Npfong 2
2
Tswa Ka̱za ji ba nom Pentikot
1Nom Pentikot a ku bu krang ba, sa̱rei ba̱nyet tssup ba a̱ ba bu tung ka̱rek ka̱yring, 2ba swat-swat a̱ hok kyang ku ra nyyai tazwa, ku zzang di wun na hyok di cet i, i nyyai bu nwa hywat bat a ban tung ni. 3Ba ryi kyang ku tai a̱riryem ndong a a̱ trak i, a̱ bu ya tra a̱ kup koyan ka̱yat ba̱nyet ka a̱ yin shyi i swat a ni. 4Tswa Ka̱za i ba̱ nwa ba̱sa̱rei mba, ba nwa ba̱ryat da̱ a̱kang a̱riryem, koyan ba̱cicrak bu kyang a Tswa Ka̱za ji zi ku nang ni.
5To, ka̱ram iya ba̱nyet Yahuda ba tung Urushalima ba̱gingang, ba̱nyet ba a̱ yin tssup Ka̱za ni. Ba nyyai kozan ka̱byen i ka̱sa ka. 6Ka̱ram ka ban hok ra na ni, ba̱nyet a̱ tung ba̱gingang. Ba ma ngat bu na̱nu rot koyan a̱ yin hok ba̱nyet tssup ba ba ryat a nwap nu. 7Ba yya ka̱hat a̱ ya zzim, “Anye sa̱rei ba̱nyet ryat bani a̱ yet ba̱nyet Galili ee? 8To, ba yya ni sa̱rei njit zin hok ba̱ryat an nwap njit a? 9Zi nyyai Bartiya bu Media, bu Ilam, bu Bagadaza bu Yahudiya, bu Kafadokiya bu Fantat, bu Asiya 10bu Firijiya, bu Bamfiliya, bu Masar, bu ba̱nyet ba a̱ swat a̱ hywot Kurane i ka̱byen Turabut; hat ma bu ba̱nyet nyyai Rom, 11wato, ba̱nyet ba a̱ yet ba̱nyet Yahuda ni bu ba̱nyet ba a̱ ya brak a̱n yya ba̱nyet Yahuda ni. Ba̱yanyet a̱ bo yet Karitawa bu Larabawa, sa̱rei zi pfong ba ryat a̱riryem njit a a̱cecet nkyang u Ka̱za ka yya ni.” 12Ba pyyem na̱nu mba a̱ tyyi ba̱tai, a̱ ya zzim a̱ yya, “A̱nzan a̱ bo ryi a̱mi?”
13Ba̱yanyet a̱ nwa ba̱ zzang a̱ yya, “Ba sswa nkwwa a̱ swei.”
Ba̱ryat Bitut ka̱tuk ba Tswa Ka̱za nom Pentikot
14Bitut a̱ ta̱za a̱ sseng bu kpikpit ba̱pfong swak bu a̱tuba a̱yring a̱ nwa ba̱ryat a̱ yrek diwan a̱ hywa, “Nyin ba̱wumbeyang nzuk ba̱nyet Yahuda bu sa̱rei ba̱nyet ba a̱ swat Urushalima ni, yi tung kap, i yrang a̱pfo nyin na ansham i hok ba̱ryat nzuk ba. 15Ba̱nyet ba ni a̱ swei nkwwa di hywa nyin na ni ba. Nom a si shyi tswam a̱kumbvuyring. 16Kyang a a̱ntyok tyyei ba̱ryat Ka̱za nu ba yin yei Yoila u ni na̱ yin dyat i ku na ni. A̱ yin hywa,
17‘Ka̱za a̱ hywa, I zamani cong bai a
n ni tyyi Tswa nzuk ji sa̱rei i ba̱nyet ba a̱ shyi i ka̱sa ka ni.
Na̱won nyin a̱ ni tyyei kyang a Ka̱za ka ri naat yya i ka̱sa ka ni;
zam nyin ji i cyang nkyang a Ka̱za ka ba̱ tyyei ni,
Ba̱nyet ba a̱ ka̱n tat a̱ssi ni a̱ zzak ba̱zzak.
18Ba̱nyet ba a̱ yet ba̱kwwa nzuk ni ma, di ba̱ntyok di ba̱nyring,
i nom iya n ni ba̱ tyyi Tswa nzuk ji,
mba meyang ba ma̱ ni tyyei nkyang a Ka̱za ka ri naat yya ni.
19N ni yya nkyang ka̱wun ntazwa
bu nkyang ka̱hat i ka̱sa ka.
Yi ni ryi ba̱sok bu rong bu a̱ka̱tuk ncing.
20Ka̱nu nom a̱ ni rop ryin,
hywan i shong di ba̱sok i,
a̱gba̱dang nom dityok A̱gwam njit u a̱ si krang a̱ ba.
21Ka̱ram iya a̱yin nu a̱ yei diyrek A̱gwam njit ti ni a̱ ni kaat.’
22“Yi hok ba̱ryat ba ni ansham, nyin ba̱nyet Isreila! Yesu a̱ntyok Nazarat, yi yin dyi kyang a ba da̱ nu ni, a̱cecet nkyang ka̱hat nu na̱ yin yya ni. Ka̱za a̱mi a̱ yin byyi nkyang iya na̱ yin yya ni. Nyin yi bvwo nkyang ani sa̱rei rot ba yin na̱ yya assi nyin. 23Ka̱za, i bvwo nka na bu cat nka na, a̱ ka̱n sak ba ni pyyem Yesu a̱ ya ryi yi hywat, ba̱nyet a̱kpot a̱ ni ku kpang di nkusa tazwa ka̱teyang. 24Ma Ka̱za a̱ bo ku yrek a̱cet a̱ ku tun i dikwu rot a̱ yin sswa cet dikwu i ku pyyem sak. 25Rot Dawuda a̱ yin hywa,
‘N dyi A̱gwam nzuk u a̱ta̱ssi nzuk kozan ka̱ram.
A̱ swat an bvuk yak nzuk, rot a̱mi n pfong ka̱wun nkyang ba.
26Nkpa n byyi rya nzuk a kun sai,
ba̱ryat nzuk ba a̱ byyi shok.
N ba n nin hwan i ka̱sa ka ba,
ma n byyi ka̱bvwa ka n ni n breng rya ni,
27rot n bvwo a ni n kaai wwon a̱yabyen ba,
da̱ nwan ba ni wwon a̱kwwa nwan nu a̱ sak rya nu a̱za̱ nwan ni nkyang ka̱byen ku ya ba.
28A ka̱n n tyyei ryen na cong ka̱bvwa sucet i,
shyi nwan na ba̱ nzuk ni n tyei i shok kozan ka̱ram.’
29“Ba̱wumbeyang, n ni ya nyyak kyang tazwa a̱tyyi a̱kwop njit ka Dawuda ba. A̱ yin kwu ba ku nyat. Dibyyi nu ti shyi ba̱ njit bu tat nom ka̱pfun. 30A̱ yin yet a̱ntyok tyyei ba̱ryat Ka̱za a̱ bo bvwo kyang a Ka̱za ka rop a̱ ku sak i ni. Ka̱za a̱ yin ku shyi mi a̱ hywa di ka tun ka̱mbvon nu ka̱yring ka sook dityok nu ti. 31Dawuda a̱ yin dyi kyang a Ka̱za ka ni yya ni; rot a̱mi na̱ ryat tazwa ta̱za Kristi ka nyyai i dibyyi ti, a̱ hywa,
‘Ba ku wwon a̱yabyen ba,
di nkyang ka̱byen na ni ya kom nu na ba.’
32Yesu a̱ yin kwu, Ka̱za a̱ ku shyek, sa̱rei njit zi yet shaida. 33Ba̱nyying ba ku yrek a̱ sak an bvak yak Ka̱za na̱ bo shya za̱nang Tswa Ka̱za nyyai da̱ A̱tyyi. Za̱nang ji Ka̱za ka yin dyat a̱wwon a̱ ni wrak i, nji a̱mi yi cyang bu pfong Yesu na̱ za jyet. 34Dawuda a̱mi a̱ wrak a̱ nat Tazwa ji ba, ma Dawuda nu di ka̱nu nu a̱ hywa,
‘A̱gwam Ka̱za a̱ hywa da̱ A̱gwam nzuk u,
Swrang kyi mbvak yak nzuk
35se n tyyi ba̱ra̱ndwan nwan ba ka̱ntai tak nwan ka.’
36“Rot a̱mi se sa̱rei ka̱ryi Isreila ka a̱ bvwo ba̱zizrak nu Yesu nu yi teyang tazwa ka̱teyang ka ni, Ka̱za a̱ ku tssa a̱ tun na̱ yet A̱gwam bu Kristi.”
37Ba bu hok a̱mi, ka̱wun a̱ ba̱ pyyem ba zzim Bitut bu kpikpit ba̱pfong Yesu na a̱ hywa, “Ba̱wumbeyang, a̱nzan zi ni yya naani?”
38Bitut a̱ hywa, “Koyan a̱ wwon a̱ka̱tuk ryen nu nu a̱ brek, koyan ba ku yya baptisma ka̱yat diyrek Yesu Kristi, ba ga ya tssu a̱ka̱tukyya nyin nu sa̱rei, yi bu shya za̱nang Tswa Ka̱za ji. 39Da ma, nyin a̱mi Ka̱za ka ryat a̱ ya wwon ni, bu na̱won nyin bu ba̱nyet ba a̱ shyi gbang ni, sa̱rei ba̱nyet ba Ka̱za ka yei ni.”
40Bu ba̱ryat ba ni bu nkyang nzaan na na̱ ryat i na̱ ba̱ ghap a̱ hywa, “Yi san a̱ccu nyin, ho yi bu sswa ka̱bvung di a̱ka̱tuk ba̱nyet zamani a̱ni ni.” 41Ka̱tuk iya ba̱nyet ba a̱ san ba̱ryat nu ba ni ba ba̱ yya baptisma, a̱ shya ba̱nyet ba tat cyi kop tsat, a̱nta̱mak bu ba̱nyet ka̱son ba. 42Wwon ba nwa cong di ba̱pfong Yesu ba, ba ba̱ zzek a̱ bo tyyi a̱ccu mba i yya a̱duwa a̱ bo ya tung a̱ tyyi ndung a̱ ya ka̱rek ka̱yring.
Swat ba̱nyet tssup a
43Ka̱wun a̱ pyyem kozan a̱ntyok sucet ba bo yya nkyang ka̱hat ba̱gingang an bvak ba̱pfong Yesu na. 44Sa̱rei ba̱nyet tssup ba ba shyi ka̱rek ka̱yring a̱ breng kozan kyang mba na ndung. 45Ba̱nyet ba a̱ byyi na̱byen ni ko nkyang nzaan a̱ zzap a̱ ya ka krum ji bu ba̱nyet ba a̱ sang ni. 46Kozan ka̱tuk ba tung i bat Ka̱za na; i na̱sa mba na ba ya kyang a ba shya ni bu shok. 47Kozan ka̱tuk ba dyep Ka̱za, ba̱nyet ba a̱ bo pfong shok ba̱nyet tssup ji. Kozan ka̱tuk A̱gwam Ka̱za na̱n ba̱ brang ba̱nyet i ka̱tung mba ka.
Currently Selected:
Npfong 2: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
