Npfong 4
4
Ba nat bu Bitut bu Yohana ka̱yat ka̱tung
1Bitut bu Yohana ba ri shyi i ba̱ryat ba bu ba̱nyet ba, ba̱gado Ka̱za ba bu a̱gba̱dang a̱dogari bat Ka̱za nu bu ba̱nyet Sadusi na a̱ nyyai a̱ bu ba̱ kpa. 2Ba yin yya diryen ba̱ mba, rot ba̱pfong Yesu ba̱hwa iya a̱ yin zzek ba̱nyet ba di koyan a̱ ni kwu a̱ ta̱za di ka̱sak ka Yesu na̱n ta̱za ni. 3Ba ba̱ pyyem a̱ si yyik se ka̱ntson tat, rot ka̱ram iya nom a ku ka̱n tyak. 4Ma ba̱nyet ba̱gingang a̱ hok ba̱ryat mba ba a̱ ba̱ san. Ba̱nyet tssup ba a̱ tat cyi kop tsson.
5Ka̱ntson a̱ wo tat, ba̱cecet ba̱nyet Yahuda ba bu ba̱nekwo ba bu ba̱malam Truwang ba a̱ tung Urushalima. 6Ba swrang bu a̱gba̱dang gado Ka̱za nu Hanana, bu Kayafat bu Yohana bu Alezanda bu kpikpit ba̱nyet a yin nyyai ka̱ryi a̱gba̱dang gado Ka̱za ka ni. 7Ba tyyi ba̱pfong iya a̱ sseng a̱ta̱ssi mba, ba ba̱ zzim a̱ hywa, “Yi cong ni n yya a̱mi? Yi shya cet na ke ki i diyrek a̱nyan yin yya?”
8Bitut a̱n hywat bu Tswa Ka̱za ji a̱ hywa da̱ mba, “Nyin ba̱cecet ba̱nyet bu ba̱nekwo: 9ki yi za zzim a̱zi hywak a̱tsatsak kyang a zi yya a̱ntyok ta̱ruk nkap a̱ni mi bu ka̱sak ka na̱n creng ni, 10to, zi cat yi bvwo, ba̱nyet Isreila sa̱rei a̱ bo bvwo, sseng a a̱yin a̱ni na̱ sseng a̱ta̱ssi nyin kinkreng a̱ni ni a̱ kpo shya ka̱yat diyrek bu cet Yesu Kristi a̱ntyok Nazarat, a̱tuba nu yi yin teyang tazwa ka̱teyang ka na̱ kwu ni, ma Ka̱za a̱ bo ku yrek a̱cet. 11Tazwa nu a̱mi ba̱ryat Ka̱za ba ba hywa,
‘Kpang ji nyin ba̱nyet dinok ba yi rak ni
nji a̱mi ba tyyi i ka̱gwut ka.’
12Zi bu byyi ryen yaan na ba nin za san ni ba, seko ba̱ nu ba̱diyin. Rot sa̱rei ka̱sa ka a̱yanyet a̱ bvon shyi zi ni yei diyrek nu n shya sucet ba, seko ba̱ nu.”
13Ba̱nyet Ka̱tung ba a̱ yya ka̱hat bu sang ka̱wun Bitut ka bu Yohana, a̱ bvwo dei ba ka̱n nat myyam ka̱rek ba a̱ si bo yet na̱baan ba̱nyet. Ba bo bvwo ka̱sak ka ba ka̱n cong bu Yesu ni. 14Ma ba byyi kyang hywa ba, rot ba ryi a̱yin nu ba creng ni a̱ yemi a̱ sseng bu Bitut bu Yohana. 15Ba ba̱ tyyei ba yen wruk ka̱bvwa Ka̱tung ka ba yen shwwang ba̱ mba. 16Ba nwa ryat ba̱ mba a̱ hywa, “Zi ni yya ni bu ba̱nyet bani? Koyan kyi Urushalima a̱ bvwo a̱gba̱dang kyang ka̱hat nu ba yya ni di ku byyi ka̱bvwa ka zi nin ton ni ba. 17Ma ki zi cat nkhang a ni na bu nat gbang ba, zi ba̱ yei i ba̱ kam ba bo ryok krang ba̱ a̱yin a̱ tyyi ryang Yesu ba.”
18Ba ba̱ yei a̱ ba̱ tyyei di ba bo ryok ryat ko ba zzek ba̱nyet i diyrek Yesu ba. 19Ma Bitut bu Yohana a̱ ba̱ shim mi a̱ hywa, “Zi cat yi cyang ansham. Ka̱za a̱ cat zi ya hok o, ki zi ka̱ hok? 20Rot njit zi ni maai i tyyi nyong bu nkyang a zi ryi i bu hok ni ba.” 21Ba̱nyet Ka̱tung ba a̱ bo ba̱ kam ansham a̱ ba̱ tun ba nat. Rot ba shya kyang a ba nin ba̱ tsot ko ba ba̱ rop ni ba, rot sa̱rei ba̱nyet ba a̱ yin shyi i dyep Ka̱za tazwa nkyang ka ba ryi ni. 22A̱yin nu creng nu na ku yin yet kyang ka̱hat ni a̱ yin da̱u a̱rya nswak naai.
Ba̱nyet tssup ba a̱ naai Ka̱za a̱ ba̱ ryi cet rya
23Ba bu ba̱ kaai a̱ wwon, Bitut bu Yohana a̱ brek a̱ nat di kpikpit ba̱pfong Yesu na a̱ si ba̱ kok kyang a ba̱cecet ba̱gado Ka̱za ba bu ba̱nekwo ba ba si ba̱ tyyei ni. 24Ba bu hok a̱mi sa̱rei mba ba nwa naai Ka̱za a̱ hywa, “A̱tyyi njit u, A̱yya tazwa bu ka̱byen ba̱ a̱yuywu ba̱shekwot bu sa̱rei nkyang a shyi ka̱yat nna ni, nwan na̱ yya! 25Ka̱ram ka Tswa Ka̱za ji zi yin nwa a̱kwwa nwan nu Dawuda a̱tyyi a̱kwop njit u ni, a ku tyyei na̱ hywa,
‘A̱nzan a̱ ba nwap a wi yet ba̱nyet Yahuda ni ban fwi,
ba̱nyet ba kwom a nkyang a ni ba̱ brang ni ba?
26Sa̱rei ba̱gwam ka̱sa ba a̱ ya zzop,
ba̱nyet a̱tityok ba a̱ ya tung ka̱bvwa ka̱yring,
a̱ yya dira̱ndwan bu A̱gwam njit u bu Kristi nu nu.’
27Rot ku yin yet ka̱ryong Hirudut bu Buntut Bilatut a̱ yin mon bu ba̱nyet ba a̱ wi yet ba̱nyet Yahuda ni a̱nta̱mak ba̱nyet Isreila ba ka̱nkrang kani a̱ yya dira̱ndwan bu Yesu, a̱kwwa nwan nu a tssa na̱ yet Kristi ni. 28Ba tung a̱ ni yya kyang a nwan ka̱yat cet nwan bu shim nwan a wu ka̱n dop wwon ni yya ni. 29A̱tyyi njit, cyang shyit a ba za shyit i, za ryi cet rya njit ba̱kwwa nwan ba zi tyyei ba̱ryat nwan ba ba bu ka̱wun kyang ba. 30Neyak bvak nwan na n creng ba̱nyet i bu za ryi nkyang ka̱hat zi yya i diyrek Yesu, a̱kwwa nwan nu.”
31Ba bu tyak a̱duwa nu, ka̱bvwa ka ban swat i a̱ nwa zun. Tswa Ka̱za ji ba̱ nwa sa̱rei mba ba nwa tyyei ba̱ryat Ka̱za ba ba bu ka̱wun kyang ba.
Ba̱nyet tssup ba a̱ swat ndung
32Sa̱rei ba̱nyet tssup ba a̱ tung a̱ tyyi ka̱nu ka̱yring. A̱yin ka̱yat mba a̱ ryi nkyang a na̱ byyi ni na yet nnu diyin ba, ma kozan kyang ba shya ba ntung. 33Ka̱za a̱ ba̱ ryi a̱gba̱dang cet ba tyyei ka̱sak ka A̱gwam Yesu na̱n kwu a̱ bo ta̱za ni, Ka̱za a̱ ba̱ tyyi a̱gba̱dang ka̱nu-a̱tan. 34Sa̱rei mba i shyi mba na a̱yin a̱ yya dizot kyang ba. Ba̱nyet ba a̱ byyi na̱byen ko na̱sa ni a̱ zzap, a̱ ba bu krum ji 35a̱ bu wrak ba̱pfong Yesu ba krum ji, ba ka ka̱sak ka koyan na̱ nin shya ba̱cicrak bu cat nu na ni.
36A̱yanyet a̱n shyi ba yin ku yei Yusufu, a̱ yin nyyai an sot Lawi a̱ yet a̱ntyok Kubrut, ba̱pfong ba a̱ ku yei Barnabat (nkpa yet “A̱ntyok Ta̱gbak Ba̱nyet”), 37a̱ ryap ka̱byen nu ka̱yring a̱ ba di krum ji a̱ bu wrak ba̱pfong ba.
Currently Selected:
Npfong 4: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
