Yohana 18

Ba pyyem Yesu

(Matta 26:47-56; Markut 14:43-50; Luka 22:47-53)

1Yesu na̱ bu tyak a̱duwa nu, a̱ drok bu na̱won pfong nu na ba byyek kibincen ka ban yei Kidurun u ni, ba si nwa a la̱mbu a̱yaan. 2Yahuda nu a̱ ni ku ryap i a̱ ma̱ yin bvwo ka̱rek iya, rot Yesu a̱ yin gwai cong ka̱ yemi bu na̱won pfong nu na. 3Yahuda a̱ si bvwa a̱tswa nsoja a̱ bo shya ba̱dogari bat Ka̱za ba ba̱cecet ba̱gado Ka̱za ba bu ba̱nyet Farisa na ba tom ni. Ba breng nkyang nzwang bu fitila bu a̱wuwuk, a̱ nyyai a̱ ba ka̱bvwa ka Yesu bu na̱won pfong nu na ba yin shyi ni. 4Rot Yesu a̱ bvwo sa̱rei kyang a ku bai ni, a̱ wruk a̱zanson ka a̱ hywa da̱ mba, “A̱nyan a̱mi yi cat?”

5Ba hywa, “Yesu a̱ntyok Nazarat.”

Yesu a̱ hywa da̱ mba, “Nzuk nu ni.”

Yahuda nu a̱ ku ryap ni na̱ sseng ba̱ mba. 6Yesu na̱ bu hywa da̱ mba, “Nzuk nu ni,” ba bvwot riryim a̱ si kwei ka̱byen. 7Na̱ bo ba̱ zzim brak a̱ hywa, “A̱nyan a̱mi yi cat?”

Ba hywa, “Yesu a̱ntyok Nazarat.”

8Na̱ hywa, “N wa ka̱ ya tyyei nzuk nu ni. Ka̱ nzuk a̱mi yi cat, yi ryok ba̱nyet bani a̱ nat.” 9(Ku gi ba ba̱cicrak bu kyang a na̱ ka̱n hywa ni, “Ka̱yat ba̱nyet ka a n dyi ni ko a̱tuba a̱yring a̱ brik ba.”)

10Siman Bitut na̱ shyi bu ka̱krong a̱kpat, na̱ kwwat a̱n tyyak a̱kwwa a̱gba̱dang gado Ka̱za a̱yring a̱ tyyak pfwo bvak yak a a̱ tyet. Ba yin yei a̱kwwa a̱ywu Malkut. 11Yesu a̱ hywa di Bitut, “Brek di ka̱krong nwan ka tyyi i baai a. A hwa ka̱bvung ka A̱tyyi na̱ sak n ni sswa ni ka ni n seyak o?”

Ba nat bu Yesu a̱ta̱ssi Hanana

12Nsoja na ba̱ a̱gba̱dang mba nu bu ba̱dogari ba̱nyet Yahuda ba a̱ pyyem Yesu a̱ ku rop. 13A̱ ye nat ba̱ nu di Hanana rot a̱ yin yet a̱kwo Kayafat, kuma Kayafat a̱mi a̱ yin yet a̱gba̱dang gado Ka̱za nu i dirya iya. 14Kayafat a̱mi a̱ ka̱n zzek ba̱cecet ba̱nyet Yahuda ba a̱ hywa, ku myim a̱tuba a̱yring a̱ kwu, kpikpit ba̱nyet a i gi kaat.

Bitut a̱ ton bvwo Yesu

(Matta 26:69-70; Markut 14:66-68; Luka 22:55-57)

15Siman Bitut bu ka̱won pfong Yesu ka̱yaan a̱ tssup Yesu. A̱gba̱dang Gado Ka̱za nu a̱ yin bvwo a̱pfong Yesu a̱yring u ba̱zizrak; rot a̱mi ba ku wwon na̱ nwa bu Yesu a̱ nat a̱katyyi a̱ta̱sa ka a̱gbang A̱gba̱dang Gado Ka̱za ka. 16Bitut a̱ sseng ka̱nu ka̱ryi ka. A̱pfong a̱yring u A̱gba̱dang Gado Ka̱za nu na̱ bvwo ba̱zizrak i a̱ brek a̱ nat ka̱nu ka̱ryi ka a̱ si naai ka̱neyang ka a̱ sseng ka̱nu ka̱ryi ka ni ka wwon Bitut na̱ nwa. 17Ka̱neyang ka a̱ sseng ka̱nu ka̱ryi ka ni a̱ zzim Bitut a̱ hywa, “A shyi bu ba̱pfong a̱ntyok iya baa?”

Bitut a̱ ton a̱ hywa, “Kaai, n shyi ka̱yat mba ba.”

18Ka̱bvwa ka a̱ yin shrim; rot a̱mi ba̱kwwa ba bu ba̱dogari ba a̱ kai rong dican, a̱n sseng a̱ krang rong a a̱ wei, Bitut a̱ nat a̱ si sseng ba̱ mba a̱ wei rong a.

A̱gba̱dang gado Ka̱za a̱ zzim Yesu

(Matta 26:59-66; Markut 14:55-64; Luka 22:66-71)

19A̱gba̱dang Gado Ka̱za nu a̱ zzim Yesu tazwa ka̱won pfong nu ka bu nkyang a na̱ zzek i. 20Yesu a̱ hywa, “Kozan ka̱ram n na ryat bu koyan a̱za̱kpai. Sa̱rei nkyang a n na yya ka̱yat a̱bat a̱duwa bu bat Ka̱za na ni, ka̱bvwa ka ba̱nyet Yahuda na ba nan tung ni, kyang nshyi n yya ntsang ba. 21A̱nzan a̱n byyi a ni n zzim? Zzim ba̱nyet ba a̱ na n pfong ni. Ba̱ zzim kyang a n na ryat i; ba bvwo.”

22Ka̱ram ka Yesu na̱n hywa a̱mi ni, a̱dogari a̱yring a ku wwon di bvak, a̱ hywa, “A maai i ryat A̱gba̱dang Gado Ka̱za nu ryihywat ba!”

23Yesu a̱ hywa da̱ nu, “Ki kyang n shyi n yya n byyan, a tyyei sa̱rei ba̱nyet ba a̱ shyi kyi ni. Ki n ma̱n yya kyang byyan ba, ho a̱nzan a ni n zzu?”

24Hanana a̱ seyak ba̱ nu bu rop a a̱ tom Kayafat, A̱gba̱dang Gado Ka̱za nu mi.

Bitut a̱ bo ton bvwo Yesu

(Matta 26:71-75; Markut 14:69-72; Luka 22:58-62)

25Bitut na̱ sseng ka̱bvwa wei rong ka. Kpikpit ba̱nyet a sseng ka̱bvwa ka ni i ku zzim, “Anye a wi ma̱n yet ka̱won pfong a̱yin a̱ni e?”

Bitut a̱ ton a̱ hywa, “Kaai, n shyi ba̱ nu ba.”

26A̱kwwa A̱gba̱dang Gado Ka̱za a̱yring, a̱ yin yet a̱wumba a̱tuba nu Bitut na̱ tyyak pfwo nu na ni, a̱ hywa, “N bu na̱ ryi a la̱mbu nu ba̱ nu baa?”

27Bitut a̱ hywa, “Kaai.” Bu ka̱ram iya a̱ngbak u a̱ tyyak.

Ba nat bu Yesu di Bilatut

(Matta 27:1-2, 11-14; Markut 15:1-5; Luka 23:1-5)

28A̱shong a̱ntson ba drok bu Yesu gbang Kayafat ka a̱ nat i ka̱ryi gwa̱mna ka. Ba̱nyet Yahuda na a̱ si sseng a̱ta̱sa, rot ba yin tyong ba bu ya tyyi dishishik a̱ wai ya kyangya Swrap wwon na. 29Rot a̱mi Bilatut a̱ wruk a̱ ba da̱ mba a̱ta̱sa ka a̱ bu ba̱ zzim, “I hywak a̱nzan yin pyyem a̱yin a̱ni?”

30Ba hywa, “A̱ si bu yya kyang ba, se njit ba ba ba̱ nu da̱ nwan ba.”

31Bilatut a̱ hywa, “Nde yi nat ba̱ nu si ku yya shirya ji, da̱ni di truwang nyin ji zi ya tyyei ni.”

Ba hywa, “Ba za ryi cet zi hywat a̱yin ba.” 32(Nkpa ba ba̱cicrak bu kyang a Yesu na̱ ka̱n hywa i taka̱i dikwu na na̱ ni kwu ni ba ga yet ka̱ryong.)

33Bilatut a̱ bo brek a̱ nwa ka̱ryi ka a̱ yei Yesu a̱ hywa, “Nwan yet a̱gwam ba̱nyet Yahuda nu o?”

34Yesu a̱ hywa, “Nwan a̱mi zzim o? Ki ba̱yanyet a̱ ka̱ na̱ tyyei kyang tazwa nzuk?”

35Bilatut a̱ hywa, “A hwa di n yet a̱ntyok ba̱nyet Yahuda a? Ba̱nyet nwan a̱mi bu ba̱cecet ba̱gado Ka̱za mba a̱ n dyi da̱ nwan. A̱nzan a̱mi a yya?”

36Yesu a̱ hywa, “Dityok nzuk ti shyi i ka̱sa ka ni ba. Dityok nzuk ti ti da n shyi i ka̱sa ka ni, se ba̱nyet ba a̱ n tssup ni a̱ kwan a̱ n san a mbvak ba̱nyet Yahuda na. Dityok nzuk ti shyi kyi ba.”

37Bilatut a̱ bo ku zzim, “Ma a wi yet a̱gwam o?”

Yesu a̱ hywa, “Ee, a wi hywa, n yet a̱gwam. Hywak n byin bu ba ka̱sa nzuk a yet n bu tyyei ba̱ryat ka̱ryong ba. A̱yin nu a̱ tssup ka̱ryong ka ni a̱ ni n pfong.”

38Bilatut a̱ ku zzim, “A̱nzan a̱ yet ka̱ryong ka?”

Ba yya Yesu shirya dikwu

(Matta 27:15-31; Markut 15:6-20; Luka 23:13-25)

Bilatut a̱ bo brek a̱ nat di ba̱nyet Yahuda na a̱ta̱sa ka a̱ si hywa, “N ku shya bu kyang a n nin ku yya shirya ni ba. 39Ma an tada nyin ji kozan ka̱ram Swrap wwon n na tun a̱tuba a̱yring a jaru n wwon. Yi cat n kaai a̱gwam ba̱nyet Yahuda nu n wwon o?”

40Ba krok nkun a̱ hywa, “Kaai, wwon Barabbat!” (Barabbat a̱ yin yet a̱ntyok a̱tsaai.)

Currently Selected:

Yohana 18: kaj

Highlight

Copy