Npfong 3
3
Bitut ba̱ A̱ntyok ta̱ruk nkap
1Ka̱tuk ka̱yaan Bitut bu Yohana ba naat bat Ka̱za yya a̱duwa, tswam tsat a̱ta̱nom, ka̱ram yya a̱duwa ka. 2Ba si tat ka̱bvwa ka̱yaan ba yei “Ka̱sham Ka̱nu ngyeng,” a̱ shya a̱ntyok ta̱ruk nkap. Nyyai i ku byin a̱ cong ba. Kozan ka̱tuk ba ku sook a̱ bu sak ka̱bvwa iya na̱ naai krum di ba̱nyet ba a̱ nwai i bat Ka̱za na ni. 3Na̱ bu ryi Bitut bu Yohana ba swrap a̱ ni nwa i bat Ka̱za na na̱ ba̱ naai ba ku nang kyang. 4Ba ku sak a̱ssi, Bitut a̱ hywa da̱ nu, “Za cyang ansham!” 5Na̱ ma̱n sook a̱ssi na a̱ ba̱ sak i a̱ hwa di ba ni ku ryi kyang. 6Bitut a̱ hywa da̱ nu, “Nzuk n byyi krum ba, ma kyang a n byyi ni nkpa n ni na̱ ryi. I diyrek Yesu Kristi A̱ntyok Nazarat, n hywa ta̱za i cong!” 7Wwon a̱ neyak bvak nu na a̱n pyyem bvak yak nu na a̱ ku yrek. Bu i ka̱baram sa̱rei a̱tak nu na a̱ neyak a̱ tyyi cet; 8na̱ rop a̱ hruk a̱ nwa ka̱cyet. A̱ ba̱ tssup a̱ nat ka̱yat bat Ka̱za ka, a̱ cong a̱ hwwut a̱ dyep Ka̱za. 9Sa̱rei ba̱nyet ba a̱ ku ryi na̱ cong a̱ dyep Ka̱za. 10Ba bu ryi a̱ bvwong da̱ nu a̱ na swat “Ka̱sham Ka̱nu ngyeng ka”, ka̱hat bu ka̱wun i ba̱ pyyem bu kyang a ku shya ni.
Wa'azi Bitut ka̱yat bat Ka̱za
11Na̱ breng Bitut bu Yohana ba̱nyet ba a̱ gbit a̱ nat da̱ mba ka̱rek ka ban yei Gra Solomon ji ni; ka̱wun a̱ ba̱ pyyem bu ka̱hat. 12Bitut na̱ bu ryi a̱mi a̱ nwa ba̱ryat bu ba̱nyet ba a̱ hywa, “Ba̱nyet Isreila! A̱nzan a̱n byyi yin yya ka̱hat ka̱sak ka nkyang ani nan ba ni? A̱nzan yi bvun za cyang a̱mi anye zi yya di cet a̱ccu njit, ko di ditsatsak njit a̱mi na̱ shya cong a? 13Ka̱za ba̱nyet Ibrahim bu Ishaku bu Yakubu, bu kpikpit ba̱tyyi a̱kwop njit a̱mi a̱ sak a̱kwwa nu Yesu i dityok ti, a̱tuba nu yi pyyem wrak ba hywat i, i ku rak a̱ta̱ssi Bilatut ni, ka̱ram ka na̱n dop a̱ ni ku kaai a̱ wwon ni. 14A̱zizrak a̱yin di na̱ byyi hywak ba, nu a̱mi yi rak, i wi naai ba ya wwon a̱tuba nu a̱ wa hywat a̱yin ni. 15Yi hywat dityin sso nyin ti, ma Ka̱za a̱ ku shyek, njit zi ryi a̱ssi ba̱ssi. 16Ka̱yat cet diyrek nu a̱mi a̱tuba a̱ni na̱n shya cong a assi nyin. Kyang a yi ryi i bu bvwo ba yya ni yet wrak ka̱ryong a da̱ wrak di Yesu ni. Nkpa n byyi na̱n creng sa̱rei assi nyin.
17“To, ba̱wumbeyang, n bvwo da̱ nyin di ba̱cecet nyin ba yi yya di bvwo nyin ba. 18Ma ku cong di Ka̱za kan dyat bu ba̱nyet tyyei ba̱ryat nka bani a̱ bo kpo yya ni. Rot nyyai gba̱gbang Ka̱za a̱ yin dyat ka̱sak ka Kristi nka nu na̱n bai a̱ bu sswa ka̱bvung ka ni. Ku ma̱n cong bu ryi ba̱rimi. 19Kyang yya na naa yi wwon a̱ka̱tukyya nyin nu brek ba di Ka̱za, ka ga ya ryang a̱ka̱tukyya nyin nu, yi gi shya cet a A̱gwam Ka̱za na̱ wwat i 20na̱ ga tom Yesu, Kristi nu na̱ ka̱n tssa a̱ ya wwon mi ni. 21Dolet na̱ yen swrang Tazwa se ka̱ram ka kozan kyang kun brak tyyi hwai ni, da̱ni di Ka̱za ka yin dyat bu ba̱nyet tyyei ba̱ryat nka ba nyyai gba̱gbang ni. 22Musa a̱ yin hywa, ‘A̱gwam Ka̱za nyin nu a̱ ni ya tom da̱ a̱ntyok tyyei ba̱ryat nka ka̱sak ka na̱ ka̱ ni n tom ni. A̱ ni wruk bu ka̱yat nyin. Kozan kyang na̱ hywa yi ni kpo hok! 23A̱yin nu a̱ rak hok ba̱ryat nu ba ni, ba ni ku gang a̱ tun a̱ wwon ba̱nyet Ka̱za ba, na̱ hwan.’ 24Wwon Samuila bu sa̱rei ba̱nyet tyyei ba̱ryat Ka̱za ba̱yaan ba a̱ ba riryim nu ka ni, koyan a̱ yin tyyei ba̱ryat Ka̱za ba ni, a̱ ma̱n dyat ba̱ryat nom ba ni. 25Nkyang a Ka̱za ka yin dop a̱wwon bu ba̱nyet tyyei ba̱ryat nka ba ni yet nyiin. Nyin a̱mi byyi nkyang a Ka̱za ka yin dop a̱wwon bu ba̱tyyi nyin ba ni. Da̱ni di na̱ yin hywa di Ibrahim, ‘A̱zi na̱mbvon nwan a̱mi n ni nang kpikpit ba̱nyet ka̱sa na ka̱nu-a̱tan.’ 26Nkpa n byyi Ka̱za ka yen tun a̱kwwa nka nu na̱ yen yet ka̱son a̱ ba da̱ nyin, a̱ ga bu ya tun a̱ka̱tuk ryen nyin nu; a̱ ya krok nda.”
Currently Selected:
Npfong 3: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
