Yohana 17

Yesu a̱ ya naai i

1Yesu na̱ bu tyak ryat a a̱mi, a̱ yrek a̱ssi nu na tazwa a̱ hywa, “A̱tyyi, ka̱ram ka a̱ yya. Tyyei shii Ka̱won nwan na, Ka̱won ka a̱ ga ma̱n tyyei shii nwan na. 2A ku ryi cet ba̱nyet ka̱sa na sa̱rei, na̱ ga wrak sa̱rei ba̱nyet ba a ku ryi ni sucet wityak. 3Shya sucet wityak a nkpa yet ba̱nyet a̱ na̱ bvwo nwan ba̱diyin yet Ka̱za ka̱ryong bu Yesu Kristi nu a tom ni. 4N ka̱n tyyei shii nwan na i ka̱sa ka, n tyak pfong a a n tyyi yya na ni. 5A̱tyyi, n na̱ naai a tyyei shii nzuk a a̱ta̱ssi nwan ka nnani, shii a n yin byyi ba̱ nwan nyyai ba ka̱n yya ka̱sa ka ba.

Yesu a̱ naai na̱won pfong nu mi

6“Ba̱nyet ba a n dyi i ka̱sa ka ni n ka̱ ba̱ tyyei da̱ nwan. Ba yet ba̱nwaan, ma a n dyi da̱ mba. Ba tssup ba̱ryat nwan ba, 7a̱ bo bvwo kozan kyang a n dyi ku nyyai da̱ nwan. 8N ba̱ tyyei pfong nwan na a n tom ni ba kpo san; ba bo bvwo ku yet ka̱ryong n nyyai da̱ nwan, a̱ bo shim nwan n tom.

9“Ba̱nyet ba a n dyi ni, mba n ba̱ naai i rot ba yet ba̱ nwaan, ba ba̱nyet ka̱sa ba n ba̱ naai i ba. 10Kyang a yet nzuuk ni ku yet nwaan; kyang a yet nwaan ni ku yet nzuuk. Ka̱yat mba a̱mi n nin shya shii. 11Naanini n bai da̱ nwan. N bo shyi i ka̱sa ka ba, ma mba ba ri shyi i ka̱sa ka. A̱zizrak A̱tyyi, ba̱ cam ka̱yat cet diyrek nwan, diyrek ti a n dyi ni, ba ga yet kyang yring da̱ni da̱ nzuk ba̱ nwan zin yet a̱yring ni. 12Ka̱ram ka n ni shyi ba mba ni n ba̱ cam ka̱yat cet diyrek nwan, diyrek ti a n dyi ni. N ba̱ hwwun ko a̱neyring mba a̱ brik ba, se ba̱ a̱tuba a̱yring u ku ku yet dolet na̱ brik i, ba̱ryat Ka̱za ba a̱ ga yet ka̱ryong. 13Ba̱nyying n bai da̱ nwan, n dyat nkyang ani ka̱yat ka̱sa ka, ba̱gwai nzuk ba a̱ ga hywaai ndya mba na. 14N ba̱ tyyei ba̱ryat nwan ba, ka̱sa ka ka ba̱ rak rot ba yet ba̱nying ka̱sa ba, da̱ni di n nin wi yet a̱nying ka̱sa nu ni. 15N hywa di a ba̱ tun wruk i i ka̱sa ka ba, ma a ba̱ hwwun A̱ka̱tuk A̱yin nu. 16Ka̱sak ka n ni wi yet a̱nying ka̱sa nu ni, a̱mi mba ba ma̱n wi yet ba̱nying ka̱sa ba. 17Ba̱ jrang di ka̱ryong nwan ka, ba ga na̱ ryi a̱ccu mba; ba̱ryat nwan ba a̱ yet ka̱ryong. 18N ba̱ tom ka̱yat ka̱sa ka ka̱sak ka nwan a ni n tom ka̱yat ka̱sa ka ni. 19I hywak mba a̱mi n ni wrak diccu nzuk ti, mba meyang ba ga ma̱n wrak a̱ccu mba di ka̱ryong.

Yesu a̱ naai ba̱nyet tssup i

20“Bu ba̱nyet bani n ba̱ naai i ba, ma nta̱mak bu sa̱rei ba̱nyet ba a̱ n dyi ndya mba na a nkyang a ba̱nyet bani ba ryat i. 21N na̱ naai sa̱rei mba ba ga mon a̱ccu. A̱tyyi! Ki a shim, ba shyi ka̱yat njit, ka̱sak ka an shyi ka̱yat nzuk i n bo ma̱n shyi ka̱yat nwan. N cat ba mon a̱ccu, ka̱sa ka a̱ ga shim nwan n tom. 22N ba̱ ryi shii a a n dyi ni, ba ga mon a̱ccu mba na da̱ nzuk ba̱ nwan zin mon ni; 23nzuk ba̱ mba, nwan ba̱ nzuk, ba ga mon a̱ccu mba na sa̱rei, ka̱sa ka a̱ ga bvwo nwan a̱mi n tom, i bu ba̱ cat ka̱sak ka a ni n cat ni.

24“A̱tyyi, a ka̱ n dyi da̱ mba, n cat ka̱bvwa ka n nin shyi ni ba shyi ba̱ nzuk, ba ga ryi shii nzuk a a n dyi ni, rot a n cat nyyai ba ka̱n yya ka̱sa ka ba. 25A̱zizrak A̱tyyi, ba̱nyet ka̱sa ba a̱ na̱ bvwo ba, nzuk n na̱ bvwo, ba̱nyet bani a̱ bo bvwo nwan n tom. 26N ka̱n ba̱ tyyei da̱ nwan an bo ni ya ka̱son bu ba̱ tyyei a, cat a a n cat ni i gi yet mbaa, a̱mi brak n bo n shyi ba̱ mba.”

Currently Selected:

Yohana 17: kaj

Highlight

Copy