Yohana 21
21
Yesu a̱ tyyei diccu nu di na̱won pfong a̱tiyring
1Yesu a̱ bo yya a̱ tyyei diccu nu di na̱won pfong a a̱mbeyang kei ba̱shekwot Tibariya ka. Diwat ti na̱ yin yya ni tintii: 2Siman Bitut, bu Toma nu ba yin yei Ka̱hywaai ka ni, bu Natana'ilu nyyai i ka̱byen Galili, bu ba̱hwai Zabadi nta̱mak bu na̱won pfong Yesu na̱yaan ba̱ mba ba̱hwa, ba shyi ka̱rek ka̱yring. 3Siman Bitut a̱ hywa di kpikpit a, “N naat pyyem hwon.”
Kpikpit a i hywa, “Zi bai ba̱ nwan.” Sa̱rei mba ba nat a̱ si nwa kpongo nu, ma ba tyak ka̱tuk ka ba pyyem kyang ba. 4Nom a ku bu ta̱kyek Yesu a̱ sseng a̱mbeyang ba̱shekwot ka, ma na̱won pfong a a̱ bvwo da̱ nu a̱mi ba. 5Na̱ hywa da̱ mba, “Zam jini, yi ka̱n pyyem kyang baa?”
Ba hywa, “Ko kyang.”
6Na̱ hywa da̱ mba, “Nde yi brak a̱riryek u rot a̱za̱gbang bvuk yak kpongo ka, a ryi yi shya kyang.” Ba brak a̱riryek u a̱ rot, kwwat a i ba̱ kaat rot ba yin pyyem hwon ba̱gingang.
7Ka̱won pfong ka̱yring ka Yesu na̱ cat i a̱ hywa di Bitut, “A̱gwam Yesu a̱mi!” Bitut na̱ bu hok di Yesu a̱mi, na̱ ka̱n kruk ba̱tro nu ba, na̱ ba̱ kok a̱ grang a̱ hruk a̱ kpa i ba̱shekwot ba. 8Kpikpit na̱won pfong a n tssup ka̱yat kpongo ka a̱ kwak a̱riryek u bu hwon ji ba̱gingang, rot ba yin shyi gbang bu gyep a ba, ba yin shyi di yadi ncyi ni. 9Ba bu si tat a̱zi gyep a a̱ shya rong dican, bu hwon tazwa ndong ka, bu burodi. 10Yesu a̱ hywa da̱ mba, “Yi yen bvwa hwon ji yi pyyem ni ba mi kyi.”
11Siman Bitut a̱ nwa a kpongo nu a̱ si kwwat hwon ji ka̱yat ba̱shekwot ka a̱ ba mi a̱ta̱sa. A̱riryek u a̱ nhywat bu a̱cecet hwon. Sa̱rei hwon ji yin yet cyi bu nswak mpfon ba̱ tat. Sa̱rei bu ka̱tswa hwon iya a̱riryek u a̱ seyak ba. 12Yesu a̱ hywa da̱ mba, “Yi ba i ya.” Da̱ a̱yin ka̱yat na̱won pfong ka na̱ gbung rya a̱ zzim, “Nwan a̱nyan?” ba; rot sa̱rei mba a̱ yin bvwo A̱gwam Yesu a̱mi. 13Yesu a̱ nat a̱ si sook burodi na a̱nta̱mak bu hwon ji a̱ ba̱ ka.
14Nkrang a̱mba̱tat yemi Yesu na̱ tyyei diccu nu di na̱won pfong a nyyai ka̱ram ka na̱n ta̱za nyyai yabyen ka ni.
Yesu bu Bitut
15Ba bu tyak ya na, Yesu a̱ hywa di Siman Bitut, “Siman ka̱won Yohana, a n cat ra̱u kpikpit ba̱nyet ani ee?”
Bitut a̱ hywa, “A̱ntyok ka̱ryi, nwan ma a̱ bvwo n na̱ gwai.”
Yesu a̱ hywa da̱ nu, “Da̱ n tsaai na̱won bvon-tsaap a.” 16Yesu a̱ bo hywa da̱ nu nkrang a̱mba̱hwa ji, “Siman ka̱won Yohana, a n cat di ka̱ryong o?”
Bitut a̱ hywa, “A̱ntyok ka̱ryi, nwan ma a bvwo n na̱ gwai.”
Yesu a̱ hywa da̱ nu, “Da̱ n cam bvon-tsaap ji.” 17Yesu a̱ bo ku zzim, “Siman ka̱won Yohana, a n gwai o?”
Rya Bitut a i byyan rot Yesu a̱ bo ku zzim nkrang a̱mba̱yintat u a̱ hywa, “A n gwai o?” Bitut a̱ hywa, “A̱ntyok ka̱ryi, a bvwo kozan kyang. A bvwo n na̱ gwai.”
Yesu a̱ hywa, “Da̱ n tsaai bvon-tsaap ji. 18Ka̱ryong a̱mi n na̱ tyyei: ka̱ram ka a yin yet ka̱seyang ni a ri ya tyet rop i nat ka̱rek ka a cat i, ma ka̱ram ka an kop ni a ni neyak mbvak nwan a̱yanyet a̱ na̱ rop a̱ kwak a̱ nat i ka̱rek ka a cat nat ni ba.” 19(I ba̱ryat bani Yesu a̱ yin tyyei taka̱i dikwu na Bitut na̱ ni kwu a̱n tyyei shii Ka̱za na ni.) Yesu a̱ si brak a̱ hywa di Bitut, “N tssup!”
Yesu bu ka̱won pfong ka̱yaan
20Bitut a̱ brak riryim a̱ ryi ka̱won pfong ka̱yring ka Yesu na̱ yin cat i, a̱tuba nu a̱ yin shek a̱ hywot Yesu ka̱rek kyangya ka a̱ zzim, “Malam, a̱nyan a̱mi a̱ ni na̱ ryap ni?” 21Bitut na̱ bu ku ryi, a̱ brak a̱ zzim Yesu a̱ hywa, “A̱ntyok ka̱ryi! A̱tuba a̱ni hwa?”
22Yesu a̱ hywa, “Ki n cat na̱ swat se ka̱ram ka n nin brek ni, an byyi bvak o? Nwan dei n tssup!”
23Ba̱nyet tssup Yesu ba a̱ nwa ryat a̱ kat di Yesu a̱ hywa da̱ ka̱won pfong a̱ywu a̱ ni kwu ba. Ma Yesu a̱ yin hywa di a̱ ni wi kwu ba. A̱ yin hywa, “Ki n cat na̱ swat se ka̱ram ka n nin brek ni, an byyi bvak o?”
24Ka̱won pfong a̱ywu nu a̱mi a̱ ryat nkyang ani sa̱rei, nu a̱mi a̱ bo na̱ jem. Zi bvwo kyang a na̱ jem ni ku yet ka̱ryong.
A̱ngbom ba̱ryat
25Nkyang nzaan n shyi ba̱gingang nying na Yesu na̱ yya ni. Ba si bu na̱ jem sa̱rei na, ka̱sa ka sa̱rei a̱ si bu maai a̱ sook a̱kpa na ba jem ni ba
Currently Selected:
Yohana 21: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
