da̱ni di saa a̱tat i a̱mbyring nu nu a̱ ma̱ nyyai a̱ ba, a̱ bvwo di kyang shya a̱ntyok nu nu ba. 8Bitut a̱ bu hywa da̱ nu, “Krum ji yin dyap ka̱byen ka ni zin ji ni sa̱rei o?”
A̱mbyring Hananiya nu a̱ hywa, “Ee, zi yemi sa̱rei.”
9Bitut a̱ hywa, “A̱nzan a̱n byyi nwan bu a̱ntyok nwan nu yin mon ka̱nu gi mak Tswa A̱gwam Ka̱za? Ba̱nyet ba a̱ nyat a̱ntyok nwan nu a̱ yemi a̱ sseng ka̱nu ngyeng; nwan meyang ba ma̱ ni na̱ sook a̱ drok i.” 10Bu ka̱baram a̱mbyring u a̱ nat a̱ si kpa bu kom. Ba̱kinkreng nzam ba a̱ nwa a̱ bu cyang a̱ ryi na̱ ka̱n kwu, ba ku sook a̱ si nyat mbeyang dibyyi a̱ntyok nu ka. 11Sa̱rei ba̱nyet tssup ba bu kpikpit ba̱nyet a i hok nkhang a ni ka̱wun a̱ ba̱ pyyem ba̱t.
Ba yya nkyang ka̱wun bu nkyang ka̱hat ba̱gingang
12Ba̱pfong Yesu ba a̱ yya nkyang ka̱wun bu nkyang ka̱hat ba̱gingang assi ba̱nyet a. Sa̱rei ba̱nyet tssup ba a̱ tung ka̱bvwa ka̱yring ka̱bvwa ka ban yei Gra Solomon ji ni. 13A̱yin nu a̱ wi yet a̱yring mba ni a̱ maai a̱ nwa ka̱yat mba ba, ma a̱ pfong shok mba ba̱t. 14Ma kozan ka̱ram ban brang ba̱nyet ba̱hwai ba̱gingang, ba̱ntyok bu ba̱nyring, ba̱nyet ba a̱ wrak A̱gwam Yesu ndya mba na ni. 15Ka̱sak ka ba̱nyet ba ban dyi nkyang a ba̱pfong Yesu ba ba yya ni, ba wruk bu ba̱nyet hywu a̱ si ba̱ myyi a̱mbeyang a̱zi ryen ka tazwa ba̱ngbrak bu kikyak. Ba cam ka̱ram ka Bitut na̱n swrap ni ko bu ma̱nwwuk nu na ku ba̱ byram ba̱yanyet mba. 16Ba̱nyet ba̱gingang nyyai a nka̱uye na shyi ba̱ nshishrek bu Urushalima ni a̱ cong bu ba̱nyet nhywu mba ba bu ba̱nyet ba a̱ yin byyi a̱ka̱tuk tswa ni, sa̱rei mba ba bu creng.
Ba̱pfong Yesu ba a̱ nwa sswa ka̱bvung
17Rot a̱mi a̱gba̱dang gado Ka̱za nu bu ba̱nyet mpfong nu ba na̱won Sayasa na a̱ shyi ka̱ yemi ni ban yei ba̱nyet Sadusi na ni a̱n kpa swam ba̱gingang ba̱pfong Yesu ba. 18Rot a̱mi ba pyyem ba̱pfong ba a̱ si tyyi ajaru. 19Ma a̱kang ka̱ram a̱ta̱tuk, a̱pfong A̱gwam Ka̱za a̱ ba a̱ bu yrang a̱jaru nu a̱ cong ba̱ mba a̱ si wruk i a̱ hywa da̱ mba, 20“Yi nat si sseng i bat Ka̱za na i tyyei ba̱nyet ba ba̱ryat a̱hwai sucet ani.” 21Ba̱pfong Yesu ba a̱ hok kyang a a̱pfong Ka̱za nu na̱ ba̱ tyyei ni a̱ nat i bat Ka̱za na ka̱ntson ka ka tssak, a̱ si nwa tyyei ba̱ryat Ka̱za ba.
Ka̱ram ka a̱gba̱dang gado Ka̱za nu bu ba̱nyet mpfong nu ba ba mon ni a̱ yei a̱gba̱dang ka̱tung ba̱nyet Yahuda nu, sa̱rei ba̱nekwo Isreila ba ban shyi. Ba tom ajaru nu ba si ba bu ba̱pfong Yesu ba. 22Ba̱dogari ba ba tom ni a̱ ba a̱ bu ba̱ shya a̱jaru nu ba, a̱ brek a̱ si tyyei a̱ hywa, 23“Zi si shya ba hweyak a̱jaru nu, sa̱rei ba̱nyet cam ba ba sseng i na̱nu ngyeng a; njit ba yrang ka̱bvwa ka si ryi a̱yin ba.” 24Ba bu hok a̱mi, a̱gba̱dang ba̱nyet cam ka̱ryi Ka̱za nu bu ba̱cecet ba̱gado Ka̱za ba ba shyi a didam bu kyang a tyyi ba̱pfong Yesu ba ni. 25A̱yanyet a̱ nyyai a̱ bu ba̱ tyyei a̱ hywa, “Ba̱nyet ba yi ku tyyi a jaru ni a̱ yemi i bat Ka̱za a̱ shyi i zzek ba̱nyet ba.” 26Ba̱dogari ba ba̱ a̱gba̱dang mba nu a̱ nat a̱ si drok ba̱ mba ba̱shinshwon rot ba yin tyong ba̱nyet ba ba bu ba̱ mang di kpang.
27Ba nyyai ba̱ mba a bu tyyi ba sseng a̱ta̱ssi Ka̱tung ka. A̱gba̱dang gado Ka̱za nu a̱ ba̱ zzim 28a̱ hywa, “Zi ka̱ ya kam yi ryok zzek i diyrek a̱yin tini ba, nyin ba tyak Urushalima bu zzek nyin na yi cat za tyyi hywak i dikwu a̱yin tini ee?”
29Bitut bu kpikpit ba̱pfong Yesu ba i hywa, “Njit dolet zi hok ka̱wun Ka̱za di zi hok ka̱wun ba̱nyet. 30Ka̱za ba̱tyyi njit ka nka a̱ shyek Yesu i dikwu ti, a̱tuba nu yi teyang tazwa ka̱teyang na̱ kwu ni. 31Nu a̱mi Ka̱za ka nat i Tazwa a̱ si sak mbvuk yak nka, na̱ yet a̱kwak-ka̱son bu wwat sucet a̱ ga brang Isreila ba wwon a̱ka̱tukyya mba nu ba ba̱ kaai a̱ wwon. 32Nkyang ani zi yet shaida na bu Tswa Ka̱za ji Ka̱za ka ka̱n wrak ba̱nyet ba a̱ ka̱ tyong ni.”
33Ba̱nyet Ka̱tung ba a̱ bu hok a̱mi, ndya mba na i byyan ba̱gingang ba cat hywaai ba̱pfong Yesu ba. 34To, a̱yanyet a̱ yin shyi a̱ yet a̱ntyok ba̱nyet Farisa, ba ku yei Gamaliyal. A̱ yin yet malami truwang Ka̱za, ba̱nyet ba̱gingang a̱ bo ku tyong. Na̱ ta̱za a̱ sseng ka̱yat Ka̱tung ka a̱ tyyi ba yen tun ba̱pfong ba ba nat a̱ta̱sa. 35Na̱ hywa di ba̱nyet Ka̱tung ba, “Ba̱ntyok Isreila, yi ta̱rwam bu kyang a yi cat yya ba̱nyet bani mi ni. 36Rot a̱rya na seyak i a̱yanyet a̱ yin shyi ban yei Tudat, a̱ tyyei ka̱sak ka na̱n yet a̱gba̱dang a̱yin ni, hat ba̱nyet ncyi nyaai a̱ ku tssup, ba ku hywat, ba̱nyet ba a̱ ku tssup ni a̱ bvwut ba̱yayring. 37A̱ntyok Galili a̱yaan a̱ bo ba riryim nu ba ku yei Yahuda. A̱ bu hwwut ba̱nyet ba̱gingang ka̱ram twang ba̱nyet ba bvwa kaat a̱ ku tssup; to, nu ma ba ku hywat, ba̱nyet ba a̱ ku tssup ni a̱ rot a̱ hwwei. 38Rot a̱mi n dyi ku myim naani ka̱ram kani zi yya ba̱nyet bani kyang ba. Zi ba̱ ryok ba̱shinshwon. Kyang a ba yya a̱ bo zzek ni ki ku yet nyyi ndwam ku ni kwu di bvak nkpa. 39Ki ku ma̱n yet nyyi Ka̱za a̱mi zi byyi cet i yya kyang ba, ki zi rak zi ni nwa zwang bu Ka̱za.”
Ba̱nyet Ka̱tung ba a̱ shim ba̱ryat nu ba, 40a̱ yei ba̱pfong Yesu ba a̱ tyyi ba ba̱ tsot, a̱ bo ba̱ tyyei di ba bo ryok ryat kyang a̱nta̱mak bu diyrek Yesu ba, a̱ si ba̱ kaai a̱ wwon. 41Ba̱pfong ba a̱ drok ka̱bvwa ka̱tung ka bu ba̱gwai a̱ dyep Ka̱za ka̱sak ka kan dyi ba maai a̱ sswa ka̱bvung rot diyrek Yesu ti ni. 42Kozan ka̱tuk, ka̱yat bat Ka̱za bu na̱sa ba̱nyet ba ya ka̱son bu wa'azi a̱ zzek ba̱nyet a̱ ba̱ tyyei ka̱sak ka Yesu nu a̱ yet Kristi ni.
Currently Selected:
Npfong 5: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
