Npfong 1
1
1Tiyofalat, i kpa ka̱son nzuk a n yin jem tazwa sa̱rei nkyang a Yesu na̱ yya a̱ bo zzek i, nyyai ka̱ram ka na̱n nwa pfong nu na ni 2bu tat nom a ba ku sook a̱ nat i Tazwa ni. Nyyai ba ka̱n nat ba̱ nu ba, na̱ yei ba̱pfong nu ba na̱ yin tssa ni, a̱ ba̱ zzek ka̱yat cet nTswa Ka̱za. 3Ka̱ram iya na̱ ka̱n ta̱za i dibyyi ti a̱ yya nom nswak naai na̱ tyyei diccu nu da̱ mba i na̱ram ba̱gingang, i ryen na ba nin shim bu rya yring da̱ a̱ yet a̱cet i. Ba ku cyang da̱ a̱ssi mba a̱ bo ryat ba̱ nu na̱ ba̱ tyyei ba̱ryat Dityok Ka̱za ba. 4Ka̱ram ka ban tung ka̱bvwa ka̱yring ni na̱ ba̱ tyyei a̱ hywa, “Yi ryok wruk Urushalima ba, se A̱tyyi a̱ ya tom di za̱nang ji na̱ yin dyat a̱wwon a̱ ni ya ryi ni. 5Yohana a̱ yin yya baptisma di ba̱shekwot, ma ka̱baram a̱ bvat ba̱cincong ba ni ya yya baptisma nyin nu di Tswa Ka̱za.”
Ba nat bu Yesu nTazwa
6Ka̱ram ka ba̱pfong ba ban tung a̱ bu mon bu Yesu ni, a̱ ku zzim a̱ hywa, “A̱gwam, ka̱ram ka ni a̱mi a nin brek di dityok ti wrak Isreila, ka̱ni?”
7Yesu a̱ hywa da̱ mba, “Saai zamani bu na̱ram a shyi an bvak A̱tyyi; ba ku yet nyiin yi bvwo na̱ram a ba. 8Ma nyin, Tswa Ka̱za ni ya nwa yi shya cet, yi ni yet shaida nzuk kyi Urushalima, bu Yahudiya bu Samariya, nta̱mak ka̱sa ka sa̱rei.” 9Na̱ bu hywa a̱mi, ba ku sook a̱ nat i Tazwa ba ku cyang na̱ naat hat a̱ si nwa a̱ brik ka̱yat a̱ninyyan.
10Ba shyi i cyang na̱ naat, ba̱yanyet ba̱ mba ba̱hwa a̱ nyyai a̱ bu sseng ba a̱huhwa mbeyang mba a̱ kup ba̱jijyat ba̱tro, 11a̱ hywa da̱ mba, “Nyin ba̱nyet Galili, a̱nzan a̱ ya ba yin tyet sseng cyang tazwa? Yesu nu yi cyang ba naat ba̱ nu Tazwa ka ni, ka̱sak ka yin dyi ba naat ba̱ nu Tazwa ka ni, a̱mi na̱ bo nin brek.”
Ba tssa ka̱shei Yahuda
12Ba brek nyyai an tsok Zeitun ji a̱ nwa Urushalima nu. Nyyai an tsok ji ba Urushalima nu i yet kilometer a̱yring. 13Ba nat i ka̱nkrang ka a̱ si wrak a̱ nwa bat a ba yin swat i. Shyi mba na naa ni: Bitut, Yohana, Yakubu, Andrawut, Filibut, Toma, Bartalamawat, Matta, Yakubu a̱hwai Alfa, Siman nu ban yei a̱ntyok nswam ba̱nyet nu, bu Yahuda a̱hwai Yakubu. 14Kozan ka̱ram ba tuk a̱ccu mba a̱ yya a̱duwa kozan ka̱ram. Ba̱nyring ba̱yaan a̱ yin shyi ba̱ mba u ba̱nyet Maryamu a̱naa Yesu nu, nta̱mak bu ba̱wumbeyang Yesu ba.
15Nom i bvwa, ba byyi ka̱tung sa̱rei ba̱nyet tssup ka, ba yin yet a̱neywu ncyi bu nswak hwa i ka̱tung ka. Bitut a̱ ta̱za a̱ sseng 16a̱ hywa, “Ba̱wumbeyang. Dolet a̱mi ba̱ryat Ka̱za ba a̱ ba cicrak di kyang a Dawuda na̱ yin hywa tazwa Yahuda ka̱ram ka Tswa Ka̱za ji zin ku nwa ni, nu Yahuda nu a̱mi a̱ kwwat ryen ba̱nyet a bu pyyem Yesu ni. 17Yahuda a̱ yin shyi ka̱yat njit, rot ba yin ku tssa na̱n byyi bvak an pfong a ban za yei ni.”
18(To, krum nzang ji na̱ yin yya a̱ka̱tuk mpfong a̱ywu ni na̱ sook a̱ sin san ka̱byen. Wwon a̱ nat a̱ si kpa a̱ ta̱kyak ka̱hwa ka, na̱na nu na a̱ wruk a̱ weyang. 19Sa̱rei ba̱nyet ba a̱ yin shyi Urushalima ni a̱ hok nkhang ani; rot a̱mi ba yei ka̱bvwa ka na̱ yin san ni i diryem mba ti Akeldama, nkpa yet, “Ka̱byen ba̱sok.”)
20“Rot ba yin jem ka̱yat Zabura a̱ hywa,
‘Ka̱ryi nu ka a̱ ni swat a̱ kwot;
da̱ a̱yin na̱ ni nwa ba.’
Ba bo jem brak,
‘A̱yanyet a̱ ni sook ka̱rek mpfong nu ka.’
21-22“Rot a̱mi a̱yanyet a̱ ni nwa i yet shaida ta̱za Yesu A̱gwam njit u; ma dolet na̱ yet a̱tuba nu a̱ shyi ba̱ njit nyyai ka̱ram ka zi nwa ka̱cyet bu Yesu ni; wato, nyyai ka̱ram ka Yohana na̱ yin yya baptisma nu ni bu tat ka̱ram ka ban sook Yesu a̱ za wwon ni.”
23Ba yei a̱yiyrek ba̱nyet ba̱hwa: Matiyat, bu Yusufu Justut, ba bo ku yei Barsabbat. 24Ba yya a̱duwa a̱ hywa, “A̱gwam njit, nwan bvwo mpfwa ba̱nyet sa̱rei, zi na̱ naai, ka̱yat ba̱nyet kani ba̱mba ba̱hwa za tyyei a̱yin nu a ka̱n tssa ni 25na̱ sook ka̱rek mpfong a̱pfong nwan ka, ka̱rek ka Yahuda na̱ wwon a̱ ga nat ka̱rek ka a̱ yet ka̱ nuu ni.” 26Ba ta gyai a̱yiyrek a̱hwa iya, Matiyat a̱ ya, ba ku ra a̱n tyyi ka̱yat ba̱pfong ka.
Currently Selected:
Npfong 1: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
