Yohana 19

1Bilatut a̱ tyyi ba tsot Yesu da̱ a̱yo. 2Nsoja na i gat rawoni a̱shyim ku kup i diccu, a̱ shya a̱lkeba̱ nu a̱ bvei shong ni a̱ ku kup i. 3A̱ cong a̱ ku byei a̱ yya, “Sso a̱gwam ba̱nyet Yahuda da̱de!” A̱ bo ku tsot.

4Bilatut a̱ bo wruk a̱ shya ba̱nyet ba a̱ yin tung ka̱ yemi ni, “To, n ni wruk ba̱ nu n ba mi da̱ nyin, yi gi bvwo n ku shya bu kyang a n nin ku yya shirya ni ba.” 5Yesu a̱ wruk bu rawoni a̱shyim a bu a̱shong a̱lkeba̱ nu. Bilatut a̱ hywa da̱ mba, “Di na̱nu ni.”

6Ba̱cecet ba̱gado Ka̱za ba bu ba̱dogari ba ba bu ku ryi a̱ krok nkun a̱ hywa, “Ba ku ka̱teyang! Ba ku ka̱teyang!”

Bilatut a̱ hywa da̱ mba, “Se yi ku ka̱teyang mbvak nyin, nzuk n dyi kyang a n nin ku yya shirya ni ba.”

7Ba̱nyet Yahuda na i hywa, “Zi byyi truwang ji hywa di dolet na̱ kwu ni, rot a̱ ya yei Ka̱won Ka̱za.”

8Ka̱ram ka Bilatut a̱ bun hok a̱mi ni, ka̱wun a̱ ku pyyem ba̱gingang. 9Na̱ bo brek a̱ nwa ka̱ryi ka a̱ si zzim Yesu a̱ hywa, “A nyyai ke?” Yesu a̱ swat ba̱ nyong.

10Bilatut a̱ hywa da̱ nu, “A rak ryat a ba̱ nzuk o? A bvwo n byyi cet na̱ kaai n wwon ko n tyyi ba na̱ ka̱teyang e?”

11Yesu a̱ hywa da̱ nu, “Cet na a byyi tazwa nzuk ka ni Ka̱za a̱mi a̱ na̱ ryi. Rot a̱mi a̱yin nu a̱ na̱ ryi da̱ nzuk ni, a̱ka̱tukyya nu nu a̱ ra̱u a̱nwaan nu.”

12Ka̱ram ka Bilatut na̱n hok a̱mi ni a̱ cat ryen na na̱ nin kaai Yesu a̱ wwon ni. Ma ba̱nyet Yahuda na krok nkun i hywa da̱ nu, “Ka ku kaai wwon, to a bu yet a̱rywai A̱gwam Rom ba. A̱yin nu a̱ ya yei a̱gwam ni a̱ yet a̱ra̱ndwan A̱gwam Rom.”

13Bilatut na̱ bu hok a̱mi, a̱ wruk bu Yesu a̱ ba mi a̱ta̱sa, a̱ brek a̱ si swrang a a̱ntwam shirya nu a̱ shyi “Ka̱rek ka ba nok di Kpang ni” ba yin ka̱ yei zi diryem ba̱nyet Yahuda ti Gabbata. 14Ka̱ram iya nom ku bai a̱katyyi, ya Swrap wwon nu na̱ bvat nom yring. Bilatut a̱ hywa di ba̱nyet Yahuda na, “Yi dii a̱gwam nyin na̱nu ni.”

15Ba krok nkun a̱ hywa, “Ba ku hywat! Ba ku hywat! Ba ku ka̱teyang!”

Bilatut a̱ hywa da̱ mba, “Yi cat n ka̱teyang a̱gwam nyin nu o?”

Ba̱cecet ba̱gado Ka̱za ba a̱ hywa, “A̱gwam Rom ba̱diyin a̱mi a̱ yet A̱gwam njit u.”

16Wwon Bilatut a̱ ba̱ ryi Yesu ba nat a̱ si ku ka̱teyang.

Ba kpang Yesu tazwa ka̱teyang

(Matta 27:32-44; Markut 15:21-32; Luka 23:26-43)

Ba ku pyyem a̱ nat ba̱ nu. 17Na̱ wruk a̱ ccok ka̱teyang na; ba si tat ka̱rek ka ba yin yei “Ka̱bvwa Nkup A̱ccu,” zi diryem ba̱nyet Yahuda ti ba yei “Golgota.” 18Ka̱ yemi ba si ku teyang tazwa ka̱teyang ka a̱nta̱mak bu ba̱nyet ba̱yaan ba̱ mba ba̱hwa, bu Yesu a̱katyyi ka. 19Bilatut a̱ jem kyang a̱ sak tazwa ka̱teyang ka a̱ hywa, “Yesu a̱ntyok Nazarat, A̱gwam ba̱nyet Yahuda.” 20Ba̱nyet Yahuda ba̱gingang a̱ twang, rot ka̱bvwa ka ba yin ka̱teyang Yesu ni a̱ yin shyi ba̱shishrek bu ka̱nkrang ka. Ba jem a nwap Yahudanci bu Romanci bu Helenanci. 21Ba̱cecet ba̱gado Ka̱za ba̱nyet Yahuda ba a̱ hywa di Bilatut, “Ryok jem ‘A̱gwam ba̱nyet Yahuda’ ba, se ba jem ‘A̱ ya yei A̱gwam ba̱nyet Yahuda’!”

22Bilatut a̱ hywa, “Kyang a n ka̱n jem ni ba bo ni kpo shei ba.”

23Nsoja na na bu ka̱teyang Yesu, a̱ ka ba̱tro nu ba a̱tswa a̱naai, kozan soja bu a̱tswa nkpa. Ba bo sook a̱tro nu nu a̱ yin wi byyi ka̱rek seyak ni, rot ba yin ku tywei ba̱ a̱kumbvuyring. 24Nsoja na i hywa, “Zi ryok ku seyak ba, zin ta gyai i ryi a̱yin nu a̱ ni ya ni.” Ku ba ba̱cicrak bu ba̱ryat Ka̱za ba a̱ yin hywa,

“Ba ya ka ba̱tro nzuk ba,

a̱ si bo ta gyai tazwa a̱tro nzuk ka.”

A̱mi nsoja na ba ma̱n yya.

25A̱na Yesu nu, ba̱ a̱wumba a̱na Yesu nu, bu Maryamu a̱mbyring Kilobat u, bu Maryamu Magadaliya a̱ yin shyi i sseng mbeyang ka̱teyang Yesu ka. 26Yesu a̱ ryi a̱na nu nu bu ka̱won pfong ka̱yring nu ka na̱ yin cat i, a̱ hywa da̱ a̱na nu nu, “Nna, dii ka̱won nwan a̱ yemi.”

27A̱ bo hywa da̱ a̱pfong u, “Dii a̱na nwan a̱ yemi.” Nyyai ka̱tuk iya a̱pfong Yesu nu a̱ nat ba̱ a̱na Yesu nu na̱ si swrang a̱gbang nu.

Yesu a̱ kwu

(Matta 27:45-56; Markut 15:33-41; Luka 23:44-49)

28Yesu a̱ bu ryi nnani kozan kyang a̱ tyak, na̱ hywa, “N pfong na̱shyi,” ku gi ba ba̱cicrak bu ba̱ryat Ka̱za ba.

29To, ka̱nshyeng ka̱yaan ka swat ka̱ yemi ban tyyi a̱sisat ba̱shekwot, ba sook a̱soso a̱ tyyi a a̱sisat ba̱shekwot u a̱ som an shan hisop a̱ yrek a̱ ku sak i ka̱nu. 30Ka̱ram ka Yesu na̱n sswa ni a̱ hywa, “A̱ngbom!”

Wwon a̱ tuk diccu nu ti a̱ kwu.

Ba tuk Yesu a̱ryam a̱ ta̱kyak

31Ba̱nyet Yahuda na i naai Bilatut na̱ wwon ba nat a̱ si kprem a̱tak ba̱nyet a ba hywaai ni a̱ ba̱ kyrek tazwa ba̱ka̱teyang ka, rot nom iya yin yet nom jyi nkyang, di ba yin cat nkom mba na i tat ka̱tuk A̱sa̱ba̱t ka ba, rot a̱gba̱dang nom a̱ yemi da̱ mba. 32Rot a̱mi nsoja na i nyyai bu kprem a̱tak a̱ntyok ka̱tsitsrang a ba̱ a̱ntyok a̱mba̱hwa nu ba yin ka̱teyang bu Yesu ni. 33Ma ba bu tat di Yesu a̱ shya na̱ ka̱n kwu, ba kprem a̱tak nu na ba. 34Ma soja yring i tyyi dikpan nkpa ti n ku tuk a̱mbeyang a̱rywam; bu ka̱baram ba̱sok bu ba̱shekwot a̱ wruk. 35A̱tuba nu a̱ yin dyi ni a̱ yet shaida, yi gi ma̱n wrak ka̱ryong. Shaida nu ji i bu yet ka̱ryong, na̱ bo bvwo kyang a na̱ tyyei ni yet ka̱ryong. 36Ba yya nkyang ani, ba̱ryat Ka̱za ba a̱ ga sseng ka̱ryong, da̱ni di ba̱ yin hywa ni, “Ko kup yring nu ba ni bvut ba.” 37Ka̱rek ka̱yaan i ba̱ryat Ka̱za ba ba hywa, “Ba ni cyang a̱yin nu ba ka̱n tuk ni.”

Ba nyat Yesu

(Matta 27:57-61; Markut 15:42-47; Luka 23:50-56)

38Ba bu tyak, Yusufu, a̱ntyok Arimatiya, nu ma a̱ ma̱ yin yet ka̱won pfong Yesu ma ntsang rot a̱ yin pfong ka̱wun ba̱nyet Yahuda ka, a̱ nat a̱ si naai Bilatut na̱ ku wwon kom Yesu na na̱ sook. Bilatut a̱ ku shim mi, na̱ sook. 39Nikodimu, a̱tuba nu a̱ yin tason a nat di Yesu a̱ta̱tuk ka ni, a̱ nat bu Yusufu a̱ breng turare mur bu alot ba ba̱ mon, swat ryet mba na yet mudu cyi. 40Ba bu sook Yesu a̱ ku grang da a̱jijyat a̱tro a̱n tyyi nkyang ka̱sham nswam iya, a̱mi ba̱nyet Yahuda na ba ri njyi kom a a̱ sin nyat. 41A̱la̱mbu a̱ yin shyi ka̱rek ka ba yin hywat Yesu ni, ryak n shyi ka̱ yemi, nying na ba ka̱n nyat a̱yin ni ba. 42Ba ku nyat ka̱ yemi, rot ryak a shyi ba̱shishrek bu ka̱bvwa ka, ka̱ntson tat ka a̱ bo yin yet A̱sa̱ba̱t, wato nom pfwi ba̱nyet Yahuda na.

Currently Selected:

Yohana 19: kaj

Highlight

Copy